Malongeso a Mukanda Wakuzachisa ha Kukunguluka cha Mwono ni Mulimo Wetu
2-8 NOVEMBRO
YIKUMA YILEMU YA MU LIJI LIA ZAMBI | KUTUHUKA 39-40
‘Mose Yalinga Nikulita ni Yeswe Yize Yehova Ambile’
(Kutuhuka 39:32) Chocho milimo yeswe yahwile ya Tabernakulu ni ya mbalaka ya chikungulwila. A-Izalele yalinga nikulita ni yeswe Yehova ambile kuli Mose. Chocho alingile.
w11 15/9 27 ¶13
Shina Yehova Kanakunyingika?
13 Kulisa ni atu akwo, ‘ha kushimbika Mose wahianyine atu eswe apwile hashi.’ (Kwa 12:3) Iye kasolwele kulikesa ha kukaula usongwelo wa Yehova. (Kut 7:6; 40:16) Kukushi chuma nichimwe chize chinasolola ngwo, Mose kapwile ni kuhamika yiyulo ya Yehova hanji kupihilila ha kukawula usongwelo wenyi. Chakutalilaho, Yehova kahanyine usongwelo wa chize te matunga tabernakulu mu yimako-yimako, ngwe ulombo wa linyu ni unji wa maswi waze te masa ku hina lia ku mbalaka. (Kut 26:1-6) Musono, nyi umwe ndumbu yoze ukwete yiteli makwaha umwe usongwelo mu yimako-yimako hanga uukawule, hanji muhasa kupihilila. Alioze Yehova kali mwata mungunu yoze wakuhana yiteli ni mbunge yeswe kuli tuvumbi twenyi ni kwajikijila. Muze akuhana usongwelo mu yimako-yimako, kakuuhana ni nyonga lialita. Kwamba pundu, Mose kakevwile kupiha muze Yehova amuhele usongwelo mu yimako-yimako hanji kumona ngwe Yehova kanamulelesa hanji ngwo, kanamumono ngwe kanyingikine nichimwe. Shimbu anyonge chocho, Mose yasa tachi hanga yilangaji alinge milimo “nikulita ni yeswe Yehova ambile.” (Kut 39:32) Mose te kakulikehesa chinji! Mose kanyingikine ngwenyi, mulimo wapwile wambala wa Yehova, iye te kanamuzachisa wika hanga aulinge.
(Kutuhuka 39:43) Mose yatala milimo yeswe, kumanyi te halinga yeswe chizechene ngwe Yehova hamba, chocho hayilinga, mba Mose yaawahisa.
(Kutuhuka 40:1, 2) Yehova yamba kuli Mose ngwenyi, 2 Ha tangwa litangu lia kakweji mutangu ukamike ye Tabernakulu ya mbalaka ya chikungulwila.
(Kutuhuka 40:16) Chocho Mose walingile nikulita ni yeswe Yehova amwambile. Chocho chialingile iye.
w05 7/15 27 ¶3
Shina Wakushishika mu Yuma Yeswe?
3 Mukanda wa Hepreu 3:5 unambe ngwo, “Mose chamwenemwene wapwile mukwa jika.” Yika yapwishile profeta Mose mukwa jika? Ha kutunga tabernakulu, “Mose walingile nikulita ni yeswe Yehova ambile. Chocho chialingile iye.” (Kut 40:16) Ngwe tuvumbi twa Yehova, twakusolola ushishiko wetu ha kumuwayila ni kumwononokena. Chikwo nawa, twakushishika muze twakupalika mu yeseko yikalu chinji. Alioze, hi wika ko kukumba yeseko yikalu muchisolola ngwo twashishika. Yesu kambile ngwenyi, “Yoze mashishika ni yuma yikepekepe, mashishika nawa ni yuma yinene; yoze mahengesa ni chuma chikepe, mahengesa ni chinene.” (Lu 16:10) Twatamba kushishika chipwe ha yuma yize muyisoloka ngwe yikehe.
Kuhengwola Yikuma Yilemu ya mu Mbimbiliya
(Kutuhuka 39:34) ni chifuko cha kutonga cha malambu a kuji a mapanga a kulomba achila, ni chifuko cha kutonga cha malambu a yipanyundu, ni hina lia chikalakala lia kufuka nalio;
it-3 219 ¶4
Malambu A Yipanyundu
Chize A-Izalele Apwile ni Kwawana. Nyi liji lia Mbimbiliya linambe ngwo, taʹchash linahanjika ha yipanyundu alisa, chihula chili ngwo, kulihi A-Izalele awanyine malambu a yipanyundu? Chipwe ngwe yipanyundu kakutwama kuma kuze kukwete chishika chinji, nihindu yipanyundu akwo kakuzanga kutwama kuze kunasasaminya. Musono, amwe yipanyundu kakutwama ku kalunga-lwiji Mediterrâneo, nihindu akwo kakutwama ku ngiji jikwo kuze kwasasaminya chinji. Hakupalika cha miaka, atu yaputuka kushiha chinji yipanyundu, hachino yatepuluka, alioze ku mashimbu akunyima tushitu wano kapwile anji ku kalunga-lwiji Mediterrâneo ni Kalunga-lwiji Muchila. Ha mwaka 1832 mukanda wa Calmet wambile ngwo: “Mu matungu anji akehe-akehe a mu Kalunga-lwiji Muchila, ku chikulo cha península ya Sinai kwatwama yipanyundu anji.” (Edição em inglês do Dicionário da Bíblia Sagrada)
(Kutuhuka 40:34) Mba lelwa yilifuka ye mbalaka ya chikungulwila. Ye Tabernakulu yiyizala ni uhenya wa Yehova.
w15 15/7 21 ¶1
Shina Mulimo we Kakuulemesa?
Muze ahwishile kutunga tabernakulu, “lelwa yilifuka ye mbalaka ya chikungulwila. Ye Tabernakulu yiyizala ni uhenya wa Yehova.” (Kut 40:34) Chino chasolwele utayizo wa Yehova! Kuchi Mbezalele ni Aholiambe evwile ha mashimbu jacho? Chipwe ngwe majina jo kakaasonekene ha yikumba yize alingile, nihindu kevwile kuwaha hakunyingika ngwo, Zambi kapwile ni kuwahisa tachi jo. (Yis 10:22) Hakupalika cha miaka, yawahilila chinji hakumona chize anungine ni kuzachisa yikumba yize alingile mu uwayilo wa Yehova. Muze makaahindwisa mu chifuchi chaha, Mbezalele ni Aholiambe makawahilila hakunyingika ngwo, tabernakulu kayizachishile mu uwayilo wa mwenemwene ha unji wa miaka 500!
