“Musakulení . . . Onimfunenyu Omulaba”

1. Wi nikane wagalala webaribari, txini enfwanyelihu okosa vina sabwaya jani? (Izaiya 48:​17, 18)

BABIHU wa wirimu ononikwela venjene, onfuna wi nijevo egumi ovanene vina musogorho. (Ko. 3:​12, 13) Iyene ohinittandda na ewodhelo ya okosa dhilobo dhotikiniha, mbwenyi kanivahile ewodhelo ya ovilamulela nanya obe ogana eli yaderetu na yabure. (Ko. 8:9; Jer. 10:23) Iyene onoziwa wila nikane wagalala webaribari ninofwanyela omulabela vina ovirihamo dhinlogiye.—Kengesa Izaiya 48:​17, 18.

2. Satana onfuna wi nirumele eni, mbwenyi txini ekosile Yehova?

² Satana onfuna wi nirumele wila ninowodha okana wagalala nigahilamuleliwe na Yehova vina attu anowodha okana egumi yapama agavittongaga anya. (Wi. 3:​4, 5) Wi alagihe wila Satana muttambi, Yehova ohattiya attu avittonge mwa mudhidhi mung’onovi. Kili yofuneya odhowa wolapa wila noone dhodhelavo dhokubanyiha sabwa ya olamuleliwa na attu. Mwa mpaddi mwina, Malebo anologa dhotagiha dha alobwana na ayana akanile wagalala sabwa ya omulabela Yehova. Yezu ddili yotagiha yamakamaka. Mu nsunzoni ntti, ninele wona txini emuttukulele Yezu osakula omulabela Yehova vina sabwaya enfwanyelela Yehova webedhiwa. Omamalelowa, ninele woona mwaha dhina dhinnittukulela ogana omwebedha Babihu Yehova.

TXINI EMUTTUKULELE YEZU OSAKULA OMULABELA YEHOVA?

3. Txini envahile Satana Yezu vina iyene osakulile okosa eni?

³ Bali velaboni ya vati, Yezu wanfwanyela omusakula agamulabeliye. Mwari mwa mudhidhi mung’onovi mmaleli Yezu obatiziwa, Satana wahiloga wi agahinvaha omwene wotene wa mwilaboni, iyene komwebedha dila modha bahi. Yezu ohimwakula: “Kaddivenyelevo, Satana wé! Vowi elebiwa: ‘Omwebedhe Yehova Mulugu wawo vina omulabelege iyene bahi.’” (Mt. 4:​8-10) Yezu okosele nni yosakula eji? Ninele wona mwaha dhing’onovi.

4-5. Mwaha gani dhing’onovi dhimuttukuleli Yezu osakula omulabela Yehova?

⁴ Mwaha wamakamaka omuttukulele Yezu osakula omulabela Yehova—okwela onddimuwa oniyena na Babe. (Jo. 14:31) Ottiya ejo, Yezu onomulabela Yehova sabwani yosakula yaderetu enfwanyeliye okosa. (Jo. 8:​28, 29; Ovu. 4:11) Iyene onoziwa wi Yehova Niparha na egumi, ddokuluveleya vina ddotapuwa mada. (Ms. 33:4; 36:9; Tia. 1:17) Yehova wanloga ebaribari na Yezu vina dhotene dhanna Yezu wanvahile ddi Yehova. (Jo. 1:14) Mbwenyi Satana ohittiyana na Yehova, ddi iyene ototile okwa. Iyene muttambi, namakumbela vaye vina onzuzumela okosa dhifunelo dhaye bahi. (Jo. 8:44) Aziwaga dhotedhene eso, Yezu txipo kobuwele omutagiha Satana modhela onvaha ekotti Yehova.—Flp. 2:​5-8.

⁵ Mwaha mwina omuttukulele Yezu osakula omulabela Yehova jawi iyene wanziwa wi weddeyana waye ogahidhana dhopurelamo dhinjene dhapama. (Ahe. 12:2) Iyene wanziwa wi kukala wororomeleya, agahikoddeliha nzina na Babe vina agahigomiha matabuwo otene atotile Ddiabo.

YEHOVA ONFWANYELELA NNI WEBEDHIWA?

