Tayiza Ngwe Yehova Kakukuzanga

1. Mumu liaka wahanyine mwono we kuli Yehova? (Tala nawa yizulie.)

SHINA uneuluka muze walihanyine kuli Yehova? Wakwachile chiyulo chacho, mumu wamunyingikine mba yiuputuka kumuzanga. Wamulakenyene ngwe, muusa upale wenyi ha chihela chitangu ku mwono we, nawa mumuzanga ni mbunge ye yeswe, ni mwono we weswe, ni kunyonga che cheswe, ni tachi je jeswe. (Marku 12:30) Kukatuka ha shimbu liacho, zango lie muli Yehova yiliputuka kukola tangwa ha tangwa. Mba kuchi mukumbulula nyi umwe makuhula ngwenyi: “Shina wakuzanga Yehova?” Mukumbulula pundu ngwe, “Ewa nakuzanga Yehova kuhiana chuma cheswacho hanji mutu mweswawo.”

2-3. Shindakenyo yika Yehova anazange hanga tupwe nayo, yika mutulilongesa ha mutwe uno? (Jeremia 31:3)

² Mba kuchi mukumbulula nyi umwe makuhula ngwenyi: “Yena uli ni shindakenyo ngwe Yehova kakukuzanga?” Shina mushimbula ha kukumbulula hanji kunyonga ngwe, kuwatelele zango lia Yehova? Umwe ndumbu wa pwo yoze wamwene lamba linji ku wanuke wenyi yamba ngwenyi: “Ngunanyingika ngwami, nakuzanga Yehova, nguli ni shindakenyo yacho. Alioze ha mashimbu amwe, nakulihula nyi Yehova neye kakunguzanga.” Mba kuchi muhasa kunyingika yize Yehova akunyonga hali yena?

³ Yehova kanazange upwe ni shindakenyo ngwo, iye kakukuzanga. (Tanga Jeremia 31:3.) Umwenemwene uli ngwo, Yehova mwe wazangile hanga ulilongese hakutwala kuli iye ni kupwa sepa lienyi. Kashika, muze wahanyine mwono we kuli iye ni kukupapachisa, yena wazukile chawana chilemu chinji, utu wa zango lia Yehova. Chino chinalumbunuka ngwo iye kakukuzanga ni mbunge yeswe, nawa kechi keza kakuhichika nilimwe tangwa. Mumu lia zango lienyi lingunu, kuli iye tuvumbi twenyi eswe kali alemu, kuchingako yena. (Mala. 3:17) Yehova kanazange hanga ulivwe ngwe chize postolo Paulu alivwile. Iye kapwile ni shindakenyo ngwenyi Yehova kakumuzanga. Kashika asonekene ngwenyi: “Nguli ni shindakenyo ngwami, chipwe kufwa, chipwe mwono, chipwe angelo, chipwe manguvulu, chipwe yuma ya haliapwila, chipwe yuma yize muyizaho, chipwe ndundo, chipwe usuku kwilu, chipwe usuku kwishi, chipwe chitangiwa chikwo cheswacho, chichi kuhasa kutuhandununa ku zango lia Zambi.” (Roma 8:38, 39) Ha mutwe uno, mutumonaho ulemu wa kupwa ni shindakenyo ngwetu Yehova kakutuzanga, ni yize muyihasa kutukwasa kuchilinga.

MUMU LIAKA CHILI CHILEMU KUTAYIZA NGWE YEHOVA KAKUKUZANGA?