Kutanga Mbimbiliya
(Kutuhuka 39:1-21) Mba ku mahina alauluka, ni a ufungo, ni ngengu, o yatonga ni ulangaji mazalo a kuvumbikila muma musandu. Yatonga mazalo asandu a Arone chizechene ngwe Yehova ambili kuli Mose. 2 Iye yatonga ye efode ya oru, ni ya mahina alauluka, ni a ufungo, ni a ngengu, ni a linyu lipema. 3 Yatatula ye oru yikapwe chipenya chilelu, hikuyiteta sambu akayisepekenye ku mahina alauluka, ni a ufungo, ni a ngengu, ni a linyu lipema. Chitanga cha chilangaji. 4 Yayilingila yipaya ya kutokekenya, kwe ku masongo jayo aali yayitokekenyena. 5 We muya wa ponda wa ulangaji, uze wapwileho wa kuyijichika, wapwile wa hina limuwika, wa milimo yimuwika wa oru wa mahina alauluka, ni a ufungo, ni a ngengu, ni a linyu lipema, chizechene ngwe Yehova ambile kuli Mose. 6 Yatota mawe a sardonica a kunjisa mu maselo ja oru a kwola ngwe kwola cha ha kazeya nikulita ni majina ja ana a Izalele. 7 Yaanangika ha yipaya ya ye efode akapwe mawe a chiwulwiso hali A-Izalele, chizechene ngwe Yehova ambile kuli Mose. 8 Yalinga chipwiko, chitanga cha chilangaji, chalifwa ni milimo ya efode te cha oru, cha mahina alauluka, ni a ufungo, ni a ngengu, ni a linyu lipema. 9 Malumbu eswe jacho a kulita ndwa lume, cha kupama. Usuhe wacho wa chikambakamba chimuwika; utohe wacho wa chikambakamba chimuwika; cha kupama. 10 Yanjisamo mikala yiwana ya mawe. Mukala wa mawe a sartiu, ni a topajiu, ni a carbunkulu; ano apwile mukala utangu. 11 Mukala wamuchiali wa esmeralda, ni safwira, ni diamante. 12 Mukala wamuchitatu wa jasendu ni agata ni ametita. 13 Mukala wamuchiwana wa turkeza, ni sardonica, ni jasepe. A kunjisa mu maselo jo ja oru. 14 E mawe apwile nikulita ni majina ja ana a Izalele te kumi ni aali nikulita ni majina jo ngwe kwola cha ha kazeya, vungu lieswe nikulita ni jina lialio, kumi lia mavungu ni mavungu aali. 15 Yafulila ha chipwiko malenge aali ngwe mihipu ya kuhosa ya oru ya kusayisa. 16 Yafula maselo aali a oru ni ngo jiali ja oru; yasela ngo jiali ku masongo aali a ku chipwiko. 17 Yanjisa malenge aali a oru ya kuhosa mu ngo jiali jize jili ku masongo ja chipwiko. 18 Mba masongo aali akwo a malenge a oru ya kuhosa yaanjisa mu maselo aali, yasa kuze kulutwe ha yipaya ya efode. 19 Yafula ngo jiali ja oru, yajisela ku masongo aali a ku chipwiko ha ukundwilo wacho wa muchima uze walihata ni efode. 20 Yafula ngo jiali ja oru, yajisa kulutwe ha chihanda cha kushi cha yipaya yiali ya ye efode, kusulangana ni unungino wayo helu lia muya wa ponda wa ulangaji wa ku efode. 21 Yakashila chipwiko ku ngo jacho ni ku ngo ja ku efode ni wanda ulauluka, hanga chikapwe ha muya wa ponda wa ulangaji wa ku efode, hanga chipwiko kuchichi kakasuluka ku ye efode chizechene ngwe Yehova ambili kuli Mose.
9-15 NOVEMBRO
YIKUMA YILEMU YA MU LIJI LIA ZAMBI | ULEVI 1-3
“Chikuma Chize Apwile ni Kuhanyina Milambu”
(Ulevi 1:3) Nyi mulambu wenyi muupwa ngombe, akapwe mulambu wa kulumba, akamulambule kuji keshi chipa. Akamulambule ku chikolo cha mbalaka ya chikunglwila, akamutambule kwe ku meso ja Yehova.
(Ulevi 2:1) Muze umwe malambula mulambu wa wunga kuli Yehova, mulambu wenyi ukapwe wa wunga wafufunuka. Akaseho maji a olevwe ni libano.
(Ulevi 2:12) Muhasa kuyilambula kuli Yehova ha mulambu wa mbuto yitangu, alioze kanda yiya ha chilumbilo ha lupembo mupema kuli Yehova.
it-3 120
Milambu
Mulambu wa kulumba. Mulambu wa kulumba te kakuuhana weswe kuli Zambi, nichimwe chihanda cha kashitu te keshi kuchichiza kuli tuvumbi twenyi. (Tesa ni Kuy 11:30, 31, 39, 40) Ayo kapwile ni kuhana mulambu wa kulumba hanga apwe ni utayizo wa Yehova, ha mukunda wa shili yize apwile ni kulinga. Ngwe “mulambu wa kulumba” Yesu Kristu yahana, mujimba wenyi weswe kuli Zambi.
it-3 123 ¶5
Milambu
Mulambu wa wunga. Mulambu wa wunga te kakuuhana hamwe ni mulambu wa sambukila, mulambu wa kulumba ni mulambu ha shili, amu yapwile milambu yitangu, ha mashimbu amwe kapwile ni kulihanyinayo. (Kut 29:40-42; Lev 23:10-13, 15-18; Kwa 15:8, 9, 22-24; 28:9, 10, 20, 26-28) Milambu yino te kakuyihana hanga asakwilile Yehova ha kupwa chihanyi ni kwawahisa. Kanji-kanji te kakuyihana hamwe ni maji ni insensu. Mulambu wa wunga te watamba kupwa wa wafufunuka, wa mbuto te watamba kupwa wa kwangiliza ni kahia, hanji wa mbolo ya kwocha ha jiko. Yihanda yimwe ya milambu ya wunga te kakuyisa ha chilumbilo cha mulambu wa kulumba, yikwo te kakuyilia kuli asasendote nawa milambu ya sambukila kavumbi yoze wapwile ni kuyihana neye kapwile ni kuyilia. (Lev 6:14-23; 7:11-13; Kwa 18:8-11) Ayo te katambile kuhana niumwe mulambu wa wunga uze uli ni futunwiso hanji “wuchi” ha chilumbilo, (uchi anambe hano hi wa puka ko) mumu yuma yino te muyihasa kuufutunwisa.—Lev 2:1-16.
