MUTWE WA KULILONGESA 5
MWASO 108 Zango lia Zambi
Chize Zango lia Yehova Liakutuyukisa
“Kristu Yesu kejile hano hashi hanga alamwine yivulumunyi.”—1 TIMO. 1:15.
YIZE MUTULILONGESA
Mutumona chize ukuule wakutuyukisa ni chize mutuhasa kusolola usakwililo wetu kuli Yehova.
1. Yika mutuhasa kulinga mba tuvwise Yehova kuwaha?
TUCHINYONGENU ngwe twahana chawana chipema kuli mutu yoze twazanga. Mutwivwa chinyengo nyi iye machitulika mu zuwo ni kuchivulama. Alioze, mutuwahilila chinji nyi machikalakalisa ni kutusakwilila. Yika tunazange kwamba? Yehova kahanyine Mwanenyi hali yetu. Kashika, iye kakuwahilila chinji muze twakusolola usakwililo wetu ha chawana chino ni ha zango lize liamutwalile kuhana ukuule.—Yoa. 3:16; Roma 5:7, 8.
2. Yika mutushimutwina ha mutwe uno?
2 Ha kupalika cha miaka, usakwililo wetu ha ukuule muuhasa kuputuka kutepuluka. Alioze, nyi mututokesa usakwililo wetu ha ukuule, muchipwa ngwe twasweka chawana chize Zambi atuhele mu chimwe chihela muze kutuchi kuhasa kuchimona nawa hanji kuchinyonga. Mba chino chihone kulingiwa, twatamba kunyonga mashimbu eswe ha yize Zambi ni Kristu alingile hali yetu. Mutwe uno, muuhasa kutukwasa hanga tuchilinge. Mutushimutwina chize ukuule wakutuyukisa haliapwila ni chize muukatuyukisa kulutwe lia matangwa. Mutumona nawa yize twatamba kulinga hanga tusolole usakwililo wetu ha zango lia Yehova, chipi-chipi muze hikwasala hakehe hanga Chiwanyino cha Kwiwuluka Kufwa cha Yesu chilingiwe ni muze hichalingiwa kulu.
CHIZE UKUULE WAKUTUYUKISA HALIAPWILA
3. Mu jila yika ukuule wakutuyukisa haliapwila?
3 Twakuyuka ha chitapo cha ukuule cha Kristu. Ngwe chilweza, kupalikila mu ukuule, Yehova kakukonekena shili yetu. Kukushi niumwe yoze wakumushinjila kuchilinga; kakuchilinga ku zango lienyi mwene. Mukwa-kwimba masamu kasolwele usakwililo wenyi ha ukonekeno wa Yehova, ha kwamba ngwenyi: “Mumu yena [Yehova] uli mupema, uli mukwa-kukonekena.”—Samu 86:5; 103:3, 10-13.
4. Hali aya Yehova ahanyine ukuule? (Luka 5:32; 1 Timoteu 1:15)
4 Atu amwe hanji mahasa kulivwa ngwe katelele ukonekeno wa Yehova. Umwenemwene uli ngwo, niumwe wa kuli yetu unautela wakuhi. Postolo Paulu kambile ngwenyi: ‘Kakatelele kumuvuluka ngwo postolo.’ Yamba nawa ngwenyi: “Mumu lia chawana cha keke ya Zambi, nguli chize nguli.” (1 Kori. 15:9, 10) Muze twakulikonyeka, Yehova kakutukonekena. Mumu liaka? Hi ko ngwo mumu twatela, alioze mumu iye kakutuzanga. Nyi mupinda ku manyonga ni kumona ngwe kuwatelele ukonekene wacho, iwuluka ngwe Yehova kakahanyine ukuule kuli atu waze keshi shili, alioze kauhanyine hali yivulumunyi waze akulikonyeka.—Tanga Luka 5:32; 1 Timoteu 1:15.
