Yihula Ya Waze Akutanga Mikanda Yetu
Muze Ndawichi asonekene Samu 61:8 kambile ngwenyi, munguwayila jina lia Zambi ku miaka ya “mutolo.” Shina muze asonekene maliji wano kanyongene ngwenyi te kechi kufwa?
Ka, hi chocho ko. Alioze yuma yize Ndawichi asonekene yapwile yamwenemwene.
Tutalenu yize asonekene ha versu yino ni ha versu jikwo ngwenyi: “Mungwimba uhaliso ku jina lie ku miaka ya mutolo, hanga ngukamanunune yilakenyo yami tangwa ha tangwa.” “Munguhalisa, mwene Zambi yami, ni mbunge yami yeswe. Munguchichimieka jina lie ku miaka ya mutolo.” “Munguhalisa jina lie ku miaka yeswe ya mutolo.”—Samu 61:8; 86:12; 145:1, 2.
Muze asonekene maliji wano Ndawichi te kasolo kuhianyisa, iye kanyingikine ngwenyi, tangwa limwe te kumafwa. Kanyingikine nawa ngwenyi, atu eswe kakufwa mumu lia shili, kashika mwene atayijile ngwenyi, neye kali chihenge. (Uputu. 3:3, 17-19; Samu 51:4, 5) Ndawichi te kananyingika ngwenyi chipwe malunga ashishika ngwe, Apalahama, Izake, ni Yakomba no kafwile. Kashika Ndawichi kanyingikine kanawa ngwenyi, tangwa limwe neye te kumafwa. (Samu 37:25; 39:4) Alioze maliji waze asonekene ali ha Samu 61:8, kanasolola nyonga lienyi lia kuwayila Zambi ku miaka ya mutolo, hanji ngwetu, ku mwono wenyi weswe.—2 Samue. 7:12.
Yuma yimwe yize Ndawichi asonekene yinatale ha yize yalingiwile ku mwono wenyi, ngwe chize unasolola Samu 18, 51 ni 52. Ha Samu 23 Ndawichi yasolola Yehova ngwe kafunga yoze wakukwasa, kufunga ni kusongwela mapanga jenyi. Ndawichi neye kapwile kafunga. Iye kazangile kulingila Yehova ku mwono wenyi weswe.—Samu 23:6.
Twatamba kwiwuluka ngwetu, yuma yeswe yize Ndawichi asonekene yakatukile kuli Yehova. Hakachi ka yize asonekene hapwile nawa uprofeto wa yize te muyilingiwa kulutwe lia matangwa. Chakutalilaho, ha Samu 110, Ndawichi kahanjikile ha tangwa lize Mwene wenyi te ‘matwama ku chindume cha [Zambi ]’ mwilu, hanga atambule ndundo. Alinge najo yika? Hanga ayule akwa kole jenyi ni kupatwila mavungu a hano hashi. Ndawichi kapwile kalamba wa shakulu wa Mesaya yoze te mayula mu malilu ni kupwa Sasendote “ku miaka ya mutolo.” (Samu 110:1-6) Yesu kambile ngwenyi, uprofeto wa Samu 110 te unatale hali iye, nawa ngwo, te muumanunuka kulutwe.—Mateu 22:41-45.
Ndawichi kakasonekene wika hakutwala ku yuma ya ha matangwa jenyi, alioze kasonekene nawa hakutwala ku yuma ya kulutwe lia matangwa, muze te mamuhindwisa ni kuwahilila ha kuwayila Yehova ku miaka yeswe. Chino chinatukwase kumona ngwetu, chilakenyo chili ha Samu 37:10, 11, 29 chinatale ha mashimbu waze achisonekene, ku Izalele ya ku shakulu, ni kulutwe lia matangwa muze Zambi makamanununa yilakenyo yenyi.—Tala paragrafu 8 ha chikuma “Kumukapwa Hamwe ni Yami mu Paraisu” ha kaposhi yono.
Malji ali ha Samu 61:8 ni ha versu jikwo kanasolola ngwo, Ndawichi kazangile kuwayila Yehova ku mwono wenyi weswe. Malji jacho, kanasolola nyonga lia Ndawichi hakutwala ku yize makalinga kulutwe lia matangwa muze Yehova makamuhindwisa.