Karumela Okwela wa Yehova

1. Oviperhekele nni wa Yehova? (Koona vina foto.)

WEYO onowubuwela mudhidhi oviperhekeliwe wa Yehova? Ohikosa yosakula eji sabwani onomuziwa pama vina onomukwela. Ohimpikirhela Yehova wi ogahika vamburoni voroma efunelo yaye mwigumini mwawo vina ogahimukwela na murima wawo wotene, omuttu wawo wotene, na yubuwelo yawo yotene vina na guru dhawo dhotene. (Mk. 12:30) Mpaka ovano okwela wawo onodhowavi okalaga woliba. Kito ogakulile dhavi muttu kowuvuza, “Weyo txibarene onomukwela Yehova?” Mohaganyedha ogahakula, “Miyo ddinomukwela Yehova opitta elobo-elobovi obe opitta muttu-muttuvi!”

2-3. (a) Yehova onfuna wi nikuluvele eni? (b) Txini enoonihu mu nsunzoni ntti? (Jeremiya 31:3)

² Mbwenyi, ogakulile dhavi muttu kowuvuza, “Okana ebaribari wi Yehova onowukwela?” Koddi weyo ogawubuwela dila bili wila wakule, txino wubuwelaga wi kunfwanyelela okwela wa Yehova? Murogora dhahi wahatonyihedhiwa okwela agali mwana ohiloga dhahi: “Ddinoziwa wi ddinomukwela Yehova vina ddikana ebaribari ya ejoya. Mbwenyi dila dhinjidhene ddinovivuzaga, Koddi Yehova onoddikwela-wene?” Kito onaziwe dhavi enubuwela Yehova mwaha wa weyo?

³ Yehova onfuna wi okane ebaribari wila iyene onowukwela. (Kengesa Jeremiya 31:3.) Ebaribariya jawi mwinyene Yehova ddukukuseli wa iyene. Muperhekeliwe egumi yawo vina vabatiziwiwe, ohakela mvaho wa ttima vaddiddi—okwela woweddeyana wa Yehova. Ejo entapulela wi iyene onowukwela venjene vina txipo kanawunyanyale. Ku okwela-wene oku onimukosiha Yehova wawona alabeli aye—vamodha na weyo ninga nlogo naye. (Mal. 3:17) Yehova onfuna wi oviwemo ninga murumiwi Paulo, iyene wahikana ebaribari wi Yehova wanimukwela. Nona wahileba: “Miyo ddinokuluvela wi kavali elo enawodhe onimwalaniha na okwela wa Mulugu, nne okwa, nne egumi, nne anju, nne aguvernu, nne dhilobo dhovano, nne dhilobo dhamusogorho, nne owodha, nne dhodhulu, nne dhavati, nne dhottanddiwa dhina, txibarene kuli elo enawodhe onimwalaniha na okwela wa Mulugu.” (Rom. 8:​38, 39) Mu nsunzoni ntti, ninele wona sabwaya jani enfwanyelelihu wunuwiha okuluvela wehu wi Yehova ononikwela vina txini enanikamihedhe okosa ejuwene.

NINFWANYELELA NNI OKULUVELA WI YEHOVA ONONIKWELA?

4. Ninawodhe dhavi owanana murega wa Satana?

⁴ Nigarumela wi Yehova ononikwela, ninele okala ‘olibene vina orabela mirega’ dha Satana. (Ef. 6:11) Satana onfuna wi nitxime omwebedha Yehova, iyene onokosa muli mwetemwene wi ahakwanihedhe efunelo yaye. Marhe anlabihedhiye ja onikosiya wubuwela wila Yehova kannikwela. Mbwenyi oku ottambi. (Gan. 24:10) Bibilia onomuladdaniha Satana ninga poddogoma. (1 Pe. 5:​8, 9) Poddogoma onoziveliwa olupela enama ji enama ehina guru vina ehinwodha ovibarela. Na mukalelo wakakene Satana masaka mena ononilupela mudhidni onkalihu wolemene obe wokubanyene sabwa ya dhilobo dhabure dhinipadduweli wale, nigapattiwa makattamiho ovanene vina nigovaga dhinanipadduwele musogorho. Satana onfuna wi anittiye wolemene mpaka iyo ottiya omulabela Yehova. Mbwenyi enowodheya, ‘omukodda Ddiabo’ na mirega dhaye, modhela okosa mpaka vanwodhelihu wi nikane ebaribari wila Yehova ononikwela.—Tia. 4:7.

