Yika Ukuule Wakutulongesa?

1. Mumu liaka chili chipema kuli yetu kuya ha Chiwanyino cha Kwiwuluka Kufwa cha Yesu hita mwaka?

YEHOVA katuhele chimwe chawana chilemu chinji, muze atumine Mwanenyi hanga afwile atu eswe hano hashi! (2 Kori. 9:15) Mumu lia chitapo chize Yesu ahanyine, yetu eswe mutuhasa kupwa ni usepa upema ni Yehova. Chikwo nawa, chitapo chino chazulwile jila hanga tupwe ni uhashi wa kuzuka mwono wa mutolo. Tuli ni yuma yinji yize yakututwala hanga tusakwilile Yehova ha zango lize atusolwelele ha kuhana Mwanenyi yoze azanga chinji. (Roma 5:8) Kashika, kutwatambile kuvulama yize Yehova ni Yesu alingile mba atwehe chitapo cha ukuule, chize Yesu atumine hanga tuchiuluke.—Luka 22:19, 20.

2. Yika mutushimutwina ha mutwe uno?

² Ha mwaka uno, Chiwanyino cha Kwiwuluka Kufwa cha Yesu, muchikalingiwa lia Sambata 12 ya Abril ya 2025. Kwamba pundu, yetu eswe tunalilulieka hanga tukapwe ha chiwanyino chacho. Mutukayuka chinji ha mashimbu a chiwanyino chacho nyi mutupukunaa ha yize Yehova ni Mwanenyi atulingilile. Ha mutwe uno, mutushimutwinaho yize ukuule wakutulongesa hali Yehova ni Mwanenyi. Ha mutwe uze muuhataho, mutukamona mumu liaka ukuule uli ulemu chinji kuli yetu, ni yize mutuhasa kulinga hanga tusolole usakwililo wetu ha chawana chino chilemu.

YIKA UKUULE WAKUTULONGESA HALI YEHOVA?

3. Kuchi kufwa cha mutu umuwika muchihasa kutusula tununu a tununu twa atu? (Tala nawa chizulie.)

³ Ukuule wakutulongesa ululi wa Yehova. (Shimbi 32:4) Mu mutapu uka? Tuchinyongenu ha chikuma chino: Mumu lia kuhona kwononoka cha Alama, yetu eswe yituhinga shili yize yakututwala ku kufwa. (Roma 5:12) Mba atutusule ku shili ni kufwa, Yehova yatuma Mwanenyi hanga atufwile. Mba kuchi chitapo cha mutu umuwika te muchitusula tununu a tununu twa atu ku shili ni kufwa? Postolo Paulu kalumbunwine ngwenyi: “Mumu chizechene ngwe ku uhulia wa mutu umuwika [Alama] anji apwile yivulumunyi, chizechene nawa ku kwononoka cha mutu umuwika [Yesu] anji kumakapwa akwa-ululi.” (Roma 5:19; 1 Timo. 2:6) Mu maliji akwo, mumu lia uhulia wa mutu umuwika, yetu eswe yitupwa ndungo ja shili ni kufwa. Chizechene nawa, mumu lia kwononoka cha mutu umuwika, yetu eswe mutuhasa kutusuka ku shili ni kufwa.

4. Mumu liaka Yehova kakechele ana ja Alama waze akumwononokena anunge ni kutwama ku miaka yeswe?

⁴ Shina Yesu katambile lume kufwa hanga atulamwine? Mumu liaka Yehova kakechele hanga ana ja Alama waze akumwononokena anunge ni kutwama ku miaka yeswe? Yetu hanji mutuhasa kunyonga ngwetu, yino te muyipwa jila yipema yakuhwishilamo kapinda wacho. Alioze, jila yacho te kuyichi kusolola ululi wa Yehova. Mumu Yehova kali mungunu, kashika te kechi kulengulula shili yize Alama alingile ku tachi.

5. Mumu liaka mutuhasa kupwa ni shindakenyo ngwetu, mashimbu eswe Yehova kakulinga yize yalita?

⁵ Mba yika te muyilingiwako nyi Yehova kakahanyine ukuule, alioze mecha kukaula ululi wenyi ha kutayiza ana ja Alama yihenge atwame ni mwono ku miaka yeswe? Kachi ha kupalika cha mashimbu, atu maputuka kuhamika ha ululi wa Yehova ni yuma yikwo nawa. Ngwe chilweza, atu te mahasa kukakajana nyi Yehova makamanununa lume yilakenyo yenyi. Alioze, kutwatambile kulihulumba ha yize yalingiwileko. Mumu liaka? Mumu Yehova kalingile yuma yeswe ni ululi, chipwe ngwe katambile kuhana Mwanenyi yoze azanga chinji ngwe ukuule. Chino chakutwaha shindakenyo ngwetu, iye mashimbu eswe kakulinga yize yalita.