(Ulevi 3:1) Nyi kachi mulambu wenyi muukapwa chitapo cha sambukila, kachi malambula wa ngombe, chipwe kuji, chipwe chihwo, akamulambule keshi chipa kumeso ja Yehova.
it-3 121 ¶1
Milambu
Mulambu wa sambukila. Milambu ya sambukila yize Yehova aapwile ni kutayiza te yakufunyisa sambukila hali iye ni A-Izalele. Kavumbi yoze wapwile ni kuhana mulambu wacho kapwile ni kulia hamwe ni usoko wenyi mu (yiize ya tabernakulu kulita ni mianda yo, te kakusa yisakila hakamwihi ni hina lize liapwile ni kuhandununa yiize; mu tembele kalingilemo nawa yipatulo yakulila.) Sasendote wa lutwe kapwile ni kwanda chihanda chimuwika, asasendote akwo no manda chihanda chikwo. Mwishi wa lupembo mupema wa maji waze apwile ni kocha te kakumutambula kuli Yehova. Amu manyinga analumbunuka mwono, kapwile ni kwahana kuli Zambi, mumu te ni enyi. Kashika, asasendote, tuvumbi ni Yehova kapwile ngwe kanali hamuwika, yino te yakusolola ngwo kali ni sambukila hakachi kwo. Mutu yoze te wakulia yuma yino shimbu ali ni luchisa (luchisa mweswawo kulita ni Shimbi) hanji yoze te wakulia yifwo yize hiyapomba matangwa anji (ha mwalwa yize te hiyapola) kapwile ni kumushiha hakachi ka atu jenyi. Iye te mapihisa kulia, hamukunda wa luchisa wenyi, ha kulia yuma yipi kumeso ja Yehova Zambi ni kuhona vumbi yuma yisandu.—Lev 7:16-21; 19:5-8.
Kuhengwola Yikuma Yilemu ya mu Mbimbiliya
(Ulevi 2:13) Mulambu weswe wa wunga ukaulungise ni mungwa. Mungwa wa usendo wa Zambi ye kanda ukahona mu mulambu we wa wunga. Mulambula mungwa hamuwika ni milambu ye yeswe.
(Ezekiele 43:24) Munukaakunjika kumeso ja Yehova, mba asasendote maalakumwinaho mungwa ni kualumba mulambu wa kulumba kuli Yehova.
w04 15/5 22 ¶1
Yikuma Yilemu ya mu Mukanda wa Ulevi
2:13—Mumu liaka apwile ni kulambula mungwa hamuwika ni ‘milambu yeswe?’ Chino te keshi kuchilinga hanga milamu yiyeme. Atu anji kakusa mungwa mu kulia hanga chihone kupiha. Kota kapwile ni kusa mungwa mu milambu hanga asolole ngwo kulia chacho kuchichi kupola.
(Ulevi 3:17) Chino chikapwe chiyulo cha mutolo mu mazuwo jenu ndusu yisemuko yenu yeswe ngwami, Kanda nulia chipwe maji chipwe manyinga.
it-2 246
Maji
Chikuma chize aselele shimbi yino. Kulita ni usendo wa shimbi, manyinga ni maji yapwile ya Yehova wika. (Lev 17:11, 14) Manyinga we mwono, Yehova wika mwe uli ni ulite wa kuhana mwono, ha chino manyinga kapwile ni kwahana wika kuli iye. Maji kapwile chihanda chilembu ku musunya wa kashitu. Kashika, kapwile ni kulambula maji a kashitu kuli Yehova, ni kusolola ngwo iye mwe watela kutambula chihanda chilemu, mumu iye mwe wakuhana kulia, ni kusolola nawa ngwo tuvumbi twa Yehova kapwile ni kuhana yitapo kuli Zambi ni mbunge yeswe. A-Izalele kapwile ni kuhana mulambu wa maji kuli Yehova mumu maji kapwile chihanda chilemu cha kashitu, chino te chakusolola ngwo, kauhana ni mbunge yeswe. Kashika apwile ni kwamba ngwo, kapwile ni kuyilumba ha chilumbilo ngwe “kulia” nawa ngwe “lupembo mupema” kuli iye. (Lev 3:11, 16) Kashika, A-Izalele kakapwile ni ulite wa kulia maji mumu kapwile ambala a Yehova. Mwaswawo malia maji te katamba kumushiha. Maji te mahasa kwazachisa nawa ha yuma yikwo ngwe chizechene apwile ni kuzachisa manyinga, chino kapwile ni kuchilinga ni kashitu yoze te wakulifwila hanji yoze apwile ni kushiha kuli kashitu mukwo.—Lev 7:23-25.
w04 15/5 22 ¶2
Yikuma Yilemu ya mu Mukanda wa Ulevi
3:17. Amu maji apwile chihanda chilemu cha ku yifwo ya kashitu, shimbi ya kukanjisa maji yapwile ni kusolola kuli A-Izalele ngwo, Yehova mwe wapwile ni ulite wa kutambula chihanda chilemu. (Upu 45:18) Chino chinatulongesa ngwo, chuma cheswacho mutuhana kuli Yehova twatamba kuchihana ni mbunge yeswe.—Yis 3:9, 10; Kol 3:23, 24.
Kutanga Mbimbiliya
(Ulevi 1:1-17) Yehova yasanyika Mose, yamba kuli iye ku mbalaka ya chikungulwila ngwenyi, 2 Amba kuli A-Izalele ngwe, Muze umwe mutu hakachi kenu malambula mulambu kuli Yehova, akalambule mulambu wenyi wa yimuna; hanji ngombe, hanji panga, hanji pembe. 3 Nyi mulambu wenyi muupwa ngombe, akapwe mulambu wa kulumba, akamulambule kuji keshi chipa. Akamulambule ku chikolo cha mbalaka ya chikungulwila, kwe kumeso ja Yehova. 4 Mwe mutu akase kwoko lienyi ha mutwe wa mulambu wa kulumba akamusalakane, akafuke kuhona chenyi. 5 Akashihe mwe kuji kumeso ja Yehova; mba asasendote, ana ja Arone, akalambule manyinga nikwasapwila kwa kujingilika ha chilumbilo chili ku chikolo cha mbalaka ya chikungulwila. 6 Akazuwe mulambu wa kulumba, akamutete mu yihanda yenyi. 7 Mba ana ja sasendote Arone akase kahia ha chilumbilo, akatengeke kunyi ha kahia. 8 Asasendote, ana ja Arone, akase ye yihanda, ni mutwe, ni maji, yeswe ya kululika mu ngango ha kunyi jize jili ha kahia ha chilumbilo. 9 Alioze yingambiangambia yenyi ni molu jenyi akayikose ni meya. Mba sasendote malumba ye yeswe ha chilumbilo, mulambu wa kulumba, mulambu wa kahia wa lupembo mupema kuli Yehova. 10 Nyi mulambu wenyi muupwa wa ku chendo, hanji panga hanji pembe, akapwe mulambu wa kulumba, akalambule kuji keshi chipa. 11 Akamushihe kumeso ja Yehova ku lumbu lia chilumbilo liatala ku Norte. Mba asasendote, ana ja Arone, akasapwile manyinga jenyi kwa kujingilika ha chilumbilo. 12 Iye mamuteta mu yihanda hamuwika ni mutwe wenyi ni maji jenyi; mwe sasendote akayise ha kunyi jize jili ha kahia ha chilumbilo, ya kululika mu ngango. 13 Alioze yingambiangambia ni molu, akayikose ni meya. Mba sasendote mayilambula ye yeswe, akayilumbe ha chilumbilo. Ukapwe mulambu wa kulumba, mulambu wa kahia, wa lupembo mupema kuli Yehova. 14 Nyi mulambu wenyi kuli Yehova muupwa wa tujila a kulumba, akalambule mulambu wenyi wa tutela hanji wa ana-a-membe. 15 Mwe sasendote akamutwale ku chilumbilo akahonde mutwe wenyi akaulumbe ha chilumbilo. Manyinga akaahichishile ku lumbu lia chilumbilo. 16 Akatukule chisakwilia ni yize yiliho akachimbile ku lumbu lia chilumbilo liatala ku Chivumbuko, ku chichilila cha uto. 17 Akamupule ha mapulwa jenyi alioze kanda amuhandununa. Sasendote akamulumbe ha chilumbilo, ha kunyi jize jili ha kahia. Ukapwe mulambu wa kulumba, mulambu wa kahia, wa lupembo mupema kuli Yehova.
