KWASA ATU AZANGE KUKUPANJIKA
LONGESO 7
Nunga ni Kukwasa Atu
Shimbi: “O anungine ni kulongesa ni kwambujola sango jipema.”—Yili. 5:42.
Yika Paulu Alingile?
1. Tala CHINEMA, hanji kutanga Yilinga 19:8-10. Mba nushimutwine yihula yino:
Kuchi Paulu anungine ni kukwasa atu waze te anazange kulilongesa umwenemwene chakuhona kuhonga, chipwe muze amwe te analimiki nenyi?
Ha yisuho yingahi Paulu afunyine ni kulongesa waze azangile kunyingika umwenemwene, chikwo nawa, ha mashimbu angahi achingile?
Yika Mutuhasa Kulilongesa Hali Paulu?
2. Yetu twatamba kusa mashimbu ni tachi hanga tufune ni kumeneka atu ni kuputuka malongeso a Mbimbiliya.
Imbulula Paulu
3. Yako ni kumeneka atu ha mashimbu waze muhasa kwawana. Lihule ngwe: ‘Ha mashimbu aka, chikwo nawa, kulihi kuze munguhasa kuwana mutu wacho? Tangwa lika lize iye mapwa ni mashimbu akuhanjika ni yami? Sako tachi hanga umumeneke chipwe ngwe mashimbu waze atesa kalitele ni katalilo we.
4. Tesenu tangwa lize munuhasa kuhanjika cheka. Hita chisuho chize munuhwisa kuhanjika, eseka kutesa mashimbu waze muhasa kuhanjika ni mutu ha chisuho chikwo. Sako tachi hanga uye ni kumeneka mutu wacho ha chihela ni tangwa lize nwatesanga.
5. Nunga ni kutalatala. Nyi chinapu chikalu kuwana mutu ku zuwo hanji kali ni yuma yinji yakulinga, watambile kulipupwisa kunyonga ngwe mutu wacho kazangile kulilongesa umwenemwene. (1 Kori. 13:4, 7) Nunga ni kweseka kufupa mutu wacho, alioze watamba kupwa ni shindakenyo ngwe unazachisa mashimbu je ni mana.—1 Kori. 9:26.