Ninonuwihe Dhavi Wakwela Abalihu

1-2. (a) Paulo ologele nni wi mwa mikalelo dhetene, munddimuwaya okwela? (b) Ninakule mavuzo gani?

MUDHIDHI waloga murumiwi paulo sabwa ya nroromelo, njedhelo vina okwela, ohipuliha na mazu aba, mwa mikalelo esi dhotene munddimuwaya okwela. (1 Kor. 13:13) Paulo ologele nni dhahene? Musogorho mapikirhelo otene a Mulugu anele wakwanihedheya, nona kaninafune vina nroromelo vina njedhelo. Mbwenyi ninele odhowavi nimukwelaga Yehova vina attu ena. Txibarene okwela kunamale.

² Vowi okwela onele odhowavi okalaga wofuneya, ninele wakula mavuzo mararu. Noroma, ninfwanyelelani okwelana? Nanawili, ninalagihe dhavi okwelana? Nanoraru, ninonuwihe dhavi okwelana?

NINFWANYELELANI OKWELANA?

3. Mwaha gani dhinnittukulela okwelana muttu na mukwaye?

³ Ekaleleni yamakamaka okwelana muttu na mukwaye? Nigakwelanaga ninowoniha wi nili Akristu atxibarene. Yezu ohawaddela arumiwi aye: “Mugakwelanaga, athu etene anoziwa wi muli—anamasunza aga.” (Jo. 13:35) Okwela ononiwananiha. Paulo ohiloga wi okwela “onowakwaniha wiwanana wa athu.” (Kol. 3:14) Ohikalawo mwaha mwina wamakamaka onnittukulela okwelana. Murumiwi Joau ohileba: “Onimukwela Mulugu, amukwelege vina mukwaye.” (1 Jo. 4:21) Nigakwelagana ninowoniha wi ninomukwela Mulugu.

4-5. Kavaha yotagiha enoniha wiwanana wa omukwela Mulugu na okwelana muttu na mukwaye.

⁴ Omukwela wehu Mulugu oniwanana dhavi na wakwela abalihu na arogora? Kobuwela wiwanana wa murima wehu na dhipaddi dhina dha mwili wehu. Dila dhina mediku onottidda mono wa muredda wi aziwe mukalelo onlaba murima wa muttuya. Dhahene oziwa mukalelo oli murimaya, akala ohobana obe ohiliba. Eji ennisunziha nni sabwa ya okwela?

⁵ Dhahene ninga enziwa mediku akala murima wa muttu onolaba pama obe nne, modhela wombeza mono wa muttuya, iyo ninowodha ozinddiyela akala omukwela wehu Mulugu ohunuwa obe nne modhela wakwela attu ena. Nigazinddiyela wi wakwela wehu abali onowobana eji enele woniha wi omukwela wehu Mulugu onowobana vina. Nigadhowavi nakwelaga abalihu, eji enowoniha wi omukwela wehu Mulugu ohunuwa.

6. Ninfwanyelelani okala txenjewa akala wakwela wehu abali onowobana? (1 Joau 4:7-9, 11)

⁶ Akala wakwela wehu abali onowobana ninofwanyela okala txenjewa. Sabwaya jani? Sabwani eji enowoniha wi mandano ehu na Yehova anowobana. Murumiwi Joau ohoniha pama ejuwene mulogeliye dhahi: “Ohinimukwela mukwaye onimoniye, kanwodha omukwela Mulugu ohinimoniye.” (1 Jo. 4:20) Eji enisunziha nni? Ninawodhe omwagalaliha Yehova, nigakwelagana muttu na mukwaye.—Kengesa 1 Joau 4:7-9, 11.

NINALAGIHE DHAVI OKWELANA?

7-8. Ninalagihe dhavi okwelana muttu na mukwaye?

⁷ Mudhidhi na mudhidhi mu Nzuni na Mulugu ninofwanyamo nlamulo “mukwelanege.” (Jo. 15:12, 17; Rom. 13:8; 1 Tes. 4:9; 1 Ped. 1:22; 1 Jo. 4:11) Mbwenyi okwela, ekalelo enihu mmurimani mwehu, kawo muttu onwodha wona eli mmurimani mwehu. Ki attu ena anone dhavi wi iyo ninowakwela? Na mazu ehu vina dhokosa dhehu.

⁸ Dhihikalawo mikalelo dhottiyana-ttiyana dhinlagiha wi ninowakwela abalihu na arogora. Koona dhotagiha dhing’onovi: “Mulogelagane ebaribari.” (Zak. 8:16) “Kalanina murenddele mukalelinyu.” (Mk. 9:50) “Muzuzumelege othithimihana.” (Rom. 12:10) “Mwakelane.” (Rom. 15:7) “Mulevelelagane.” (Kol. 3:13) “Mukamyedhane opwathela mithorho dhenyu.” (Gal. 6:2) “Pangarhazaganina.” (1 Tes. 4:18) “Libihanina murima.” (1 Tes. 5:11) “Mulobelelagane.”—Tia. 5:16.

