Kakalavi Mu Okwelani Wa Mulugu

1, 2. Ninafanye wuvi vottawela vokuluveleya?

KOBUWELA eji: Weyo onoweedda mu dila siku na pevo. Odhulu ohidhaala mirabo dhoriba. Jai dhihiroma ozerima, nanda dhinoruma, venevo muzogwe onokukuma. Weyo onomaguva, bugatamela vego vottawela. Venevo nikome na dilaya weyo woona vottawela. Mburhoya boliba, bowuma, vina bozivela mmentoni. Weyo onowika ttima vaddiddi mburhoya!

² Iyo ninkalawo mmidhidhini dha mbigiddi. Mikalelo dha elabo dhinonongeyavi. Mbwenye ohikala mburho wottawela, obwene onanibarele oputtuwa na mukalakala. Mburho obu txini? Koona ejile ensunziha Bibilia: ‘Ddinela ompanga Yehova: “Nyuwo muli thawelo yaga, oliba waga, muli Mulugu waga, onimuroromelimi.”’​—Masalmo 91:2.

3. Niwodhe dhavi omukosa Yehova okala vottawela vehu?

³ Katanaalela eji! Yehova, Muttanddi vina Mulamuleli wa elabo yotene, iyene poddi okala yobarela vina vottawela vehu. Iyene poddi onittiddeela, sabwani iyene ddwa guru vaddiddi opitta muttu muttuvi obe elobo elobovi ejene eganiputtulile. Masiki akala iyo ninoputtuliwa, Yehova poddi ogomiha dhabure dhotene dhikoseliwe weyo. Nimukose dhavi Yehova okala vottawela vehu? Ninofanyeela omukuluvela iyene. Mowenjedhedha, Nzu na Mulugu ninolibiha: ‘Kakalanivi mu okwelani wa Mulugu.’ (Juda 21) Noona, ninofanyeela okalavi mu okwelani wa Mulugu, nanda nimukwelegevi Babi wehu wa odhulu. Dhahene panakaanihu nikuluvelo nawila iyene ddi vottawela vehu. Ki niwodhe dhavi okaana wandana oku?

KAZINDDIYELA VINA KAAKULELA OKWELA WA MULUGU

4, 5. Makalelo gani meena anilagihedhi Yehova okwela?

⁴ Wila nikalevi mu okwelani wa Mulugu, ninofanyeela ononelamo mukalelo onnilagihedha Yehova okwela waye. Katanaalela masunziho meena a Bibilia abene amaliliwe osunza na nikamihedho na nivuru ntti. Ninga Muttanddi, Yehova ohinivaha elabo ya vati ninga murala wehu woziva. Iyene ohidhaaliha elabo eji ya vati na dhoja gwè vina manje, vitagano dhittanddiliyena, dhinama dhotikiniha, na dhilobo dhiina dhokoddelela mmentoni. Ninga Mwinya wa Bibilia, Mulugu ohinivuhulela nzina naye vina mikalelo dhaye. Mowenjedhedha Nzu naye ninovuhula wila iyene wahimuruma Mwana waye wokweleya velaboni ya vati, bamuttiya Yezu otabuwa mpaka onikwela. (Joau 3:16) Mvaho obu ontapulela eni wa iyo? Obu ononivaha njeedhelo na musogorho motikiniha.

⁵ Vina njeedhelo nehu na musogorho ningayela elobo yina ekosile Mulugu. Yehova ohimala wimetxa nlamulelo na odhulu, Omwene wa Mesiya. Omwene obu onela ogomiha goi yotene vina onela osaddula elabo ya vati ekale paraizu. Ovanene kobuwela! Iyo poddi okala mwilaboni mpule na mukalakala na murenddele vina osanzaya. (Masalmo 37:29) Mulugu ononivaha mweeddihedho wa okalawo na mukalelo waderetu ovanene apa. Iyene vina ohinivaha mvaho wa olobela, dila ya ologaga na iyene s’ohikalavo makattamiho. Aba ba makalelo mang’onovi anlagiha Yehova okwela nlogo na attu vina wukwela weyo.

