Zambi Yatanga Malilu ni Hashi

Yehova Zambi mwe Sakatanga wetu. Mwe watangile nawa yuma yeswe yize twakumona ni yize kutushi kumona. Muze te kanda achitanga yuma yize twakumona, iye yatanga angelo anji. Unanyingika chize angelo apwa? Angelo kali atu waze Yehova atangile apwa ngwe iye. Kutuchi kuhasa kwaamona, ngwe chize kutuchi kuhasa kumona Zambi. Mungelo mutangu yoze Yehova atangile mwe wamukwashile kutanga yuma. Iye yakwasa Yehova kutanga tutongonoshi, ni yuma yikwo yeswe. Ayo yatanga nawa hano hashi twatwama.

Yehova yalulieka hashi hanga tushitu ni atu ahase kutwamaho. Yalingisa hano hashi hapwe pangu. Yatanga milundu, tulunga-lwiji ni njiji.

Mba yika nawa atangile? Yehova yamba ngwenyi: ‘Mungutanga mwambu, ni yiputa ni mitondo.’ Mba yikusoka mihuko yeka ni yeka, yitemo ni mafwo anji waze twakulia. Chocho, Yehova yatanga tushitu eswe waze akukalala, akwenda ni waze akuhumuka. Yatanga nawa tushitu anene-anene ni akehe-akehe, ngwe mbalu ni njamba. Kashitu muka yena wakuzanga?

Hachino, Yehova yamba kuli mungelo mutangu ngwenyi: “Tulingenu mutu.” Atu te malisa ni tushitu. Ayo te mahasa kulinga yuma yeka ni yeka. Ayo te mahanjika, maseha ni kulemba kuli Zambi. Nawa te mahasa kufunga hashi ni tushitu. Unanyingika mutu mutangu yoze wapwile hano hashi? Tutalenu.