16-22 NOVEMBRO
YIKUMA YILEMU YA MU LIJI LIA ZAMBI | ULEVI 4-5
“Hana Kuli Yehova Cheswacho Uli Nacho ni Mbunge Yeswe”
(Ulevi 5:5, 6) Mba muze mahila chimwe cha yuma yino akashikise chize havulumuna. 6 Akanehe kuli Yehova mulambu wa uhie ha mulonga uze havulumuna, chihwo wa ku chendo, chipwe panga chipwe pembe, akapwe mulambu ha shili. Mwe sasendote akamufukile shili yenyi.
it-3 122 ¶9
Milambu
Mulambu wa uhie. Mulambu wa uhie kapwile nikuuhana hamukunda wa shili, mumu uhie weswawo uli shili. Kapwile ni kuuhana mumu lia shili yinene yize te yakuhisa mutu, wapwile nikulisa hakehe ni milambu yikwo ya shili mumu kapwile ni kuuhana hanga afunyise umwe ulite. Mutu yoze wavulumuna kapwile ni kupihisa ulite wa Yehova ni wa vungu lienyi lisandu. Mulambu wa uhie kapwile ni kuuhana hanga evwise Yehova kuwaha hamukunda wa ulite wenyi uze apihisa, hanji kufunyisa ulite wa umwe chivulumunyi yoze walikonyeka nikumutusula ku fweto ya shili yenyi.—Tesa ni Iza 53:10.
(Ulevi 5:7) Nyi kahashile kuneha mwana-panga akanehe kuli Yehova mulambu wa uhie ha mulonga uze havulumuna, tutele aali, hanji ana-a-membe aali, umwe akapwe mulambu ha shili, mukwo akapwe mulambu wa kulumba.
w09 1/6 26 ¶3
Iye Kananyingika Haze Hasulila Tachi Jetu
Shimbi yambile ngwo: “Nyi kahashile kuneha mwana-panga akanehe kuli Yehova mulambu wa uhie ha mulonga havulumuna, tutele aali, hanji ana-a-membe aali.” (Versu 7) Maliji anambe ngwo, “nyi kahashile kuneha” mahasa kulumbunuka nawa ngwo, “nyi kahashile kuwana.” Nyi umwe ka-Izalele mapwa chiswale hanji mahona uhashi wa kulanda panga, Zambi kapwile ni kutayiza mulambu weswawo apwile ni kuhana, ngwe tutele aali, hanji ana-a-membe aali.
(Ulevi 5:11) Nyi kahashile kuneha tutele aali, hanji ana-a-membe aali, mba akanehe mulambu ha uhie wenyi, ngwami, chihanda chimuwika cha ku kumi lia yihanda ya efa ya wunga wafufunuka ukapwe mulambu ha shili. Kanda asaho maji a olevwe niamwe, chipwe libano, mumu mulambu ha shili.
w09 1/6 26 ¶4
Iye Kananyingika Haze Hasulila Tachi Jetu
Mba nyi mutu te keshi nyi uhashi wa kulanda chipwe tutele aali? “Mba akanehe mulambu ha uhie wenyi, ngwami, chihanda chimuwika cha ku kumi lia yihanda ya efa [misenge nake hanji livwa] ya wunga wafufunuka ukapwe mulambu ha shili,” che te shimbi yakwamba. (Versu 11) Yehova kakwashile A-Isalele waze apwile yiswale ha kwecha hanga ahane mulambu uze kuushi manyinga ha shili. Mu Izalele, uswale te kuushi kukwika mutu niumwe kupwa ni uhashi wa chiwape cha kumufukila shili hanji kupwa ni sambukila ni Zambi.
Kuhengwola Yikuma Yilemu ya mu Mbimbiliya
(Ulevi 5:1) Muze umwe mutu mavulumuna ha kwivwa liji lia kushililika, mapwa chela ha kuchimona, hanji ha kuchinyingika, mba nyi kachambulwile, mambata uhenge wenyi.
Twimbululenu Yilweza ya Tuvumbi Ashishika a Yehova
14 Ni yena nawa muhasa kushishika chitangu kuli Yehova, ni kuli mandumbu je, hakwaasolwela zango. Chakutalilaho, yena hanji muhasa kunyingika ngwe umwe ndumbu kalinga yimwe shili yinene. Ena muhasa kuzanga kushishika kuli iye, chipi-chipi nyi kali sepa hanji usoko we. Alioze yena nawa unanyingika ngwenyi chili ni ulemu unji kushishika kuli Yehova. Chizechene ngwe Natane, ononokena kuli Yehova, alioze solola zango kuli ndumbwe. Mulweze ngwenyi aye katamba kufupa ukwaso kuli makulwana amu chikungulwila nawa katamba kuhanjika no kawashi-washi. Nyi kachilingile yena watamba kulweza makulwana chikuma chacho. Nyi walinga chocho, yena mununga ni kushishika kuli Yehova. Nawa chino muchisolola ngwo wakuzanga ndumbwe, mumu makulwana mahasa kumukwasa hanga apwe nawa ni usepa upema ni Yehova. Ayo mamufumba ni kumusolwela zango.—Tanga Ulevi 5:1; A-Ngalishia 6:1.
