Yipikalo Hakutwalaku Ponde

Alona yamba ngwenyi: “Muze nevwile alarme, yinguputuka kuchikima nawa yingufupa uchinyino wa mbomba. Alioze chipwe kuze kwene naswamine nalipikalile chinji. Nakulipikala chinji, chipi-chipi muze nguli haze, kuze kukushi chihela chakuswamina. Tangwa likwo muze te ngunende mu tapalo, naputukile kulila, nawa te chiso kuhasa kuhwima mbunge. Kwapalikile maola anji mba ngulihumikize. Alarme yiputuka kuteta nawa.”

Jita yili chimwe chuma chipi chinji. Chakutalilaho, nyi munyingika ngwenyi yena hanji mutu yoze wazanga chinji kali ni yimwe yikola yipi muwivwa ngwe kakwasa uta wa mbomba. Nawa kuli atu akwo, kwivwa woma wa matangwa akulutwe chakwaanehena yipikalo. Ayo kakulipikala ni kulihula ngwo, ana jo hanji ajikulu jo shina makatwama hashi haze hali jita, utoji, kupiha, kwalumuka cha tungonde, ni yikola yipi nyi? Kuchi mutuhasa kukumba yipikalo yino?

Kunyingika ngwetu yuma yipi muyilingiwa, “chikanyame malangikiza maswama.” (Yishima 27:12) Ngwe chize twakufupa kufunga mwono wetu, mutuhasa kusa tachi hanga tufunge mbunge ni manyonga jetu. Yiheho ya utoji ni sango jipi, yeswe ai, yakuwezela yipikalo kuli ana jetu. Kwehuka yizulie ya ponde kuchiso kulumbunuka ngwo tunalengulula yuma yize yakulingiwa. Zambi kakalingile atu hanga apwe ni kumona yuma yipi. Alioze twatamba kupwa ni manyonga a yuma “yeswayo yamwenemwene, . . . ya ululi, yitoma, . . . yatela kufwila, . . . nyi twayilinga, ‘Zambi wa sambukila makapwa hamwe ni yetu.’​—A-Fwilipu 4:8, 9.

ULEMU WA KULEMBA

Ufulielo wamwenemwene wakutukwasa kulimika ni yipikalo. Mbimbiliya yinatukolweza ngwetu: “Keyelenu, nukalitumbikile ku kulemba.” (1 Petulu 4:7) Mutuhasa kwita kuli Zambi hanga atwehe mana ni hamu nawa hanga atukwase kwehuka yipikalo yeswe, nawa ni kufuliela ngwetu: “Aye matwivwa, tunanyingika ngwetu mututambula chize tunamwichi.”​—1 Yoano 5:15.

Mbimbiliya yinalumbununa ngwo Satana, mwe “wayula hashi” hi Zambi ko nawa ngwo “hashi heswe lukombo kuhakupomba mu chiyulo cha mwe chingulungulu.” (Yoano 12:31; 1 Yoano 5:19) Hano Yesu kanakahanjika umwenemwene muze atulongesele kulemba ngwenyi: “Kanda nututwala kama kucheseko.” (Mateu 6:13) Alona yamba ngwenyi: “Nyi nevwa alarme yinatete, nakwita Yehova hanga angukwase kufunga manyonga jami. Nawa lunga liami kakungutelefonala hanga tulembe. Kwamba umwenemwene kulemba chakungukwasa.” Yino ye Mbimbiliya yinambe: “Yehova hakamwihi ali ni waze eswe akutambika kuli iye; waze eswe akutambika kuli iye mu umwenemwene.”​—Samu 145:18.

KUTALATALA CHETU CHA KULUTWE LIA MATANGWA

Ha longeso lienyi lia ku mulundu, Yesu yalongesa tumbaji twenyi hanga alembe: “Wanangana wenu wize.” (Mateu 6:10) Wanangana wa Zambi mukahwisa yipikalo yeswe. Kupalikila muli Yesu “Mwanangana wa Sambukila,” Zambi makamanununa “jita ndo kusongo lia hashi.” (Izaia 9:6; Samu 46:9) ‘Iye [Zambi] kumakapatwila mavungu anji . . . Vungu kulishi kakwata katana likalimike ni vungu likwo. . . . Niumwe maavwisa woma wakwihi.’ (Mika 4:3, 4) Asoko awahilila “kumakatunga mazuwo ni kutwamamo; kumakatumba minda ya uva ni kulia ye mihuko yamo.” (Izaia 65:21) “Niumwe watungako mamba ngwenyi ngunayiji.”​—Izaia 33:24.

Musono, chipwe twakusa tachi hanga twehuke yuma yipi nihindu kutuchi kuhasa kwehuka ‘luyinda yoze wakwiza’ susumuku, hanji kwehuka yuma yipi yize yakulingiwa mu chihela hanji ha maola api. (Chilumbununyi 9:11) Chize ha miaka ya kunyima, jita, upupilo, ni yikola nihindu yinanungu ni kushiha atu waze akwete yitanga yipema. Kutalatala chika atu jacho asamba alinacho?

Atu anji hanafu, waze ananyingika kuli Zambi, kumakahindwisa. Haliapwila ayo kanapombo, kali mu manyonga ja Zambi ndo ha tangwa lize “waze eswe ali mu mafuka . . . makatuhuka.” (Yoano 5:28, 29) Kuhanjika hakutwala ku uhindukilo, Mbimbiliya yinatulakenya ngwo: “Chino tuli nacho ngwe ankora ya mbunge, kuyajikiza, kuyakola nawa.” (A-Hepreu 6:19) Nawa Zambi, “hanahana chinyingi kuli atu eswe, se hanamuhindwisa [Yesu] hakachi ka afu.”​—Yilinga 17:31.

Musono, chipwe waze aneseka kuvwisa Zambi kuwaha no makamona yipikalo. Hakukaula shimbi jingunu, ha kukundama kuli Zambi ha kulemba, ni kukolesa ufulielo ha kutalatala cha Mbimbiliya cha kulutwe lia matangwa, Paulu, Janete, ni Alona o kanakumbu kanawa yipikalo yo. Ngwe chize chapwa kuli ayo ‘Zambi yoze tunasela mbunge anuzalise ni uwahililo weswe ni sambukila yeswe ha kufuliela.’​—A-Roma 15:13.