6. Jila yika yize yakusolola ngwo ukuule wakusolola zango lia Yehova? (1 Yoano 4:9, 10)

⁶ Kuchizako kutukwasa kunyingika ngwo, Yehova kali mukwa-ululi, ukuule wakutukwasa nawa kunyingika zango lize iye akwete. (Yoa. 3:16; tanga 1 Yoano 4:9, 10.) Wakutulongesa nawa ngwo, Yehova kanazange hanga tutwame ku miaka yeswe, alioze chahiana yeswe, tupwe mu usoko wenyi. Tuchinyongenu ha chino: Muze Alama avulumwine, iye katuhukile mu usoko wa Yehova. Kashika muze twakusemuka, kutushi kulinga chihanda mu usoko wa Yehova. Alioze kupalikila mu ukuule, yetu eswe waze twakufuliela muli Zambi ni kumwononokena, tangwa limwe mutuhasa kulinga chihanda mu usoko wenyi. Chipwe chocho, haliapwila Yehova mahasa kukonekena shili yetu ni kutukwasa kupwa ni usepa ukolo ni iye hamwe ni mandumbu jetu. Kashika, yetu kutushi kuyambashana ha zango lize Yehova akwete hali yetu!—Roma 5:10, 11.

7. Kuchi lamba lize Yesu amwene liakutukwasa kumona zango lize Yehova akwete hali yetu?

⁷ Mutuhasa kunyingika kanawa zango lize Yehova akwete hali yetu, nyi mutunyonga ha yikola yize evwile muze afwetele ukuule. Satana kambile ngwenyi, kukushi kavumbi wa Zambi niumwe, yoze manunga ni kushishika kuli Iye muze mapalika mu yipikalo. Mba Yehova asolole ngwenyi, maliji wano kali a mahuza, iye yecha Mwanenyi amone lamba muze te kanda achifwa. (Yombi 2:1-5; 1 Petu. 2:21) Yehova kamwene atu makekuna Mwanenyi ni kumulamba. Kamwene nawa muze amuhachile ha mutondo wa lamba ni kukaula mu yimako-yimako lamba lize Yesu amwene ha kufwa chenyi. (Mateu 27:28-31, 39) Yehova kapwile ni ndundo ja kuhwisa lamba liacho ha shimbu lieswalio. Ngwe chilweza, muze akwa-kulimika nenyi ambile ngwo: “Zambi, amulamwine haliapwila, nyi kakumuzanga,” kachi che Yehova alingile lume. (Mateu 27:42, 43) Alioze, nyi Yehova kalingile yimwe hanga akwike lamba lize Mwanenyi te anamono, kachi ukuule kakaufwetele, chikwo nawa, te mutununga chakuhona kutalatala. Yino ye yatwalile Yehova mba eche Mwanenyi amone lamba ndo ni ku kufwa chenyi.

8. Shina Yehova kevwile yikola ku mbunge muze amwene Mwanenyi mamona lamba? Lumbununa. (Tala nawa chizulie.)

⁸ Kutwatambile kunyonga ngwetu, Yehova keshi kwivwa yikola ku mbunge mumu lia kupwa mukwa-ndundo-jeswe! Katutangile ni uhashi wa kwivwa chize iye akwivwa. Mbimbiliya yakwamba ngwo, Zambi katutangile mu chano chenyi. Chino chinalumbunuka ngwo, yize yetu twakwivwa, ni Yehova ye akwivwa. Mbimbiliya yakusolola ngwo, Yehova kevwile ‘kupihia’ ni kunenganyana. (Samu 78:40, 41) Tutalenu lusango wa Apalahama ni Izake. Yehova ketele kuli Apalahama hanga ahane mwanenyi wa wika ngwe chitapo. (Uputu. 22:9-12; Hepre. 11:17-19) Tuchinyongenu ha yikola yize Apalahama evwile muze te analilulieka hanga ashihe mwanenyi. Yehova neye kevwile yikola yinji muze amwene Mwanenyi mamumwesa lamba ni kumushiha!—Tala chinema, Imbulula Ufulielo Wo—Apalahama, Chihanda 2 ha site jw.org.

