Azombwe—Munawodhe Dhavi Okala Alobwana vina Akristu Owarala

1. Txini enfwanyela muttu okosa wi akale Mukristu woliba omuyani?

Mwene David wahinvaha malago mwanaye Salomau: “Maga murima, weddege ninga Mulobwana.” (1 Amwe. 2:​1-3) Nlago ntti ttamakamaka mwa alobwana otene anfuna okala Akristu owarala. Nona awene anofwanyela osunza wiwelela malamulo a Mulugu vina ovirihamo magano a mBibiliani mwa dhetedhene dhinkosani. (Lk. 2:52) Ekaleleni yamakamaka mwa abali ali azombwe okala Akristu owarala?

2-3. Enfuneyelani muzombwe okala Mukristu wowarala?

² Mulobwana oli Mukristu okana mabasa menjene a makamaka vamuralani vina mmulogoni. Txino ninga muzombwe onowubuwelaga mabasa anattiddiwe musogorho. Txino weyo okana yogana ya ovolowa mmabasani a mudhidhi wotene, okala mudhari wokamihedha vina munddimuwa wa mulogo. Txino weyo vina onofuna otela vina okana aima. (Ef. 6:4; 1 Tim. 3:1) Wi owodhe wakwaniha dhogana esi dhotene onofwanyela okala Mukristu wowarala.b

³ Txini enawukamihedhe okala Mukristu wowarala? Dhikalawo dhiwodhelo dhinjene dhamakamaka dhinfwanyeliwe wunuwiha. Mbwenyi txini enfwanyeliwe okosa ovanene wi owodhe wakwaniha mabasa-mabasavi anakaniwe musogorho?

TXINI ENFWANYELIWE OKOSA WI OKALE MUKRISTU WOWARALA

4. Onafwanye wuvi dhotagiha dhapama wi ofware? (Koona vina foto.)

⁴ Ofware dhotagiha dhapama. Bibilia okana dhotagiha dhinjene dhinfwanyela azombwe ofwara. Bibilia onologa dhotagiha dha alobwana amukwela Yehova vina akosile mabasa ottiyana-ttiyana akamihedhile nlogo naye. Ogang’ana mu onamudhini mwawo obe mmulogoni onele onofwanya dhotagiha dhapama dha Akristu ena owarala. (Aheb. 13:7) Enowodheya vina ofwara yotagiha yoligana ya Yezu Kristu. (1 Ped. 2:21) Ogasunzaga nofwaseya dhotagiha esi, katanalela mikalelo dhapama dhilagihile awene. (Aheb. 12:​1, 2) Venevo wone mukalelo onawodhiwe ofwara dhotagiha dhawa.

5. Ononuwihe dhavi ewodhelo ya otanalela, nanda ekalele nni yofuneya? (Masalmo 119:9)

⁵ Weddege na malago vina . . . ovipimelela. (Gano 3:21) Muttu onivipimelela onowubuwela n’ofwaseya ahinatti okosa elobo. Nona ovilibihedhe wunuwiha vina weddegenavi ovipimelela. Sabwaya jani? Sabwani mwilaboni akalamo alobwana enjene anfwara dhubuwelo dhawa obe esile dhinunlela murima wawa. (Gano 7:7; 29:11) Ottiya ejuwene, dhinlagihiwa mu TV, mmafilmeni, mwinternetini vina mu redes socias, dhinopatta vaddiddi egumi yawo ofiyedha opatta mukalelo wa wubuwela vina wa okosa dhilobo. Kito onawodhe dhavi ovipimelela? Karoma osunza magano a mBibiliani vina wubuwele ekalelani yapama mwa weyo. Venevo olabihedhe magano aba wi okose dhosakula dhinamwagalalihe Yehova. (Kengesa Masalmo 119:9.) Ogonuwiha mukalelo obu wamakamaka wa olabihedha magano a mBibiliani wi okose dhosakula enele wukamihedha okala Mukristu wowarala. (Gano 2:​11, 12; Aheb. 5:14) Ovano koona mukalelo onwodha ovipimelela oukamihedha dhipaddi esi: (1) Mukalelo onaweddiha weyo arogora (2) ogasakulaga yowabala vina mukalelo wa ovikoddeliha.

