Shina Unanyingika Kalisa Watwama Hakachi ka Umwenemwene ni Mahuza?

1. Kuchi wakwivwa hakutwala ku umwenemwene?

YETU Yela ja Yehova, twakuzanga umwenemwene uze twakulilongesa mu Mbimbiliya. Chikwo nawa, ufulielo wetu wakukatuka ha umwenemwene wacho. (Roma 10:17) Tuli ni shindakenyo ngwetu, Yehova kasele chikungulwila cha Akwa-Kristu ngwe “nguji ni fundamentu ya umwenemwene.” (1 Timo. 3:15) Kashika, twakuzanga kukwasa mandumbu waze akutusongwela, mumu mandumbu jacho kakukaula umwenemwene wa mu Mbimbiliya ni kutukwasa hanga tulinge mulimo wa Zambi.—Hepre. 13:17.

2. Kulita ni Tiangu 5:19, yika muyihasa kulingiwa kuli yetu hanyima lia kulilongesa umwenemwene?

² Alioze, hanyima lia kulilongesa umwenemwene ni kutayiza usongwelo wa mu ululikiso wa Yehova, nihindu mutuhasa kupwa mu ponde ya kutupiangula. (Tanga Tiangu 5:19.) Satana mawahilila chinji nyi mututokesa ujikijilo wetu ha Mbimbiliya ni ha ululikiso wa Yehova.—Efwe. 4:14.

3. Mumu liaka twatamba kulalaminya ku umwenemwene? (A-Efwesu 6:13, 14)

³ Tanga A-Efwesu 6:13, 14. Kwasala hakehe, Satana mamwanga mahuza ni kutwala akwa-mavungu hanga alimike ni atu ja Zambi. (Uso. 16:13, 14) Yetu nawa tunanyingika ngwetu, Satana malinga yeswayo mahasa hanga onge atu ja Zambi. (Uso. 12:9) Kashika kukatuka haliapwila, chili chilemu kunyingika kalisa yoze watwama hakachi ka umwenemwene ni mahuza, ni kusa tachi hanga tununge ni kwononokena umwenemwene. (Roma 6:17; 1 Petu. 1:22) Yino ye muyikatukwasa mba tukalilamwine ha luyinda munene.

4. Yika mutulilongesa ha mutwe uno?

⁴ Ha mutwe uno, mutulilongesaho yitanga yaali yize twatamba kupwa nayo nyi tunazange kunyingika umwenemwene uze uli mu Mbimbiliya, ni kutayiza usongwelo wa mu ululikiso wa Yehova. Hanyima, mutuhengwola yuma yitatu yize twatamba kulinga nyi tunazange kumana nguu mu umwenemwene.

YITANGA YIZE TWATAMBA KUPWA NAYO NYI TUNAZANGE KUNYINGIKA UMWENEMWENE

5. Kuchi kuvwila Yehova woma chakutukwasa kunyingika umwenemwene?

⁵ Kuvwila Yehova woma. Kuvwila Yehova woma chinalumbunuka kumuzanga, kashika kutwazangile kulinga chuma chize muchimuvwisa yikola ku mbunge. Mba tupwe ni utayizo wa Yehova, twatamba kunyingika kanawa kalisa watwama hakachi ka chipi ni chipema ni kalisa yoze watwama ha umwenemwene ni mahuza. (Yishi. 2:3-6; Hepre. 5:14) Yuma yize atu akuzanga chinji, kanji-kanji kuyishi kuvwisa Yehova kuwaha. Kashika, kanda twecha woma wa atu utukwike kuzanga Yehova.

