Kwalula
24 Muze Mbalau amwene ngwenyi, Yehova kanawahisa A-Izalele, iye yalitwamina kuya ni kufupa nawa yuma ya yipanda-panda, alioze yatalikisa meso jenyi mu puya. 2 Muze Mbalau ahetwile meso jenyi, yamona A-Izalele hasa yilombo kulita ni minyachi yo. Hazehene spiritu ya Zambi yiyiza hali iye. 3 Chocho, iye yata chishima chino ngwenyi:
“Wano kali maliji a Mbalau, mwana wa Mbeore,
Maliji a mutu yoze azulula meso jenyi,
4 Maliji a yoze wakwivwa maliji a Zambi,
Yoze wamona usolwelo wa Mukwa-Ndundo-Jeswe,
Yoze wafulamana hashi ni meso awashi:
5 Mbalaka je jipema chinji, yena Yakomba,
Mbalaka je jipema chinji, yena Izalele!
6 Jili ngwe yikulo yize yinalilongo kusuku,
Ngwe minda yize yili hakamwihi ni lwiji,
Ngwe mitondo ya aloa ya kutumba kuli Yehova,
Ngwe sedru jize jili hakamwihi ni lwiji.
7 Meya kanasupwoka mu milondo yenyi yaali,
Mbuto jenyi ja kutumba hakamwihi ni meya anji.
Mwanangana wenyi makapwa munene chinji kuhiana Agage,
Wanangana wenyi makauhalisa.
8 Zambi kanakaachiza ku Engitu;
Iye kali kuli ayo ngwe mbinga ja mbau.
Iye makaumbula mavungu, akwa-kole jenyi.
Makafwenya yifwaha yo ni kwanongesa ni mivi yo.
9 Iye yapatama, yautama ngwe ndumba,
Iya mahasa kulawisa ndumba?
Waze mamuwahisa, no maawahisa.
Waze mamushinga, no maashinga.”
10 Chocho, Mbalake yevwila Mbalau uli unji. Mba Mbalake yalamba moko jenyi pwaa, yamba kuli Mbalau ngwenyi: “Yami nakusanyika hanga ushinge akwa-kole jami, alioze yena wawahisa ha yisuho yeswe yitatu. 11 Haliapwila, yako ku zuwo lie. Yami te ngunazange kukulemesa, alioze Yehova kazangile hanga ngukulemese.”
12 Mbalau yamba kuli Mbalake ngwenyi: “Ngwami nalwezele mikeji je ngwo: 13 ‘Chipwe ngwe Mbalake mangwaha zuwo lienyi lia too ni prata ni oru, yami chichi kuhasa kulinga chuma nichimwe, chipema hanji chipi, chize muchihiana shimbi ya Yehova. Yami munguhanjika wika yize Yehova mangulweza.’ 14 Haliapwila, ngunayi kwami kuli atu jami. Alioze shimbu kanda nguchiya, mana ngukulweze yize atu wano makalinga kuli atu je kulutwe lia matangwa.” 15 Chocho, iye yata chishima chino ngwenyi:
“Wano kali maliji a Mbalau mwana wa Mbeore,
Maliji a mutu yoze azulula meso jenyi,
16 Maliji a yoze wakwivwa maliji a Zambi,
Maliji a yoze uli ni chinyingi cha mwe Chitunda.
Maliji a yoze wamona usolwelo wa Mukwa-Ndundo-Jeswe,
Ha kufulamana hashi ni meso awashi:
17 Mungukamumona, alioze hi haliapwila ko;
Mungukamutala, alioze hi musono ko.
Katongonoshi makavumbuka kuli Yakomba,
Lukanda makasoloka muli Izalele.
Iye makapula huma lia Moape
Ni kola lia tujita jenyi eswe a ndundo.
18 Endome muyikapwa ya Izalele,
Ewa, Sere muyikapwa ya akwa-kole jenyi,
Alioze, Izalele makasolola hamu lienyi.
19 Kuli Yakomba umwe makayula,
Makanongesa waze makasala mu mbonge.”
20 Muze iye atalile kuli A-Amaleke, yanunga ni chishima chenyi ha kwamba ngwenyi:
“A-Amaleke kali vungu litangu hakachi ka mavungu,
Alioze, ku songo makaanongesa.”
21 Muze atalile kuli A-Kene, Mbalau yanunga ni chishima chenyi ngwenyi:
“Zuwo lie likolo, zuwo lie lia kutungila ha liwe.
22 Alioze umwe makashiha A-Kene ni kahia.
Mba tangwa lika A-Shure makamutwala mu undungo?”
23 Iye yanunga ni chishima chenyi ha kwamba ngwenyi:
“Mama yami! Iya makamona mwono muze Zambi makalinga yuma yino?
24 Maulungu makakatuka ku mbumbulu ya Kitime
Makapinjisa A-Shure,
Makapinjisa A-Epere.
Alioze, ni iye makamunongesa liakulu.”
25 Chocho, Mbalau yaya kwenyi, yafuna kumahio. Mbalake neye yaya mu jila yenyi.