Kamukamihedhe Namasunza Wawo wa Bibilia Ogana Omulabela Yehova

1-2. (a) Anamasunza ena a Bibilia anovela nni omulabela Yehova? (b) Txini enasekeserhe iyo mu nsunzoni ntti?

WEYO wannova okala Munamoona wa Yehova? Txino wannova osadduweliwa na akwawo omabasani, na amarho awo obe na anamudhi awo. Obe txino wobuwela wi kugawodhile okalawo mowiwanana na magano a Mulugu. Akala jijuwene, onowodha ononelamo ejile enatximiha anamasunza awo a Bibilia okosa matxinjo wi awodhe omulabela Yehova.

² Yezu wanziwa wi dhilobo esi dhigahidha omutximiha muttu omulabela Yehova. (Mt. 13:​20-22) Mbwenyi iyene kaanyanyalile abale oova onfwara. Ottiya ejo, iyene ohalagiha anamafwara aye mukalelo ogawodhilani wakamihedha (1) ozinddiyela dhilobo dhaatximiha omulabela Yehova, (2) wunuwiha omukwela wawa Yehova, (3) omwika Yehova vamburoni voroma mwigumini mwawa vina (4) opemberha dhorutxa. Ninawodhe dhavi ovirihamo mazu awaddele Yezu anamafwara aye nigalabihedhaga nivuru Kajavo Egumi Yamukalakala! wi nimukamihedhe namasunza wehu wa Bibilia okosa matxinjo wila awodhe omulabela Yehova?

KAMUKAMIHEDHE NAMASUNZA WAWO WA BIBILIA OZINDDIYELA DHILOBO DHINIMUTXIMIHA OMULABELA YEHOVA

3. Elobo gani txino emutximihile Nikodemu okala namafwara wa Yezu?

³ Nikodemu wali musogorheli wanna ttima enddimuwa mu relijiauni ya Ayuda, iyene wahigumanana dhorutxa wila awodhe okala namafwara wa Yezu. Dhivirile myeri mitanu na modha, muromile Yezu mabasa aye a olaleya wi Nikodemu azinddiyele wila Yezu wali Mesiya. (Jo. 3:​1, 2) Mbwenyi Nikodemu wahisakula ogumana na Yezu movitteyani sabwani ‘wannawova Ayuda.’ (Jo. 7:13; 12:42) Txino iyene wobuwela wi agayelela dhilobo dhinjidhene sabwa ya okala namafwara wa Yezu.a

4. Yezu omukamihedhile dhavi Nikodemu ononelamo ejile yamujedhelana Yehova?

⁴ Nikodemu wanziwa Malamulo, mbwenyi iyene wanfuna nikamihedho wi anonelemo ejile yamujedhelana Yehova. Yezu omukamihedhile dhavi? Yezu wali womala-nawale wi anonge mudhidhi waye wila aloge na Nikodemu masiki ekalaga na mattiyu. Yezu vina ohiloga yafwanyela okosa Nikodemu wi akale namafwara waye: otxinuwa dhottega dhaye, obatiziwa mmanjeni vina omuroromela Mwana Mulugu.—Jo. 3:​5, 14-21.

5. Ninawodhe dhavi omukamihedha namasunza wa Bibilia ozinddiyela dhilobo dhinimutximiha omulabela Yehova?

⁵ Masiki akala namasunza wa Bibilia onononelamo pama Malebo, iyene onodhaga ofuna nikamihedho wi azinddiyele dhilobo dhinimutximiha omulabela Yehova. Txino mabasa aye anomujela mudhidhi mwinjene obe anamudhi aye kanfuna wi iyene akale Munamoona wa Yehova. Nona dhahene ninga Yezu katamela mudhidhi wa omukamihedha. Enowodheya omukonvidari namasunza wawo wa Bibilia wi muje obe mwedde vamodha. Mugakosaga dhilobo ninga esi vamodha, txino iyene onodhaga wuwaddela dhimpadduwa mwigumini mwaye, sabwa ya ejuwene weyo onele ozinddiyela makattamiho angumaniyena. Musogorhomwa omukamihedhe wona mukalelo onawodhiye okosa matxinjo. Vina kudduwale wi enfwanyela omuttukulela okosa matxinjo, ku omukwela waye Yehova ottiya sabwa ya ofuna wuwagalaliha.