6. Kuchi kuvwila atu woma chatwalile A-Izalele kumi kuhanjika mahuza?

⁶ Nyi mutuvwila chinji atu woma kuhiana Yehova, chino muchihasa kututwala hanga twehuke umwenemwene. Tutalenu chilweza cha ngendeshi 12 A-Izalele waze atumine hanga anehe sango mu chifuchi chize Yehova alakenyene kuli atu jenyi. Kumi a kuli ayo, yecha woma uze apwile ni kuvwila A-Kanana uhiane zango lize o apwile nalio hali Yehova. Ayo yalweza A-Izalele eswe ngwo: “Kutwahashile kukanduka ni kulimika ni aze atu, mumu o katakama, yetu, ka.” (Kwa. 13:27-31) Chochene, kulita ni kunyonga cha atu, A-Kanana kapwile ni tachi jinji kuhiana A-Izalele. Alioze kwamba ngwo, A-Izalele te kechi kuhasa kukumba akwa-kole jo, chapwile ngwe kanavulama ndundo jize Yehova apwile najo. Malunga wano kumi kachi kalihulikilile ha yize Yehova azangile hanga A-Izalele alinge. Ayo nawa kachi kapukwine ha yize Yehova aalingilile. Kulinga chino, kachi chaakwashile kwiuluka ngwo, A-Kanana keshi ni yize malinga nyi maatesa ni Yehova mukwa-ndundo jeswe. Alioze kulisa ni malunga jacho, Yoshua ni Kalemba kazangile kupwa ni utayizo wa Yehova. Chocho, yalweza mbunga ngwo: “Nyi Yehova mawahilila muli yetu, iye kumakatunjisa mu chino chifuchi, kumakatwahacho.”—Kwa. 14:6-9.

7. Kuchi mutuhasa kuvwila chinji Yehova woma? (Tala nawa chizulie.)

⁷ Mba twivwile chinji Yehova woma, ha shimbu lieswalio mutukwata chiyulo, twatamba kunyonga ha yize muyimuvwisa kuwaha. (Samu 16:8) Muze mutanga jimwe sango ja mu Mbimbiliya, lihule ngwe, ‘Nyi yami mwe napwileho, kachi chiyulo chika nakwachile?’ Ngwe chilweza, muze ngendeshi kumi ahanjikile yuma yize kuyalitele, nyi wapwileho kachi watayijile yuma yacho ni kuvwila atu woma, nyi kachi wazangile chinji Yehova kuhiana kuvwila atu woma? A-Izalele kakatayijile Yoshua ni Kalemba waze apwile ni kuhanjika umwenemwene, chocho yatokesa uhashi wo wa kunjila mu chifuchi cha Chilakenyo.—Kwa. 14:10, 22, 23.

8. Chitanga chika twatamba kupwa nacho, mumu liaka?

⁸ Kulikehesa. Yehova kakusolola umwenemwene kuli atu waze alikehesa. (Mateu 11:25) Ni kulikehesa cheswe, yetu twakutayiza umwenemwene uze twakulilongesa. (Yili. 8:30, 31) Chipwe chocho, twatamba kukeya hanga tuhone kulizata. Mumu nyi twalizata, mutuhasa kuputuka kunyonga ngwetu, manyonga jetu kali alemu kuhiana shimbi ja mu Mbimbiliya ni usongwelo uze twakutambula mu ululikiso wa Yehova.

9. Kuchi mutuhasa kununga ni kupwa akwa-kulikehesa?

⁹ Nyi tunazange kununga ni kupwa akwa-kulikehesa, twatamba kunyingika ngwetu nyi twalitesa ni Yehova tuli akepe. (Samu 8:3, 4) Chikwo nawa, twatamba kulemba kuli Yehova ni kumwita hanga atukwase tupwe akwa-kulikehesa ni kutayiza yize akutulongesa. Yehova kakutulongesa manyonga jenyi kupalikila mu Mbimbiliya ni mu ululikiso wenyi. Kashika, iye matukwasa hanga tulemese yize akutulongesa kuhiana manyonga ja yetu ene. Muze unatange Mbimbiliya, eseka kumona chize Yehova akuzanga mutu yoze wa kulikehesa ni kuvwila lwaji mutu yoze wakulizata. Hanyima, sako tachi hanga ununge ni kulikehesa muze mutambula chimwe chiteli chize muchikwaha ndambu ya wata hanji chize muchikukwasa kusoloka chinji.

