Mose ni Arone Yaya Kuli Falau

MUZE Mose ahilukile ku Engitu, iye yalweza kuli ndumbwenyi Arone hakutwala ku yikomokeso yeswe. Muze Mose ni Arone asolwele yikomokeso yacho kuli A-Izalele, ayo yatayiza ngwo chochene Yehova kali hamwe ni ayo.

Mose ni Arone yaya ni kuhanjika ni Falau. Ayo yamulweza ngwo: ‘Yehova, Zambi ya Izalele, kanambe ngwo, “Echa atu jami aye, ha matangwa atatu, hanga ayo akanguwayile mu puya.”’ Alioze Falau yakumbulula ngwenyi: ‘Yami chanyingikine Yehova. Nawa chichikwecha A-Izalele hanga aye.’

Falau yevwa uli unji, mumu te atu kanazange kuhwima ku milimo hanga aye ni kuwayila Yehova. Kashika, iye yaputuka kwawezela milimo yikalu. A-Izalele yalamikiza Mose ha kapinjiso wacho, Mose yanyenganyana. Alioze, Yehova yamwamba ngwenyi, kanda ulipikala. Nawa Yehova yamba ngwenyi, ‘Yami mungushinjila Falau hanga eche atu jami aye.’

Mose ni Arone yaya ni kuhanjika nawa ni Falau. Ha tangwa liacho ayo yalinga chimwe chikomokeso. Arone yakonga mukombo wenyi hashi, yiwalumuka kapela munene. Mba alioze akwa mana ja Falau noo yachilinga. Alioze, tala! Kapela wa Arone yaputuka kumina tupela ja akwa mana a Falau. Chipwe chocho Falau kechele A-Izalele hanga aye kwo.

Yikwiza amwe mashimbu hanga Yehova ahane limwe longeso kuli Falau. Unanyingika chize iye anakalinga? Iye yatuma luyinda 10, hanji lamba mu Engitu.

Muze lamba hilioka, Falau yasanyika Mose yamwamba ngwenyi: ‘Chiza lamba, mba Yami ngweche Izalele hanga aye kwo.’ Alioze muze lamba te hiliahwa, Falau yanyonga cheka. Iye yalituna kwecha atu hanga aye kwo. Mba hi hakusula, kulutwe lia lamba liamuchikumi (10), mba Falau yatusula A-Izalele hanga aye kwo.

Yena unanyingika 10 lia lamba liacho? Fukula lifwo hanga tulilongese hakutwala ku luyinda wacho.