Kwalula
23 Mbalau yalweza Mbalake ngwenyi: “Tunga yilumbilo shimbiali, lulieka kuji a ngombe shimbiali ni kuji a mapanga shimbiali.” 2 Hazehene Mbalake yalinga yize Mbalau amulwezele. Mbalake ni Mbalau yalambula kuji a ngombe umuwika ni kuji a panga umuwika ha chilumbilo ni chilumbilo. 3 Mbalau yalweza Mbalake ngwenyi: “Sala hano ni mulambu we wa kwocha, yami ngunachiya akuze. Hanji Yehova mahanjika ni yami. Mungukulweza yeswe yize iye mangulweza.” Chocho iye yaya ha umwe mulundu haze te kuheshi mitondo.
4 Chocho Zambi yasoloka kuli Mbalau, mba Mbalau yamulweza ngwenyi: “Nalulieka yilumbilo shimbiali, nalambula kuji a ngombe umuwika ni kuji a panga umuwika ha chilumbilo ni chilumbilo.” 5 Yehova yasa maliji wano mu kanwa lia Mbalau ngwenyi: “Hiluka kuli Mbalake, yino ye watamba kumulweza.” 6 Chocho Mbalau yahiluka, yamona Mbalake ni miata eswe a Moape kanamana hakamwihi ni mulambu wenyi wa kwocha. 7 Mba iye yata chishima chino ngwenyi
“Mbalake mwanangana wa Moape kanguchijile ku Arame,
Chize ku milundu ya ku chivumbuko ngwenyi:
‘Tweya ungushingile Yakomba.
Ewa, tweya unguhishile Izalele.’
8 Kuchi munguhasa kushinga waze Zambi kashingile?
Kuchi munguhasa kuhisa waze Yehova kahishile?
9 Hano ha milundu ya mawe nguli, ngunaamono,
hano ha milundu ngunaamono.
Kali atu waze atwama ukawo;
keshi kulichinga ni mavungu akwo.
10 Iya mahasa kwalula fufuta ya Yakomba
Hanji chihanda chamuchiwana cha Izalele?
Ngufwe ngwe chize akufwa akwa-ululi,
Songo liami lipwe ngwe lia ayo.”
11 Chocho Mbalake yalweza Mbalau ngwenyi: “Yika wangulinga? Yami nakuneha hanga ushinge akwa-kole jami, alioze yena unaawahisa.” 12 Iye yamukumbulula ngwenyi: “Shina chatambile kuhanjika yeswe yize Yehova masa mu kanwa liami?”
13 Mbalake yamba ngwenyi: “Lisesa, tweya kama ni yami ku chihela chikwo kuze muukamwena. Mukamona wika amwe a kuli ayo, kuuchi kamona eswe. Kwenako mukaashingila.” 14 Chocho Mbalake yamutwala mu munda wa Zofime ha mulundu wa Pisiga, yatungaho yilumbilo shimbiali, yalambula kuji a ngombe umuwika ni kuji a panga umuwika ha chilumbilo ni chilumbilo. 15 Mbalau yalweza Mbalake ngwenyi: “Yena sala hano ni mulambu we wa kwocha, yami munguchiya akuze hanga nguhanjike nenyi.” 16 Mba Yehova yasoloka kuli Mbalau, yasa maliji wano mu kanwa lienyi ngwenyi: “Funa kuli Mbalake, yino ye watamba kumulweza.” 17 Iye yaya ndo kuli Mbalake, yamuwana kanamana ni mulambu wenyi wa kwocha ni miata A-Moape. Mbalake yamuhula ngwenyi: “Yika Yehova akulweza?” 18 Ha kumukumbulula, iye yata chishima chino:
“Lilulieke, Mbalake ni kungupanjika.
Ngupanjike, yena mwana wa Zepore.
19 Zambi keshi kulionga ngwe chize atu akulinga,
Hi mwana-mutu ko hanga alumune manyonga jenyi.
Iye nyi mamba chuma, shina keshi kuchilinga?
Nyi mahanjika, shina keshi kumanununa yize akulakenya?
20 Iye hananguneha hanga nguwahise atu wano;
Haliapwila iye hawahisa, kashika chichi kuhasa kulinga nichimwe.
21 Iye keshi kutayiza hanga spiritu ya munanyi yilimike ni Yakomba,
Chipwe kwecha A-Izalele amone lamba.
Yehova Zambi yo kali hamwe no,
Kakumuvuluka ngwo, mwanangana wo.
22 Zambi kaachiza ku Engitu.
Kuli ayo iye kali ngwe mbinga ja kuji a mbau.
23 Mumu kukushi yipanda-panda yize muyilimika ni Yakomba,
Chipwe kutaha chize muchilimika ni Izalele.
Haliapwila mahasa kwamba hakutwala kuli Yakomba ni Izalele ngwo:
‘Talenu yuma yize Zambi alinga!’
24 Atu wano makatuka ngwe ndumba,
Mamana ngwe ndumba.
Ngwe ndumba yoze keshi kuutama ndo muze malia yifwo ya kashitu yoze akwata
Ni kunwa manyinga a kashitu yoze ashiha.”
25 Chocho Mbalake yalweza Mbalau ngwenyi: “Nyi kuuchi kuhasa kwashinga, kuwatambile kwawahisa.” 26 Mbalau yakumbulula Mbalake ngwenyi: “Chakulwezele ngwami mungulinga yeswe yize Yehova mangulweza?”
27 Mbalake yalweza nawa Mbalau ngwenyi: “Lisesa, tweya kama hanga ngukutwale ku chihela chikwo. Hanji kuzekwene Zambi wamwenemwene matayiza hanga ungushingilewo.” 28 Chocho Mbalake yatwala Mbalau ku mulundu wa Peore, kuze te mahasa kumona puya ya Njeshimone. 29 Mbalau yalweza Mbalake ngwenyi: “Tunga hano yilumbilo shimbiali, lulieka kuji a ngombe shimbiali ni kuji a panga shimbiali.” 30 Chocho, Mbalake yalinga yize Mbalau amulwezele, yalambula kuji a ngombe umuwika ni kuji a panga umuwika ha chilumbilo ni chilumbilo.