Yesu Kaneza Ngwe Mwanangana

HA MASHIMBU akehe muze te Yesu hauka tupuputa aali, iye yeza ku chimwe chihunda chikehe hakamwihi ni Yerusaleme. Iye yamba kuli tumbaji twenyi aali ngwenyi: ‘Njilenu mu chihunda munuwanamo umwe mwana chimbulo. Munumujitula hanga numunehe kuli yami.’

Muze hamunehena mwana chimbulu, Yesu yanyinoho. Mba iye yanjila mu Yerusaleme helu lia mwana chimbulu. Muze iye te haheta hakamwihi ni mbonge, yikwiza yimwe mbunga yinene ya atu hanga yilitakane nenyi. Anji a kuli ayo yala mahina jo mu tapalo. Akwo yateta mitango ya mingaji. Ayo yayala mu tapalo, yaputuka kukololoka ngwo: ‘Zambi awahise mwanangana yoze uneza mu jina lia Yehova!’

Ku mashimbu akunyima, mu Izalele, mwanangana mwaha mweswe te kakunjila mu Yerusaleme helu lia mwana chimbulu hanga alisolole kuli atu. Chenacho che Yesu alingile. Atu wano ha chizulie kanasolola ngwo kanazange Yesu hanga apwe mwanangana wo. Alioze atu akwo te keshi kumuzanga. Yetwe mutuhasa kuchinyingika mumu ha yuma yize yinakapwako muze Yesu anakaya mu tembele.

Muzemwene mu tembele Yesu yauka tupuputa ni yitonji. Muze twanuke achimwene ayo yaputuka kuhalisa Yesu ni liji likolo. Alioze asasendote yevwa uli unji, mba ayo yamba kuli Yesu ngwo: ‘Yena unevu ko yize twanuke anambe?’

Yesu yaakumbulula ngwenyi, ‘Ewa, yami ngunevu ko. Kunwatangile nilimwe tangwa mu Mbimbiliya ngwo: “Mu makanwa ja ana-akemba Zambi makatuhwisamo uhaliso ungunu?”’ Chocho twanuke yanunga ni kuhalisa mwe mwanangana wa Zambi.

Yetwe tunazange kupwa ngwe twanuke jacho, nyi ngwami? Amwe atu mahasa kutukanjisa kuhanjika hakutwala ku wanangana wa Zambi. Alioze yetwe mutununga ni kuhanjika kuli akwetu hakutwala ku yuma yipema yize Yesu makalinga hali atu.

Ha mashimbu waze Yesu te uchili hano hashi, iye te kanda achiputuka kuyula ngwe mwanangana. Tangwa lika te shimbu yacho muyiheta? Tumbaji twa Yesu yazanga kuchinyingika. Mutulilongesa yuma yacho kulutwe.