6-7. Attu enjene masaka abano ankoddela nni omulabela Yehova, mbwenyi ninfwanyelela nni omwebedha iyene bahi?

⁶ Enji masaka abano kanimulabela Yehova sabwani kanziwa mikalelo dhaye dhotikiniha vina kanzinddiyela dhotedhene dhinakoseliye. Eji yannapadduwela abale alaleyeliwe na Paulo akala o Atena.—Mer. 17:​19, 20, 30, 34.

⁷ Paulo ohatapulelamo akadda Atena wi Mulugu webaribari ‘ddinnivaha muya onnivumiha, egumi vina dhilobo dhotedhene.’ Iyene ohenjedhedha: “Sabwani mwaha wa iyene iyo nikaana egumi, ninowedda vina nihikalawo.” Mulugu ddi Muttanddi, omukosile mulobwana mmodha bahi, bakalihawo attu a malogo otene. Nona ddi iyene onfwanyela webedhiwa.—Mer. 17:​25, 26, 28.

8. Elobo gani ehinakose Yehova? Katapulela.

⁸ Ninga Muttanddi wa elabo yotene, Yehova agahamagelela attu otene omulabela. Mbwenyi Yehova txipo kankosa ejuwene. Ottiya ejo, Yehova ononivaha vizinddiyelo dhinoniha wi iyene ohikalawo vina onomukwela muttu-muttu wa iyo. Iyene onfuna wi attu enjene akale amarho aye namukalakala. (1 Tm. 2:​3, 4) Nona, Yehova ononishagiha wi nasunzihe attu ena mwaha wa efunelo yaye na elabo ya vati vina wawaddela dhilobo dhapama dhinakosele iyene nlogo na attu. (Mt. 10:​11-13; 28:​19, 20) Iyene osasanyedha milogo, mwenemo munimwebedhihu vina munakelihu nikamihedho na anddimuwa a mmulogoni okwela.—Mer. 20:28.

9. Yehova onalagiha okwela attu otene na mukalelo gani?

⁹ Okwela wa Yehova onowoneya modhela mukalelo onaweddihiye abale ahinfuna orumela okalawo waye. Katanalela vizinddiyelo esi: Mwari mwa vyaka dhinjidhene, attu enjene ahigana osakula anyene okosa eli yapama obe yabure ottiya omwiwelela Yehova. Masiki dhawene, na oderetu Yehova ohavaha dhinfunani wi awodhe okalawo vina ojavo egumi. (Mt. 5:​44, 45; Mer. 14:​16, 17) Iyene ohavaha ewodhelo yokana amarho okweleya, anamudhi vina ojavo dhopurelamo dha mabasa awa. (Ms. 127:3; Ko. 2:24) Eji enowoniha wi Babi wehu wa wirimu onowakwela attu otene. (Obu. 34:6) Ninele wubuwela mwaha dhing’onovi dhinnittukulela osakula omulabela Yehova vina mukalelo onnirurihiye.

TXINI ENITTUKULELE OSAKULA OMULABELA YEHOVA?

10. (a) Txini ennittukulela omulabela Yehova? (Mateu 22:37) (b) Weyo opurelemo dhavi olevelela wa Yehova? (Masalmo 103:​13, 14)

¹⁰ Dhahene ninga Yezu iyo ninomulabela Yehova sabwa ya omukwela. (Kengesa Mateu 22:37.) Vandowihu nisunzaga mikalelo dha Yehova, ninokala ofiyedheya na iyene. Motagiha, iyene oli womala-nawale wi anilevelele. Ana Izrayel mukoddelani omwiwelela, iyene wahakokomeza: “Mutxelele mweddelo wenyu wabure.” (Jer. 18:11) Eji enolagiha wi Yehova onoziwa wila iyo nili attu ohakwana vina nili mattaka. (Kengesa Masalmo 103:​13, 14.) Weyo ogatanalela midhidhi dhuleveleli Yehova, kinuttukulela omulabela namukalakala?