5. Ninfwanyelela nni okuluvela wi ninokweliwa vina nili a ttima vamentoni va Yehova?

⁵ Nigakana ebaribari wi Yehova ononikwela ninele okala wofiyedheya na iyene. Ninlogela nni ejoya? Yehova onittandda na efunelo ya okwela vina ya ofuna okweliwa. Nigatonyihedhiwaga okwela ejo enonittukulela iyo vina omukwela muttuya. Nona nigoona wi ninokweliwa vina ninovahiwa ttima na Yehova, iyo vina ninele ofuna omukwela iyene. (1 Jo. 4:19) Iyo nigamukwelaga, iyene vina onele onikwela venjene. Bibilia kampipirhiha agalogaga mwaha wa ejuwene: “Mmususele Mulugu, iyene vina onele oususelani.” (Tia. 4:8) Mbwenyi ninonuwihe dhavi okuluvela wehu wi Yehova ononikwela?

TXINI ENANIKAMIHEDHE ORUMELA OKWELA WA YEHOVA?

6. Wi nirumele okwela wa Yehova, txini enfwanyelihu okumbirha munlobeloni?

⁶ Kadhowavi omulobelelaga Yehova wi awukamihedhe ononelamo wi iyene onowukwela. (Lk. 18:1; Rom. 12:12) Kamukumbirhe Yehova wi awukamihedhe oviwona ninga enuwona iyene, kakosa ejuwene dila dhinjene valaboni egakala yofuneya. Ebaribari wi masaka mena enorutxa orumela wila Yehova onowukwela. Mbwenyi kudduwale wi Yehova munddimuwa opitta murima wawo. (1 Jo. 3:​19, 20) Iyene onowuziwa pama opitta weyo wamwinya vina onowona elobo mwa weyo ehinwodhiwe wona wamwinya. (1 Sa. 16:7; 2 Ma. 6:30) Nona kuttiye omutapulela segedho dhawo Yehova, omukumbirhe iyene wi okamihedhe orumela okwela waye. (Ms. 62:8) Ogamala olobela japama ofwara ttarho dhing’onovi dhamakamaka. Ndoweni none ttarho esi.

7-8. Nivuru na Masalmo ninnikuluveliha dhavi wi Yehova ononikwela?

⁷ Okuluvele enloga Yehova. Yehova ohavudhelela anamaleba Bibilia oleba eliye. Mwene Davidi ohileba wi Yehova ononizuzumela vaddiddi. Iyene ohileba dhahi. “Nabuya [Yehova onowawaddamela] ansuveya murima; onowalibiha anojeya.” (Ms. 34:​19, [Ms. 34:18 NM]) Ogakala wokubanyene vaddiddi weyo onodhaga wubuwela wi kawo muttu onnonelamo enupadduwela. Mbwenyi Yehova onopikirhela wi oli vakuvi na weyo, sabwani mudhidhi ninga obo onofuna nikamihedho naye opitta wale. Mmasalmuni mwina, Davidi ohileba: “Nyuwo [muddoddela] mintori dhaga, mukoya mmukàtheni mwenyu.” (Ms. 56:​9, [Ms. 56:8 NM]) Yehova onowona ogatabuwaga vina ogakubanyaga. Ottiya ejo onowuzuzumela venjene vina iyene onowiwa opa oniwa weyo. Dhahene ninga nttotto na manje nili namakamaka mwa muttu onkosa oleddo mwiddeddereni, mintori dhehu samakamaka mwa Yehova. Masalmo 139:​3, onologa: Nyuwo Yehova munoziwa ttarho dhaga dhotene. Yehova onoziwa dhotene dhinkosiwe, mbwenyi iyene onofwaseyela wona dhilobo dhapama dhinkosiwe. (Ahe. 6:10) Sabwaya? Sabwani iyene onovaha ttima dhilobo dhotene dhinkosiwe wi omwagalalihe.a

⁸ Modhela malebo aba opangarhaza a mBibiliani, enkala ninga Yehova onloga dhahi: “Miyo ddinfuna wi oziwe wila ddinowukwela venjene vina ddinowuzuzumela.” Mbwenyi ninga moonelihu mundduni, Satana ononikwekwettela wubuwela mottiyana. Nona akala onowaganyedha wi Yehova onowukwela katxima vina wubuwele. ‘Ddinamurumele ani—“babi wozivala” obe Mulugu webaribari?’—Jo. 8:44; Ms. 31:​6, [Ms. 31:5 NM].

