‘Kawo Ona Okwela Opitha Oku’

1-4. (a) Txini yapadduwile mudhidhi wamuthwanyutxile Pilato Yezu vamentoni va muthithi wa athu aludduwile abene aatugumanile otakulu wa numba ya governador? (b) Yezu wakuleli dhavi obeddiwa vina woonihiwa goi, nanda mavuzo gani a makamaka antatamuliwa?

“MMONE muthu oddu.” Na mazu aba, Governador wa Roma Pónsio Pilato onomuthwanyutxa Yezu Kristu vamentoni va muthithi wa athu aludduwile abene atugumanile otakulu wa numba ya governadoriya mudhidhi wa Paskwa wa 33 E.C. (Joau 19:5) Masiku mañgonovi bahi munddunimwa, Yezu wela oveleeliwa na mithithi dha athu mudhidhi wavolowileye na ethomo mu Jeruzalemi ninga Mwene wathomiwe na Mulugu. Txibarene omathiyu obu, muthithi obu wawopiha kunimoona viina Yezu ninga Mwene.

² Yezu ohabalihiwa guwo yofila ninga ejile enabala mwene, vina mmusorhoni mwaye muhikala mwerheko. Mbwenye guwo enkuneela baru dhodhaala nikami na edduni yaye ewasuliwe na muwasulo vina mwerheko odhaalihiwe minga nanda buthoromedhiwa mmusorhoni mwaye munthamaga nikami, onlagiha ekalelo yaye ya omwene wobeddeya. Athu ahitatamuliwa na anamakutha anddimuwaya, onvanya mulobwana wowuluvala wimelile vamentoni vawa. Anamakutha ahikuwa: ‘Mmukomele, mmukomele vapingirhizini.’ Bana elova mmirimani mwawa, athuya ahikuwa: ‘Iyene onofanyeela opiwa.’​—Joau 19:1-7.

³ Na ethomo vina oliba murima, Yezu onovilelana obeddiwa vina woona goi s’ohiñguñguna.a Iyene ohivisasanyedhela kakamwe okwa. vasogorhova Siku nthile na Paskwa, na ofuna ohiviperhekela okwa wopa vaddiddi vapingirhizini ya otabuwelavo.​—Joau 19:17, 18, 30.

⁴ Modheela operheka egumi yaye, Yezu wahilagiha okala mukwawaya-mukwawaya wa anamafara aye. Wahiloga dhahi: “Kawo onna okwela ompitha ole onalevela akwaye egumi yaye.” (Joau 15:13) Eji enotatamula mavuzo a makamaka. Yanfuneya-wene Yezu woona goi eji yotene nanda bakwa? Iyene wafunela eni okosa ejene? Ninga “akwaye” vina anamafara, niwodhe dhavi ofara yotagiha yaye?

Yafuneyela Eni Yezu Woona Goi Vina Okwa?

5. Yezu waziwile dhavi makathamiho abene amujeedhela?

⁵ Ninga Mesiya ororomelihiwe, Yezu wanziwa ejile yajeedheliye. Wanziwa mavuhulo menjene Mmaleboni a Ebraiko abene abazile ologa dhotene dhigatabuwilena Mesiya vina okwa waye. (Izaiya 53:3-7, 12; Daniyel 9:26) Opitha dila modha, iyene wahasasanyedha anamasunza aye wakwaniha makathamiho aganfanyile. (Marko 8:31; 9:31) Mu dila ya o Jeruzalemi wila amuje Paskwa wogomihedha, na mukalelo wohipothowa wahapanga arumiwi aye: “Mwana-Muthu onere operhekiwa mmadani mwa anddimuwa a anamakutha, a anamasunziha a magano. Aweneyá anere omukona apiwe, anere omuleva mmadani mwa amalabo. Aboyá anere ompuja, omuturela mara, omuwasula, ompa.” (Marko 10:33, 34) Aba kaali mazu oohikaana ntapulelo. Ninga moonelihu, txibarene Yezu ohivegiwana, otureliwa mara, owasuliwa vina opiwa.

