10 Lia Lamba

TALA ha yizulie. Yizulie yeswe yinasolola limwe lamba lize Yehova anakatuma mu Engitu. Ha chizulie chitangu yena muhasa kumona chize Arone analambe mukombo mu Lwiji Nilu. Muze iye anakalinga chocho, meya eswe a mu lwiji yalumuka manyinga. Yishi eswe yafwa, lwiji yaputuka kunuka vumba lipi.

Lamba liamuchiali, Yehova yakandwisa mbwota a mu Lwiji Nilu. Ayo yanjila mu mbonge yaputuka kupihisa yuma yeswe—fornu, ndoho ja mbolo, nawa ni mihela—yeswe. Muze mbwota eswe hafwa, A-Engitu yaputuka kwalumbieka, yikupwa vumba lipi.

Nawa, Arone yalamba mukombo hashi, fufuta ya mavu yiyalumuka yikefwe. Yikefwe kali amwe tushitu akehe-akehe, kakusumana nawa kakuhumuka. Lamba liamuchitatu mu Engitu te lia yikefwe.

Lamba lieswe likwo linakaheta wika kuli A-Engitu, kuli A-Izalele liakaheteleko. Lamba liamuchiwana te jiji anene-anene, waze anakanjila mu mazuwo ja A-Engitu. Lamba liamuchitano linakashaha tushitu anji. Ngombe, ni mapanga, ni pembe ja A-Engitu kanakafwa.

Ha kusulaho, Mose ni Arone yanda uto yaukonga mwilu. Yiuneha mahute kuli atu ni tushitu. Lino lie te lamba liamuchisambano.

Kulutwe lia yino yuma, Mose yolola kwoko lienyi mwilu, nawa Yehova yatuma mihenyo ni chiwe. Chinakapwa chimwe chiwe chipi chinji chize te mu Engitu kanda achichimona kama.

Lamba liamuchinake te chizavu chinene cha mapasu. Te nilimwe tangwa kanda kuchipwa kama mapasu wano anji. Ayo yalia yuma yeswe yize chiwe chinakahichika.

Lamba liamuchilivwa te milima. Ha matangwa atatu, chifuchi cheswe yichipwa mu milima pwi, alioze A-Izalele yapwa mu pangu.

Hi kusuloho, Zambi yatuma atu jenyi hanga akwite manyinga a mwana-pembe hanji a mwana-panga helu lia yikolo yo. Mba, mungelo wa Zambi yapalika mu Engitu. Muze mungelo amwene manyinga jacho, kakashahile niumwe wa ku mazuwo jacho. Alioze, ku mazuwo eswe waze te kushi kukwita manyinga helu lia yikolo, mungelo wa Zambi yashaha ko tupula-majimo eswe ja atu ni tushitu. Lino te lie lamba liamuchikumi.

Ha kupalika cha lamba lino lia kasula, Falau yecha A-Izalele hanga aye kwo. Atu ja Zambi te hanalilulieka kulu hanga aye, kashika hakachi ka ufuku uzewene ayo yijituhuka mu Engitu.