Chize Muhasa Kuzachisa Site

Wana Yikuma Yize Yapwa Kutuhwisa

Mandumbu jetu anji kakuzachisa yikuma ha lifwo litangu lia jw.org mu munda. Chili chashi kuyituma kupalika ha site, nawa kanji-kanji yakulumbununa chize yuma yinalingiwa ha mashimbu wano yinamanununa uprofeto wa mu Mbimbiliya. Umwe ndumbu yasoneka ngwenyi, yikuma yize yakusoloka ha lifwo litangu “ye tunafupiwa chinji mu mulimo wa kwambujola ha mashimbu wano.”

Alioze yikuma yacho kakuyalumuna mashimbu eswe, mba kuchi muhasa kuyiwana?

• Ha lifwo litangu lia jw.org, pola ha link yinambe ngwo, “Tala Yikwo.” Link yacho muyazulula lifwo lize lili ni chikuma “Yikuma Yize Yasoloka ha Lifwo Litangu.”

• Ha jw.org hanji JW Library^®, yako ha “Yikuma” mba himupola ha “Sango Jikwo.” Ha chihanda chacho hali yikuma yinji yize akusa ha lifwo litangu lia site.