Okuluvele wi Yehova Onele Wukamihedha

1. Mizé olagihile dhavi omukuluvela Yehova mudhidhi wasogorheliye ana Izrayel vabudduwani mw’Ejipitu?

NIVURU na Ahebreu ninowaloga attu enji amuroromela Yehova. Mmodhaya ddi Mizé, iyene wahikana nroromelo notikiniha. (Ahe. 3:​2-5; 11:​23-25) Iyene ohilagiha nroromelo naye modhela wasogorhela ana Izrayel aburutxaga mw’Ejipitu. Iyene kattiyile omova Mwene w’o Ejipitu vina anyakoddo aye omutximiha. Amukuluvelaga Yehova, iyene ohasogorhela ana Izrayel mpaka Mwinje Wofila, musogorhomwa mpaka ofiya mwiddeddereni. (Ahe. 11:​27-29) Ana Izrayel enjene ahittiya okuluvela ewodhelo ena Yehova ya wakamihedha, mbwenyi Mizé wahidhowavi amukuluvelaga Mulugu. Iyene katxinuwile sabwa ya okosa ejuwene, vowi Yehova wahavaha ana Izrayel dhoja vina manje wi awodhe okalawo mwiddeddereni.a—Obu. 15:​22-25; Ms. 78:​23-25.

2. Sabwaya jani Mulugu anvuza Mizé: Guru dha mono waga kadhinwodha wira esuwene? (Olebeliwa 11:​21-23)

² Masiki Mizé vaniye nroromelo noliba, mvireli yaka modha vamalile Yehova wafurula ana Izrayel mu Ejipitu, Mizé wahiroma ovivuza akala Yehova agahavaha nama ninga mwalogiliye. Mizé kobuwela mukalelo ogawodhile Yehova wavaha nama attu matxikwi na matxikwi àli mwiddeddereni. Akulaga, Yehova wahinvuza Mizé: Guru dha mono waga kadhinwodha wira esuwene? (Kengesa Olebeliwa 11:​21-23.) Mazu aba na elogelo ya Ebrayiko antapulela mono wa Yehova. Ejo enaddiwana muya wokoddela wa Mulugu obe guru dhinlabihedha Yehova wi akose efunelo yaye. Mwadhawene, Yehova wela onvuza Mizé, ‘Txibarene weyo onubuwela wi miyo kaddinwodha wakwanihedha ejile elogilimi?’

3. Yotagiha ya Mizé vina ya ana Izrayel ennipatta dhavi?

³ Wahiromaga ovivuza akala Yehova onele ozuzumela dhojombeliwa dhawo dhomaningoni obe dha anamudhi awo? Akala wahiromaga ovivuza obe nne, ndowe nisekeserhe yotagiha ya Mizé vina ya ana Izrayel, akodda okuluvela ewodhelo ya Mulugu yowasapela. Vina ninele wona Malebo mang’onovi analibihe nikuluvelo nehu wi Yehova onele onikamihedha.

KASUNZA NA YOTAGIHA YA MIZÉ VINA YA ANA IZRAYEL

4. Txini yattukulele enjene waganyedha ewodhelo ya Yehova ya wasapela mpaddi womaningoni?

⁴ Katanalela makaniya. Nlogo na Izrayel vina “athu enjene a vilabo dhothiyana-thiyana” àli anawedda ahikala mwiddeddereni mudhidhi mwinjene vabudduwani mu Ejipitu adhowaga Elabo Yopikirheliwa. (Obu. 12:38; Oli. 8:15) Anawedda ahilemana oja maná, ana Izrayel ena ahivitaganyiha na awene vina bamusadduwela Mizé. (Ole. 11:​4-6) Nlogona nahiroma wunlela dhoja dhafwanyeya Wijipitu. Sabwa ya nlogo odidela ologa mazu aba na Mizé, iyene wobuwela wi wanfwanyelela otamela nama wila avahe otene, mbwenyi kaziwa mukalelo ogafwanyiliye.—Ole. 11:​13, 14.

5-6. Ninsunzavo eni na mukalelo wapattile dhologa dha anawedda ana Izrayel?