6. Wakulele dhavi okwela wulagihedhi Yehova?

⁶ Nivuzo na makamaka wila weyo otanaalele tti ntti: Ddinakulele dhavi okwela wa Yehova? Attu enjene anloga dhahi: “Ddinofanyeela omwiyihedha Yehova modheela omukwela iyene vina.” Ji ejene enubuwela weyo? Yezu walogile wila nlamulo ntti tti nddimuwana na malamulo otene: ‘Onofanyeela omukwela Yehova Mulugu wawo na murima wawo wotene, vina na egumi yawo yotene vina mubuwelo wawo wotene.’ (Mateu 22:37) Txibarene weyo ohikaana sabwa dhinjidhene dha omukwela Yehova Mulugu. Mbwenye mwiwelo wawila weyo ohikaana okwela oku, ji yotene eli mwari mwa omukwela Yehova na murima wawo wotene, na egumi yawo yotene, vina mubuwelo wawo wotene?

7. Ohikala elobo yina empitta okalela ologavi wila onomukwela Mulugu? Katapulelamo.

⁷ Ninga mulogeliwani mBibiliani, omukwela Mulugu kayo okalela ologavi wila onomukwela. Txibarene, masiki omukwela Yehova vakalilani wofuneya, okwela oku ku omaromo wa omukwela iyene txibarene. Motagiha: Wila okalewo muri ombaala masawa enofuneya okalavo ttaga ya masawa. Akala weyo wafuna masawa, ogahiziveliwa muttu kowuvaha ttagavi? Nne! Na mukalelo wakakene, omukwela Yehova Mulugu oku omaromo bahi. Bibilia onsunziha wila: ‘Omukwela Mulugu ontapulela eji: niwelele malamulo aye; mwa dhahene, malamulo aye kanlemela.’ (1 Joau 5:3) Wila omukwela Mulugu okale wa ebaribari onofanyeela obaala misapo. Okwela oku onofanyeela olagihiwa na merelo.​—Kengesa Mateu 7:16-20.

8, 9. Nilagihe dhavi okwela vina ntamaalelo nehu vamentoni va Mulugu?

⁸ Ninolagiha wila ninomukwela Mulugu nigasorihaga malamulo aye vina nigattiddihedhaga mabasa magano aye. Okosawa ejene kunrutxa. Malamulo a Yehova ottiya okala oolemela, aba asasanyeliwe onikamiha okalagawo na egumi yoziva, yosanzaya vina yohagalaliha. (Izaiya 48:17, 18) Sabwa ya okalagawo na mweeddihedho wa Yehova, iyo ninomulagiha Babi wehu wa odhulu wila ninotamaalela dhilobo dhotene dhinikoseliye. Mokubanyiha, attu ang’onovi bahi mwilaboni eji ya ovanene bana ntamaalelo ntti. Kaninfuna okala attu otuwa ntamaalelo, ninga mwakaleli attu eena aakalawo Yezu bali velaboni ya vati. Yezu wahavulumutxa attu kumi aana maranya, mbwenye weyelile wila amutamaalele iyene wali mmodha bahi. (Luka 17:12-17) Txibarene nigahifuna okala ninga oddule watamaaleli, ottiya okala ninga abale atanu na anai aakooddile otamaalela!

⁹ Ki malamulo a Yehova anfanyeelihu osoriha bavi? Mu nivuruni ntti iyo nihimala ologa malamulo aba menjene. Mbwenye ovanene ndoweni nisakulele mang’onovi. Osoriha malamulo a Mulugu onela onikamiha okalavi mu okwelani wa Mulugu.

KANFIYEDHE YEHOVA

10. Katapulelamo ekalelani ya makamaka osunza mwaha wa Yehova Mulugu.

¹⁰ Osunza mwaha wa Yehova eji ttarho ya makamaka ya onfiyedhana iyene. Eji elobo ehigafanyeeli ogoma.Weyo kookala otakulu na mattiyu siku na oridha vaddiddi bugotta motto, weyo ogahittiya mottoya olala nanda buttima? Nne. Weyo welege wikavovi kuni wila mottoya ottiddegevi. Txino egumi yawo engayela motto ottiddagavi! Ninga kuni dhinttiddiha motto, na mukalelo wakakene ‘eziwelo ya Mulugu’ enolibiha okwela wehu na Yehova.​—Gano 2:1-5.