6. Onawodhe dhavi omukamihedha namasunziha wa Bibilia oliba murima wi awodhe omulabela Yehova? (1 Korinto 16:13)

⁶ Namasunza wa Bibilia agaziwa wi Yehova onele omukamihedha okalawo mowiwanana na magano aye, onoliba murima wi avirihemo dhinsunziye. (Kengesa 1 Korinto 16:13.) Mabasa awo anoladdanihiwa na a namasunziha. Wubuwelaga malabo asunziwe oskola, waziveliwa na namasunziha gani? Txino ddi namasunziha ole wukamihedhile novilela okuluvela ttotto dhana weyo. Na mukalelo wakakene, namasunziha wapama wa Bibilia kanimusunziha bahi namasunza waye ejile eninfunana Mulugu wi iyene akose, mbwenyi onomukamihedha okuluvela wi onowodha okosawa sabwani Yehova onele omukamihedha. Onawodhe dhavi okosa ejuwene?

KAMUKAMIHEDHE NAMASUNZA WAWO WA BIBILIA WUNUWIHA OMUKWELA WAYE YEHOVA

7. Yezu wakamihedhile dhavi anamewa aye wunuwiha omukwela wawa Yehova?

⁷ Yezu wanziwa wi omukwela Mulugu ogahakamihedha anamafwara aye ovirihamo ejile yasunzani. Dila dhinjene iyene wansunziha dhilobo dhigaakamihedhile anamasunza aye wunuwiha omukwela wawa Babiwa wa wirimu. Motagiha, iyene ohimuladdaniha Yehova na mulobwana onavaha dhilobo dhapama anaye. (Mt. 7:​9-11) Anamewa ena a Yezu txino kaaleliwe na babi wokwela. Katanalela mukalelo oviwilemo awene, valogile Yezu musibo wa babi wa ttagaraga omwakelile wili mwanaye odduwene wana mweddelo wohifwanyelela. Yezu ohakamihedha attu wona wi Yehova onowakwela venjene vina onofuna wakamihedha.—Lk. 15:​20-24.

8. Onawodhe dhavi omukamihedha namasunza wa Bibilia wunuwiha omukwela waye Yehova?

⁸ Weyo vina onowodha omukamihedha namasunza wa Bibilia wunuwiha omukwela waye Yehova modhela ottukulela vadhulu mikalelo dha Mulugu ogamusunzihaga Bibilia. Mu nsunzoni nimodha-nimodha, kamukamihedhe wiwananiha ejile ensunziye na okwela wa Yehova. Mugasunzaga sabwa ya yobolo, kamukamihedhe namasunza wawo wona wi Yehova kaperhekile yobolo sabwa ya wakwela attu otene bahi, mbwenyi sabwani onomukwela iyene vina. (Rom. 5:8; 1 Jo. 4:10) Namasunza wa Bibilia aganonelamo mukalelo onimukamihedha Yehova ejo enele omukamihedha omukwela venjene iyene.—Gal. 2:20.

9. Txini emukamihedhile Michael otxinja mweddelo waye?

⁹ Katanalela yotagiha ya Michael, onkala o Indonésia. Iyene oleliwe mwibaribarini mbwenyi kabatiziwe. Vaniye vyaka 18, iyene wahidhowa dhilabo dhotakulu wi akale nameddiha kamiau. Musogorhomwa iyene wahidha otela, mbwenyi wahattiya anamudhi aye wi adhowe alabe dhilabo dhotakulu. Mudhidhene obule mwadhiye na mwanaye ahiroma omusunza Bibilia vina wunuwa mpaddi womuyani. Mmaleli maye okwa, Michael wahigana wiyelela vatakulu wi amukamihedhe babe vina wahirumela omusunza Bibilia. Osekeserha epaddi “Kasunzavi” wa nsunzo 27 wa nivuru Kajavo Egumi Yamukalakala! ehiddiginya vaddiddi murima wa Michael. Atanalelaga mukalelo waviwilemo Yehova amoonaga Mwanaye atabuwaga, Michael wahiroma wunla. Iyene wahunuwiha otamalela waye yobolo, wahittukuleleya otxinja mweddelo waye vina obatiziwa.