⁵ Anawedda katamalela dhotedhene dhavaha Yehova vina ana Izrayel ahiroma wubuwela na mukalelo wakakene. Ejo vina enodhaga opadduwa na iyo, attu annirugunuwela agahilagihege otamalela iyo ninodhaga oroma ohitamalela esile dhinnivaha Yehova. Ejo enodhaga opadduwa akala ninofwaseyela wubuwela esile dhanihuna obe nigasilila dhinna attu ena. Mbwenyi ninele wagalala nigasunza oziveliwana esile dhinihuna.

⁶ Ana Izrayel anfwanyelela wubuwela wi Mulugu wahakuluveliha wila awene kofiya elabo yadhowani agahijavo dhilobo dhinji dhomaningoni. Nipikirhelo ntti nigakwanihedheyile Mwilaboni Yopikirheliwa ottiya mudhidhi walani mwiddeddereni. Na mukalelo wakakene, ottiya iyo ozuzumela dhilobo dhihinwodhihu okana mwilaboni mpuno, enokala yapama otanalela dhilobo dhipikirhele Yehova onivaha mwilaboni eswa. Vina enowodheya otanalela malebo ananikamihedhe olibiha omukuluvela wehu Yehova.

7. Ninfwanyelela nni okuluvela wi Yehova onele onikamihedha mudhidhi wetene?

⁷ Vamwaddele Yehova Mizé mazu anfwanyihu va Olebeliwa 11:​23, Iyene txino wafuna wi Mizé atanalele dhilobo bili: (1) Ewodhelo yaye kingoma. (2) Iyene onowodha olabihedha ewodhelo yaye mburo-mburovi. Mulugu agahiwodha wavaha ana Izrayel nama yinjene masiki akalaga mwiddeddereni. “Na guru dha nlada naye, n’owodha wa mono waye” Mulugu ohilagiha wi agahiwodha okamihedha nlogo naye mburo-mburovi. (Ms. 136:​11, 12) Mwadhawene akala nili mmidhidhini dhorutxa, ninofwanyelela okuluvela wi Yehova onowodha omukamihedha muttu-muttu wa iyo ehitanalaga mburo olihu.—Ms. 138:​6, 7.

8. Ninawodhe dhavi orabela okosa yovonya yakakene yakosile enjene àli mwiddeddereni? (Koona vina foto.)

⁸ Yehova ohikosa ejile yapikirheliye vina ohivaha nlogo naye muttengo mwinjene wa kwali. Mbwenyi ana Izrayel kamutamalele Mulugu sabwa ya matikiniho aba. Ottiya otamalela, anfuna kwali dhinjidhene opitta esile dhafwanyelelani. Ahilaba mutana na mattiyu addoddelaga muttengo mwinjene wa kwali. Yehova wahisilidhiwa na abale alagiha efunelo yabure vina wahatxinutxa. (Ole. 11:​31-34) Ninowodha osunza elobo na nipadduwo ntti. Ninofwanyela okala txenjewa wi nihifunetxe dhilobo dhihinfwanyelihu. Kintanala akala nili areeli obe nayelegi, ninofwanyelela ozuzumela opingela ‘mafumo ehu wirimu’ nunuwihaga mandano ofiyedheya na Yehova vina Yezu. (Mt. 6:​19, 20; Lk 16:9) Nigakosa ejuwene kaninaganyedha wi Yehova onele onisapela.

9. Ninfwanyelela okuluvela elobo gani?

⁹ Yehova oli womala-nawale wi akamihedhe nlogo naye masaka abano. Mbwenyi eji kintapulela wi kaninayelele dhilobo dhomaningoni obe kaninapattiwe na dala.b Yehova txipo kananinyanyale. Iyene onele onikamihedha mmakattamihoni mwehu mottiyana-ttiyana. Enowodheya oladdaniha ebaribari eji nonaga midhidhi minli dhinawodhihu olagiha okuluvela wi Yehova onele onikamihedha wakwanihedha dhojombeliwa dhehu dhomaningoni: (1) nigapattiwa makattamiho a ojombeliwa kobiri (2) nigakosaga masasanyedho a musogorho mwaha wa dhojombeliwa dhehu dhomaningoni.