4. Kuchi mutuhasa kwehuka umwe wa ku miheto ya Satana?

⁴ Muze twakupwa ni shindakenyo ngwetu Yehova kakutuzanga, chino chakutukwasa kwehuka umwe wa ku “miheto” ya Satana. (Efwe. 6:11) Umwe wa ku miheto yenyi, uli mahuza akwamba ngwo, Yehova keshi kutuzanga. Satana malinga yeswe yize mahasa hanga atukwike kuwayila Yehova. Kanda wiza kavulama ngwe, Satana kakufupa-fupa uhashi wa kutuhandununa kuli Yehova. Iye kakuchilinga kanji-kanji muze tunahongo, muze tunapinda ku manyonga hakutwala ku yuma yize twapalikile kunyima, mumu lia lamba lize tunapalika haliapwila ni mumu lia kuhona kupwa ni shindakenyo ha yuma yize muyikalingiwa kulutwe lia matangwa. (Yishi. 24:10) Satana kali ngwe umwe ndumba yoze wakufupa kukwata kashitu yoze unahongo, hanji yoze uli ukawenyi. Iye kakweseka kutuhandununa kuli Yehova muze tunahongo. Alioze, nyi twapwa ni shindakenyo ngwetu Yehova kakutuzanga, mutuhasa kulimika ni Satana ni kwehuka miheto yize akututela.—1 Petu. 5:8, 9; Tia. 4:7.

5. Mumu liaka chili chilemu kulivwa ngwetu Yehova kakutuzanga ni kutulemesa?

⁵ Muze twakupwa ni shindakenyo ngwetu Yehova kakutuzanga, chino chakutukwasa kukolesa usepa wetu ni iye. Mumu liaka tunambe chocho? Mumu Yehova katutangile ni uhashi wa kuzanga akwetu ni yetu ene tulivwe ngwetu kakutuzanga. Muze akwetu akutuzanga, chino chakututwala hanga ni yetu twazange. Kashika nyi mutulivwa ngwetu Yehova kakutuzanga ni kutulemesa, chino muchitukwasa hanga ni yetu tumuzange. (1 Yoa. 4:19) Mba nyi yetu mutumuzanga chinji, neye matuzanga. Mbimbiliya yakwamba ngwo, “kundamenu kuli Zambi mba iye makundama kuli yenu.” (Tia. 4:8) Mba kuchi mutuhasa kupwa ni shindakenyo ngwetu, Yehova kakutuzanga?

YIKA MUYIHASA KUTUKWASA KUTAYIZA NGWETU YEHOVA KAKUTUZANGA?

6. Nyi kuushi ni shindakenyo ngwe Yehova kakukuzanga, yika watamba kulinga?

⁶ Nunga ni kulemba kuli Yehova hanga akukwase kunyingika mumu liaka akukuzanga. (Luka 18:1; Roma 12:12) Eta kuli Yehova hanga akukwase kulimona ngwe chize iye akukumona. Nyi muchilita, linga chino tangwa ha tangwa. Ha mashimbu amwe, muchihasa kupwa chikalu kutayiza ngwe Yehova kakukuzanga. Alioze watamba kunyingika ngwe, Yehova kali munene kuhiana mbunge ye. (1 Yoa. 3:19, 20) Iye kanakunyingika kanawa kuhiana yena mwene, nawa kakumona yuma yize yena kuuchi kuhasa kumona. (1 Samue. 16:7; 2 Sango 6:30) Kashika, mulweze chize unevwu ni kumwita hanga akukwase kutayiza ngwe, kakukuzanga. (Samu 62:8) Hanyima lia kulemba, chili chilemu kukaula yimwe yikuma yilemu. Tutalenu yikuma yacho.

7-8. Kuchi mukanda wa Samu unakwehe shindakenyo ngwe Yehova kakukuzanga?

⁷ Fuliela ha maliji a Yehova. Yehova katumine atu waze asonekene Mbimbiliya hanga alumbunune chize utu wenyi wapwa. Mu yimwe Samu, Ndawichi yalumbununa kanawa chize Yehova akutufunga. Yasoneka ngwenyi: “Yehova katwama hehi ni waze amakuka mbunge. Kakulamwina waze ali ni spiritu ya kupihilila.” (Samu 34:18) Muze unanenganyana chinji, muhasa kunyonga ngwe niumwe kamwene yize unapalika ku mwono we. Alioze Yehova kanalakenya ngwenyi, mapwa hehi ni yena mumu iye kananyingika ngwenyi ha mashimbu jacho, mumufupa chinji kuhiana ha mashimbu akwo. Ha Samu yikwo, Ndawichi yasoneka ngwenyi: “Sako kama masoji jami mu mulangi we.” (Samu 56:8) Yehova kakumona muze unanenganyana ni lamba lize unapalika. Iye kakulihulumba chinji hali yena nawa kakwivwa yikola yize yena unevwu. Chizechene ngwe masoto a meya apwa alemu kuli mutu yoze unalingi wenyi mu puya, ni masoji jetu kapwa alemu chinji kuli Yehova. Samu 139:3, yinambe ngwo: “[Yehova] unalijilila ni majila jami eswe.” Yehova kakumona yuma yeswe yize wakulinga, alioze kakulihulikila ha yuma yipema. (Hepre. 6:10) Mumu liaka? Mumu iye kakulemesa yuma yeswe yize wakulinga hanga umuvwise kuwaha.a

