Ngideone Yakumba A-Mindiane

Hakupalika cha mashimbu, A-Izalele yehuka nawa Yehova yaputuka kuwayila tuzambi a mahuza. Ha miaka shimbiali, A-Mindiane yeya yimuna ya A-Izalele, nawa yenyeka mbuto yo. Mba achine kwaashiha kuli A-Mindiane, A-Izalele yaputuka kuswama ku yivwenge ni ku milundu. Ayo yeta kuli Yehova hanga aakwase. Chocho, Yehova yatuma mungelo kuli mukweze yoze te avuluka ngwo Ngideone. Mungelo yamba ngwenyi: ‘Yehova ha kusakula hanga upwe kajita wa ndundo.’ Ngideone yamuhula ngwenyi: ‘Kuchi munguhasa kupulwila A-Izalele? Ami nguli mutu wangwaza.’

Kuchi te Ngideone manyingika ngwenyi, Yehova te hamusakula? Iye yasa wona wa panga hashi ni kwamba kuli Yehova ngwenyi: ‘Ha chimene, nyi mume muupwa wika ha wona uno, alioze mavu mapwa omu, mungunyingika ngwami unazange hanga ngupulwile A-Izalele.’ Mukwachako ha chimene, wona wacho yiuzala too ni mume, alioze mavu te kali omu! Hachino, Ngideone yeta nawa hanga ha chimene chize muchisulaho wona ume, alioze mavu aule ni mume. Muze yino yalingiwile, Ngideone yanyingika ngwenyi, Yehova kamusakwile. Hachino, yakunga maswalale jenyi hanga aye ni kwasa jita ni A-Mindiane.

Yehova yalweza Ngideone ngwenyi: ‘Mungunukunjika akwa-kole jenu. Alioze amu uli ni maswalale anji, yenu munuhasa kunyonga ngwenu munukumba jita yenwene. Lweza mweswawo unevu woma hanga ahiluke ku zuwo.’ Hachino, maswalale 22, 000 yahiluka ku mazuwo jo, chocho yasala ni maswalale 10, 000. Yehova yamba nawa ngwenyi: ‘Uchili ni maswalale anji. Atwale ku lwiji nawa alweze hanga anwe meya. Usala wika ni waze matala kuze mukwijila akwa-kole muze ananu meya. Hachino yasala wika ni maswalale 300 waze apwile ni kuhetula meso muze te ananu meya. Mba Yehova yamulakenya ngwenyi, malunga wano akehe e makumba maswalale A-Mindiane 135, 000.

Ufuku uzewene, Yehova yalweze Ngideone ngwenyi: ‘Wano e mashimbu akulukukila A-Mindiane!’ Ngideone yahana kuli maswalale jenyi yitavwi ni milondo yinene-yinene, ni masoka mu chima liayo. Iye yaalweza ngwenyi: ‘Senu meso kuli yami nawa lingenu chize yami mungulinga.’ Ngideone yemba chitavwi ni kushiha mulondo wenyi ni kukololoka ngwenyi: ‘Katana wa Yehova ni wa Ngideone!’ Mba maswalale jenyi eswe 300 no yalinga chochene. A-Mindiane yevwa woma, chocho yaputuka kuchina chamuchinyina. Hamukunda wa choji, ayo yaputuka kulishiha-ene. Hachino, Yehova yakwasa nawa A-Izalele kukumba akwa-kole jo.