NIGAPATTIWA MAKATTAMIHO A OJOMBELIWA KOBIRI

10. Makattamiho gani a otowa kobiri andaga iyo ogumanana?

¹⁰ Vandowihu naddamelaga omagomo wa elabo ejino, txino makattamiho anele akalagawovi sabwa ya otxinja wa alamuleli, koddo, dhifoyo obe vizini dhiswa. Mohijedheleya-mwene ninodhaga oyelela ganyo yehu, dhilobo dhinihu obe omwalela mburo mwina vina enodhaga okala yorutxa wakwanihedha dhojombeliwa dhehu, enodhaga ofuneya ofwanya mabasa maswa mburo omwalelihu obe omwalela mburo mwina na amudhihu wi nakwanihedhe dhojombeliwa dhawa. Txini enanikamihedhe okosa dhogana dhinalagihe wi ninomukuluvela Yehova?

11. Txini enawukamihedhe owanana makattamiho a otowa kobiri? (Luka 12:​29-31)

¹¹ Elobo yoroma vina yamakamaka enfwanyeliwe okosa ja omuttiyedha makattamiho awo Yehova. (Gan. 16:3) Kamukumbirhe eziwelo enfuniwe wi okose dhogana dhapama vina murima wofwasa wi orabele ‘ottabwihetxa ovizuzumela’ sabwa ya makattamiho anupatta. (Kengesa Luka 12:​29-31.) Kamukumbirhe wi awukamihedhe wagalala na esile dhiniwena. (1 Tm. 6:​7, 8) Kapepesa mmapublikasauni ehu wi owodhe owanana makattamiho a ojombeliwa kobiri. Enjene ahipurelamo vaddiddi mitoma dhinfwanyeya mu jw.org dhinloga mwaha wa makattamiho a ojombeliwa kobiri.

12. Mavuzo gani andaga omukamihedha Mukristu okosa yogana yapama mwaha wa anamudhi aye?

¹² Ena ahikwekwetteleya orumela mabasa attukulele okala wolapelana na amudhawa, mbwenyi yogana eji dila dhinjene ehilagiha otowa malago. Ohinatti orumela mabasa maswa kutanalele bahi kobiri enattambirhege weyo mbwenyi ejo enapatte dhavi mpaddi womuyani. (Lk. 14:28) Kavivuze: ‘Matelo aga anakale dhavi miyo ddigakala wolapelana na mwadhaga obe na mamunaga? Ddinelege owodha wona matugumano otene, odhowa mmabasani a olaleya vina okala na abali na arogora?’ Akala weyo ohikana aima onofwanyela ovikosa nivuzo ntti namakamaka: ‘Ddinele owodha walela anaga vina ‘wasunziha ddifwaraga malago a Yehova’ ddigahikalege na awene?’ (Ef. 6:4) Kasogorheliwa na mubuwelo wa Yehova ottiya na anamudhi obe amarho ahinriha magano a mBibiliani.c Tony, onkala o Ázia ohakela gari dhinjene dha ganyo dhigamuttukulele olaba dhilabo dhotakulu. Mbwenyi mmaleliye olobela sabwa ya makaniya vina otanalela na mwadhiye, iyene ohigana okodda, ottiya ejo wahitanalela txini egakamihedhile amudhaye okalawo na kobiri eng’onovi. Obuwelaga dha mundduni, Tony ohiloga: “Ddihikana gari ya wakamihedha attu enjene omuziwa Yehova vina anihu anomukwela vaddiddi Yehova. Anamudhi ehu ahisunza wi nigakalawo mowiwanana na mazu anfwanyeya va Mateu 6:​33, Yehova onele onikoya.”

MASASANYEDHO A DHOJOMBELIWA DHEHU DHOMANINGONI DHA MUSOGORHO

13. Marhe gani opimeleleya anfwanyelihu ogana ovanene ananikamihedhe ovisapela nigoluvala?

¹³ Omukuluvela wehu Yehova onodhaga wehiwa nigatanalela mukalelo onakalegehu nigoluvala. Bibilia ononikokomeza olaba vaddiddi wi niwodhe wakwanihedha dhojombeliwa dhehu dhomaningoni dha musogorho. (Gan. 6:​6-11) Ja malago, mikalelo dhehu dhiganirumeliha okoya kobiri eng’onovi enanikamihedhe musogorho. Kobiri enonivaha nibarelo ning’onovi. (Ko. 7:12) Mbwenyi ninofwanyela orabela otamela dhilobo dhomaningoni okala yamakamaka mwigumini mwehu.

