Chize ha Yitangiwa ndo ha Sanga lia Meya

Malilu ni hashi kulihi anakeza? Tangwa, kakweji ni tutongonoshi, nawa ni yuma yikwo yinji ya hano hashi kulihi yinakakatuka? Mbimbiliya yinahana kumbululo liamwenemwene ngwo Zambi mwe wayitangile. Kashika mukanda wetu unaputuka ni yishima ya mu Mbimbiliya hakutwala ku yitangiwa.

Yitangiwa yitangu ya Zambi, yize mutulilongesa, kali atu a spiritu, waze analifwa ni Zambi. Ayo kali angelo. Alioze hashi kanakatangoho hanga atu atwamoho. Kashika Zambi yatanga lunga ni pwo, waze anavuluka ngwo Alama ni Eva, yaasa mu munda upema. Alioze ayo yehuka kuli Zambi yatokesa mwono wo wa matangwa eswe.

Ha yuma yino yeswe, chize ha kutanga cha Alama ndo ha Sanga linene lia Meya, kunakapalika 1,656 a miaka. Ha mashimbu eswe awa, kunakapwa atu anji api. Mu malilu, mwapwile atu a spiritu waze keshi kumoneka, Satana ni angelo jenyi api. Hano hashi, hapwile Kene ni atu akwo api, kuchinga ni malunga akwo akwa tachi jinji. Alioze kwapwile nawa atu akwo apema hano hashi—Abele, Enoke ni Noa. Ha Chihanda CHITANGU, mutulilongesa hakutwala kuli atu wano eswe, ni yuma yeswe yize yinakapwako.