5. Shina kuli umwe wa kuli yetu yoze watamba kulivwa ngwe katela kutambula ukonekeno wa Yehova? Lumbununa.
5 Niumwe wa kuli yetu katambile kunyonga ngwo, Yehova katamba kumukonekena mumu kakumuwayila ha miaka yinji. Kwamba pundu, Yehova kakwiuluka yuma yeswe yize hitunamulingila. (Hepre. 6:10) Iye katuhele ukuule ngwe chawana hi ko ngwo hanga atufwete ha mulimo uze twakumulingila. Kashika kuchichi kulita kunyonga ngwetu, twatela ukonekeno wa Yehova mumu twakumulingila yuma yinji. Nyi mutunyonga chocho, mutusolola ngwetu kutwafupile ukuule.—Tesa nawa ni A-Ngalashia 2:21.
6. Mumu liaka Paulu akalakalile chinji mu mulimo wa Yehova?
6 Paulu kanyingikine ngwenyi, chipwe ngwe malingila Yehova yuma yeswayo, nihindu kakatelele ukonekeno wenyi. Mba mumu liaka akalakalile chinji mu mulimo wa Yehova? Iye kachilingile hanga asolole usakwililo wenyi kuli Yehova mumu lia kumusolwela umbovu ni keke. (Efwe. 3:7) Chizechene ngwe Paulu, ni yetu twakununga ni kulingila Yehova ni zango lieswe, hi ko ngwo hanga Yehova atukonekene, alioze hanga tusolole usakwililo wetu ha keke yenyi.
7. Musono, jila yika twakuyukilamo ha ukuule? (A-Roma 5:1; Tiangu 2:23)
7 Musono, jila yimwe yize twakuyukilamo ha ukuule yili, kupwa ni usepa upema ni Yehova.a Ngwe chize twamonanga ha mutwe wapalika, muze twasemukine, kutwakapwile ni usepa ni Zambi. Alioze mumu lia ukuule, mutuhasa kupwa ni ‘sambukila ni Zambi’ ni kukundama kuli iye.—Tanga A-Roma 5:1; Tiangu 2:23.
8. Mumu liaka twatamba kusakwilila Yehova ha chiwape cha kulemba?
8 Tuhengwolenu chikuma chimwe chize chakutukwasa kupwa masepa ja Yehova—chiwape cha kulemba. Yehova keshi kwivwa wika yilemba ya tuvumbi twenyi muze akupwa ha kukunguluka. Alioze, kakupanjika nawa yilemba ya mutu ni mutu. Kulemba chakutuhwimisa mbunge ni kutwaha sambukila. Alioze, kulemba kuchishi kutuyukisa wika mu jila yino. Chakutukwasa nawa kukolesa usepa wetu ni Zambi. (Samu 65:2; Tia. 4:8; 1 Yoa. 5:14) Muze apwile hano hashi, Yesu te kakulemba mashimbu eswe mumu kanyingikine ngwenyi, Yehova kakwivwa yilemba yenyi; nawa ngwo, chino te muchikolesa usepa wenyi ni Tato. (Luka 5:16) Twakusakwilila chinji ha kunyingika ngwetu, kupalikila mu chitapo cha Yesu, yetu mutuhasa kupwa masepa ja Yehova ni kuhanjika nenyi mu yilemba!
CHIZE UKUULE MUUKATUYUKISA KULUTWE LIA MATANGWA
9. Kuchi ukuule muukayukisa tuvumbi twa Yehova ashishika kulutwe lia matangwa?
9 Kuchi ukuule muukayukisa tuvumbi twa Yehova ashishika kulutwe lia matangwa? Ayo makazuka mwono wa mutolo. Atu anji kakunyonga ngwo, chino kuchichi kuhasa kulingiwa, mumu ha tununu a tununu twa miaka atu anji kakufwa. Alioze upale utangu wa Yehova wapwile ngwo, atu atwame ku miaka yeswe. Nyi ngwe Alama kakavulumwine, kachi atu te katwama ni mwono ku miaka yeswe. Chikwo nawa, chipwe ngwe musono chakukaliwa kunyonga kutwama ni mwono wa miaka yeswe, mutuhasa kutayiza ngwetu, chino muchikalingiwa mumu tunanyingika ngwetu, Yehova kafwetele ndando yinene—kuhana mwono wa Mwanenyi hanga chino chipwe chashi.—Roma 8:32.