6. Yafuneyelani Yezu woona goi vina okwa?

⁶ Ki yafuneyela eni Yezu woona goi mpaka okwa? Na sabwa dhinji dha makamaka vaddiddi. Sabwa yoroma, modheela okala wororomeleya, Yezu agahilagiha wimela waye nanda bavuneela olamulela onddimuwa wa Yehova. Kobuwela wila Satana na mukalelo wa othambi walogile wila athu animulaba Mulugu sabwa ya omujani bahi. (Job 2:1-5) Modheela okalavi wororomeleya ‘mpaka okwa va pingirizini ya goi,’ Yezu wahakula dhologa dha othambi dha Satana na mukalelo wogomihedha. (Filipi 2:8; Gano dh’olelana 27:11) Sabwa yanawili, goi ya Mesiya vina okwa ogahikuputha dhothega dha athu ena. (Izaiya 53:5, 10; Daniyel 9:24) Yezu wahiperheka “muzimu waye ninga mukutho vamburoni va athu enjene,” anifugulelaga dila wila nikaane omarho worumeeliwa na Mulugu. (Mateu 20:28) Sabwa yanoraru, modheela ovilela na makathamiho oothiyana-thiyana na goi, Yezu “ohehiwa mwa dhetedhene ninga iyo.” Noona iyene Namakutha Munddimuwa wa thagaraga, oddwene onwodha “okubanyedha dhawobana dhehu.”​—Ahebreu 2:17, 18; 4:15.

Yezu Wafunela Eni Operheka Egumi Yaye?

7. Dhilobo gani dhinyanyali Yezu mudheeliye velaboni ya vati?

⁷ Wila ononelemo ejile yafuna Yezu okosa, katanaalela eji: Mulobwana gani agathiyile murala waye numba yaye nanda bamwalela elabo ya otakulu koziwa wila athu enjiya a elabo ejile agahimukoodda, yawila agahibeddiwa vaddiddi, woonihiwa goi nanda omagomelowa agahipiwa na otabala? Ovano katanaalela ejile yakosile Yezu. Ahinathi odha velaboni ya vati, wahikaana mpaddo wa vawoka odhulu vamodha na Babi waye. Masiki dhaene, na ofuna Yezu wahimwala ntakulu naye na odhulu badha velaboni ya vati ninga muthu. Iyene wamwalile aziwaga wila agahikooddiwa na athu enjiya vina yawila agahibeddiwa na otabala, goi enddimuwa vina okwa wopa vaddiddi. (Filipi 2:5-7) Txini yamuthukuleli Yezu okosa elobo ninga ejene?

8, 9. Txini yamulibihedhi Yezu operheka egumi yaye?

⁸ Vadhulu va dhotedhene, Yezu walibihiwe na omukwela vaddiddi Babi waye. Odiga wa Yezu wali onamoona wa omukwela Yehova. Okwela oku wahimutotela Yezu ozuzumela nzina vina ovuwa wa Babi waye. (Mateu 6:9; Joau 17:1-6, 26) Opitha elobo yina yotene, Yezu wafuna oone nzina na Babi waye banikuputheyile mwa esile dhamageedhiwani. Dhaene Yezu wahikaana nthithimiho vina gari ya otabuwela otamela oligana, sabwani wanziwa yawila ororomeleya waye ogahilaba mwa okoddeliha nzina naderetu vina nokoddela na Babi waye.​—1 Mapadduwo 29:13.

⁹ Yezu wahikaana sabwa yina ya operheka egumi yaye​—okwela nlogo na athu. Oku okwela witeyile omaromo-wene wa okalawo wa athu. Wale vaddiddi Yezu ahinadha velaboni ya vati, Bibilia onloga wila iyene wewa dhahi: “Ddanziveliwa okala na malogo a athu.” (Gano dh’olelana 8:30, 31) Okwela waye wannooneya-wene bali velaboni ya vati. Ninga moonelihu mmakapitulini mararu avirile a nivuru nthi, na makalelo menjene Yezu wahilagiha wakwela athu otene vina makamaka anamafara aye. Mbwenye va 14 wa Nisani wa 33 E.C., na ofuna iyene onipikirele muzimu waye. (Joau 10:11) Txibarene, kuwali mukalelo wopitha wa iyene onilagihedha okwela. Ninofuna omutagiha mowiwanana na ejene? Indde. Txibarene, ninorumiwa okosa ejene.

