Solola Ushishiko we Kuli Yehova
“Yehova mapwa hakachi ka yami ni yena ni hakachi ka chisemuko cha yami ni chisemuko cha yena ndo ku miaka ya mutolo.”—1 SAMUELE 20:42.
1, 2. Mumu liaka usepa wa Ndawichi ni Jonata uli chilweza chinene cha ushishiko?
JONATA kakomokene chinji ha hamu lize mukweze Ndawichi apwile nalio. Ndawichi kashihile Ngoliate ni kutwala “mutwe wa Ka-Filistea” wacho kuli tato ya Jonata, Mwanangana Saulu wa mu Izalele. (1 Samuele 17:57) Jonata kakahamikine ngwenyi Zambi keshi hamwe ni Ndawichi, nawa chize ha shimbu liacho, Jonata ni Ndawichi yijipwa masepa apema. Ayo yalilakenya ngwo manunga ni kushishika kuli umwe ni mukwo. (1 Samuele 18:1-3) Ku mwono wenyi weswe, Jonata kashishikile kuli Ndawichi.
2 Jonata yanunga ni kushishika kuli Ndawichi chipwe ngwe Yehova te hanasakula kulu Ndawichi hanga asuleho ngwe mwanangana mu Izalele alioze hi Jonata ko. Nawa, muze Saulu te anafupa kushiha Ndawichi, Jonata kalipikalile chinji hakutwala kuli sepa lienyi. Aye muze hanyingika ngwenyi Ndawichi kachinyina ku puya yili hakamwihi ni Horeshe, Jonata yayako ni kumutakamisa hanga anunge ni kujikijila muli Yehova. Jonata yalweza Ndawichi ngwenyi: “Kanda wivwa woma mumu tata Saulu kechi kukuwana. Yena kumukapwa mwanangana wa Izalele ni yami mungukakuhata ha kota.”—1 Samuele 23:16, 17.
3. Chuma chika chapwile ni ulemu kuli Jonata kuhiana kushishika kuli Ndawichi, nawa kuchi tunachinyingika? (Tala chizulie chili hauputukilo.)
3 Yetu kanji-kanji twakukomoka atu waze ashishika. Alioze yetu twakukomoka wika Jonata mumu kashishikile kuli Ndawichi? Ka, mumu kushishika kuli Zambi chapwile chuma chilemu chinji ku mwono wa Jonata. Umwenemwene uli ngwo, aye kashishikile kuli Ndawichi chakuhona kupwa ni ukwa hali iye, chipwe ngwe te kananyingika ngwenyi Ndawichi mwe mapwa mwanangana. Jonata nawa kakwashile Ndawichi hanga afuliele muli Yehova. Malunga wano aali kashishikile kuli Yehova ni kuli umwe ni mukwo. Ayo kanungine ni kumanununa chilakenyo cho chize alingile ngwo: “Yehova mapwa hakachi ka yami ni yena ni hakachi ka chisemuko cha yami ni chisemuko cha yena ndo ku miaka ya mutolo.”—1 Samuele 20:42.
4. (a) Yika muyitulingisa hanga tuwahilile hamwe ni chiseke? (b) Yika mutulilongesa ha mutwe uno?
4 Twatamba kushishika kuli asoko, masepa, ni mandumbu jetu mu chikungulwila. (1 A-Tesalonika 2:10, 11) Alioze chuma chahiana yeswayi, chili kushishika kuli Yehova. Mumu iye wika watwehele mwono! (Usolwelo 4:11) Muze mutushishika kuli iye, mutuwahilila chinji hamwe ni chiseke. Alioze tunanyingika ngwetu twatamba kushishika kuli Zambi chipwe ha mashimbu akalu. Ha mutwe uno, mutulilongesa chize chilweza cha Jonata muchitukwasa kununga ni kushishika kuli Yehova ha yikuma yiwana: (1) muze mutumona ngwetu mutu yoze uli ni chiyulo hali yetu katelele vumbi lietu, (2) shimbu lize twatamba kukwata chiyulo cha kusakula yoze mutusolwela ushishiko, (3) muze akwetu matwanda kapalia hanji kutulemeka ku mbunge, ni (4) muze muchipwa chikalu kumanununa chilakenyo chetu.