9. Ekaleleni yamakamaka wapangarhaza abali? (Koona vina foto.)

⁹ Ninele osunza mikalelo dha wakwela abalihu na arogora. Ddima evirile nihona wi Paulo ohakokomeza abali dhahi: “Pangarhazaganina.” Ekaleli nni yamakamaka opangarhazana? Referensiya dhahi ya Bibilia, ehiloga wi nzu ntti “opangarhaza” nilogile Paulo, nintapulela “okala vakuvi na muttu ontabuwa na makattamiho orutxa wi nimpangarhaze.” Iyo nigapangarhaza abali na arogora, ninowakamihedha ovenya wi odhowegevi eddaga mudila ya egumi. Dila dhetene dhinapangarhaza iyo abalihu, ninowoniha wi ninokwelana.—2 Kor. 7:6, 7, 13.

10. Ttagaraga na nipangarhazo dhiniwanana dhavi?

¹⁰ Akala muttu onomweddela ttagaraga muttu mwina ontabuwa, ttagaraga enele omuttukulela ompangarhaza vina omukamihedha. Ttagaraga enomuttukulela muttu ovaha nipangarhazo. Koona mukalelo wiwananihile Paulo ttagaraga ya Mulugu na nipangarhazo ninnivahiye. Paulo ohiloga wi Yehova “Babi onneddela thagaraga, Babi onnipangarhaza mudhidhi wotene.” (2 Kor. 1:3) Paulo onolabihedha nzu ntti “thagaraga” wi atapulelemo ttagaraga enkana muttu na mukwaye. Nona, “Mulugu agakuweliwa Babi obe Fukuwa ya ttagaraga sabwa ya iyene waweddela attu ttagaraga enddimuwa vaddiddi.” Ttagaraga enomuttukulela onipangarhaza “mmakathamihoni mwetemwene.” (2 Kor. 1:4) Dhahene ninga manje oridha aninvaha guru muttu wanna nttona, Yehova ononipangarhaza vina ononivaha guru nigawanagana makattamiho. Ninawodhe dhavi omutagiha Yehova modhela wapangarhaza attu ena vina walibiha? Mukalelo mmodha ku wunuwiha mikalelo dhinanikamihedhe wapangarhaza ena. Mikalelo eso sivi?

11. Mowiwanana na Kolosi 3:12 vina 1 Pedro 3:8, mikalelo gani dhina dhinfwanyelihu wunuwiha wi nikane okwela onnittukulela wapangarhaza abalihu?

¹¹ Txini enanikamihedhe odhowagavi nikwelanaga siku na siku? Ninofwanyela wunuwiha mikalelo dhapama ninga, ttagaraga, okwela wa weddeyana vina oderetu. (Kengesa Kolosi 3:12; 1 Pedro 3:8.) Mikalelo esi dhinanikamidhe dhavi? Nigaweddelaga ttagaraga abali na arogora, ninowoniha wi ninowatanala txibarene vina ninele ottukuleleya wapangarhaza agapattiwa makattamiho. Dhahene ninga mulogile Yezu, “mulomo onloga esile dhidhalile mmirimani. Muttu wapama onoburutxa dhapama mmafumoni mwaye apama.” (Mt. 12:34, 35) Wapangarhaza abali na arogora antabuwa, mukalelo wapama wolagiha wi ninowakwela.

NINONUWIHE DHAVI OKWELANA?

12. (a) Elobo gani enfwanyelela iyo okalela txenjewa? (b) Ninakule mavuzo gani?

¹² Notene ninofwanyela odhowavi nikwelagana. (1 Jo. 4:7) Mbwenyi kanidduwale eji elogile Yezu “okwela wa enjiya onele wobana.” (Mt. 24:12) Apa Yezu kalogile wi anamafwara aye enjene wi agahittiya okwelana. Masiki dhawene, nikale txenjewa vowi otoweya wa okwela oli mwilaboni onadhe onipatta ofiyedha waweddiha abalihu se okwela. Niziwaga ejuwene ondoweni nitanalele nivuzo nina namakamaka: Ninaziwe dhavi wi ninowakwela venjene abalihu?

13. Txini egadhile weha wakwela abalihu?

¹³ Mukalelo modha wa wona wi okwela wehu ohiliba ja otanalela mukalelo onaweddihehu nigagumanana magudulano. (2 Kor. 8:8) Jijene emuttukuleli murumiwi Pedro ologa: “Makamaka [munuwihe] okwelana, vowi okwelana onottimiha dhothega dhinjene.” (1 Ped. 4:8) Ohiligana na dhawobana dha abalihu dhinodhaga weha okwela wehu.