“Mukwelanege N’ekalelo Yukwelilenina Miyo”

10, 11. Nlamulo niswa txini nthene navahile Yezu anamafara aye, nthi entaganyiheya na eni, ki ekaleli eni ya makamaka iyo wiwelelaga nlamulo nthi?

¹⁰ Omathiyu ahinathi okwa, Yezu wahapanga anamasunza aye-aye: “Ddinouvahani nlamulo niswa: Mukwelanege. N’ekalelo yukwelilenina miyo, nyuwo vina mukwelanege. Mugakwelanaga, athu etene anoziwa wi muli anamasunza aga.” (Joau 13:34, 35) “Mukwelanege,” nikaleli eni “nlamulo niswa”? Nlamulo na Mizé nahimala olamula dhahi: “Mwirege wakwela akwinyuyá [obe amwaddamani] n’ekalelo envikwelenyuna.” (Onamakutha 19:18) Mbwenye nlamulo nthi niswa ninofuna okwela onddimuwa, okwela okwene oganithukuleli operheka egumi yehu mwa oderetu wa athu ena. Mwinyene Yezu wahilagiha deretu eji mwalogeliye dhahi: “Nlamulo naga thinthi: mukwelanege ninga munukwelanimi. Kawo onna okwela ompitha ole onalevela akwaye egumi yaye.” (Joau 15:12, 13) Nlamulo nthi txibarene ninologa: “Mwakwelege athu ena, kayo ninga munkoselinyu moka-moka, mbwenye opitha mukalelo onivikwelenyu moka.” Modheela mukalelo wakaliyewo vina wakwileye txibarene Yezu wahilagiha okwela oku.

¹¹ Ekaleli eni ya makamaka iyo wiwelelaga nlamulo niswa? Kobuwela wila Yezu walogile dhahi: “Mugakwelanaga [ovilibihedhela okwela], athu etene anoziwa wi muli anamasunza aga.” Indde ovilibihedhela okwela ononilagiha wila nili Akristu a ebaribari. Iyo podi oladdaniha okwela oku na cartão de identificação nina nzina na muthuya. Abale andowa omutugumanoni wa kwathi wa Anamoona Yehova anowabala cartão de lapela. Jangarhana ninomutonya namabalaya, banigalagiha nzina naye vina mulogoya. Ovilibihedhela okwelana muthu na mukwaye ji ezinddiyelo ejene enalagiha Akristu a ebaribari. Na mazu mena, okwelana muthu na mukwaye onlagihehu onofanyeela wooneya deretu mpaka okalaga ninga ezinddiyelo, obe cartão de lapela banigapanga abale annoona yawila txibarene iyo nili anamafara a Kristu. Kadda muthu wa iyo onokosa deretu ovivuza, ‘“cartão de lapela” na ovilibihedha okwela ninowooneya mwigumini yaga?’

Ovilibihedhaga Okwela—Ontapulela Eni?

12, 13. (a) Ninfanyeela olagiha okwelana muthu na mukwaye mpaka vavi? (b) Txini entapulela ovilibihedha okwela?

¹² Ninga anamafara a Yezu, ninofanyeela okwelanaga muthu na mukwaye n’ekalelo enikwelile Yezu. Eji entapulela ofunaga ovilibihedhela wakamiha anamafara akwehu. Ninfuna nivilibihedhe mpaka muddidda gani? Bibilia ononipanga: “Iyo ninonelamo elí okwela, vowi Yezu onilevela egumi yaye. Enofuneya wi iyo vina nàlevelege akwihu egumi yehu.” (1 Joau 3:16) Ninga Yezu, egafuneya ninofanyeela ofuna okwa mwa oderetu wa muthu mwina. Mmudhidhini wa ofarafariwa, nigahifiyedha operheka egumi yehu othiya waguliha abali ehu a omuyani nanda baneka va ngovini dhigumi dhawa. Mu dhilabo dhigaweyile malogo obe maziza, nigaheka va ngovini dhigumi dhehu wila navuneele abali ehu, peno akala ba nlogo obe makalelo mena. Malogo agadhowaga okoddoni, nigahifuna vaddiddi ofiyedha ofugeliwa obe okwa banikoodda othidda futhi mowasadduwela Akristu akwehu, obe muthu mwina na mwaha obu.​—Joau 17:14, 16; 1 Joau 3:10-12.