MUZE MUTUMONA NGWETU MUTU YOZE ULI NI CHIYULO HALI YETU KATELELE VUMBI LIETU
5. Mumu liaka chapwile chikalu kuli A-Izalele kushishika kuli Zambi muze Saulu te uchili mwanangana?
5 Jonata ni atu a mu Izalele kapwile ha mashimbu akalu. Mwanangana Saulu, tato ya Jonata, kechele kwononokena Yehova, mba hi Yehova yalitunayo. (1 Samuele 15:17-23) Chipwe chocho, Zambi yecha Saulu hanga anunge ni kuyula ha miaka yinji. Kashika, chapwile chikalu chinji kuli A-Izalele kwononokene Zambi, mumu mwanangana asakwile hanga atwame ha “ngunja ya Yehova,” kapwile ni kulinga yuma yipi.—1 Sango ja Mianangana 29:23.
6. Yika yinasolola ngwo Jonata kanungine ni kushishika kuli Yehova?
6 Jonata kanungine ni kushishika kuli Yehova. Achinyonga ha yize Jonata alingile muze Saulu aputukile kwehuka shimbi ja Zambi. (1 Samuele 13:13, 14) Ha mashimbu jacho, chimwe chilombo chinene cha A-Filistea hamwe ni matemba a jita 30.000 kayile ni kwasa jita ni A-Izalele. Saulu kapwile wika ni maswalale 600, nawa iye ni Jonata e wika apwile ni mata. Alioze Jonata kakapwile ni kwivwa woma. Iye yewuluka maliji a profeta Samuele, waze anambe ngwo: Yehova “keshi kwehuka atu jenyi, mumu ha ulemu wa jina lienyi.” (1 Samuele 12:22) Jonata yalweza maswalale ni akwo ngwenyi: “Hi chikalu ko kuli Yehova kulamwina atu chipwe ni anji chipwe ni akehe.” Ha chino, iye hamwe ni maswalale ni akwo yasa jita ni chizavu cha tujita A-Filistea ni kushiha 20. Jonata kafulielele muli Yehova, mba Yehova yamuwahisa. Yehova yaneha umwe munyiko wa mavu nawa A-Filistea, yaputuka kwivwa woma. Chocho, o yaputuka kuliasa jita ene ni kulishiha umwe ni mukwo, mba A-Izalele yakumba jita.—1 Samuele 13:5, 15, 22; 14:1, 2, 6, 14, 15, 20.
7. Kuchi Jonata te akumona tato?
7 Chipwe ngwe Saulu kanungine ni kwehuka shimbi ja Yehova, nihindu Jonata kasele tachi hanga ononokene tato. Chakutalilaho, o kashile jita hamuwika hanga jikalile atu ja Zambi.—1 Samuele 31:1, 2.
8, 9. Kuchi mutuhasa kushishika kuli Zambi muze mutuvumbika waze ali ni poko ya kuyula?
8 Chizechene ngwe Jonata, ni yetu mutuhasa kushishika kuli Yehova ha kusa tachi hanga twononokene manguvulu a mu chifuchi chize twatwama. Yehova kaneche waze “ali ni poko ya kuyula” hanga atuyule, nawa iye kanatwite hanga twaavumbike. (Tanga A-Roma 13:1, 2.) Kashika twatamba kusa vumbi manguvulu, chipwe muze malinga kalimbalimba hanji mutumona ngwetu ayo katelele vumbi lietu. Ha chino, twatamba kusa vumbi waze eswe haneehe chiyulo kuli Yehova.—1 A-Korindu 11:3; A-Hepreu 13:17.
Yimwe jila yakusolwela ngwetu twakushishika kuli Yehova, yili kutwama kanawa ni malunga hanji mapwo jetu ni kwaavumbika chipwe ngwe ayo keshi kuwayila Yehova (Tala paragrafu 9)
9 Olga, umwe pangi ku America ya Kusango, kasolwele ushishiko wenyi kuli Yehova ha kusa vumbi mukwo-lunga chipwe ngwe lunga te kakumumwesa lamba.[1] (Tala maliji ali mushi.) Mukwo-lunga ha mashimbu amwe te keshi kuhanjika ni Olga hanji kumwamba yuma yipi mumu ali Chela cha Yehova. Mukwo-lunga yamwamba ngwenyi te mamuhichika nawa ngwo te mambata ana eswe. Alioze Olga kakafunyishine “yipi ha yipi.” Iye te kakulinga yuma yize yalita hanga apwe pwo mupema. Iye te kakumutelekela ni kumukosela mazalo, ni kufunga atu akwo mu usoko wenyi. (A-Roma 12:17) Nawa muze te akupwa ni shimbu, aye te kakuya hamwe ni mukwo-lunga ni kumeneka asoko ni masepa jo. Chakutalilaho, muze mukwo-lunga azangile kuya ku mbonge yikwo ku ufwe wa tato, Olga yalulieka yuma yeswe yize te yinafupiwa hanga ayo ambate mu wenyi. Muze te hafunda tato, Olga yashimbwila mukwo-lunga haze lia yingeleja. Hakupalika cha miaka yinji, lunga lienyi yaputuka kumufunga kanawa mumu iye kapwile chihomboloji ni kumusolwela vumbi matangwa eswe. Haliapwila Olga kakumukolweza mashimbu eswe kuli mukwo-lunga hanga aye ku kukunguluka nawa kakuya ni kumwandako. Ha mashimbu amwe ni iye kakukunguluka hamwe ni mukwo-pwo.—1 Petulu 3:1.
