Chize ha Sanga Lia Meya ndo ha Utuswilo mu Engitu

Atu nake wika waze anakasala ni mwono ha Sanga lia Meya, alioze hakupalika cha mashimbu atu yaputuka kwoka chinji hano hashi. Hi hakupalika cha miaka 352 muze te Sanga lia Meya hiliapalika kulu mba yikusemuka Apalahama. Yetwe mutulilongesa chize Yehova anakamanuna chilakenyo chenyi ha kuhana kuli Apalahama umwe mwana yoze anavuluka ngwo Izake. Alioze, mukachi ka ana aali a Izake, Zambi yasakula Yakomba.

Yakomba yapwa ni asoko anji, 12 a ana a malunga ni amwe a mapwo. Kumi lia ana ja Yakomba te kakwivwila mwana-kwo Yosefwe kole, kashika yamulanjisa mu undungo ku Engitu. Hakupalika cha mashimbu, Yosefwe yapwa umwe mwanangana mulemu mu Engitu. Muze kwejile zala yinji, Yosefwe yeseka a-yayo hanga aamone nyi te halumuna mbunge jo. Hi kulutwe, asoko eswe a Yakomba, e A-Izalele, yaya ni kutunga mu Engitu. Yuma yino yinakapwa muze te hikwapalika 290 a miaka chize muze Apalahama asemukine.

A-Izalele kanakatunga mu Engitu 215 a miaka. Muze te Yosefwe hafwa, ayo yapwa tupinji mu Engitu. Ha mashimbu jacho, Mose yasemuka, nawa Zambi yamutenga chikwashi hanga alamwine A-Izalele mu Engitu. Mu Chihanda CHAMUCHIALI muli yishima yize yinakalinga 857 a miaka.