11. Yodhavo gani yana masunziho a Yezu mmirimani mwa anamafara aye?

¹¹ Yezu wafuna wila anamafara aye amukwelegevi Yehova vina akwelegevi na guru Nzu Naye na ttima na ebaribari. Mumaleliye ovenya mu okwani, Yezu wahasunziha anamasunza eeli mwaha wa mavuhulo meena ali mMaleboni a Ebraiko abene aasoriheya mwa iyene. Yadhilevo txini? Musogorhomwa awene aahiloga dhahi: “Kanewa murima wehu oviha mu dila, iyene anitapulelaga mazu a malebo Okoddela?”​—Luka 24:32.

12, 13. (a) Mwari mwa attu enjiya a nlogo na attu ovanene, txini epadduweli omukwela Mulugu vina omukwela Bibilia? (b) Niwodhe dhavi obarela okwela wehu wila onaridhe?

¹² Mudhidhi waromiliwe osunza esile dhinsunziha Bibilia, murima wawo wahikala ninga onttidda motto na ohagalala, na guru vina na omukwela Mulugu? Mohaganyedha weyo wahikosa ejene. Attu enjene aahiwa na mukalelo wakakene. Ovanene nivurhanona tta okaanavi okwela oku onddimuwa vina wunuwihagavi okwelawa. Iyo kaninfuna otagihaga emanya ya elabo ya ovanene. Yezu wahibaza ologa wila: ‘Okwela wa attu enjiya onela oridha.’ (Mateu 24:12) Owodhe dhavi obarela wila omukwela Yehova vina okwela ebaribari ya Bibilia onaridhe?

¹³ Kadhowavi bugasunza mwaha wa Yehova Mulugu vina wa Yezu Kristu. (Joau 17:3) Katanaalela vaddiddi esile dhinsunziwe mu Nzu na Mulugu bugavivuza: ‘Eji enddisunziha eni mwaha wa Yehova Mulugu? Sabwa gani dhowenjedhedha dhinddivaha eji wila ddimukwele iyene na murima waga wotene, na mubuwelo waga wotene, vina na egumi yaga yotene?’ (Kengesa 1 Timóteo 4:15.) Otanaalela oku onela wukamiha omukwelagavi Yehova na guru.

14. Nlobelo ninnikamiha dhavi okaanavi okwela wehu na Yehova?

¹⁴ Mukalelo mwina wa okaanavi okwela wawo na Yehova okalaga ninga onttidda motto ku olobelaga wili wili. (1 Tesalónika 5:17) Mu Kapitulu 17 ya nivuru ntti, iyo nihisunza wila nlobelo obu mvaho wong’animela odhile wa Mulugu. Moladdana na wandana wa attu onliba sabwa ya ologaga makani motapuwa, na mukalelo wakakene nigalobelaga wa Yehova wili wili wandana wehu na iyene onelege olibavi. Txipo kaninfanyeela ottiya malobelo ehu otuwa ttima. Bakala mazu anlogitxihu s’ohikaana ntapulelo na txibarene. Ninofanyeela ologaga na Yehova ninga mugalogeli mwana na babi wokwela. Txibarene, Iyo ninfuna nilogege na nriho, nilogege motapuwa, nilogege na ebaribari, vina nilogege ovenyedha vati va murima. (Masalmo 62:8) Noona, nsunzo na muttu yeka vina nlobelo na murima wotene ttofuneya mu webedhani wehu, nanda esi dhinonikamiha okalavi mu okwelani wa Mulugu.

KAHAGALALA SABWA YA OMWEBEDHA YEHOVA

15, 16. Ninfanyeelela eni woona deretu mabasa a olaleya Omwene ninga gari vina ninga yuma?

¹⁵ Nsunzo na Bibilia na muttu yeka vina nlobelo, aba merelo a webedha anfanyeelihu okosaga banilivo noka. Mwa dhahene, ovanene ndoweni noone mukalelo wa webedha obwene onkosiwa numba na numba: walaleyela attu eena mwaha wa esile dhinsunzihu. Weyo ohapanga attu eena ebaribari ya Bibilia? Akala ohikosa ejene, weyo wahikaana mudhidhi waderetu vaddiddi. (Luka 1:74) Nigaapangaga attu eena ebaribari ejile esunzilihu mwaha wa Yehova Mulugu, iyo ninosoriha mabasa a makamaka vaddiddi abene avahiwe Akristu otene a ebaribari. Mabasa aba ba olaleya bili yaderetu ya Omwene wa Mulugu.​—Mateu 24:14; 28:19, 20.