KAMUKAMIHEDHE NAMASUNZA WAWO WA BIBILIA OMWIKA YEHOVA VAMBURONI VOROMA

10. Yezu wakamihedhile dhavi anamafwara aye oroma omwika Yehova vamburoni voroma mwigumini mwawa? (Luka 5:​5-11) (Koona vina foto.)

¹⁰ Anamafwara oroma a Yezu momaguva-mwene ahizinddiyela wi Yezu ddi Mesiya, odduwene wapikirheliwe, mbwenyi anfuna nikamihedho wi eke mabasa a Yehova vamburoni voroma. Pedro na André àli anamafwara, Yezu ahinatti wakonvidari wi arome onfwara iyene. (Mt. 4:​18, 19) Dhahene ninga Tiago na Joau, awene àli anamattadda vina ahikana marhondda apama vaddiddi. (Mk. 1:​16-20) Pedro na André ‘vattiyilani milaba dhawa,’ awene txino ahikosa masasanyedho wi àsapele anamudhi awa mudhidhi wanfwarani Yezu. Txini yattukulele wika mabasa a olaleya vamburoni voroma? Nipadduwo ninfwanyeya va Luka, ninologa ntikiniho nikosile Yezu nilibihile okuluvela wawa ewodhelo ena Yehova ya wakamihedha.—Kengesa Luka 5:​5-11.

11. Ninawodhe dhavi olabihedha dhotagiha dhehu wi nilibihe nroromelo na namasunza wehu wa Bibilia?

¹¹ Iyo kaninwodha okosa matikiniho ninga mukosele Yezu, mbwenyi enowodheya ologa nikamihedho navahile Yehova abale amwikile vamburoni voroma mwigumini mwawa. Motagiha, weyo onowubuwela nikamihedho nuvahile Yehova muromiliwe wona matugumano? Txino yahifuneya ologa na munddimuwa wawo womabasani vina omutapulelamo wi wanfwanyela obudduwa o mabasani na mudhidhene wi owodhe wona matugumano. Ogalogaga dhotagiha dhawo na namasunza wawo wa Bibilia, kamutapulelemo mukalelo olibile nroromelo nawo mudhidhi wamooniwe Yehova akamihedhaga yogana yawo ya wika mabasa aye vamburoni voroma.

12. (a) Ninfwanyelela nni wakonvidari anamalaleya ottiyana-ttiyana wi nidhowe vamodha neddihe nsunzo na Bibilia? (b) Onawodhe dhavi olabihedha mavidiyu wi omukamihedhena namasunza wawo wa Bibilia na mukalelo wapama? Kavaha yotagiha.

¹² Namasunza wawo wa Bibilia vina onele opurelamo wiwa dhotagiha dha Akristu ena amwikile Yehova vamburoni voroma. Nona kaawobe abali na arogora a yimo obe a dhilabo dhottiyana-ttiyana wi mudhowe vamodha weeddiha nsunzona. Kaakumbirhe wi aloge yakamihedhile orumela ebaribari vina ekosilani wila eke mabasa a Yehova vamburoni voroma. Ottiya ejo, katamela mudhidhi wa wona na namasunza wawo vidiyu dha epaddi “Kasunzavi” obe “Tamelá Ononelamo Deretu” mu nivuruni Kajavo Egumi Yamukalakala!. Motagiha, mugasunzaga nsunzo 37 enowodheya weyo ottukulela vadhulu magano anfwanyeya mvidiyuni Yehova Onele Onikamihedha na Esile Dhinijombela.

KAMUKAMIHEDHE NAMASUNZA WAWO WA BIBILIA OWANANA DHORUTXA

13. Yezu wakamihedhile dhavi anamafwara aye ovisasanyedhela ofwara-fwariwa?

¹³ Dila dhinjidhene Yezu ohawaddela anamafwara aye wi agahigumanana ofwara-fwariwa, masiki na anamudhi awa. (Mt. 5:11; 10:​22, 36) Mudhidhi mung’onovi ahinakwa, iyene ohawaddela anamafwara aye wi awene agahipiwa sabwa ya omulabela Yehova. (Mt. 24:9; Jo. 15:20; 16:2) Iyene ohakokomeza okala txenjewa mmabasani mwawa. Motagiha, iyene ohiloga wi awene kafwanyela wakulana na muttu agalogile bure esile dharumelani vina anfwanyela wang’anela dhologa dhawa vina dhokosa dhawa wi adhowegevi alaleyaga.