¹³ Ofunaga ofiyedha okwa mwa oderetu wa abali ehu kayo mukalelo mmodha bahi wa ovilibihedhela okwela. Txibarene, kayo enjene mwa iyo ankumbirhiwa ovilibihedha mpaka veneva. Dhaene akala ninowakwela abali ehu kakamwe mpaka okwa mwa oderetu wawa, kanigafanyeeli wakosela dhilobo dhiñgono banigavilibihedha wakamiha ovanene? Ovimana ontapulela onyanyala esile dhigapurilehumo obe okala deretu wila naalabe athu ena. Ninowika dhofuna vina oderetu wawa vasogorho vehu masiki akala eji kinnizivela. (1 Korinto 10:24) Na makalelo gani oothiddihedheya mabasa anfanyeelihu ovilibihedha olagiha okwela?

Mmulogoni Vina Vamuralani

14. (a) Anddimuwa a mmulogoni ankumbirhiwa ovilibihedha okosa eni? (b) Weyo oniwamo dhavi mwaha wa mabasa manddimuwa ankosa anddimuwa a mmulogoni mwawo?

¹⁴ Anddimuwa a mmulogoni onovilibihedha vaddiddi ‘osapiha nikuru na mabila.’ (1 Pedro 5:2, 3) Mowenjedhedha osapela mirala dhawa, txino awene anolabihedha mudhidhi wa mathiyu obe magomo a sumana wila atanaale dhilobo dha mulogo, vamodha na osasanyedha dhipaddi dha matugumano, oleddo wokumbuza vina othonga miladdu. Anddimuwa enjene a mmulogoni anovilibihedha mwa dhilobo dhiina, olabaga na guru mmitugumanoni dha murudda obe dha kwathi vina olabaga ninga Comissões de Ligação com Hospitais, Grupos de Visitas a Pacientes (Makuru a Wawoona Aredda) vina Nikwekwe Na Omaga Na Murudda. Anddimuwa a mmulogoni, kamudduwale wila modheela olabaga na ekalelo ya ofuna, olabihedhaga mudhidhi wenyu, guru vina mazanga musapihaga nikuru na mabila, munolagiha ovilibihedha okwela. (2 Korinto 12:15) Guru dhenyu dhohikala dha omujani dhinotamaaleliwa kayo na Yehova bahi mbwenye vina na mulogo onsapihenyu.​—Filipi 2:29; Ahebreu 6:10.

15. (a) Dhilobo gani dhiina dhinivilibihedhela awadhi a anddimuwa a mmulogoni? (b) Weyo oniwamo dhavi mwaha wa ayana abene anavaha amamunawa mudhidhi wila alabe na mulogo wenyu?

¹⁵ Ki naaloge dhavi awadhi a anddimuwa a mmulogoni, ayana aba ankamihedha vina kanivilibihedha wila amamuni awa atanaale nikuru na mabila? Txibarene oku ovilibihedha wa muyana mamunaye agafunaga olabihedha mudhidhi osasanyedha dhilobo dha mulogo mudhidhi obu ogalabihedhiye na murala waye. Kawubuwele vina awadhi a asogorheli a oleddo vina ovilibihedha onkosani wavelela amamunawa weeddela milogo vina mirudda. Awene anovimana okaana numba yawa nanda txino anofiyedha ogona va gorini dhothiyana-thiyana kadda sumana. Ayana abene anika dhofuna dha mulogo vasogorho va dhilobo dhawa anofanyeela otamaaleliwa sabwa ya mulagiho wa ofewa mada wawa vina ovilibihedha okwela.​—Filipi 2:3, 4.

16. Amambali ali Akristu anivilibihedha wakosela eni ana awa?

¹⁶ Niwodhe dhavi olagiha ovilibihedhela okwela va muralani? Amambali, nyuwo munovilibihedhela vaddiddi ana enyu vina ofiyedha walela ‘na malago animuzivela Nabuya.’ (Éfeso 6:4) Txino munofiyedha olaba mudhidhi wolapa mmabasani oolemiha wila mugumelele murala oja vina wila mukaane ebaribari yawila ana enyu ahikaana guwo vamodha na mburo wokala wofanyeela. Othiya ovilibihedhaga dhilobo dhenyu mwanya opitha wawoona ana enyu s’ohikaana dhofuneya dha okalawo. Vina munokosa guru vaddiddi bamugasunza na anenyu, wathukulela omatugumanoni a Okristu vina bamugalaba na awene mmabasani a olaleya. (Olibiha 6:6, 7) Okwela wenyu wovilibihedha onomuhagalaliha oddule Witile murala nanda podi wavaha anenyuya egumi yohimala.​—Gano dh’olelana 22:6; Éfeso 3:14, 15.