¹⁶ Murumiwi Paulo woona orumiwi waye ninga elobo ya ttima, mpaka otxemerha orumiwi obu okala yuma. (2 Korinto 4:7) Mabasa aderetu vaddiddi agafanyeeliwe okosa, ba wapanga attu eena mwaha wa Yehova Mulugu vina dhifunelo dhaye. Aba mabasa agamukoseliwe Nabuya waderetu vaddiddi, vina eji enela wuvaha dhopuramo dhaderetu vaddiddi. Modheela okosaga mabasa aba, weyo onowakamiha attu a murima waderetu onfiyedha Babi wehu wa odhulu vina oroma weedda mu dila ya wigumini ya mukalakala! Mabasa gani agakalile oohagalaliha vaddiddi? Mowenjedhedha, ovaha onamoona mwaha wa Yehova na Nzu naye onowenjedhedha nroromelo nawo vina onolibiha omukwela iyene. Vina Yehova onotamaalela guru dhawo. (Ahebreu 6:10) Okosaga mabasa aba wili wili onowukamiha okalavi mu okwelani wa Mulugu.​—Kengesa 1 Korinto 15:58.

17. Orumiwi wa Okristu okaleli eni wa omaguva?

¹⁷ Ja makamaka wubuwela wila mabasa a olaleya Omwene ba omaguva. Bibilia onloga dhahi: ‘Kalaleya nzu, kakosaga ejene na omaguva.’ (2 Timóteo 4:2) Okosa eji okaleli eni wa omaguva? Nzu na Mulugu ninonipanga dhahi: ‘Nihaddamela siku nddimuwa na Yehova. Nihaddamela nanda ninomaguva vaddiddi.’ (Sofoniya 1:14) Indde, mudhidhiya onodha na omaguva vanfuna Yehova ogomiha elabo eji yotene yabure. Attu anofanyeela opangiwa! Awene anofanyeela oziwa yawila ovanene bu mudhidhi wa omusakula Yehova ninga Mulamuleli wawa Munddimuwa. Omagomo ‘kunayeluwe.’​—Habakuk 2:3.

18. Ninfanyeelela eni omwebedha Yehova vamentoni va attu otene vamodha na Akristu a ebaribari?

¹⁸ Yehova onfuna wila iyo nimwebedhege vamentoni va attu otene vamodha na Akristu a ebaribari. Ji sabwa ya ejene enlogela Nzu naye dhahi: “Nubuwelanege wi nilibihe okwela, othidda mabasa apama. Kanitxelele matugumano ehu, ninga eniraga eena; nilibihanege thabwa-thabwa apa vanziwehu wi siku na Nabuya nli vakuvi”. (Ahebreu 10:24, 25) Nigatugumana na Akristu akwihu mmatugumanoni a Okristu, nihikaana gari yaderetu vaddiddi ya omutamaala vina ya omwebedha Mulugu wehu wokweleya. Vina ninowaralihana nanda vina ninolibihana muttu na mukwaye.

19. Niwodhe dhavi olabela olibiha mafunddo a okwela mmulogoni wa Okristu?

¹⁹ Nigatugumanaga na anamebedha eena a Yehova, ninolibiha mafunddo ehu a okwela vina a omarho mmulogoni. Jaderetu iyo otamelaga mikalelo dhaderetu mwa attu akwihu, sabwani Yehova ontamela ejile eli yaderetu mwa iyo. Kujeedhele wila abali awo a omuyani akale owakwana. Kobuwela wila otene ahikaana muddidda wottiyana ttiyana wa wunuwa omuyani, nanda yawila muttu wotene mwa iyo onovonya. (Kengesa Kolosi 3:13.) Katamela wunuwiha omarho na abale animukwela vaddiddi Yehova, venevo onela woona wila onowunuwa omuyani. Indde, omwebedha Yehova vamodha na abali vina arogori awo a omuyani onela wukamiha okalavi mu okwelani wa Mulugu. Yehova onattuva dhavi abale animwebedha iyene na ororomeleya nanda dhahene ankalavi mu okwelani mwaye?