KUKWATA CHIYULO CHA KUSAKULA YOZE TWATAMBA KUSOLWELA USHISHIKO
10. Kuchi Jonata anyingikine yoze te iye atamba kusolwela ushishiko?
10 Muze Saulu ambile ngwenyi, mashiha Ndawichi, Jonata te katamba kukwata chimwe chiyulo chikalu. Aye yazanga kushishika kuli tato, alioze yazanga nawa kushishika kuli Ndawichi. Jonata te kananyingika ngwenyi, Zambi kapwile hamwe ni Ndawichi hi ni Saulu ko, kashika iye asakwile kushishika kuli Ndawichi. Iye yatoweza Ndawichi hanga achine ni kulweza Saulu hanga eche kushiha Ndawichi.—Tanga 1 Samuele 19:1-6.
11, 12. Kuchi zango lietu hali Yehova liakutukwasa kukwata chiyulo cha kumushishikila?
11 Alice, umwe pangi yoze watwama mu Australia, kakwachile chiyulo chakunyingika yoze te atamba kusolwela ushishiko. Muze te analilongesa Mbimbiliya, iye yalweza asoko jenyi hakutwala ku yuma yize te akulilongesa. Iye nawa yaalweza ngwenyi te katambile kulinga chiwanyino cha Natal, nawa yaalumbunwina mumu liaka. Asoko yevwa kupihia, nawa yaputuka kumwivwila uli. Ayo yanyonga ngwo Alice keshi kwaazanga. Ha chino, naye yamwamba ngwenyi, te keshi kuzanga nawa kumumona kumeso jenyi. Alice yamba ngwenyi: “Nevwile yikola yinji ku mbunge, mumu te nakuzanga chinji asoko jami. Alioze yingunyingika ngwami, Yehova ni Mwanenyi e natamba kusa kulutwe mu mwono wami, kashika ha kukunguluka cha mbonge chize chasulileho yangupapachisa.”—Mateu 10:37.
12 Kutwatambile kushishika ku chuma nichimwe, chalifwa ngwe, chizavu cha akwa-konda, shikola hanji chifuchi, yino kuyatambile kupwa ni ulemu unji ku mwono wetu kuhiana kusolola ushishiko wetu kuli Yehova. Chakutalilaho, Henry te kakuzanga chinji kuheha xadrez mu chizavu cha ku shikola yenyi nawa te kanazange kukumba hanga aye ku kampionatu ya shikola yenyi. Alioze, amu te akuheha xadrez poso jeswe, te chakumupwila chikalu kuya ni kwambujola hanji ku kukunguluka. Henry yamba ngwenyi, kuli iye chapwile chilemu chinji kusolola ushishiko wenyi ku shikola kuhiana kuli Zambi. Alioze, aye yakwata chiyulo cha kwecha kuheha xadrez.—Mateu 6:33.
13. Kuchi kushishika kuli Zambi muchihasa kutukwasa hanga tuhwise kapalia mu usoko?
13 Ha mashimbu amwe muchihasa kupwa chikalu chinji kusolola ushishiko kuli atu amu usoko wetu ha shimbu limuwika. Chakutalilaho, Ken yamba ngwenyi: “Ami matangwa eswe te nakuzanga kumeneka mama yoze hapwa kashinakaji, nawa te kanazange hanga atwame ni yetu ha amwe mashimbu akehe. Alioze mama ni mukwetu-pwo te jishi kulivwashana.” Ken yanunga ni kwamba ngwenyi: “Ami te chishi kuzanga kupwa sali lia umwe, ni kwivwisa mukwo chinyengo ku mbunge.” Ken yanyonga hakutwala ku yize Mbimbiliya yinambe, nawa yanyingika chize te malinga ha chikuma chacho, ni kusolola ngwenyi, katamba kuwahilila ni kushishika kuli mukwo-pwo. Ha kasulaho, aye yalumbununa kuli mukwo-pwo mumu liaka iye te atamba kuvumbika naye. Nawa yalumbununa kuli naye mumu liaka iye te atamba kuvumbika mukwo-pwo.—Tanga Uputukilo 2:24; 1 A-Korindu 13:4, 5.