14. Ninawodhe dhavi omukamihedha namasunza wa Bibilia ovisasanyedhela ofwara-fwariwa? (2 Timóteo 3:12)

¹⁴ Enowodheya omukamihedha namasunza wehu wa Bibilia ovisasanyedhela ofwara-fwariwa, nigamutapulelamo endaga ologa akwaye omabasani, amarho aye vina anamudhi aye. (Kengesa 2 Timóteo 3:12.) Akwaye ena a omabasani anodhaga ombedda sabwa ya mweddelo waye muswa. Ena masiki akalaga anamudhi aye ofiyedheya txino anologa bure esile dhinrumeliye dhindela mBibiliani. Japama vaddiddi ologa na anamasunza ehu mwaha wa ofwara-fwariwa momaguva-mwene, dhahene namasunzaya kanatikine ejo egapadduwa vina onele oziwa deretu enfwanyeliye ologa obe okosa ena agamusadduwela.

15. Txini enamukamihedhe namasunza wa Bibilia owanana ofwara-fwariwa na anamudhi?

¹⁵ Akala namasunza wawo wa Bibilia onofwara-fwariwa na anamudhi aye, kamukamihedhe wubuwela wi txino anamudhi aye ena ahisilidhiwa sabwa ya iyene omusunza Bibilia na Anamoona a Yehova. Txino anamudhi aye anubuwela wi Anamoona a Yehova anosunziha dhilobo dhottambi obe attu abure. Yezu ohigumanana makattamiho akakene, anamudhi aye obuwela wila iyene wahitaduwa. (Mk. 3:21; Jo. 7:5) Kamusunzihe namasunza wawo wa Bibilia okala muttu wovilela vina ologa na oderetu na attu ena otaganyiha na anamudhi aye.

16. Ninawodhe dhavi omukamihedha namasunza wehu wa Bibilia ologa na ena mwaha wa esile dhinrumeliye na oderetu?

¹⁶ Masiki akala anamudhi aye anolagiha efunelo, namasunza wa Bibilia kanfwanyela otapulelamo dhetedhene mudhidhi wakakene. Sabwani akala iyene onokosa ejuwene onodhaga walemeliha anamudhi aye na miselu dhinjidhene, sabwa ya ejuwene anodhaga ohifuna ologa na iyene wili mwaha wa esile dhinrumeliye. Nona kamukokomeze namasunza wawo wa Bibilia ologa esile dhinrumeliye na mukalelo wovevuwa, ejuwene enattukulele attu ena ofuna onvuruwana wili. (Kol. 4:6) Enowodheya iyene ologa na anamudhi aye wila adhowe mu jw.org. Ejo egahakamihedha awene osunza venjene sabwa ya Anamoona a Yehova mudhidhi onfunani.

17. Onawodhe dhavi omushagiha namasunza wawo wa Bibilia wakula mavuzo ankosa attu ena mwaha wa Anamoona a Yehova? (Koona vina foto.)

¹⁷ Enowodheya olabihedha seriye “Mavuzo Ankosetxa Attu Sabwa ya Anamoona a Yehova” enfwanyeya mu jw.org wi omukamihedhe namasunza wawo wa Bibilia osasanyedha dhowakula dhovevuwa wi awodhe wakula mavuzo andaga okosa anamudhi aye obe akwaye omabasani. (2 Tm. 2:​24, 25) Ottiya ejo omagomo wa nsunzo nimodha-nimodha kudduwale osekeserha epaddi “Attu Ena Anloga Wi” munivuruni Kajavo Egumi Yamukalakala!. Kamushagihe namasunza wawo mukalelo onawodhiye watapulelamo attu ejile enrumeliye ovanene. Egafuneya kamukamihedhe ofwanya marhe mena apama a otapulelamo ejile enrumeliye. Dhipaddi esi dhinele omukamihedha namasunza wawo wa Bibilia obarela nroromelo naye na nikuluvelo.