17. Mamuni oli Mukristu awodhe dhavi otagiha mweeddelo wa Yezu wohikala wa ogugulu?

¹⁷ Amamuni, muwodhe dhavi omutagiha Yezu mwa olagiha okwela wovilibihedha? Bibilia onowakula: “Nyuwo amamuni mwakwelege awadhinyu, n’ekalelo ekwelile Kristu Mutugumano, ovileveliye mpaka opeliwa.” (Éfeso 5:25) Ninga moonelihu, Yezu wahakwela vaddiddi anamafara aye mpaka okwa mwa oderetu wawa. Mamuni oli Mukristu onotagiha mweeddelo wa Yezu wohikala wa ogugulu, iyene “katamelile wira yamuzivela mwinya.” (Roma 15:3) Mamuni oddu na mukalelo wofuna onowika va mburoni voroma dhofuna vina esile dhinimuzivela mwadhiye. Iyene kandidela na wuma murima wila dhilobo dhotene dhikosiwege na mukalelo onfuniye, mbwenye na ofuna iyene onorumeela wila elobo ekosiwe na mukalelo onfuna mwadhiyeya akala okosa eji kunlupa nigano na Malebo. Mamuni onivilibihedhela okwela onowakela nrumeelo na Yehova vina onogumela okwela vina nriho na mwadhiye vina anaye.

Weyo Onakose Eni?

18. Txini ennilibihedha ofara nlamulo niswa na okwelana muthu na mukwaye?

¹⁸ Wiwelelaga nlamulo niswa na okwelana muthu na mukwaye enorutxa vaddiddi ofarawa, mbwenye nihikaana sabwa yoliba vaddiddi ya okosaga ejene. Paulo ohileba: ‘Okwela wa Kristu ononikwekwetha, nigobuwelaga yawila muthu mmodha ohakwela athu otene . . . , wila abale ankalawo ahivikalelegewo vina anya, mbwenye amukalelegewo oddule wakweli awene vina ovenyihiwe.’ (2 Korinto 5:14, 15, NM) Vowila Yezu okwile mwa oderetu wehu, kanigafanyeeli okwekwetheleya omukalelagawo iyene? Iyo podi okosa ejene modheela ofaraga yotagiha yaye ya ovilibihedhaga okwela.

19, 20. Mvaho gani woñganimela onivahile Yehova, ki nilagihe dhavi yawila ninorumeela mvaho obu?

¹⁹ Yezu kela othabwiha mwalogeliye wila: “Kawo onna okwela ompitha ole onalevela akwaye egumi yaye.” (Joau 15:13) Ofuna waye wa operheka muzimu waye mwa oderetu wehu, wali onikwela waye onddimuwa. Masiki dhaene muthu mwina ohinikwela vina vaddiddi. Yezu ohitapulela: “Mulugu oakwela athu vaddiddi ofiyedha walevela Nammodha waye, wi animuroromela ahirimele, athidde egumi yohimala.” (Joau 3:16) Mulugu ohinikwela vaddiddi ofiyedha onilevela Mwanaye ninga yobolo, awodhihaga onivuna mu othegani vamodha na okwa. (Éfeso 1:7) Mukutho, obu mvaho woñganimela vaddiddi odhile wa Yehova, mbwenye iyene kannimagelela orumeela.

²⁰ Engayela wa iyo osakula orumeela mvaho wa Yehova. Dhavi? Modheela ‘omuroromela’ Mwanaye. Dhaene nroromelo kayo ologavi wila nihikaana nroromelo. Ninlagihiwa na merelo, modheela mukalelo onkalihuwo. (Tiago 2:26) Ninlagiha omuroromela Yezu Kristu modheela onfaraga kadda siku. Okosaga dhaene onela onidheelana mareeliho manddimuwa ovanene vina musogorho, ninga munfunela otapulela kapitulu yogomihedha ya nivuru nthi.