6. Otanalela onamukamihedhe dhavi muzombwe wariha arogora?

⁶ Ovipimelela onele oukamihedha wariha ayana. Kavali yabure mbali oziveliwa na murogora vina ofuna omuziwa deretu. Mbwenyi muzombwe onubuwela pama vina onroma otanalela ahinatti okosa yogana kanakose elobo enamuttukulele murogoraya wubuwela wi ntxibani onoddifuna akala iyeneya kanfuna omutela. (1 Tim. 5:​1, 2) Vina akala mbali onomweddelela murogora onele orabela okosa dhilobo dhigamuttukuleli murogoraya waganyedhiwa, motagiha, okala attu eli oku vahili muttu mwina.—1 Kor. 6:18.

7. Otanalela onamukamihedhe dhavi muzombwe okosa dhosakula sabwa ya dhowabala vina ovikoddeliha?

⁷ Mukalelo mwina onalagihe muzombwe wi onowubuwela pama ahinatti okosa dhosakula oniwanana na mukalelo wowabala vina wovikoddeliha. Dila dhinjene, dhowabala dhinkosiwa na anamasasanya guwo ahinimuriha Yehova vina ana mweddelo wonyakuwa, mweddelo wawa wonyakuwa ononeya na guwo dhinsasanyani vina dhingulihani, motagiha, guwo dhottidda vaddiddi dhinrutxa ottiyaniha akala guwo ya mulobwana obe ya muyana. Agasakulaga yowabala, muzombwe onfuna okala Mukristu wowarala onofwanyela weddihiwa na magano a Bibilia vina dhotagiha dhapama dhili mmulogoni. Iyene onofwanyela ovivuza: ‘Dhosakula dhaga dhinowoniha wi ddili muttu wa zelu? Ddinotanalela dhinubuwela attu ena? Dhowabala dhaga vina mukalelo wa ovikoddeliha onowattukulela attu ena wona wi miyo ddili mulabeli wa Yehova?’ (1 Kor. 10:​31-33; Tito 2:6) Muzombwe onubuwela deretu makani aba onele orihiwa mmulogoni vina na Babi waye wa wirimu.

8. Muzombwe anawodhe dhavi okala muttu wokuluveleya?

⁸ Okale muttu wokuluveleya. Muzombwe onkuluveleya onozuzumela deretu mabasa attomeliwiye. (Lk. 16:10) Kobuwela yotagiha yoligana ya Yezu. Yezu kattiya dhilobo bure-bure vina wali muttu wokuluveleya, iyene wannakwaniha mabasa otene amuttomeli Yehova masiki valani orutxa. Iyene wannakwela attu—makamaka anafwara aye—wali womala-nawale wi aperheke egumi yaye. (Jo. 13:1) Enowodheya weyo ofwara yotagiha ya Yezu modhela ovilibihedha wakwaniha mabasa-mabasavi anakeliwe. Ogahiziwe mowakwana-mwene enfwanyeliwe okosa, kalá woviyeviha vina kakumbirha nikamihedho na abali owarala. Kuttiye okosa mpaka vanwodheliwe. (Rom. 12:11) Kavilibihedhe wakwaniha mabasa awo. Okose ejuwene “n’ekalelo yomulabela Mulugu, ehilí yowalabela athu.” (Kol. 3:23) Enoziweya wi weyo oli muttu wohiligana, nona kalá wovipimelela, vina karumela yovonya-yovonyavi enakosiwe.—Gano 11:2.

KASUNZA TTOTTO YA OKOSA DHILOBO

9. Ekaleleni yofuneya muzombwe osunza ttotto ya okosa mabasa?

⁹ Wi okale Mukristu wowarala onofwanyela osunza ttotto ya ottidda mabasa. Okosa eji enele oukamihedha ozuzumela mabasa anakeliwe mmulogoni, vina enele oukamihedha ofwanya ganyo enauwodhihe wasapela amudhawo vina okana mandano a pama na attu ena. Ovano ninfuna none ttotto dhing’onovi.

10-11. Muzombwe agaziwa wengesa na oleba pama onele ovikamihedha vina okamihedha mulogo, dhavi? (Masalmo 1:​1-3) (Koona vina foto.)

¹⁰ Osunze wengesa vina oleba deretu. Bibilia onologa wi wengesa Nzu na Mulugu malabo otene vina otanalela, enomukamihedha mulobwana okana wagalala, vina dhinkosiye dhinosogora. (Kengesa Masalmo 1:​1-3.) Omwengesa Bibilia malabo otene enele oukamihedha oziwa mukalelo onubuwela Yehova, ottiya ejo onelege wubuwela mofwanyelela-mwene, otanalela pama vina ovirihamo malago a mBibiliani. (Gano 1:​3, 4) Mulobwana onkosa ejuwene onolabihedhiwa vaddiddi mmulogoni. Sabwaya jani?