⁸ Kupalikila mu yisoneko yino ya utakamiso, chili ngwe Yehova kanakulweze ngwenyi: “Ngunazange hanga unyingike ngwe, nakukuzanga chinji nawa nakulihulumba hali yena.” Alioze ngwe chize twamona ku uputukilo, Satana kanazange hanga unyonge ngwe Yehova keshi kukuzanga. Kashika nyi muupwa ni manyonga wano, hanji kuyambashana hakutwala ku zango lia Yehova, lihule ngwe, ‘Kuli iya natamba kutayiza, kuli “tato ya mahuza” nyi kuli ‘Zambi ya umwenemwene’?’—Yoa. 8:44; Samu 31:5.

9. Yika Yehova analakenya kuli waze akumuzanga? (Kutuhuka 20:5, 6)

⁹ Pukuna ha chize Yehova akwivwa hali atu waze akumuzanga. Tutalenu yize Yehova alwezele Mose ni kuli A-Izalele. (Tanga Kutuhuka 20:5, 6.) Yehova kanalakenya ngwenyi, manunga ni kusolola utu wa zango kuli waze akumuzanga. Maliji wano kanatwehe shindakenyo ngwo, chili chikalu Yehova kuhona kuzanga atu waze akumuzanga. (Nehe. 1:5) Kashika muze mukakajana nyi chamwenemwene Yehova kakukuzanga nyi ka, lihule ngwe, ‘Shina yami nakuzanga Yehova?’ Nyi wakuzanga Yehova nawa unase tachi hanga umuvwise kuwaha, muhasa kupwa ni shindakenyo ngwe neye kakukuzanga ni mbunge yeswe. (Danie. 9:4; 1 Kori. 8:3) Mu maliji akwo, nyi yena kuushi kuyambashana ha zango lize ukwete hali Yehova, mumu liaka unayambashana ha zango lize iye akwete hali yena? Muhasa kupwa ni shindakenyo ngwe iye manunga ni kukuzanga mashimbu eswe, nawa kechi kakwehuka nilimwe tangwa.

10-11. Kuchi Yehova anazange hanga umone ukuule? (A-Ngalashia 2:20)

¹⁰ Pukuna ha ukuule. Chitapo cha ukuule wa Yesu Kristu, chili chawana chinene chize Yehova atuhele. (Yoa. 3:16) Shina chawana chino kachihanyine nawa hali yena? Ewa! Achinyonga ha chilweza cha postolo Paulu. Iye kalingile yuma yinji yipi, nawa chipwe muze te hapwa Mukwa-Kristu, nihindu kanungine ni kupinda ni uhenge wenyi. (Roma 7:24, 25; 1 Timo. 1:12-14) Chipwe chocho, kapwile ni kumona ukuule ngwe chawana chize Yehova ahanyine hali iye. (Tanga A-Ngalashia 2:20.) Iwuluka ngwe, Yehova mwe watumine Paulu kusoneka maliji wano, nawa yuma yeswe yize asonekene mu Mbimbiliya, kayisonekene hanga yitulongese. (Roma 15:4) Kashika maliji a Paulu kanasolola ngwo, Yehova kanazange hanga yena umone ukuule ngwe chawana chize iye ahanyine hali yena. Nyi wamwena ukuule mu jila yino, muupwa ni shindakenyo ngwe, Yehova kakukuzanga.

