Chize Muputuka Lusango ni Tumafwo

Kukatuka ha Janeiro 2018, ha chifukilo cha Mukanda Wakuzachisa ha Kukunguluka cha Mwono ni Mulimo Wetu, ha kwiza maliji akuhanjika no. Kanatukolweza hanga tupwe ni kuhanjika ni atu chakuhona kwaha wika mikanda. Mba akwase akwa-kwambujola alinge kanawa mulimo wo, yinema ya maliji akuhanjika no yakusolola chize ayo mahasa kuputuka lusango ha kuzachisa wika Mbimbiliya. Shina chino chinalumbunuka ngwo kutwatambile kuzachisa mikanda muze tunambujola ku zuwo ni zuwo? Ka, mutuhasa kuzachisa! Chakutalilaho, tumafwo mutuhasa kukwasa ha kuputuka lusango. Mutuhasa kukaula chilweza chino, muze tunazachisa hita kalifwo:

1. Sakula chihula chize chili ha chifukilo cha kalifwo.

2. Solola kumbululo lia Mbimbiliya ha kuzachisa chisoneko chize chili helu lia lifwo liamuchiali. Nyi mutu wacho mapwa ni mashimbu, tanga ni kushimutwina yikuma yize yili mukachi ka lifwo.

3. Hana kalifwo kuli mwenya zuwo, nawa mukolweze hanga mwene akatange sango jize kunwatangile.

4. Shimbu kanda ukatuka, musolwele chihula chinambe ngwo “Achi Nyonga Kama,” nawa litesenu hanga ukeze ni kumwaha kumbululo lia Mbimbiliya lia chihula chacho.

Muze mufunako, mukumbulule nawa muhichikile chihula chize munukashimutwina ha tangwa likwo. Muhasa kwanda chihula mu site yetu hanji mu mukanda uze anatongola kunyima lia ka lifwo. Ha shimbu lialita, musolwele mukanda Sango Jipema ja Kuli Zambi! hanji mukanda ukwo wa mu Mushete wa Yikwataya Kulongesa Nayo.