¹¹ Mmulogoni munofuniwa abali anziwa osunziha pama vina anvaha malago andela mBibiliani. (Tito 1:9) Weyo ogaziwa wengesa vina oleba pama onele owodha osasanyedha diskursu dhapama vina ovaha dhowakula dhinalibihe nroromelo na abali. Enowodheya vina weyo oleba dhilobo dhamakamaka ogavuruwanaga diskursu mmulogoni, mmatugumanoni a murudda vina a kongeresu. Dholeba esi dhinele oukamihedha olibiha nroromelo nawo vina wapangarhaza enna.

12. Txini enokamihedhe oziwa ologa pama na attu ena?

¹² Kaziwa ologa pama na attu enna. Mukristu onofwanyela osunza ologa pama na attu ena. Mulobwana onziwa ologa pama na attu ena onovuruwana n’ofwaseya dhubuwelo na dhiniwamo attu enna. (Gano 20:5) Iyene onowodha ozinddiyela lizu na attuya, ekalelo enlagiha kove dhawa vina jestu dhinkosani. Weyo kunawodhe wona dhotedhene esi ogahilogege na attu kove na kove. Akala weyo mudhidhi mwinjene onkala ologaga na attu ena modhela telefoni, e-mail obe mensagem, onodhaga wobaniha ewodhelo yawo ya ologa na attu ena kove na kove, nona otamelege marhe ologa na attu kove na kove.—2 Jo. 12.

13. Elobo gani yina enfwanyela muzombwe osunza? (1 Timóteo 5:8) (Koona vina foto.)

¹³ Osunze ovisapela. Mukristu wowarala onoziwa ovisapela vina wasapela amudhaye. (Kengesa 1 Timóteo 5:8.) Dhilabo dhina, azombwe anosunza okosa mabasa na amambali awa obe na munammudhi mwina, oku dhipaddi dhina, muzombwe onsunza okosa mabasa obe kursu bali oskola. Kintanala mukalelo onsunziwa mabasa elabo enkaliwe, jamakamaka vaddiddi osunza mabasa anaukamihedhe ovisapela. (Mer. 18:​2, 3; 20:34; Ef. 4:28) Kavilibihedhe woniwa n’ekalelo ya muttu onttidda mabasa vina ompuliha mabasa aromiliye. Ogakosa dhawene enele okala yovevuwa ofwanya ganyo. Mikalelo na dhiwodhelo dhonilehu ddima dhivirile samakamaka vaddiddi wa Mukristu owodha wakwaniha mittorho dhinakaniye musogorho. Ndowe none mittorho dhing’onovi.

OVISASANYEDHELE MITTORHO DHINAKANIWE MUSOGORHO

14. Muzombwe anavisasanyedhe dhavi wi avolowe mmabasani a mudhidhi wotene?

¹⁴ Olaba mabasa a mudhidhi wotene. Abali enjene oliba mpaddi womuyani aromile mabasa a mudhidhi wotene bali aima. Okala pionero onele omukamihedha muzombwe okana ewodhelo yologa na muttu-muttuvi, olabihedha pama kobiri vina ohinonga bure-bure. (Fil. 4:​11-13) Mukalelo wapama wovolowa mmabasani a mudhidhi wotene ku oroma olaba ninga pionero wokamihedha. Sabwa ya abali enjene olaba ninga a pionero okamihedha mwari mwa mudhidhi mwinjene, ejo ehawodhiha awene olaba ninga a pionero a mudhidhi wotene. Mabasa o pionero anofugula misuwo dhinjidhene mmabasani a mudhidhi wotene, ninga motagiha, okamihedha mabasa a omaga obe okala Betelita.

15-16. Txini enamukamihedhe muzombwe okala mudhari wokamihedha obe munddimuwa wa mulogo?

¹⁵ Mudhari wokamihedha obe munddimuwa wa mulogo. Mbali-mbalivi wa mmulogoni onofwanyela okana yogana wi avilibihedhe wakamihedha venjene abali na arogora, txino akalaga munddimuwa wa mmulogoni. Bibilia onologa wi abale anivilibihedha wi attukule muttorho obo “[entamelani] japama.” (1 Tim. 3:1) Mbwenyi mbali ahinatti okala munddimuwa wa mulogo, vamaromo onofwanyela ovilibihedha wi akale mudhari wokamihedha. Adhari okamihedha anowakamihedha anddimuwa a mmulogoni na mikalelo dhottiyana-ttiyana. Anddimuwa a mmulogoni na adhari okamihedha abali ovyeviha anlaba wi akamihedhe abali na arogora ottiya ejo anovilibihedha venjene mmabasani a olaleya. Enowodheya muzombwe ottomiwa ninga mudhari wokamihedha na vyaka 17 obe 19. Vina mudhari wokamihedha wowarala mpaddi womuyani onottomiwa ninga munddimuwa wa mulogo na vyaka 20.