CHIZE MUTUHASA KULALAMINYA KU UMWENEMWENE

10. Aya Yehova atongwele hanga alongese atu jenyi ni kwaha usongwelo?

¹⁰ Jikijila ha ululikiso wa Yehova. Ku shakulu, Yehova katongwele Mose, hanyima yatongola Yoshua hanga asongwele A-Izalele. (Yoshu. 1:16, 17) A-Izalele te kakutambula yiwape muze apwile ni kumona malunga jacho ngwe tunganda twa Yehova. Ha kupalika cha miaka yinji, chikungulwila cha Akwa-Kristu yichiputuka, apostolo 12 e apwile ni kuhana usongwelo kuli atu ja Zambi. (Yili. 8:14, 15) Kulutwe, chizavu chacho yichitohwa; yasamo nawa makulwana waze apwile mu Yerusaleme. Ha kukaula usongwelo uze wapwile ni kukatuka kuli malunga wano ashishika, “yikungulwila yatakamine mu ufulielo, yokele tangwa ha tangwa.” (Yili. 16:4, 5) Musono, ni yetu twakutambula yiwape yinji muze twakukaula usongwelo uze wakwiza mu ululikiso wa Yehova. Mba kuchi Yehova mevwa nyi mutuhona kutayiza atu waze iye anasakula hanga atusongwele? Mutuhasa kukumbulula chihula chino ha kumona yize yalingiwile kuli A-Izalele muze te anayi mu chifuchi cha chilakenyo.

11. Yika yalingiwile kuli atu waze ahonene kuvumbika Mose, yoze Yehova asakwile hanga asongwele vungu lia Izalele? (Tala nawa chizulie.)

¹¹ Ha shimbu limwe muze A-Izalele te anayi mu chifuchi cha chilakenyo, malunga waze apwile ni ndambu ya wata, yalimika ni Mose ni kulituna kutayiza chiteli chize Yehova amuhele. Ayo yamba ngwo: ‘Akwa chikungulwila eswe [hi Mose wika ko] kali asandu, ayo eswe, Yehova hwali hakachi ko.’ (Kwa. 16:1-3) Chili umwenemwene ngwo, kuli Yehova chikungulwila cheswe cha A-Izalele chapwile chisandu. Alioze, iye kasakwile Mose hanga apwe kasongo mukachi ko. (Kwa. 16:28) Muze apwile ni kulimika ni Mose, kwamba umwenemwene, yihulia jacho kapwile ni kulimika ni Yehova. Ayo kakalihulikilile ha yize Yehova azangile; kalihulikilile ha yize ene apwile ni kuzanga; kupwa ni wata ni kutambula yiteli yize muyaasolola kumeso ja atu. Yehova yashiha malunga jacho eswe hamwe ni atu waze aakwashile. (Kwa. 16:30-35, 41, 49) Chizechene nawa, ni musono tunanyingika ngwetu, Yehova keshi kutayiza atu waze akulengulula usongwelo uze twakutambula mu ululikiso wenyi.

12. Mumu liaka twatamba kujikijila ha ululikiso wa Yehova mashimbu eswe?

¹² Yetu twatamba kujikijila ha ululikiso wa Yehova mashimbu eswe. Muze muchisoloka zwalala ngwo, twatamba kwalumuna ulumbunwiso wa yize twakulilongesa mu Mbimbiliya, hanji mutapu uze twakulingilamo Yehova; mandumbu waze akutusongwela keshi kushimbula ha kukaula kwalumuka chacho. (Yishi. 4:18) Ayo kakuchilinga mumu kanazange kuvwisa Yehova kuwaha. Ayo nawa kakusa tachi hanga akwate yiyulo yacho kulita ni Liji lia Zambi. Yino ye tuvumbi eswe a Yehova atamba kulinga.

13. “Chilweza cha maliji apema yika,” mba yika twatamba kulinga ni maliji jacho?

¹³ “Kakaminya ku chilweza cha maliji apema.” (2 Timo. 1:13) Malji “chilweza cha maliji apema,” kanatale ha malongeso a Akwa-Kristu waze twakuwana mu Mbimbiliya. (Yoa. 17:17) Malongeso jacho e akutukwasa ha yeswe yize twafuliela. Ululikiso wa Yehova wakutulongesa hanga tulikwachilile ku malongeso jacho. Nyi twachilinga, Yehova matuwahisa chinji.

