Nunuwihaga Ewodhelo Yehu Mmabasani a Omwene—Nitonyihedhaga Efunelo na Muttuya

Ekalele Eni Yamakamaka: Yezu wanatanaala attu, wanakwela vina wanlagiha efunelo na attuya. Motagiha, mudhidhi dhahi Yezu wahimuzuzumela mulobwana dhahi, ofiyedha onvulumutxa moviteyani, wolapelana na muttitti. (Marko 7:31-35) Iyene vina wahilagiha efunelo na attuya modheela ononelamo wi anamafara aye aali attu ohiligana nanda kaapwatteliha muttorho wolemela modheela wasunziha dhilobo dhinjene. (Joau 16:12) Masiki aziwaga wi agahiyelela wirimu, Yezu wanakwelavi attu. (2 Tim. 4:17) Ninga anamafara a Yezu, iyo ninofanyeela omutagiha. (1 Ped. 2:21; 1 Joau 3:16, 18) Ottiya ejuwene, iyo ninokala woshagene mmabasani ehu a olaleya, nigalagihaga efunelo na mwanamurala, ninonelagamo makattamiho aye, efunelo yaye vina na etanaalelo yaye. Iyene onele ovuruwana deretu agafiyedha oziwa wi kanidhele ottiya miselu na manivuru bahi, mbwenye, ninomukwela vina ninolagiha efunelo na iyeneya.

Ninakose Dhavi:

• Okale womala-nawale. Ofwaseye vina olagihe mikalelo dha omarho.

• Okale namang’ana waderetu. Weyo onowoona ntonyihedho nawila muttuya ohikaana ayima? onoziveliwa mundda wa marhuwa vina na dhinama? ohikaana relijiau endowiye? Txino weyo onodha osaddula mukalelo wa oromana makani wi owodhe wiwananiha muselu wawo na mikalelo dhaye.

• Kamukumbirhe wi aloge enziwiye vina omvuruwane na ofwaseya ohimugwaddelaga. Kamwang’ane na mukalelo onlagiha yawila ononvuruwana. Otamaalele dhowakula dhaye na murima wawo wotene olagihaga wi samakamaka. Karabela efunelo ya wakulana.

• Kaviparhapattele. Egawodheya, kasaddula makaniya mowiwanana na yubuwelo ya muttuya. Ejo enodha okala yohirutxa opitta enubuwela weyo, modheela matratado na mabrochura ehu, katanaalela mitoma dhottiyana-ttiyana. Akala ofiyile mudhidhi wohifanyeelela, akala iyeneya ohikaana mabasa, kagwaddela dhologadha.

Kakosa Ejuwene Mwari mwa Mweri Obu:

• Kasakula mudhidhi wa webedha wa murala wi osunze mashagiho, obe buli mmabasani a olaleya, namalaleya onowodha oparhapattela muselu waye wi aloge ejile enziwa mwanamurala.

• Mudhidhi wa matugumano a mabasa a olaleya, mbali onsogorhela matugumanoya onofanyeela otonyihedha mukalelo onlagihiwa efunelo na mwanamurala.