10. Yika anashimbwila Akwa-Kristu akuwayisa ni mapanga akwo?
10 Chipwe ngwe mutukapwa wika ni mwono wa mutolo kulutwe lia matangwa, nihindu Yehova kanazange hanga tuunyonge haliapwila. Akwa-Kristu akuwayisa, kanashimbwila ni chiseke cheswe akaye mu malilu hanga akayule hashi hamwe ni Yesu. (Uso. 20:6) Mapanga akwo, kanashimbwila kutwama mu paraisu hano hashi muze kumuchikapwa yikola ni lamba. (Uso. 21:3, 4) Shina uli umwe wa kuli mapanga akwo waze makatwama hano hashi ni mwono wa mutolo? Yehova katangile atu hanga atwame hano hashi. Kashika, kutwama ku miaka yeswe muchikatunehena uwahililo unji.
11-12. Yiwape yika tunashimbwila mu Paraisu? (Tala nawa yizulie.)
11 Tuchinyongenu chize mwono wetu muukapwa mu paraisu. Kutuchi kalipikala nawa ni yikola hanji kufwa. (Iza. 25:8; 33:24) Yehova makatwaha yuma yeswe yipema yize twakuzanga. Yika mukazanga kulilongesa mu paraisu? Shina mukalilongesa hali tushitu? Mukazanga kulilongesa kwimba? Nyi hanji mukazanga kulilongesa kufunjeka yizulie? Ewa, mu paraisu mutukafupa atu waze ananyingika kutunga mazuwo ni kulima; mutukafupa nawa kululieka yuma ya kulia, kulinga yikwata ya milimo, kutumba mitondo ni kuyifunga. (Iza. 35:1; 65:21) Muze mutukatwama ku miaka yeswe, mutukapwa ni mashimbu akulinga yuma yino yeswe ni yikwo nawa.
12 Muchikapema chinji kutambwisa atu waze makahindwisa ku ufwe. (Yili. 24:15) Uchinyonga ha chize mukawahilila ha kulilongesa ni kuhengwola yitangiwa yeka ni yeka ya Yehova. (Samu 104:24; Iza. 11:9) Chahiana ulemu, muchikapema chinji kuwayila Yehova ni mbunge yitoma! Shina mupihisa kutalatala che cha kutwama mu paraisu hanga ulinge wika ‘yuma yize muyikuvwisa kuwaha ha mashimbu wano’? (Hepre. 11:25) Kutwazangile chino chilingiwe kuli yetu! Yiwape yize mutukapwa nayo mu paraisu, muyikahiana chuma cheswacho chize mutuhasa kupwa nacho mu chifuchi chino. Twiulukenu ngwetu, kwasala hakehe paraisu muyiza, kutuchi kununga ni kuyishimbwila ku miaka yeswe. Yino yeswe muyikalingiwa mumu Yehova katuzangile chinji ni kutwaha ukuule.
Yiwape yika wakushimbwila mu Paraisu? (Tala maparagrafu 11-12)
SOLOLA USAKWILILO WE HA ZANGO LIA YEHOVA
13. Kuchi mutuhasa kusolola ngwetu twakusakwilila ha zango lia Yehova? (2 A-Korindu 6:1)
13 Kuchi mutuhasa kusolola ngwetu, twakusakwilila Yehova ha kutwaha ukuule? Mutuchilinga ha kusa mulimo wenyi ha chihela chitangu ku mwono wetu. (Mateu 6:33) Mumu Yesu kafwile “hanga waze eswe ali ni mwono kanda alivwisa kuwaha ene, alioze evwise kuwaha Kristu yoze wafwile mumu hali ayo ni kumuhindwisa.” (2 Kori. 5:15) Yehova kakutusolwela utu ni kutukonekena. Muze twakulinga yeswe yize mutuhasa hanga tumuwayile, twakusolola ngwetu tunanyingika yuma yeswe yize atulingilile ni kumusakwilila ni mbunge yeswe.—Tanga 2 A-Korindu 6:1.
14. Kuchi mutuhasa kujikijila ha usongwelo wa Yehova?
14 Mutuhasa nawa kusolola ngwetu, twakusakwilila ha zango lia Yehova ha kujikijila ha usongwelo wenyi. Kuchi mutuhasa kuchilinga? Muze mutukwata yiyulo hakutwala ku shikola hanji ku mulimo uze mututayiza, twatamba kunyingika yize Yehova anazange hanga tulinge. (1 Kori. 10:31; 2 Kori. 5:7) Muze twakukwata yiyulo kulita ni shimbi ja Yehova, ufulielo ni usepa wetu ni iye yakukola chinji. Chikwo nawa, kutalatala chetu cha kutwama ku miaka yeswe chakupwa chamwenemwene.—Roma 5:3-5; Tia. 2:21, 22.