9. Yika mutuhasa kulilongesa ha A-Roma 8:32, 38, 39 hakutwala ku zango lize Yehova akwete hali yetu?

⁹ Ukuule wakutulongesa ngwo, Yehova kakutuzanga chinji kuhiana mutu mweswawo—chipwe sepa lietu yoze twafuliela chinji hanji usoko wetu. (Tanga A-Roma 8:32, 38, 39.) Pundu lume, Yehova kakutuzanga chinji kuhiana chize twakulizanga yetu ene. Shina unazange ukatwame ni mwono ku miaka yeswe? Yino ye Yehova anazange hali yena. Unazange hanga shili ye ayikonekene? Chino che Yehova anazange chinji hali yena. Chuma chize iye anashimbwila hanga ulinge, chili wika kusolola usakwililo we ha yeswe yize akulingilile. Ukuule uli chawana chilemu chize chakusolola zango lize Yehova akwete hali yetu. Mu chifuchi chaha, mutukalilongesa chinji ha zango lize Yehova akwete hali yetu.—Chilu. 3:11.

YIKA UKUULE WAKUTULONGESA HALI YESU?

10. (a) Mumu liaka Yesu anenganyanyine chinji ha kufwa chenyi? (b) Yika Yesu alingile yize yasolwele ngwo Satana kali mukwa-mahuza? (Tala nawa mushete, “Ushishiko wa Yesu Wasolwele Ngwo Satana kali Mukwa-Mahuza.”)

¹⁰ Yesu kakulihulumba chinji ha yize atu akunyonga hali Tato. (Yoa. 14:31) Yesu kanenganyanyine muze amulamikijine ngwo, kashililika jina lia Tato, nawa ngwo kali chingalwe. Kashika alembele ngwenyi: “Tata, nyi muchilita, lisesa, echa kama musenge uno ukatuke kuli yami.” (Mateu 26:39) Yesu kanungine ni kushishika ndo ku kufwa chenyi, chino yichisolola ngwo, Satana kali mukwa-mahuza.

11. Kuchi Yesu asolwele zango lienyi hali atu? (Yoano 13:1)

¹¹ Ukuule wakutulongesa nawa ngwo, Yesu kakulihulumba chinji hali atu, chipi-chipi hali tumbaji twenyi. (Yishi. 8:31; tanga Yoano 13:1.) Yesu kanyingikine ngwenyi, te mapalika mu yuma yinji yipi mu mulimo wenyi wa kwambujola, kuchingako kufwa. Alioze, iye kakatayijile kupalika mu yuma yacho yipi mumu ngwo, Yehova mwe wamutumine; kachilingile mumu te kakuzanga atu. Yesu kasolwele zango lienyi ha kwambujola, kulongesa ni ha kukwasa atu. Ha tangwa lienyi lia kasula hano hashi, Yesu kasele mashimbu hanga alongese, ajikijise ni kutakamisa apostolo jenyi. (Yoa. 13:12-15) Chikwo nawa, chipwe muze apwile ha mutondo wa lamba, Yesu yahana kutalatala kuli chingulungulu yoze wapwile ku sali lienyi ngwenyi, makapwa mu paraisu; yeta nawa kuli Yoano hanga afunge naye. (Luka 23:42, 43; Yoa. 19:26, 27) Twamona pundu ngwetu, Yesu kasolwele zango linji hali atu hi wika ko ha kuhana mwono wenyi, alioze ni ha yuma yize aalingilile muze te ali hano hashi.

12. Yika Yesu anatulingila musono?

¹² Chipwe ngwe Yesu kafwile “kamuwika kunahu,” nihindu iye machinunga ni kutulingila yuma yeka ni yeka. (Roma 6:10) Yuma yika yenayo? Kupalikila mu ukuule, iye kananungu ni kukalakala hanga atwehe yuma yipema haliapwila. Iye kanalingi milimo yinji ha kukilikita ngwe Mwanangana wetu, Mwata wa Asasendote, nawa mutwe wa chikungulwila. (1 Kori. 15:25; Efwe. 5:23; Hepre. 2:17) Iye kali ni chiteli cha kukunga Akwa-Kristu akuwayisa ni mbunga yinene ya atu. Chiteli chino, muchikahwa wika muze kwasala hakehe hanga luyinda munene aputuke.b (Mateu 25:32; Marku 13:27) Iye nawa kanatwehe kulia cha ku ufulielo kupalikila muli ndungo washishika, wakanyama chize chakutukwasa kununga ni kulingila Yehova ni ushishiko ha matangwa wano a kusula. (Mateu 24:45) Mba muze makatuyula ha kanunu ka miaka, Yesu makanunga ni kukalakala hanga atukwase. Chochene, Yehova kahanyine Mwanenyi hali yetu.