(Ulevi 5:15, 16) Nyi umwe mutu makavulumuna mulonga wa susumuku mu chuma chisandu cha Yehova, akanehe kuli Yehova mulambu wa uhie, kuji ya panga keshi chipa, wa kuchiza ku chendo nikulita ni ndando yize musela mu shekele ja prata, nikulita shekele ya muma musandu, akapwe mulambu wa uhie. 16 Akawezeko nawa ha chize hahengesa mu yuma yisandu, akawezeko chihanda chamuchitano cha ndando akachihane kuli sasendote. Mba sasendote akamufukile shili yenyi ni kuji ya panga wa mulambu wa uhie, amukonekeneyo.
it-3 529 ¶1
Usandu
Yimuna ni Mbuto. Tupula-jimo a kuji ya ngombe, panga, hanji pembe, kapwile asandu kuli Yehova nawa te katambile kwakula. Te katamba kwahana ngwe mulambu, chihanda chimwe chapwile cha asasendote. (Kwa 18:17-19) Mbuto yitangu ni yihanda ya kumi yapwile yisandu, chipwe milambu yeswe yize apwile ni kuhana ni yawana yize apwile ni kusela ku usandu ha mulimo usandu neyo yapwile yisandu. (Kut 28:38) Yuma yeswe yize yapwile yisandu kuli Yehova, te katamba kuyilemesa nawa katambile kuyizachisa mu jila yize kuyalitele. Chikuma chino kanachisolola ha shimbi ya yihanda ya kumi. Nyi umwe mutu masa ku mbango chihanda cha kumi, ngwe mbuto ya tiliku, mba mwene hanji mutu mweka mu usoko wenyi mayizachisa chakuhona kunyingika hanji mayiteleka, mutu wacho te mapwa ni chitela ha kuhona kukawula shimbi ja Zambi hakutwala ku yuma yisandu. Kulita ni shimbi mutu wacho kapwile ni kufweta panga keshi chipa ni kuwezela nawa ha yize andanga unji uzewene, yuma yeswe kapwile ni kuyitwala muma musandu. Ha mukunda wa chino atu kapwile ni kulemesa chinji yuma yisandu ya Yehova.—Lev 5:14-16.
Kutanga Mbimbiliya
(Ulevi 4:27–5:4) Nyi umwe mutu mweswawo mavulumuna mulonga wa susumuku mukulinga chuma cheswecho cha yuma yize Yehova hanayilanjisa, mba hahia, 28 nyi mamulweza mulonga wenyi uze havulumuna, akanehe mulambu wenyi, chihwo cha pembe keshi chipa ha mulonga wenyi uze havulumuna. 29 Akase kwoko lienyi ha mutwe wa mulambu ha shili, akashihe we mulambu ha shili kuze akushihila mulambu wa kulumba. 30 Sasendote makanda amwe manyinga ha munwe wenyi akaakomone ha mbinga ja chilumbilo cha milambu ya kulumba, mba manyinga eswe waze asala akaazujile ku shina lia chilumbilo. 31 Maji jawo eswe akaachizeho ngwe chize akuchiza maji eswe a yitapo ya milambu ya sambukila. Mwe sasendote akaalumbe ha chilumbilo akapwe lupembo mupema kuli Yehova, mba sasendote akamufukile shili yenyi hanga amukonekeneyo. 32 Nyi makaneha mwana-panga akapwe mulambu ha shili akamunehe chihwo keshi chipa. 33 Akase kwolo lienyi ha mutwe wa mulambu ha shili, akamushihe kuze akushihila mulambu wa kulumba, akapwe mulambu ha shili. 34 Mwe sasendote makanda ha munwe wenyi amwe manyinga a mulambu ha shili akaakomone ha mbinga ja chilumbilo cha milambu ya kulumba, mba manyinga eswe waze asala akaazujile ku shina lia chilumbilo. 35 Maji jawo eswe akaachizeho ngwe chize akuchiza maji ja mwana-panga ku yitapo ya milambu ya sambukila. Mba sasendote akaalumbe ha chilumbilo nikulita ni milambu ya kahia kuli Yehova. Chocho mwe sasendote akamufukile shili yenyi hanga amukonekeneyo.
5 Muze umwe mutu mavulumuna ha kwivwa liji lia kushililika, mapwa chela ha kuchimona, hanji ha kuchinyingika, mba nyi kachambulwile, mambata uhenge wenyi. 2 Nyi umwe hakwata chuma cha luchisa, chipwe mujimba wa kashitu wa luchisa yoze hafwa kulu, hanji mujimba wa chimuna wa luchisa, hanji wa mukwa kukalala wa luchisa, chipwe kachinyingikine, halichisa, hahia. 3 Chipwe hakwata ku luchisa wa mutu, luchisa wenyi mweswawo wa kuchisa mutu, alioze kachinyingikine, muze machinyingika, mba hahia. 4 Chipwe umwe halipupula kulishinga ni kanwa lienyi kulinga chipi hanji chipema, cheswacho mutu malipupula kwamba ni shingo, hanji kachinyingikine, muze machinyingika hahila chimwe hakachi ka yuma yino.
23-29 NOVEMBRO
YIKUMA YILEMU YA MU LIJI LIA ZAMBI | ULEVI 6-7
‘Mulambu ha Kusakwila’
(Ulevi 7:11, 12) Yino ye shimbi ya chitapo cha mulambu wa sambukila mutu malambula kuli Yehova. 12 Nyi makaulambula ha kusakwila, akalambule hamwe ni chitapo cha kusakwila yandanda kuyishi futunwiso, ya kuchinga ni maji, ni malikemba keshi futunwiso ya kulembula ni maji, ni yandanda ya wunga wafufumuka, ya kuchinga ni maji.
Yize Mutuhasa Kulilongesa ha Mukanda wa Ulevi
9 Longeso liamuchiali: Twakuwayila Yehova mumu lia usakwililo wetu kuli iye. Mutushimutwina longeso lino ha kuhengwola kanawa yitapo yize A-Izalele te akulambula. Milambu yacho te yikwete ulemu mu uwayilo wamwenemwene mu Izalele. Mukanda wa Ulevi unalumbununa chize umwe Ka-Izalele te mahasa kuhana milambu ya sambukila ngwe “chitapo cha kusakwila.” (Levi 7:11-13, 16-18) Iye te keshi kuhana milambu yacho mumu lia kumushinjila, alioze mumu kanazange kuchilinga. Chapwile chawana chize Ka-Izalele te akuhana mumu te kakuzanga Yehova Zambi yo. Mutu yoze te wakuhana mulambu, asoko jenyi ni asasendote e te akulia yifwo ya kashitu yoze ahananga ngwe chitapo. Alioze yihanda yikwo ya kashitu te kakuyihana wika kuli Yehova. Yihanda yika yenayo?
(Ulevi 7:13-15) Helu lia yandanda akalambule mbolo ja futunwiso hamwe ni chitapo cha mulambu wenyi wa sambukila ha kusakwila. 14 Mba akalambule umuwika ukapwe mulambu wa kuzundula kuli Yehova. Muukapwa wa mbala wa sasendote mukwa kusapwila manyinga a mulambu wa sambukila. 15 Yifwo ya chitapo cha mulambu wa sambukila ha kusakwila, akayilie tangwa lize liene haulambula. Kanda akahichika nichimwe chihanda chayo chikasale ndo chimene.
w00 15/8 15 ¶15
Yitapo Yize Zambi Atayijile
15 Chitapo chikwo cha vumbi chize apwile ni kuhana, chili cha mulambu wa wa sambukila chili ha kapitulu 3 wa mukanda wa Ulevi. Liji lino mahasa kulilumbununa nawa ngwo, “chitapo cha mulambu wa kulivwashana.” Liji “sambukila” mu Hepreu linalumbunuka yuma yinji hi wika ko kuhona cha jita hanji kapinda. Umwe mukanda unambe ngwo: “Liji lino, Mbimbiliya yinalilumbununa ngwo, kupwa ni ukulungunga ni Zambi, yiwape, chiseke ni uwahililo” (Estudos nas Instituições Mosaicas). Mulambu wa sambukila kakapwile ni kuuhana hanga apwe ni ukulungunga ni Zambi ngwe kanafupu kumuhwimisa mbunge, alioze te kakuuhana hanga amusakwilile hanji kuwahilila ha kupwa ni sambukila ni iye, kuli atu waze apwile ni utayizo wenyi. Asasendote ni mutu yoze wapwile ni kuhana chitapo kapwile ni kuchilia hanyima lia kuhana manyinga ni maji kuli Yehova. (Lev 3:17; 7:16-21; 19:5-8) Mutu yoze te wakuhana chitapo, asasendote ni Yehova kapwile ni kuyuka ha chitapo chacho ni kusolola ngwo, kali ni sambukila hakachi kwo.