15. Kuchi mutuhasa kusolola usakwililo wetu ha mashimbu a Chiwanyino cha Kufwa cha Yesu?
15 Kuli jila yikwo yize mutuhasa kusolwelamo usakwililo wetu ha zango lia Yehova. Jila yacho yili kulinga yeswe yize mutuhasa, shimbu Chiwanyino cha Kufwa cha Yesu kanda chilingiwa ni muze hichalingiwa, hanga tusolole usakwililo wetu kuli Yehova mumu lia ukuule. Kuchizako kulilulieka hanga tukapwe ha chiwanyino cha Kwiuluka Kufwa cha Yesu, mutuhasa nawa kusanyika atu akwo hanga akapweho. (1 Timo. 2:4) Lumbunwina atu waze musanyika yize muyikalingiwa ha chiwanyino chacho. Muchilita nawa kwasolwela chinema ha jw.org chinambe ngwo, Mumu Liaka Yesu Afwile? ni chinema, Kwiwuluka Kufwa cha Yesu. Makulwana a mu chikungulwila katamba kusanyika mandumbu waze anazeye ku ufulielo. Tunyongenu ha uwahililo uze muupwa mu malilu ni hano hashi nyi umwe wa ku mapanga ja Yehova mafuna mu chendo! (Luka 15:4-7) Ha Chiwanyino cha Kufwa cha Yesu, tusenu tachi hanga tumeneke atu eswe, chipi-chipi waze mapwaho ha chisuho chitangu ni waze hikwapalika mashimbu anji keshi kupwaho. Tunazange hanga ayo alivwe kanawa!—Roma 12:13.
16. Mumu liaka twatamba kulihana hanga tukalakale chinji mu mulimo wa Yehova ha mashimbu a Chiwanyino cha Kufwa cha Yesu?
16 Shina muhasa kukalakala chinji mu mulimo wa Yehova ha mashimbu a Chiwanyino cha Kufwa cha Yesu? Yino yili jila yipema yakusolwelamo ngwo, wakusakwilila ha yeswe yize Yehova ni Yesu akulingilile. Nyi twalihulikila chinji mu mulimo wa Yehova, mutumona ukwaso wenyi. Hachino, ujikijilo wetu muli iye, muukola chinji. (1 Kori. 3:9) Chikwo nawa, kaula kutanga cha Mbimbiliya ha mashimbu a Kwiwuluka Kufwa cha Yesu chize chakusoloka ha mukanda Kuhengwola Yisoneko Tangwa ha Tangwa, hanji ha mukanda mwono ni mulimo wetu. Muhasa kusakula yimwe ya ku yisoneko yacho hanga ulinge longeso lie lia wika.
17. Yika yakuvwisa Yehova kuwaha? (Tala nawa mushete, “Majila Akusolwelamo Usakwililo Wetu ha Zango lia Yehova.”)
17 Muchihasa kupwa ngwe, mumu lia yize unapalika ku mwono, kuuchi kuhasa kukaula yikuma yeswe yize twahanjika ha mutwe uno. Alioze iwuluka ngwe, Yehova keshi kutesa yize wakulinga ni yize akwenu akulinga. Iye kakumona yize yili mu mbunge ye. Yehova kakuwahilila muze akumona chize wakumusakwilila ni mbunge yeswe ha chawana cha ukuule.—1 Samue. 16:7; Marku 12:41-44.
18. Mumu liaka twakusakwilila Yehova ni Yesu?
18 Mumu lia ukuule, shili yetu mahasa kutukonekenayo, kupwa masepa ja Yehova ni kushimbwila kutwama ni mwono ku miaka yeswe. Tunungenu ni kusakwilila Yehova ha kutwaha yuma yino yipema. (1 Yoa. 4:19) Tusakwililenu nawa Yesu, yoze watuzangile chinji ni kuhana mwono wenyi hali yetu.—Yoa. 15:13.
MWASO 154 Zango Kulishi Kuhwa