14. Kuchi Akwa-Kristu amwe ku sekulu yitangu echele kukaula “chilweza cha maliji apema”?

¹⁴ Yika muyihasa kulingiwa kuli yetu nyi twehuka “chilweza cha maliji apema”? Tutalenu chimwe chilweza. Ku sekulu yitangu, Akwa-Kristu amwe kapwile ni kumwanga mahuza ngwo, tangwa lia Yehova te hilieza kulu. Muchihasa kupwa ngwe ayo katambwile umwe mukanda uze kota atu anyongene ngwe kausoneka kuli Paulu ni kuhanjika ha chikuma chacho. Chakuhona kuhengwola kanawa yuma, Akwa-Kristu amwe mu mbonge ya A-Tesalonika, yatayiza mahuza jacho ni kuputuka kwalweza kuli akwo. Nyi te ayo kewulukile yize Paulu aalongesele, kachi kakaaliongele. (2 Tesa. 2:1-5) Paulu kalwezele mandumbu jacho ngwenyi, kanda atayiza yuma yeswe yize mevwa. Mba aakwase ha yize te muyiza kulutwe, Paulu yahwisa mukanda wenyi wamuchiali uze asonekenene a A-Tesalonika ngwenyi: “Yami Paulu, ngunasoneka maliji wano ni kwoko liami mwene ngwami: Mwoyo wenu. Chino chili chilayi mu mikanda yeswe; chenacho nakusoneka.”—2 Tesa. 3:17.

15. Kuchi mutuhasa kulifunga ku mahuza waze akusoloka ngwe umwenemwene? Hana chilweza. (Tala nawa yizulie.)

¹⁵ Yika mutuhasa kulilongesa ha yize Paulu alwezele A-Tesalonika? Nyi mutwivwa chimwe chuma chize kuchalitele ni yize twakulilongesa mu Mbimbiliya, hanji mutwivwa umwe lusango yoze matupinjisa, tunafupiwa kupwa ni mana. Ha shimbu limwe, mu União Soviética, akwa-kole jetu yatwala umwe mukanda kuli mandumbu, uze wasolokele ngwe unakatuka ku chishina chinene. Mukanda wacho, wakolwezele amwe mandumbu kuputuka ululikiso uze te muulihandununa ku ululikiso wa Yehova. Mukanda wacho wasolokele ngwe uli lume wamwenemwene. Alioze mandumbu waze te ashishika, kakaongele ni maliji a mukanda wacho. Ayo kanyingikine ngwo, lusango yoze wapwile ha mukanda te keshi kulita ni yize akulilongesa. Ni musono nawa, atu waze keshi kuzanga umwenemwene ha mashimbu amwe kakufupa kutulumbanganyisa ni kutuhandununa kupalikila mu internet ni mu marede social. Shimbu tutayize yuma yacho, twatamba kunyonga kanawa nyi yize twevwa hanji twatanga yinalite ni umwenemwene uze twakulilongesa.—2 Tesa. 2:2; 1 Yoa. 4:1.

16. Kulita ni A-Roma 16:17, 18, yika twatamba kulinga nyi umwe mehuka umwenemwene?

¹⁶ Nunga hamwe ni atu waze akushishika kuli Yehova. Yehova kanazange hanga tumuwayile hamuwika ni mandumbu jetu, kashika mutuhasa kuchilinga nyi mutulalaminya ku umwenemwene. Mutu yoze wakumwanga sango jize jakulimika ni umwenemwene, kakuneha kulihandununa mu chikungulwila. Kashika Yehova anatutoweza hanga tulihandunune ni atu jacho. Nyi kutwachilingile, ni yetu mutuhasa kuputuka kufuliela ha yuma yize hi yamwenemwene ko ni kuhona kushishika kuli Yehova.—Tanga A-Roma 16:17, 18.

17. Yika mutuyuka nyi twanyingika kanawa umwenemwene ni kuulalaminya?

¹⁷ Nyi twanyingika kanawa umwenemwene ni kuulalaminya, mutukundama kuli Yehova ni kununga ni kukolesa ufulielo wetu. (Efwe. 4:15, 16) Nyi twachilinga, kechi kuhasa kutupiangula ku malongeso a mahuza a Satana. Chikwo nawa, Yehova makatufunga ha ha luyinda munene. Kashika, tulalaminyenu ku umwenemwene, ‘mba Zambi ya sambukila makapwa hamwe ni yetu.’—Fwili. 4:8, 9.