(Ulevi 7:20) Alioze mweswawo makalia yifwo ya chitapo cha mulambu wa sambukila wa Yehova shimbu kali ni luchisa, makamuteta kuli atu jenyi.
w00 15/8 19 ¶8
Yitapo ya Uhaliso Yize Yehova Akutayiza
8 Mba yika mutwamba hali mutu yoze wapwile ni kuhana chitapo? Shimbi yapwile ni kwamba ngwo, mweswawo te makundama kuli Yehova, katamba kupwa walinanga, keshi luchisa. Alioze mutu yoze wapwile ni luchisa, chitangu te kakuhana chitapo ha shili yenyi hanji ha uhie, hanga apwe keshi luchisa kuli Yehova, mba iye atayiza chitapo cha mulambu wenyi wa kulumba hanji wa sambukila. (Lev 5:1-6, 15, 17) Shina tunanyingika ulemu wa kupwa mashimbu eswe atu waze alinanga kumeso ja Yehova? Nyi mutuzanga hanga Yehova atayize uwayilo wetu, muze mutwehuka shimbi jenyi twatamba kulikonyeka ni kawashi. Twatamba nawa kufupa ukwaso uze Yehova hanatwehe, “makulwana a Chikungulwila” ni “kuka ha milonga yetu,” Yesu Kristu.—Tia 5:14; 1Yo 2:1, 2.
Kuhengwola Yikuma Yilemu ya mu Mbimbiliya
(Ulevi 6:13) Kahia mukakayila ha chilumbilo matangwa eswe nikujima, ka.
it-2 148 ¶4
Kahia
Yikuma yize yinatale ha tabernakulu ni Tembele. Kahia kapwile chilayi cha uwayilo mu tabernakulu, kulutwe yikapwa nawa mu Tembele. Sasendote wa Lutwe kapwile ni kwochela insensu ha chilumbilo cha insensu matangwa eswe chimene ni chingoloshi. (Kut 30:7, 8) Shimbi te yakwamba ngwo, kahia ka ha chilumbilo cha mulambu wa kulumba kanda kajima. (Lev 6:12, 13) A-Yunda kapwile ni kwamba ngwo, Zambi mwe wawikile kahia ka ha chilumbilo mu chikomokeso. Chipwe ngwe atu anji kakutayiza longeso lino, nihindu kulishi kulita ni yisoneko. Kulita ni usongwelo uze Yehova ahanyine kuli Mose ku uputukilo, ana ja Arone te katamba kuwika “kahia ha chilumbilo, atengeke kunyi ha kahia” shimbu te kanda achisaho chitapo. (Lev 1:7, 8) Yino yinakalingiwa muze te hasa kulu usasendote wa Arone, kashika, hanyima lia kulambula yitapo ya usasendote uze asele, mba kahia ka kuli Yehova, kota kakatukile ha lelwa lize liapwile helu lia tabernakulu, yikocha chitapo chize chapwile ha chilumbilo. Kashika, kahia ka chikomokeso kaze kakatukile kuli Yehova, kakawikile ha kunyi jize japwile ha chilumbilo, alioze kanakocha wika “mulambu wa kulumba hamwe ni maji ha chilumbilo.” Kashika, kahia kaze kanungine ha chilumbilo, kota kali kaze kakatukile kuli Zambi ni kaze kapwile ha chilumbilo. (Lev 8:14–9:24) Yino ye yalingiwile nawa hanyima lia yilemba ya Solomone hakutwala ku Tembele, kahia ka chikomokeso ka kuli Yehova yikeza ni kwocha yitapo.—2Sg 7:1; tala nawa Kuy 6:21; 1Mi 18:21-39; 1Sg 21:26, ha yisoneko yino, hali yilweza yikwo ya yikomokeso ya Yehova, ha chize apwile ni kutayiza yitapo ya tuvumbi twenyi.
(Ulevi 6:25) Amba kuli Arone ni anenyi a malunga ngwe, Shimbi ya mulambu ha shili yino. Kuma kwa kushihila mulambu wa kulumba kwenako akashihile mulambu ha shili kumeso ja Yehova. Wapwa usandu wahiana.
si 27 ¶15
Ulevi, Mukanda wa 3—wa mu Mbimbiliya
15 (3) Chapwile ni kufupiwa kuhana mulambu ha shili yize mutu alinga chakuhona kunyingika. Kapwile ni kuhana kashitu kulita ni mutu yoze walinga shili yize te mafuka, ngwe sasendote, mwata hanji mutu mweswawo. Kulisa ni milambu ya vumbi, ya kulumba ni ya sambukila yize atu apwile ni kuhana, mulambu ha shili te katamba kuwuhana lume.—4:1-35; 6:24-30.