MUZE UMWE NDUMBU MATWANDA KAPALIA HANJI KUTULEMEKA KU MBUNGE
14. Kuchi Saulu te akumwesa mwanenyi lamba?
14 Mutuhasa nawa kushishika kuli Yehova nyi umwe ndumbu yoze uli ni chiteli, matwanda kapalia hanji matulemeka ku mbunge. Mwanangana Saulu yoze asakwile kuli Zambi, te kakumwesa mwanenyi lamba. Aye te keshi kunyingika mumu liaka Jonata te akuzanga Ndawichi. Kashika muze Jonata te akweseka kukwasa Ndawichi, Saulu te kakumwivwila uli unji, nawa aye kamukolesele sonyi hakachi ka atu. Alioze Jonata nihindu kasolwele vumbi kuli tato. Ha shimbu lioliene aye yashishika kuli Yehova ni kuli Ndawichi, yoze Zambi asakwile hanga asuleho ngwe mwanangana mu Izalele.—1 Samuele 20:30-41.
15. Yika twatamba kulinga, nyi umwe ndumbu matulemeka ku mbunge?
15 Mu yikungulwila yetu musono, mandumbu waze apwa tusongo kakusa tachi hanga asolole yitanga yipema kuli mandumbu eswe. Alioze mandumbu wano kali yihenge. Amu o ali yihenge muchihasa kupwa chikalu kuli ayo kunyingika mumu liaka twalinga chimwe chuma. (1 Samuele 1:13-17) Kashika, nyi hanji amwe matulengulula hanji kuhona kutupanjika, tunungenu wika ni kushishika kuli Yehova.
MUZE MUCHIPWA CHIKALU KUMANUNUNA CHILAKENYO CHETU
16. Ha yikuma yika twatamba kusolola ushishiko kuli Zambi ni kwehuka kuzo?
16 Saulu kazangile hanga Jonata amusalakane ngwe mwanangana, hi Ndawichi ko. (1 Samuele 20:31) Alioze Jonata te kakuzanga Yehova ni kushishika kuli iye. Shimbu apwe ni kuzo, Jonata yapwa sepa mupema lia Ndawichi ni kumanununa chilakenyo chenyi. Chochene, mweswawo yoze wakuzanga Yehova ni kushishika kuli iye, ‘kechi kwecha kulinga yeswe yize alakenya chipwe mamona lamba.’ (Samu 15:4) Amu yetu twakushishika kuli Zambi, mutununga ni kumanununa yilakenyo yetu. Chakutalilaho, nyi twalinga chimwe chilakenyo hakutwala ku umwe mungoso, yetu twakulinga yeswe yize mutuhasa hanga tumanunune chilakenyo chetu chipwe ngwe chino muchipwa chikalu. Chikwo nawa, ni tuli ni umwe kapinda mu ulo wetu, twatamba kusolola zango lietu kuli Zambi ni kushishika kuli mukwetu-lunga hanji kuli mukwetu-pwo.—Tanga Malakia 2:13-16.
Nyi twalakenya kulinga umwe mungoso twatamba kulinga yize twalakenya nyi twachilinga, mutusolola ngwetu twashishika kuli Zambi (Tala paragrafu 16)
17. Mutwe uno watukwasa ha yikuma yika?
17 Tunazange kushishika kuli Zambi chipwe ha mashimbu akalu ngwe chize alingile Jonata. Kashika tunungenu ni kushishika kuli mandumbu ni mapangi jetu, muze matulemeka ku mbunge. Mba mutwivwisa mbunge ya Yehova kuwaha, nawa muchitunehena chiseke chinji ku mbunge. (Yishima 27:11) Mutuhasa kufuliela ngwetu, Yehova manunga ni kulinga yuma yipema hali yetu ni kutufunga. Ha mutwe uze musulaho, mutulilongesa hakutwala kuli amwe atu aha mashimbu a Ndawichi waze ashishikile ni waze kakashishikile.
^ [1] (paragrafu 9) Majina amwe kapwa kwalumuna.