Ku Mulundu wa Olivwe

AU Yesu uli ha Mulundu wa Olivwe. Malunga awana waze ali no kali apostolo jenyi. Kali Andeleu ni yayo Petulu, nawa Tiangu ni mwanakwo Yoano. Kulutwe akuze yena muhasa kumona tembele ya Zambi mu Yerusaleme.

Te hi kwapalika matangwa aali chize muze Yesu anjilile mu Yerusaleme helu lia mwana chimbulu. Te tangwa liamaali. Ha chimenemene Yesu yaya ku tembele. Asasendote yeseka kukwata Yesu hanga amushehe. Alioze ayo yevwa woma wa kuchilinga, mumu atu te kakuzanga Yesu.

Yesu yaluka jina kuli mangana a ulembelo. Hakwavuluka ngwo: ‘Tupela enwe e ana ja tupela!’ Hohene Yesu yamba kuli ayo ngwo Zambi makaamwesa lamba mumu ha yuma yeswe yipi yize ayo akulinga. Mba hi Yesu yakanduka ha Mulundu wa Olivwe, hazehene apostolo jenyi awana yaputuka kumulinga yihula. Yena unanyingika yize ayo anakamuhula?

Apostolo yamuhula hakutwala ku yuma yize te muyipwa kulutwe lia matangwa. Ayo te kananyingika ngwo Yesu mahwisa upi weswe hano hashi. Kashika, ayo te kanazange kunyingika shimbu lize te yuma yacho muyikapwa. Shimbu yika te Yesu mafuna hanga ayule ngwe Mwanangana?

Yesu te kananyingika ngwo tumbaji twenyi hano hashi te kechi kuhasa kumumona muze iye meza kamuchiali. Mumu iye te mu malilu matwama, kashika ayo te kechi kuhasa kumumona. Kashika Yesu yalweza apostolo jenyi yimwe yuma yize te muyipwa hano hashi, muze iye maputuka kuyula ngwe Mwanangana mu malilu. Yuma yacho yika?

Yesu yamba ngwo kumukukapwa jita, yikola, zala, ni utoji unji, nawa ni minyiko yinene. Yesu yamba nawa ngwo sango jipema ja wanangana wa Zambi kumakajambujola hashi eswe. Yetwe hitwamona yuma yacho chize yinalingiwa ha mashimbu jetu? Ewa! Kashika yetwe tuli ni ushindakenyo ngwo Yesu kanayula haliapwila mu malilu. Kwasala hakehe hanga iye amanyise upi weswe hano hashi.