Kutanga Mbimbiliya
(Ulevi 6:1-18) Yehova yamba kuli Mose ngwenyi, 2 Nyi umwe mutu mavulumuna akapwe ni mulonga kuli Yehova, hanji ha kwonga mukwo ha kutwala ku chifungo, hanji kapopo, hanji kuhupa, hanji hapinjisa mukwo; 3 hanji hawana chuma chatokele mba hahanjika mahuza nikulishinga ni mahuza, mu chuma cheswacho cha yino yeswe mutu malinga nikuvulumuna, 4 mba nyi havulumuna, hahia, akahilwisase chuma chize hahupa, hanji chuma hatambula ku upinjiso, hanji kapopo amukunjikile, hanji chuma chatokele iye hachiwana, 5 hanji chuma cheswacho halishingilacho ni mahuza, akachihilwise cheswe nikuweza helu nawa chihanda chamuchitano cha ndando. Akachihane kuli mwenyacho ha tangwa lia kuhia chenyi. 6 Akanehe kuli Yehova mulambu wenyi wa uhie kuji ya panga wa ku chendo, yoze keshi chipa, nikulita ni ndando makasela ha mulambu wa uhie kuli sasendote. 7 Mwe sasendote akamufukile shili yenyi kumeso ja Yehova ha chuma cheswecho halinga ni uhie, akamukonekenecho. 8 Yehova yamba kuli Mose ngwenyi, 9 Amba kuli Arone ni anenyi a malunga ngwe, Shimbi ya mulambu wa kulumba yino: mulambu wa kulumba nukawoche ha kunyi jawo ha chilumbilo ufuku weswe ndo chimene. Kahia ka ha chilumbilo kakayile lume. 10 Mba sasendote akazale chikuto chenyi cha hina lia linyu lipema. Akazale kaputula kenyi wa hina lia linyu lipema ha mujimba wenyi. Akande uto wa mulambu wa kulumba uze wasala ku kahia ka ha chilumbilo, akaulumbike mushi lia chilumbilo. 11 Akazule mazalo jenyi, akazale akwo eka, akatwale uto haze lia chilombo kuma kupema. 12 Alioze kahia ka ha chilumbilo kakayile, kanda kakajima, mwe sasendote akaseho kunyi chimene ha chimene. Akaseho mulambu wa kulumba mu ngango jawo. Akalumbeho nawa maji a milambu ya sambukila. 13 Kahia mukakayila ha chilumbilo matangwa eswe nikujima, ka. 14 Shimbi ya mulambu wa wunga yino: Ana ja Arone akaulambule kumeso ja Yehova kulutwe lia chilumbilo. 15 Akazomoneko kwoko lienyi lia wunga wafufunuka wa mulambu wa wunga, ni maji jawo, ni libano yeswe yili ha mulambu wa wunga, akayilumbe ha chilumbilo yikapwe ya lupembo mupema, chiwulwiso chawo kuli Yehova. 16 Chize muchisalaho Arone ni anenyi a malunga akachilie. Akachilie kuchishi futunwiso kuma kusandu; akachilile mu yiize ya mbalaka ya chikungulwila. 17 Kanda akachocha ni futunwiso. Ngunachihana chikapwe chihanda cho cha milambu yami ya kahia. Chuma chisandu chahiana, chimuwika ni mulambu ha shili, ni mulambu wa uhie. 18 Malunga eswe hakachi ka ana ja Arone makachilia, chihanda cho cha mutolo ndusu yisemuko yenu yeswe cha ku milambu ya kahia kuli Yehova. Mweswe makayikwata makapwa musandu.
30 NOVEMBRO–6 DEZEMBRO
YIKUMA YILEMU YA MU LIJI LIA ZAMBI | ULEVI 8-9
“Yuma Yize Yinasolola Yiwape ya Yehova”
(Ulevi 8:6-9) Mba Mose yaneha Arone ni anenyi a malunga, yaasanyisa ni meya, 7 yamujika che chikuto, yamujichika we muya wa ponda, yamusa lie hina lia ngungu, ni ye efode, yamujichikayo ni muya wa ponda wa ulangaji wa ku efode. 8 Yamusa che chipwiko, mba mu chipwiko yasa Urimi ni Tumimi. 9 Yamusa kapusa ha mutwe wenyi, mba ha kapusa kulutwe wasele chipenya cha oru, che chipangula chisandu chizechene ngwe Yehova watumine Mose.
(Ulevi 8:12) Yazujila amwe maji a kuwayisa no ha mutwe wa Arone. Yamuwayisa akamusele ku usandu.
it-2 414
Kuwayisa
Mose yatwala Arone ni ana jenyi Nandambe, Ambihu, Eleazare ni Itama (hanji kaatumine hanga asane ene) ku mbashila ya unengu yize yapwile mu yiize ni kujika Arone che chikuto cha usasendote. (Kwa 3:2, 3) Muze hamujika yuma yacho, yamusa ha usasendote, chikuto chacho te chinalumbunuka yitanga ni yiteli yize amuhele. Hanyima, Mose yawayisa tabernakulu ni yikumba yeswe yize yapwilemo, ni chilumbilo cha mulambu wa kulumba, yawayisa nawa mbashila ni yuma yikwo yize azachishile hakutwala kuli ayo. Chino yichaapwisa asandu, ni kusolola ngwo kaasakula hanga alinge wika milimo ya Zambi, yize aahele kulinga. Mba Mose yawayisa Arone ha kuzujila maji ha mutwe wenyi.—Lev 8:6-12; Kut 30:22-33; Sam 133:2.
(Ulevi 9:1-5) Ha tangwa liamuchinake Mose yasanyika Arone ni anenyi a malunga ni makulwana a Izalele. 2 Yamba kuli Arone ngwenyi, Anda chimbembe wa kuji akapwe mulambu ha shili, ni kuji ya panga akapwe mulambu wa kulumba, eswe ni aali keshi chipa, ukaalambule kumeso ja Yehova. 3 Amba kuli A-Izalele ngwe, Andenu kuji ya pembe akapwe mulambu ha shili, ni chimbembe ni mwana-panga, eswe ni aali a mwaka umuwika, keshi chipa, akapwe mulambu wa kulumba; 4 ni kuji ya ngombe ni kuji ya panga akapwe milambu ya sambukila, akaatape kumeso ja Yehova; ni mulambu wa wunga wa kuchinga ni maji, mumu musono Yehova kumasoloka kuli yenu. 5 Mba yuma yeswe Mose waatumine yayineha kulutwe lia mbalaka ya chikungulwila. Che chikungulwila cheswe yichikundama nikumana kumeso ja Yehova.
it-2 415 ¶8
Kuwayisa
Ha tangwa liamuchinake, usasendote wene yiuputuka kukalakala chisuho chitangu (chakuhona ukwaso wa Mose,) yiuputuka mulimo wa kufuka shili ya A-Izalele waze te anafupiwa kwapemesa, hi wika ko mumu lia shili yize ahingile, alioze hamukunda wa mwana-ngombe wa kuzuzulula yoze anakawayila, ni kuvwisa Yehova kupiha. (Lev 9:1-7; Kut 32:1-10) Ku songo lia milimo ya usasendote yize alingile ha chisuho chitangu, Yehova yasolola ngwenyi katayiza mulimo wacho ni atu waze aseleho ha kutuma kahia mu chikomokeso, kahia kacho kakatukile ha lelwa lize liapwile ha tabernakulu, ni kocha yitapo yize yasalile ha chilumbilo.—Lev 9:23, 24.
(Ulevi 9:23, 24) Mba Mose ni Arone yanjila mu mbalaka ja chikungulwila. Muze hatuhuka, yawahisa atu, mba uhenya wa Yehova yiusoloka kuli atu eswe, 24 mumu kahia kakatukile kumeso ja Yehova yikalalisa mulambu wa kulumba hamwe ni maji ha chilumbilo. Muze atu eswe hachimona, atetele mba yafulamana meso jo.