18. Onawodhe dhavi omukamihedha namasunza wawo wa Bibilia oroma olaleya na mulogo? (Mateu 10:27)

¹⁸ Yezu ohawaddela anamafwara aye wi anfwanyela walaleyela attu miselu dhapama. (Kengesa Mateu 10:27.) Namasunza wa Bibilia agaroma olaleya na mulogo onowona nikamihedho na Yehova vina onosunza omukuluvela venjene iyene. Onawodhe dhavi omukamihedha namasunza wawo okana yogana eji? Mulogo wawo ogakosa masasanyedho a mabasa a olaleya origanela mmuruddani munlaleyinyu, kamukamihedhe wona enfwanyeliye okosa wi akale namalaleya wohibatiziwa. Kamwaddele wi dila dhinjidhene jovevuwa olaleya mudhidhi onkosiwa mabasa aba origanela. Yogana yina enfwanyeliye okana ja oroma okosa dhipaddi dha matugumano a vari va sumana. Agakwaniha yogana eji, iyene onele osunza ologa na nikuluvelo na attu ena mwaha wa esile dhinrumeliye.

KALAGIHA WI ONOMUKULUVELA NAMASUNZA WAWO WA BIBILIA

19. Yezu olagihile dhavi wi wannakuluvela anamafwara aye, nanda iyo ninawodhe dhavi omutagiha?

¹⁹ Ahinatti odhowa wirimu, Yezu ohawaddela anamafwara aye wi awene agahigumana na iyene. Awene kanonelemo wi Yezu waloga mwaha wa odhowa waye wirimu. Masiki dhawene iyene wazuzumele weddeyana wawa ottiya dhowaganyedha dhawa. (Jo. 14:​1-5, 8) Iyene wanziwa wi awene agahifuna mudhidhi wila anonelemo dhilobo dhina, ninga njedhelo nokala wirimu. (Jo. 16:12) Iyo vina ninofwanyela olagiha wi ninokuluvela efunelo enna anamasunza ehu a Bibilia ya omwagalaliha Yehova.

20. Murogora onkala o Malawe olagihile dhavi wi wannimukuluvela namasunza waye wa Bibilia?

²⁰ Kakuluvela wi namasunza wawo wa Bibilia onofuna okosa eli yapama. Koona yotagiha ya Chifundo, murogora onkala o Malawe. Iyene ohiroma nsunzo na Bibilia alabihedhaga nivuru Kajavo Egumi Yamukalakala! na muzombwe dhahi wali mu Katolika onkuweliwa Alinafe. Vamalilani ogomiha nsunzo 14, Chifundo wahinvuza namasunza waye ejile yobuweliye mwaha wa olabihedhiwa dhingamuttu mu webedhani. Alinafe wahisilidhiwa vina wahakula, “Ejo yogana yomwinya!” Mpadduwilani ejuwene Chifundo wahubuwela wila Alinafe agahittiya osunza momaguva-mwene. Mbwenyi na ovilela iyene wahidhowavi asunzaga na Alinafe, ajedhelaga wi na mudhidhiya iyene agahinonelamo makaniya. Myeri dhing’onovi musogorhomwa, mudhidhi wasunzani nsunzo 34, Chifundo wahimukosa nivuzo ntti: “Nsunzo nawo na Bibilia vina omuziwa Mulugu webaribari Yehova yukamihedhile dhavi mpaka ovanene?” Chifundo onologa ejile yakulile Alinafe, “Iyene wahiloga dhilobo dhinji dhowumiha milomo, elobo modha jawi Anamoona a Yehova kanivitaganyiha na dhilemelelo dhinkoddiha Bibilia.” Musogorhomwa Alinafe wahittiya olabihedha dhingamuttu vina wahirumeleliwa obatiziwa.

21. Ninawodhe dhavi omukamihedha namasunza wehu wa Bibilia osakula omulabela Yehova?

²¹ Masiki akalaga Yehova ‘onimunuwiha’ namasunza, iyo nihikana muttorho wa omukamihedha wunuwa mpaddi womuyani. (1 Ko. 3:7) Iyo ninokosa venjene opitta omusunziha ejile enfuna Mulugu wi iyene akose. Iyo ninomukamihedha wunuwiha omukwela waye Yehova. Ninomukamihedha vina olagiha omukwela waye Yehova modhela omwika vamburoni voroma mwigumini mwaye. Vina ninomusunziha omukuluvela Yehova agagumana dhorutxa. Nigamulagiha namasunza wehu wa Bibilia wi ninokuluvela wila iyene onele omwagalaliha Yehova ninokamihedha oliba murima wila asakule omulabela Yehova.