11. Mwaha gani dhing’onovi dhinnittukulela osakula omwebedha Babihu wa wirimu?

¹¹ Elobo yina ennittukulela omulabela Yehova jawi ejo elobo yapama enfwanyelihu okosa. (Mt. 4:10) Ottiya ejuwene, ninoziwa wi iyo nigakala oweddeyana na Yehova ninele okana dhopurelamo dhinji: ninele okamihedha otxeniha nzina na Yehova, olagiha wi Ddiabo muttambi vina wagalaliha murima wa Babihu. Nigasakula omulabela Yehova masaka abano, ninele okana njedhelo nomulabela namukalakala!—Jo. 17:3.

12-13. Txini ensunzihu na yotagiha ya Jane na Pam?

¹² Masiki banili azombwe, enowodheya osunza omukwela venjene Yehova vina okwela oku onele wunuwa mwa ovira wa mudhidhi. Koona yotagiha ya arogora eli ankuweliwa Jane na Pam.a Mmodhaya wanna vyaka 11 mwina 10 muromelani omusunza Bibilia. Masiki amambali awa ahirumelaga omusunza Bibilia, ahimuttiya Jane na Pam omusunza Bibilia na Anamoona a Yehova, mbwenyi awene anfwanyela odhowa okapela wawa. Jane ohiloga, “Eddisunzihile Anamoona mBibiliani, eddikamihedha ohitagiha dhakosa akwaga enji oskola, ninga oja mirobwe dhinnonga ogogo vina ogonihana wonyakuwa.”

¹³ Vyaka dhing’onovi musogorho, oheli ahidha olaba ninga anamalaleya ohibatiziwa. Musogorhomwa, ahilaba ninga apionera oku akoyaga amambali awa owunuwelavo. Obuwelaga dhotagiha dhawa, Jane ohiloga: “Ddisunza wi Yehova onowakoya amarho aye, dhahene ninga munlogela 2 Timóteo 2:​19, ‘Yehova onowaziwa attu aye.’” Kavali waganyedha wi Yehova onowatanala abale angana omukwela vina omulabela!

14. Ninawodhe dhavi obarelavi nzina na Yehova? (Koona vina mafoto.)

¹⁴ Ninfuna wi attu aziwe wila dhilobo dhabure dhiwalani mwaha wa Mulugu kahiye ebaribari. Motagiha: Weyo okana marho wawo wofiyedheya, oli waderetu, namavaha vina namalevelela. Labo nimodha, weyo wiwa wi marho wawo ddabure vina kankuluveleya. Ogakosile eni? Mwebaribari weyo ogahimbarela. Na mukalelo wakakene, Satana na abale ali mpaddi waye anopigidha nzina na Yehova vina anovuwiha dhottambi mwaha wa Iyene. Mbwenyi iyo ninokosa muli-mwetemwene wi nibarele nzina na Yehova vina ologa ebaribari mwaha wa Iyene. (Ms. 34:1; Iza. 43:10) Ninolagiha wi ninfuna nimulabele Yehova na omuttu wehu wotene modhela mazu vina merelo ehu.

15. Dhopurelamo gani dhing’onovi dhimpadduweli Paulo mmaleliye okosa matxinjo mwigumini mwaye? (Filipi 3:​7, 8)

¹⁵ Nili omala-nawale wi nikose matxinjo mwigumini mwehu wila nimwagalalihe Yehova obe nikose venjene mmabasani mwaye. Motagiha, murumiwi Paulo wahikana ettomo yamakamaka mu relijiauni ya Ayuda, mbwenyi wahittiya relijiauyá wi akale namafwara wa Kristu vina amulabele Yehova. (Gal. 1:14) Yodhelavoyá, iyene wahikana egumi yowagalaliha vina ohakela gari ya olamulela na Kristu wirimu. Paulo txipo katxinuwile sabwa ya ogana omulabela Yehova, iyo vina kaninatxinuwe.—Kengesa Filipi 3:​7, 8.

