Jonata Mukwa-Hamu ni Ushishiko

Mwana wa mukulwana wa Mwanangana Saulu, kapwile kajita wa hamu. Ndawichi kambile ngwenyi, Jonata kapwile chikanyame ngwe pupa, nawa mukwa-tachi ngwe ndumba. Ha limwe tangwa, Jonata yamona maswalale 20 A-Filistea ha umwe mulundu. Yalweza kafunga kenyi ngwenyi: ‘Etu mutulimika no nyi Yehova matwaha chimwe chilayi. Nyi A-Filistea matusanyika hanga tuyeko, mba mutunyingika chize mutulimika no.’ A-Filistea yakololoka ni kwamba ngwo: ‘Tweyenu hanga tuliase jita!’ Hachino, malunga aali yakanduka ha mulundu yakumba maswalale jacho.

Amu Jonata te mwana wa mukulwana wa Saulu, iye te mahasa kusulako ngwe mwanangana. Alioze Jonata kanyingikine ngwenyi, Yehova te hanasakula kulu Ndawichi hanga akapwe mwananagana yoze mahatako mu Izalele, chipwe chocho kakapwile ni chipululu. Jonata ni Ndawichi yapwa masepa akolo. Ayo yalilakenya kulifunga ni kulikalila umwe ni mukwo. Jonata yahana Ndawichi chikuto, katana mwivwi ni muya wenyi, ngwe chilayi cha usepa wo.

Muze Ndawichi te anachina Saulu, Jonata yaya ndo kuze apwile, ni kumulweza ngwenyi: ‘Takama, nawa pwako ni hamu. Yehova hanakusakula hanga upwe mwanangana. Chipwe tata neye kanachinyingika.’ Shina muzanga kupwa ni sepa ngwe Jonata?

Ha yisuho yinji, Jonata yasa mwono wenyi mu kapalia hanga alamwine sepa lienyi. Iye yanyingika ngwenyi, Mwanangana Saulu te kanambe kushiha Ndawichi, chocho yalweza tato ngwenyi: ‘Muchipwa shili kuli yena kushiha Ndawichi; iye kalingile upi niumwe. Saulu yevwila Jonata uli. Hakupalika cha yimwe miaka, Saulu ni Jonata yafwa hamuwika mu jita.

Muze Jonata afwile, Ndawichi yafupa mwana wa Jonata Mefiposhete. Muze amuwanyine, yamulweza ngwenyi: ‘Yena mutwama ni yami ku mwono we weswe, mumu tatenu kapwile sepa liami mupema. Mutwama ku zuwo liami lia wanangana ni kulila ha mesa yami.’ Ndawichi kakavulamine sepa lienyi Jonata.