Luyinda Wamuchikumi

Mose yalakenya Falau ngwenyi, kechi kamumona nawa. Alioze shimbu te kanda achikatuka kumeso ja Falau, iye yamwamba ngwenyi: ‘Ha ufuku wa musono, ana eswe atangu amu Engitu, kukatuka kuli mwana mutangu wa Falau ndo kuli ana eswe atupinji, kumafwa.’

Yehova yalweza A-Izalele alulieke chimwe chiwanyino chilemu. Iye yaamba ngwenyi: ‘Shihenu mwana-panga wa mwaka umuwika hanji pembe, nawa kwitenu manyinga helu lia yikolo yenu. Ochenu kanawa yifwo, nawa yilienu hamwe ni mbolo yize kuyishi ufutunwiso. Zalenu mazalo jenu hamwe ni sapato, nupwe akulilulieka. Mumu ha ufuku wa musono ngunanutusula.’ Kuchi A-Izalele evwile ha chikuma chino?

Ha ufuku wacho, mungelo wa Yehova yaya ku mazuwo eswe A-Engitu. Ku mazuwo kuze kwakapwile chilayi cha manyinga ku yikolo, ana eswe atangu yafwa. Alioze mungelo yapalika helu lia mazuwo eswe waze apwile ni yilayi ya manyinga. Asoko eswe amu Engitu, pichi ni yiswale yafwisa ana jo. Alioze kuli A-Izalele kwakafwile mwana niumwe.

Ni mwana wa Falau neye yafwa. Hachino, Falau kakahashile nawa kulinga nichimwe. Hohene yalweza Mose ni Arone ngwenyi: ‘Katukenu. Tuhukenu mu chifuchi chino. Yenu nukawayile Zambi yenu. Andenu yimuna jenu hanga nuye!’

Muze kwilu hikwatoma too ni mweji, A-Izalele yatuhuka mu Engitu, kapwile akulilulieka mu usoko ni mu minyachi. A-Izalele eswe kapwile 600,000 malunga ni mapwo anji hamwe ni twanuke. Chikwo nawa, ni atu akwo anji waze te hi A-Izalele ko yaya hamwe no hanga awayile Yehova. Chocho, A-Izalele yaatusula mu undungo!

Mba ewuluke chize Yehova aalamwinyine, ayo te kakulinga chiwanyino chacho chilemu ha miaka yeswe. Chiwanyino chino te kakuchivuluka ngwo Chizomboka.