14. Ninfwanyelela nni otanalela nlebo na Ahebreu 13:5 mwaha wa dhojombeliwa dhehu dha musogorho?

¹⁴ Yezu ohiloga nipadduwo ninlagiha wi muttu onzuzumela okoya kobiri mbwenyi “ohirelile vamentoni va Mulugu” ddotowa malago. (Lk. 12:​16-21) Kawo onziwa enapadduwe mangwana. (Gan. 23:​4, 5; Tia. 4:​13-15) Iyo ninogumanana makattamiho anapatta bahi anamafwara a Kristu. Yezu ohiloga wi ninofwanyela okala omala-nawale wi ‘nittiye’ dhokana dhehu wi nikale anamafwara aye. (Lk. 14:​33, nota) Jijuwene epadduwile na Akristu o Judeya a nsaka na arumiwi, awene ali omala-nawale wi attiye dhotene dhanani. (Ahe. 10:34) Masaka abano abali enjene ahiyelela dhilobo dhomaningoni sabwani kakamihedhile nikuru na partidu. (Ovu. 13:​16, 17) Txini yakamihedhile okosa ejuwene? Awene anokuluvela nipikirhelo na Yehova ninloga: “Miyo txipo kaddinauttiye vina txipo kaddinaunyanyale.” (Kengesa Ahebreu 13:5.) Nona ninokosa mpaka munwodhelihu wi nikane ejile enfunihu nigoluvala vina ninokuluvela wi Yehova onele onikamihedha egapadduwa elobo yahajedhelihu.

15. Monelo gani wopimeleleya onfwanyela okana amambali sabwa ya aniwa? (Koona vina foto.)

¹⁵ Mirudda dhina attu anokanaga aima wi musogorho anawa akane kobiri vina asapele agoluvala. Bibilia onologa wi amambali anofwanyela wasapela aniwa. (2 Ko. 12:14) Ebaribari wi amambali anodhaga ofuna wakela nikamihedho na aniwa venevo vanuluvalani vina aima enjene anoziveliwa sabwa ya okosa ejuwene. (1 Tm. 5:4) Mbwenyi amambali ali Akristu anoziwa wila wagalala wawa kunda sabwa ya okana aima na efunelo yawila awene àvahege kobiri, mbwenyi sabwa ya wakamihedha aniwa omulabela Yehova.—3 Jo. 4.

16. Amambali anawodhe dhavi wasasanyedha aniwa wila awodhe ovisapela anya? (Éfezo 4:28)

¹⁶ Modhela yotagiha yawo wasunzihe anawo omukuluvela Yehova oku weyo wakamihedhaga ovisasanyedhela wi awodhe ovisapela anya. Oromana muzombweni mwawa walagihe ttima ya olaba na nttokoso. (Gan. 29:21; kengesa Éfezo 4:28.) Venevo vandowani onuwaga, wakamihedhe ovilibihedha oskola. Enowodheya amambali opepesa wi afwanye magano a mBibiliani, musogorhomwa akamihedhe anawa okosa yogana ya malago mwaha wa masunzo anfwanyelani okosa. Yogana ya amambali ja wakamihedha anawa ovisasanyedhela wi avisapele anyene vina okana mudhidhi wa olaleya obe okala apionero.

17. Nikuluvelo gani ninfwanyelihu okana?

¹⁷ Alabeli oweddeyana a Yehova anokuluvela ewodhelo yaye vina efunelo yaye ya wakwanihedha dhojombeliwa dhawa dhomaningoni. Venevo vanaddamela iyo omagomelo wa elabo ejino, ninojedhela wi omukuluvela wehu Yehova onele wehiwa. Kintanala empadduwa, nigane okuluvela wi Yehova onele olabihedha ewodhelo yaye wi akwanihedhe dhojombeliwa dhehu dhomaningoni. Nikuluvele wi Yehova ohikana ewodhelo ya onikamihedha kintanala mburo onkalihu.