9. Nipikirhelo gani ninavaha Yehova otene animukwela? (Obudduwa 20:​5, 6)

⁹ Katanalela mukalelo oniviwamo Yehova mwa abale animukwela. Kobuwela yawaddelile Yehova ana Izrayel vina Mizé. (Kengesa Obudduwa 20:​5, 6.) Yehova onopikirhela watonyihedha okwela woweddeyana abale animukwela. Mazu aba anonikuluveliha wi Yehova onele wakwela abale animukwela. (Ne. 1:5) Nona ogaroma waganyedha akala Yehova onowukwela, katxima vina ovivuze, ‘Miyo ddinomukwela Yehova?’ Katanalela eji: Akala weyo onomukwela Yehova vina onokosa muli-mwetemwene wi omwagalalihe, iyene vina onowukuluveliha wi onowukwela venjene. (Da. 9:4; 1 Ko. 8:3) Akala kunaganyedha wi onomukwela Yehova, kito onaganyedhelani wi iyene onowukwela? Okuluvele wi iyene onele wukwelavi vina txipo kanawunyanyale.

10-11. Yehova onfuna wi woonege dhavi yobolo? (Galásia 2:20)

¹⁰ Katanalela yobolo. Yehova ohavaha attu mvaho wa ttima vaddiddi mudhidhi omurumiliye Mwanaye, Yezu Kristu wi adhe anikwele. (Jo. 3:16) Koddi Yehova omurumile Mwanaye wi adhe awuvune weyo? Pumwenemo! Kobuwela yotagiha ya murumiwi Paulo. Iyene wahikosa dhilobo dhinjidhene dhabure. Masiki mukaleliye Mukristu, iyene wanfwanyela odhowavi awanagana ohiligana waye. (Rom. 7:​24, 25; 1 Tm. 1:​12-14) Iyene woona yobolo ninga mvaho wa Yehova mwa iyene. (Kengesa Galásia 2:20.) Kobuwela wi ddi Yehova onvudhelele murumiwi Paulo oleba mazu aba vina dhetene dhilebiwe mBibiliani dhilebeliwe wila dhinisunzihe. (Rom. 15:4) Nona mazu a murumiwi Paulo anotonyihedha wi Yehova onfuna wi wonege yobolo ninga mvaho wa vawoka mwa weyo. Ogonaga yobolo na mukalelo obu, onowunuwiha okuluvela wawo wi Yehova onowukwela.

¹¹ Iyo ninomutamalela venjene Yehova sabwa ya omuruma Mwanaye Yezu odha velaboni ya vati wi anikwele. Elobo yina emuttukuleli Yezu odha velaboni ya vati yali ya ologa ebaribari mwaha wa ejile eli Mulugu. (Jo. 18:37) Ebaribari eji enotaganyiheya na okwela onddimuwa onna Yehova na anaye.

YEZU ONNIKAMIHEDHA DHAVI ORUMELA OKWELA WA YEHOVA?

12. Ninfwanyelela nni okuluvela elogile Yezu mwaha wa Yehova?

¹² Agali velaboni ya vati, Yezu wanziveliwa wawaddela attu ejile eli Yehova Mulugu. (Lk. 10:22) Iyo nihikana mwaha dhinji dhinnittukulela okuluvela ejile elogile Yezu mwaha wa Yehova. Mwebaribari kawo okalile mudhidhi mwinjene wirimu na Yehova ompitta Yezu. (Kol. 1:15) Mwinyene Yezu wannona okwela oku wa Yehova, iyene vina ohona mukalelo onakwela Yehova anaye ororomeleya. Kito Yezu onnikamihedha dhavi okana ebaribari wi Yehova ononikwela?

13. Yezu onfuna wi nimoonege dhavi Yehova?

¹³ Yezu ononikamihedha omoona Yehova dhahene ninga munimooneliye. Mmittakani, Yezu ohimukuwela Yehova ninga “Babi” okwaranya dila 160. Vina alogaga na anamafwara aye, Yezu wanimukuwela Yehova ninga “Babinyu” obe “Babinyu wa wirimu.” (Mt. 5:16; 6:26) Yezu ahinatti odha velaboni ya vati adhari ororomeleya a Yehova annimukuwela Mulugu ninga ‘Namawodha-wodha,’ ‘Namadhulu-dhulu,’ ‘Muttanddi Munddimuwa’ na mazina mena a nttittimiho. Mbwenyi Yezu wannimukuwela Yehova dila dhinjidhene ninga ‘Babi’ wehu. Mazu aba antonyihedha wi Yehova onfuna wi adhari aye akale ofiyedheya na iyene dhahene ninga mwana onkala wofiyedheya na babe wokweleya. Yezu wela onisunziha wi Yehova ononikwela ninga Babi wapama onakwela anaye. Ndowe nooneni dhotagiha bili dhintonyihedha wi Yezu wanlabihedha nzu ntti “Baba” amwaddagana Yehova.

