Yikuma Yize Muyitukwasa Kusongwela Kanawa Kukunguluka cha Kuya mu Munda

Kukunguluka cha kuya mu munda necho chili chawana cha Yehova, ngwe chizechene kukunguluka chikwo cha mu chikungulwila, mumu chakutukwasa hanga tukolweze akwetu mu zango ni yitanga yipema. (Hep 10:24, 25) Kukunguluka chacho chatamba kulinga minutu 5 hanji 7, chekwamba, kuteta mandumbu mu yizavu, kwalweza njiza yize makalakalila ni kulemba. (Nyi kukunguluka chacho muchipwa hanyima lia kukunguluka chikwo, chatambile kumbata mashimbu anji.) Ndumbu yoze masongwela kukunguluka, katamba kululieka chikuma chize muchikwasa mandumbu waze mambujola ha tangwa liacho. Chakutalilaho, Liaposo ha kukunguluka cha kuya mu munda, hakupwa mandumbu anji waze kambulwile poso yeswe, kashika muchipema kushimutwina yikuma yize muyikwasa mandumbu kuhanjika ni atu. Yikuma yikwo yika yipema yize munuhasa kushimutwina?

• Maliji akuhanjika no ali ha Mwono Wetu ni Mulimo Wetu—Mukanda Wakuzachisa ha Kukunguluka

• Chize mutuhasa kuzachisa yuma yize yinalingiwa mu njiza yetu ni sango ja mu chifuchi hanga tuputuke kwambujola

• Chize mutukumbulula chihula chize akuhula chinji mu munda

• hize mutukumbulula atu waze keshi kufuliela Zambi, ni waze akwamba ngwo yuma yalitangile yene, hanji mutu yoze wakuhanjika limi lieka ni yoze wakuya mu yingeleja yeka

• Chize mutuhasa kuzachisa yikuma yize yili mu site jw.org, aplicativo JW Library^® hanji Mbimbiliya

• Chize mutuhasa kuzachisa umwe mukanda wa mu Mushete wa Yikwata ya Kulongesa Nayo

• Chize mutuhasa kwambujola ni telefone, kusoneka mikanda, kwambujola ha mbunga, kufuna ni kumeneka hanji kusongwela malongeso a Mbimbiliya

• Kuliwulula hakutwala ku kulifunga, kupwa atu ashi, kusolola yitanga yipema, kupwa ni nyonga lialita, hanji yuma yikwo nawa

• Limwe longeso hanji chinema cha kamukanda, Likolweze Kutanga ni Kulongesa

• Chize mutuhasa kukolweza ni kukwasa mandumbu waze twakwambujola no

• Chisoneko chize chinatale ha mulimo wa kwambujola hanji umwe lusango wa utakamiso