Yize Mutuhasa Kulilongesa ha Mukanda wa Ulevi
13 Longeso liamuchiwana: Yehova kanawahisa chihanda cha hashi cha ululikiso wenyi. Tutalenu yize yalingiwile ha mwaka 1512 K.M.J., muze asele Tabernakulu ku Mulundu wa Sinai. (Kutuhu. 40:17) Mose kalingile jimwe pande muze atongwele Arone ni ana jenyi ngwe asasendote. Vungu lia Izalele te kanalikungulula hanga amone chize asasendote malambula yitapo yo yitangu ya tushitu. (Levi 9:1-5) Kuchi Yehova asolwele ngwo asasendote waze aha kapwile ni utayizo wenyi? Shimbu te Arone ni Mose anawahisa atu, Yehova yatuma kahia kaze kalalishile mulambu ha chilumbilo.—Tanga Ulevi 9:23, 24.
Kuhengwola Yikuma Yilemu ya mu Mbimbiliya
(Ulevi 8:6) Mba Mose yaneha Arone ni anenyi a malunga, yaasanyisa ni meya.
w14 15/11 9 ¶6
Mumu Liaka Twatamba Kupwa Asandu?
6 Shimbi yize yapwile ni kwamba ngwo, asasendote a Izalele katamba kupwa alinanga ku musunya, yili ni ulumbunwiso ulemu musono kuli atu ja Yehova. Atu waze twakulongesa Mbimbiliya, kakumona chize twakupemesa yihela yetu ya uwayilo ni chize twakulinanga. Kashika, kulinanga cha asasendote chinatukwase kunyingika ngwetu, mutu mweswe wakukanduka ku mulundu wa Yehova hanga amuwayile, katamba kupwa ni “mbunge ya kulinanga.” (Tanga Samu 24:3, 4; Iza 2:2, 3) Muze tunalingi mulimo usandu wa Zambi, twatamba kulipemesa mu manyonga, ku mbunge ni kulinanga ku mujimba. Hachino, twatamba kulihengwola mashimbu eswe ni kwalumu ndako yetu mba tupwe asandu. (2Ko 13:5) Chakutalilaho, nyi mutu yoze hanapapachisa mapwa ni ndako ya kutala pornografia katamba kulihula ngwenyi: ‘Shina munguhasa kwamba ngwami nguli musandu?’ Ha chino, katamba kufupa ukwaso hanga eche ndako yino ya luchisa.—Tia 5:14.
(Ulevi 8:14-17) Mba yaneha kuji ya ngombe wa mulambu ha shili. Arone ni anenyi amalunga yasa moko jo ha mutwe wa kuji ya ngombe wa mulambu ha shili. 15 Mose yamushiha, yatata munwe wenyi ha manyinga, yaakomona ku mbinga ja chilumbilo ha kujingilika, nikupemesa chilumbilo. Yazujila manyinga ku shina lia chilumbilo nikuchisela ku usandu, kuchifukila shili. 16 Yanda maji eswe a ku yingambiangambia, ni a ku liayi, ni njiso jiali hamwe ni maji jako, ayo Mose yayilumba ha chilumbilo. 17 Alioze mwe kuji, ni kupu lienyi, ni yifwo yenyi, ni ufwachi wenyi, ayo yayocha ni kahia haze lia chilombo chizechene ngwe Yehova watumine Mose.
it-3 17 ¶6
Mose
Zambi kasele Mose hanga apwe chitakanyishi ha usendo wa Shimbi ni A-Izalele, chiteli chilemu chize mutu niumwe kanda achipwa nacho kumeso ja Zambi, kuchizako Yesu Kristu, Chitakanyishi wa usendo waha. Mose yanda mukanda wa usendo yawusapwila manyinga a tushitu waze ahanyine ngwe yitapo, yasolola ngwe Yehova kali “sali limwe” atu jenyi (makulwana waze apwile ni kumanyinako A-Izalele) “sali likwo.” Mose yaatangila mukanda wa shimbi, ayo yakumbulula ngwo: “Ye yeswe hahanjika Yehova yetu kumutukayilinga.” (Kut 24:3-8; Hep 9:19) Muze Mose apwile chitakanyishi, yapwa ni chiwape cha kusongwele mulimo wa kutunga tabernakulu ni yikumba ya mu tabernakulu yize alingile kulita ni usongwelo amuhele kuli Zambi, yasa usasendote, yawayisa tabernakulu ni Arone Sasendote wa Lutwe ni maji akululieka kanawa. Yasongwela nawa milimo yitangu ya usasendote muze te machiwuselako.—Kut kapitulu 25-29; Lev kapitulu 8, 9.
Kutanga Mbimbiliya
(Ulevi 8:31–9:7) Mba Mose yamba kuli Arone ni anenyi a malunga ngwenyi, Telekenu ye yifwo ku chikolo cha mbalaka ya chikungulwila nukayilile kuzekwene hamuwika ni mbolo yize yili mu mutonga wa milambu ya kulitumbikila ku usasendote, ngwe nanutumine ngwami, Arone ni anenyi a malunga akayilie. 32 Yifwo ni mbolo yize muyisalaho nukachoche ni kahia. 33 Kanda nutuhuka ku chikolo cha mbalaka ya chikungulwila ndo matangwa shimbiali, ndo matangwa jenu a kulitumbikila ku usasendote hahwa. Mumu matangwa shimbiali makahwa ha kunusela ku usasendote. 34 Chize halinga musono Yehova wachitumine cha kunufukila shili. 35 Kwe ku chikolo cha mbalaka ya chikungulwila munukatwama matangwa shimbiali, mwalwa ni ufuku, ni kufunga chiyulo cha Yehova kuchina munufwa, mumu chocho angutumine. 36 Chocho Arone ni anenyi a malunga alingile yuma yeswe Yehova watumine Mose.
9 Ha tangwa liamuchinake Mose yasanyika Arone ni anenyi a malunga ni makulwana a Izalele. 2 Yamba kuli Arone ngwenyi, Anda chimbembe wa kuji akapwe mulambu ha shili, ni kuji ya panga akapwe mulambu wa kulumba, eswe ni aali keshi chipa, ukaalambule kumeso ja Yehova. 3 Amba kuli A-Izalele ngwe, Andenu kuji ya pembe akapwe mulambu ha shili, ni chimbembe ni mwana-panga, eswe ni aali a mwaka umuwika, keshi chipa, akapwe mulambu wa kulumba; 4 ni kuji ya ngombe ni kuji ya panga akapwe milambu ya sambukila, akaatape kumeso ja Yehova; ni mulambu wa wunga wa kuchinga ni maji, mumu musono Yehova kumasoloka kuli yenu. 5 Mba yuma yeswe Mose waatumine yayineha kulutwe lia mbalaka ya chikungulwila. Che chikungulwila cheswe yichikundama nikumana kumeso ja Yehova. 6 Mose yamba ngwenyi, Chino che chuma Yehova wanutumine, lingenu mba uhenya wa Yehova muusoloka kuli yenu. 7 Mba Mose yamba kuli Arone ngwenyi, Kundama ku chilumbilo ukalambule mulambu we ha shili, ni mulambu we wa kulumba, ukafuke shili hali yena mwene ni hali e atu. Neha nawa mulambu hali atu ukafuke shili yo, chizechene ngwe Yehova hatuma.