14. Yezu otonyihedhile dhavi wi muttu-muttu wa iyo okana ttima vamentoni va Yehova? (Mateu 10:​29-31) (Koona vina foto.)

¹⁴ Koona elogile Yezu va Mateu 10:​29-31. (Kengesa.) Balame dhing’ono kadhinimukwela Yehova vina kadhinwodha omwebedha. Masiki dhawene Yehova onovaha ttima vina onoziwa egamottela vati. Katanalela mukalelo onavaha Yehova ttima vina onazuzumeliye adhari aye animulabela na okwela! Yezu wahiloga wi Babihu onoziwa muttengo wa nttitti onihuna mmusorhoni. Vowi Yehova onoziwa dhilobo dhing’ono mwaha wa iyo, ninokana ebaribari wi iyene ononizuzumela venjene. Kaninaganyedha, Yezu onfuna wi nirumele wila muttu-muttu wa iyo ddwa ttima vamentoni va Babihu oli wirimu.

15. Mazu a Yezu annisunziha eni mwaha wa Babihu wa wirimu? (Joau 6:44)

¹⁵ Koona yotagiha yanawili valabihedhile Yezu nzu ntti “Baba” va Joau 6:44. (Kengesa) Mwinyene Yehova na okwela vina noderetu ohukukusela mwibaribarini. Okoseli nni ejoya? Sabwani Babihu wa wirimu ohona wi ohikana murima wapama vina mikalelo dhapama. (Mer. 13:48) Yezu alogaga mazu anfwanyeya va Joau 6:44 txino iyene waddana mazu a Yehova anfwanyeya va Jeremiya 31:3. Iyene ohiloga dhahi na nlogo naye: Dduhukukusela wa miyo na okwela woweddeyana. (Jer. 31:3; kaladdaniha na Ozeya 11:4.) Katanalela entapulelani. Babi wehu wa wirimu onodhowavi onaga mikalelo dhawo dhapama, masiki akala weyo kunwodha woona.

16. (a) Yezu onnisunziha eni mwaha wa Yehova vina ninfwanyelela nni omukuluvela iyene? (b) Txini enawukamihedhe okuluvela wi Yehova Babi wa pama mwa weyo? (Koona vina kasha “Babi Oninfuna Iyo Notene.”)

¹⁶ Amulogaga Yehova ninga Babi wehu, yakala ninga Yezu waloga dhahi: “Yehova kahiyo Babi waga bahi; ddi Babi wawo vina. Miyo ddinokuluvela wi iyene onowukwela vina onowuzuzumela venjene.” Nona akala onowaganyedha wi Yehova onowukwela, katxima vang’onovi ovivuze, ‘Kigali yapama miyo okuluvela mazu a Yezu omuziwile deretu Babihu opitta muttu-muttuvi vina onloga ebaribari?’—1 Pe. 2:22.

ODHOWEGEVI WUNUWIHAGA NIKULUVELO NAWO

17. Ninfwanyelela nni odhowagavi nilibihaga okuluvela wehu wi Yehova ononikwela?

¹⁷ Iyo ninofwanyela okosa muli-mwetemwene wi nilibihe nikuluvelo nehu wila Yehova ononikwela. Ninga moonelihu mu nsunzoni ntti, Satana mwiddani wonyengetta vina onfuna wi iyo nittiye omwebedha Yehova, iyene onfuna anobanihe. Nona onokosa muli-mwetemwene wila aninyengette wi Yehova kannikwela. Kanigwela vamuragani vaye!—Job 27:5.

18. Onawodhe dhavi olibiha okuluvela wawo wi Yehova onowukwela?

¹⁸ Wi olibihe okuluvela wawo wila Yehova onowukwela, kadhowagavi omulobelelaga iyene wi okamihedhe oviwona ninga munuwonela iyene. Katanalela maversu a mBibiliani anlagiha okwela onddimuwa wa Yehova vina wi iyene onowazuzumela abale animukwela. Kobuwela wi muttu agamukwelaga Yehova enowodheya iyene vina okweliwa na Yehova. Kudduwale wi yobolo mvaho wa Yehova mwa muttu-muttu wa iyo. Kakuluvela ejile elogile Yezu wi Yehova ddi Babo wa wirimu. Kito akala muttu onowuvuza, “Weyo ohikana ebaribari wi Yehova onowukwela?” Onele wakula nomaguva: “Ndde, iyene onoddikwela! Miyo vina ddinokosa muli-mwetemwene wi ddimutonyihedhe omukwela waga!”