Zambi Haputuka Kutanga Yuma

YUMA yeswe yipema yize yetwe tulinayo yineza kuli Zambi. Iye yalinga tangwa hanga litwehe pangu ha mwalwa, nawa kakweji ni tutongonoshi, hanga tupwe ni pangu ha ufuku. Nawa Zambi yatanga hashi, hanga tutungoho.

Alioze, tangwa, kakweji, tutongonoshi, ni hashi hi yuma yitangu ko yize Zambi alingile. Yena unanyingika yuma yize yitangu? Zambi yalinga chitangu atu waze alifwa nenyi. Yetwe tuchi kuhasa kwamona, ngwe chizechene tushi kumona Zambi. Mbimbiliya yinavuluka atu jacho ngwo angelo. Zambi kanakatanga angelo hanga atwame noo mu malilu.

Mungelo mutangu yoze Zambi atangile kali ni ulemu unji. Mwe mwana mutangu wa Zambi, nawa iye kanakakalakala hamuwika ni Tato. Yamukwasa hakulinga yuma yeswe. Ngwe, tangwa, kakweji, tutongonoshi nawa ni hashi hetu.

Hashi kuchi te hapwa? Ha uputukilo, kushi te niumwe yoze mahasa kutunga hano hashi. Hashi heswe hapwile wika meya a kalunga-lwiji munene. Mba alioze Zambi yazanga ngwo atu atwame hano hashi. Kashika iye yaputuka kutululiekela yuma. Mba iye yalinga yika?

Chitangu, hashi te heshi pangu. Kashika, Zambi yalinga tangwa hanga hashi hapanguke. Iye yalinga chino hanga kupwe mwalwa ni ufuku. Hi kusuloho, Zambi yalinga mavu omu hanga atutumuke helu lia kalunga-lwiji.

Ha uputukilo, helu lia mavu te heshi nichimwe chuma. Ngwe chize yena unamono ha chizulie achi. Te heshi yitemo, mitondo chipwe tushitu ka. Mu kalunga-lwiji niumwe yishi te katwaminemo. Zambi te uchili ni milimo yinji hanga apemese hashi mba hapwe mwono wa tushitu ni wa atu.