14. Mowiwanana na 1 Pedro 4:8, ekalelo gani yokwela enfwanyelihu okana? Kavaha yotagiha.

¹⁴ Ndoweni ninonelemo pama mazu aba alogile Pedro. Epaddi yoroma ya versu 8 enloga mukalelo wa okwela onfwanyelihu okana—wunuwiha okwela. Nzu ntti nilabihedhi Pedro nintapulela “oweta.” Epaddi ya nawili ya versu eji enloga ejile enfwanyelihu okosa nigakana okwela oku. Onele okunela obe olevelela dhottega dha abalihu. Nitanaleleni dhahi: Nittiddele okwela wehu na mada meeli, ninga nittiddelile guwo niwetela oku-noku ofiyedha okunela ottiya yottega modha, dhottega bili, mbwenyi “dhothega dhinjene.” “Okunela” egali ninga olevelela. Na mukalelo wakene onvita guwo maleba obe ohiligana, okwela wehu onokunela dhawobana vina ohiligana wa abalihu.

15. Nigakwelaga venjene abalihu, txini enawodhe iyo okosa? (Kolosi 3:13)

¹⁵ Ninofwanyela wakwela venjene abalihu wi niwodhe walevelela—masiki masaka mena ekalaga yorutxa vaddiddi. (Kengesa Kolosi 3:13.) Nigalevelela ena ninowoniha wi nihikana okwela onddimuwa vina ninofuna omwagalaliha Yehova. Elobo gani yina enanikamihedhe ohang’anetxa dhovonya dha abali?

16-17. Elobo gani yina enanikamihedhe olevelela dhovonya dha attu ena? Kavaha yotagiha. (Koona vina foto.)

¹⁶ Nizuzumelege dhilobo dhapama dhinkosa abali ottiya dhovonya dhawa. Katanalela yotagiha eji. Kobuwela buli vamattangani na abali ang’onovi. Munovega omamalelo wa mattangaya weyo opida foto modha. Foto yoroma egahikale pama, onopida foto dhina bili. Ovano ona foto ttaru, foto modha weyo ozinddiyela wi mbali mmodha kabudduwile pama. Onakosena nni foto ejo? Onofudha, vowi ohikana foto dhina bili, eso bili abali otene onoteya otaganyiha na mbali oddule.

¹⁷ Ovano kaladdaniha foto dhipidile weyo na esile dhinubuwela weyo. Txibarene onowubuwela dhilobo dhapama mudhidhi waliwe na abali. Mbwenyi nsaka ntto txino mbali obe murogora wahiloga obe wahikosa elobo yohikala. Onakose nni na dhubuwelo eso dhohikala? Onkoddelani ofudha dhahene ninga enfudha weyo foto ehibudduwile pama? (Gano 19:11; Ef. 4:32) Ogazuzumela wang’ana dhilobo dhapama dhipadduwile mudhidhi wali weyo na mbali oddo, eloboya ejo modha epadduwile kinakale enddimuwa vaddiddi vowi onobuwelege dhilobo dhapama.

OKWELA OKALELENI WOFUNEYA MASAKA ABANO

18. Txini esunziliwe sabwa ya okwela mu nsunzoni ntti?

¹⁸ Ninfunelani olibiha okwelana muttu na mukwaye? Ninga monile iyo, nigakwela abali na arogora, ninowoniha wi ninomukwela Yehova. Ninalagihe dhavi wi ninowakwela abalihu? Mukalelo mmodha ku wapangarhaza. Ttagaraga enele onittukulela opangarhazana muttu na mukwaye. Ninawodhe dhavi olibiha okwelana? Modhela ovilibihedha olevelela dhottega dha abalihu masiki ekalaga yorutxa.

19. Okwelana muttu na mukwaye ekaleleni yamakamaka masaka abano?

¹⁹ Ekaleleni yamakamaka okwelana masaka abano? Pedro ohiloga mwahaya: “Ogoma wa dhetedhene oli vakuvi, . . . [nona] mweddegena okwelana.” (1 Ped. 4:7, 8) Omagomo wa elabo eji yabure oli vakukuvi, txini enjedhelihu? Yezu ohatxenjeriha arumiwi aye awaddelaga dhahi: “Munele widdiwa na attu a malogo otene, sabwa ya nzina naga.” (Mt. 24:9) Wi nivilele widdiwa oku, ninofwanyela ovilibihedha okala a wiwanana vina okwelana—vowi “okwelana onowakwaniha wiwanana wa athu.”—Kol. 3:14; Fil. 2:1, 2.