¹⁶ Onakose nni wi okale mudhari wokamihedha obe munddimuwa wa mulogo? Mbibiliani munofwanyeya lista na mikalelo dhinfwanyeliwe okana. Mbwenyi kudduwale wi onofwanyela wunuwiha mikalelo esi sabwa ya omukwela Yehova, wakwela amudhawo vina abali a mmulogoni. (1 Tim. 3:​1-13; Tito 1:​6-9; 1 Ped. 5:​2, 3) Kakosa guru eli yotene wi ononelemo ejile entapulela mukalelo mmodha-mmodha. Ottiya ejo kamukumbirhe Yehova wi okamihedhe wunuwiha mikalelo esi.c

17. Muzombwe anawodhe dhavi ovisasanyedha wi akale mamuni vina mwazambo wa ntakulu? (Koona vina foto.)

¹⁷ Mamuni vina mwazambo wa ntakulu. Ninga mulogile Yezu, Akristu ena agahisakula okala aziye. (Mt. 19:12) Weyo ogasakula otela, onele ottukula muttorho wokala mamuni vina mwazambo wa ntakulu. (1 Kor. 11:3) Yehova onfuna wi omukwele mwadhiyo vina omuzuzumele mpaddi w’omaningoni wa muyubuweloni vina w’omuyani. (Ef. 5:​28, 29) Dhonilehu mwari mwa nsunzo ntti, ttotto ya okosa dhilobo, mikalelo dhapama, wariha ayana vina okuluveleya, dhinele oukamihedha okala mamuni waderetu. Ogavilibihedha ovirihamo esi dhetene, onele okala mamuni waderetu vina mwazambo wa ntakulu.

18. Muzombwe anavisasanyedhe dhavi wi akale babi?

¹⁸ Babi. Ogamala otela, txino onele okala babi. Txini ensunziwe na Yehova sabwa ya okala babi wapama? Dhilobo dhinjene. (Ef. 6:4) Yehova kakana manyazo a omwaddela Mwanaye Yezu wi wanimukwela vina wanimurumela. (Mt. 3:17) Ogadha okala babi, kudduwale omukuluveliha mwanawo mudhidhi wotene wi onomukwela. Agakosa dhilobo dhapama kamutamalele. Ababi anfwara yotagiha ya Yehova, onowakamihedha aniwa okala Akristu owarala. Enowodheya ovisasanyedha oromana ovanene wi okale babi waderetu modhela waweddiha na oderetu amudhawo vina abali a mmulogoni, ononihe ejuwene ogalagiha wi onowakwela vina onoziveliwa na awene. (Jo. 15:9) Sisine dhinawukamihedhe musogorho ogadha okala mamuni obe okala babi. Oku ojedhela esodha, kakana nikuluvelo wi ohikana ttima enddimuwa vamentoni va Yehova vina oli mukamihedhi munddimuwa wa amudhawo vina abali a mmulogoni.

OVANO ONAKOSE NNI?

19-20. Txini enakamihedhe azombwe okala Akristu owarala? (Koona foto ya kapa.)

¹⁹ Muzombwe, enofuneya ovilibihedha wi okale Mukristu wowarala. Kafwara dhotagiha dhapama, konuwiha ttotto ya okosa mabasa, otanalela, okuluveleya, osunza mabasa anawukamihedhe vina ovisasanyedhele mittorho dha musogorho.

²⁰ Txino weyo onozuzuma ogobuwela mabasa aba otene anujedhela musogorho. Mbwenyi onele owodha. Kudduwale, Yehova onofuna venjene wukamihedha. (Iza. 41:​10, 13) Kinaganyedheya wi abali na arogora a mmulogoni anele wukamihedha. Ogadha okala Mukristu wowarala ninga munfunela Yehova, egumi yawo enele okala yowagalala vina yozivela. Azombwe, iyo ninowukwelani venjene! Abali na arogora, mukane nikuluvelo wi Yehova onele wururihani venjene venevo vandhowinyu munuwaga wi mukale Akristu owarala.—Gano 22:4.