KATTIDDEELA ‘EGUMI YA EBARIBARI’

20, 21. ‘Egumi ya ebaribari’ txini, nanda ntti nikaleli eni njeedhelo notikiniha?

²⁰ Yehova onowattuva egumi adhari aye oororomeleya. Ki eji egumi ya mukalelo gani? Weyo ohikalawo wene ovanene? Enjene mwa iyo agalogile wila iyo nihikalawo. Sabwani ninovuma, ninoja vina ninomwa. Txibarene iyo ninokalawo. Vina mmidhidhini dhehu dha ohagalala vaddiddi, iyo vina poddi ologa wila: “Ovanene iyo ninojavo wene egumi kakamwe!” Txibarene Bibilia onlagiha wila, na mukalelo wa makamaka, kuli muttu wa omaningoni onjavo wene egumi.

²¹ Nzu na Mulugu ninonikokomezela ‘ottiddeela moliba egumi ya ebaribari.’ (1 Timóteo 6:19) Mazu abale antonyihedha wila ‘egumi ya ebaribari’ elobo enjeedhelihu ofanya musogorho. Indde, nigakala attu owakwana, venevo panakaligihuwo mowiwanana na mutapulelo wa mazu aba, sabwani ninelege okalawo ninga mwanifunelana Mulugu omaromo. Nigakalagawo mparaizu mwilaboni ya vati na egumi yokala kakamwe, murenddele, na osanzaya, pa venevo vanajigihuvo ‘egumi ya ebaribari’​—egumi ya mukalakala. (1 Timóteo 6:12) Ntti kayo njeedhelo notikiniha vaddiddi?

22. Weyo owodhe dhavi ‘ottiddeela moliba egumi ya ebaribari’?

²² Niwodhe dhavi ‘ottiddeela moliba egumi ya ebaribari’? Na mazu akakene, Paulo wahalibiha Akristu ‘wila akose oderetu’ vina ‘wila areele mmabasani aderetu.’ (1 Timóteo 6:18) Txibarene, enddimuwaya engayela mukalelo onttiddihedhihu mabasa ebaribari emalilihu osunza mBibiliani. Paulo wafuna aloge wila iyo ninakele ‘egumi ya ebaribari’ sabwa ya okosaga mabasa aderetu? Nne, mwaha wa njeedhelo ntti notikiniha txibarene engayela iyo wakela ‘mahala’ a Mulugu. (Roma 5:15) Txibarene Yehova onoziveliwa wattuva abale animulaba iyene na nroromelo. Iyene onofuna wuwoona bugajavo ‘egumi ya ebaribari.’ Abale ankalavi mu okwelani wa Mulugu poddi ojeedhela ojavo egumi eji ya mukalakala yosanzaya vina ya murenddele.

23. Ekaleli eni ya makamaka okalavi mu okwelani wa Mulugu?

²³ Kadda muttu wa iyo onofanyeela ovivuza: ‘Ddinomwebedha Mulugu mowiwanana na mukalelo otonyihedhiye mBibiliani?’ Akala ninovipepesa siku na siku, banoona wila ninomwebedha Mulugu mowiwanana na mukalelo otonyihedhiye mBibiliani, venevo nili mu dila yaderetu. Iyo poddi okaana nikuluvelo nawila Yehova ddi vottawela vehu. Iyene onela okoya nlogo naye nororomeleya mmasikuni oomariha a makattamiho a elabo eji yowuluvala. Yehova vina onela onivuna banivolowa mwilaboni eswa yong’animela ejene eli vakukuvi. Ntto ninakale nsaka nohagalaliha vaddiddi! Vina enazivani sabwa yawila iyo nahisakula deretu mwari mwa masiku aba oomariha! Weyo ogasakula deretu ovanene, onela ojavo ‘egumi ya ebaribari,’ egumi ejene enaddana Yehova Mulugu, mpaka mudhidhi wohimala!