NUNGA NI KULILONGESA YUMA YAHA

13. Kuchi mutuhasa kununga ni kulilongesa ha zango lize Yehova ni Yesu akwete hali yetu?

¹³ Mutuhasa kununga ni kulilongesa ha zango lize Yehova ni Yesu akwete hali yetu, nyi mutupukuna ha yuma yize o akutulingila. Mutuhasa kuchilinga, ha jimwe poso muze chiwanyino cha Yesu kanda chiputuka ni muze muchihwa, ha kutanga ni uhumikizo weswe yimwe mikanda ya Evanjelu. Alioze kanda utanga tupitulu anji ha shimbu limuwika. Shimbu ulinge chocho, tanga hakehe-hakehe hanga uwane majila akwo aha waze Yehova ni Yesu akusolwelamo zango lio hali yetu. Chikwo nawa, kanda uvulama kulianyina ni akwenu yuma yize walilongesa.

14. Kuchi kuhengwola chakutukwasa kulilongesa yuma yinji hakutwala ku ukuule ni ha yuma yikwo nawa? (Samu 119:97) (Tala nawa chizulie.)

¹⁴ Nyi uli mu umwenemwene ha miaka yinji, kota muhasa kulihula nyi kuli yikuma yaha yize muhasa kulilongesa yinatale ha ululi wa Zambi, zango lienyi ni ha ukuule. Kwamba umwenemwene, nihindu mukupwa yuma yaha yize mutulilongesa hakutwala ku yikuma yino twatongola. Mba yika muhasa kulinga? Sako tachi hanga upwe ni kutanga mikanda yetu. Nyi ngwe mutanga lusango umwe mu Mbimbiliya alioze kakulumbunukine kanawa, hengwola mu mikanda yetu ni kupukuna ha yize walilongesa hali Yehova, Mwanenyi ni ha zango lize o akwete hali yena.—Tanga Samu 119:97.

15. Mumu liaka chili chilemu kununga ni kufupa yikuma yaha mu Mbimbiliya?

¹⁵ Muze unatange Mbimbiliya hanji unahengwola, kanda unenganyana nyi kuwawanyine chikuma chaha. Kuhengwola chize unalingi, chili ngwe mutu yoze unayi ni kufula kamanga. Kanji-kanji atu waze akuya ni kufula kamanga, kakupalikisa maola ni matangwa anji mba awane tusenga. Chipwe chocho, ayo keshi kulitwamina. Mumu kuli ayo, kalusenga keswako mawana kali ni ndando. Kuli yetu, umwenemwene uze twakuwana mu Mbimbiliya uli ni ndando yinji kuhiana kamanga mweswawo. (Samu 119:127; Yishi. 8:10) Kashika, pwako ni kuhwima mbunge hanga uwane yikuma yaha muze unatange Mbimbiliya.—Samu 1:2.

16. Kuchi mutuhasa kwimbulula Yehova ni Yesu?

¹⁶ Muze unalilongesa, fupa kunyingika chize mukaula ku mwono we yuma yize unalilongesa. Ngwe chilweza, imbulula ululi wa Yehova ha kusa tachi hanga uhone kusolwela mutu niumwe katonde. Muhasa nawa kwimbulula zango lize Yesu akwete hali Tato ni hali atu akwo. Jila yimwe ya kuchilingila, yili kulihana hanga ulinge yuma yize Yehova anazange ni kukwasa atu chipwe ngwe ha mashimbu amwe kulinga chino muchikalisa mwono we. Jila yikwo yili kwambujola sango jipema kuli atu, hanga no anyingike yuma yipema yize Yehova anatulingila ni kufuliela ha ukuule.

17. Yika mutukamona ha mutwe uze muuhataho?

¹⁷ Nyi mutulilongesa chinji hakutwala ku ukuule ni kumona ulemu wawo, mutwokesa zango lietu hali Yehova ni hali Yesu. Nyi twachilinga, Yehova ni Yesu no matuzanga chinji. (Yoa. 14:21; Tia. 4:8) Kashika, tusenu tachi hanga tukalakalise yuma yeswe yize Yehova akutwaha ni kununga kulilongesa hakutwala ku ukuule. Ha mutwe uze muuhataho, mutumona yiwape yize mutukazuka mumu lia ukuule, ni chize mutuhasa kusolola usakwililo wetu ha zango lize Yehova akwete hali yetu.