16. Txini ensunzihu na yotagiha ya Julia? (Koona vina mafoto.)

¹⁶ Mabasa a Yehova agakala elobo yamakamaka mwigumini mwehu, iyene onele oniruriha ovanene vina musogorho. Koona epadduwile na murogora dhahi onkuweliwa Julia. Valiye mwana Julia waniba mukapela, sabwa ya wiba deretu wahishagihiwa wi akale nameba wa ópera. Masiki valiye muzombwe vaddiddi, Julia wahivuwa vina waniba mmimburoni dhovuwa. Mudhidhi wasunziye eskola dhahi yovuwa ya jibo, marho waye w’oskola wahiroma ologa na iyene sabwa ya Mulugu vina wahimutapulelamo wi nzina na Mulugu ddi Yehova. Mudhidhi mung’onovi musogorhomwa, Julia wahiroma omusunza Bibilia dila bili vasumanani. Na mudhidhiya, iyene wahigana omulabela Yehova ottiya okala nameba. Yogana eji kiyali yovevuwa. Iyene ohiloga dhahi: “Attu enjene anloga wi yali otolo ottiya wiba wila ddimulabele Yehova, mbwenyi miyo ddafuna ddilabihedhe egumi yaga yotene wi ddimulabele Yehova.” Julia oniviwamo dhavi sabwa ya yogana ekosiliye vyaka 30 mundduni? “Ddikana murenddele wa muyubuweloni vina ddinokuluvela wila Yehova onele wakwanihedha dhofuna dhaga musogorho.”—Ms. 145:16.

KADHOWAVI OMULABELAGA YEHOVA

17. Ekalele nni yamakamaka ononelamo masaka ankalihu?

¹⁷ Nili vakuvi na ogoma wa elabo ejino yabure. Murumiwi Paulo ohileba dhahi: “Vowi, ‘Ohalile mudhidhi mung’onovi bahi,’ vina ‘Ole ondha onele ofiya, kanagonele.’” (Ahe. 10:37) Ejo ennipatta dhavi? Kuwalilewo mudhidhi mwinjene wila attu asakule akala anele omulabela Yehova obe nne; awene anofwanyela okosa ejo momaguva. (1 Ko. 7:29) Akala nihigana omulabela Yehova, ninofwanyela okuluvela wi dhorutxa dhinagumanihuna, “dhinakale mwari mwa mudhidhi mung’onovi.”

18. Yezu vina Yehova anfuna wi iyo nikose eni?

¹⁸ Yezu wahakokomeza attu okala anamafwara aye vina odhowavi anfwaraga. (Mt. 16:24) Mwadhawene akala ninomulabela Yehova mwari mwa vyaka dhinjene, nigane ohiyelela mundduni. Iyo notene ninofwanyela olaba na nttokoso wila nidhowegevi nikalagawo mowiwanana na yogana yehu ya omulabela. Txino enodhaga okala yorutxa, mbwenyi ninele wagalala vina ojavo mareliho menjene masaka abano!—Ms. 35:27.

19. Txini ensunzihu na yotagiha ya Gene?

¹⁹ Ena anubuwela wi agamulabela Yehova kanawodhe ojavo egumi. Akala weyo wa muzombwe, onubuwela wi onoyelela elobo sabwa ya omulabela Yehova? Muzombwe dhahi onkuweliwa Gene ohiloga: “Miyo ddobuwela wi kaddinajevo egumi sabwa ya okala Munamoona wa Yehova. Yakala ninga aima onuwile na miyo anjavo egumi sabwa ya odhowa omattangani, weddelelana obe ojugari videogame dhinlagiha owali, mbwenyi miyo ddanyonga mudhidhi waga ddidhowaga omatugumanoni vina mmabasani a olaleya.” Mubuwelo obu ompattile dhavi Gene? Iyene ohiloga: “Mwari mwa mudhidhi mung’onovi ddahiroma okosa moviteyani dhilobo dhina dhabure dhakosa azombwe ena, mbwenyi kiyaddidhelilena wagalala webaribari. Ddahiroma otananelela dhopurelamo sabwa ya wiwelela ejile enloga Biblia vina ddahigana omulabela Yehova na murima waga wotene. Oromana mudhidhi obule, ddinona ninga Yehova onowakula malobelo aga.”

20. Txini enfwanyelihu ogana okosa?

²⁰ Munasalmo dhahi ohimwibela Yehova: “Onna gari ddule omusakulilenyu, omwithanelinyu okalaga na nyuwo mmusanani mwenyu.” (Ms. 65:4) Mwadhawene, nigane odhowavi nimulabelaga Yehova. Dhahene ninga Jozuwé ninele ologa: Miyo na amudhaga ninele omulabelavi Yehova.—Joz. 24:15.