¹¹ Twakusakwilila Yehova ha kutuma mwanenyi hano hashi hanga atufwile. Chikuma chikwo chize chanehene Yesu hano hashi, chili kulongesa atu umwenemwene hakutwala kuli Zambi. (Yoa. 18:37) Umwenemwene uno, unachingi zango linene lize Yehova akwete hali ana jenyi.

KUCHI YESU AKUTUKWASA KUTAYIZA NGWO YEHOVA KAKUTUZANGA?

12. Mumu liaka mutuhasa kufuliela ha yize Yesu ambile hakutwala kuli Yehova?

¹² Muze apwile hano hashi, Yesu te kakuzanga kwambulwila akwo hakutwala ku utu wa Zambi. (Luka 10:22) Mutuhasa kujikijila ha yize Yesu ambile hakutwala kuli Yehova. Mumu liaka? Mumu Yesu katwamine ni tato mu malilu ha miaka yinji muze te kanda achiza hano hashi. (Kolo. 1:15) Yesu kanyingikine kanawa chize tato akumuzanga. Iye kamwene nawa chize Yehova akuzanga angelo waze ashishika ni chize akuzanga tuvumbi twenyi a malunga ni a mapwo hano hashi. Mba kuchi Yesu akutukwasa kutayiza ngwo Yehova kakutuzanga?

13. Kuchi Yesu anazange hanga tumone Yehova?

¹³ Yesu kanazange hanga tumone Yehova ngwe chize iye akumumona. Mu mikanda ya Evanjelu, Yesu kanasanyika Yehova ngwo “Tata,” ha yisuho 149. Mba muze te akuhanjika ni tumbaji twenyi, Yesu te kakuvuluka Yehova ngwenyi, “Tatenu,” hanji “Tatenu yoze uli mu malilu.” (Mateu 5:16; 6:26) Muze Yesu te kanda achiza hano hashi, tuvumbi twa Yehova ashishika kapwile ni kumuvuluka ngwo, ‘Mukwa-Ndundo-Jeswe,’ ‘Chitunda,’ ‘Tangi’ ni yisanyiko yikwo nawa. Alioze Yesu kapwile ni kuvuluka Yehova ha yisuho yinji ngwo, ‘Tata.’ Liji lino linasolola ngwo Yehova kanazange hanga tuvumbi twenyi akundame kuli iye chizechene ngwe umwe mwana akuzanga kukundama kuli Tato yoze ukwete zango. Chinasoloka zwalala ngwo, Yesu kanazange hanga tumone Yehova ngwe chize iye akumumona, ngwe umwe Tata mupema yoze wakuzanga chinji ana jenyi. Tutalenu yilweza yaali haze Yesu atongwele liji “Tata” hanga asolole utu wa Yehova.

14. Kuchi Yesu asolwele ngwenyi, yetu eswe tuli ni ulemu kumeso ja Yehova? (Mateu 10:29-31) (Tala nawa chizulie.)

¹⁴ Chitangu, tutalenu yize Yesu ambile ha Mateu 10:29-31. (Tanga.) Tujila waze Yesu atongwele ha mukanda uno, keshi kuwayila Yehova chipwe kumuzanga. Chipwe chocho, Tata yetu kakwalemesa nawa kananyingika kanawa kajila ni kajila. Nyi Yehova kakulemesa tujila wano akehe-akehe, mutuhasa kupwa ni shindakenyo ngwetu, kakulihulumba hali umwe ni umwe wa kuli yetu, mumu yetu twakumuzanga nawa twakumuwayila. Yesu kambile nawa ngwenyi, tata yetu kananyingika unji wa kambu jize mutu ni mutu ali najo ku mutwe. Amu Yehova ananyingika yuma yikehe-yikehe ku mwono wetu, mutuhasa kupwa ni shindakenyo ngwetu, iye kakulihulumba chinji hali yetu. Pundu lume, Yesu kanazange hanga tupwe ni shindakenyo ngwetu, tuli ni ulemu unji kumeso ja tata yetu yoze uli mu malilu.

15. Yika maliji a Yesu ali ha Yoano 6:44, anasolola hakutwala kuli Tata yetu wa mu malilu?

¹⁵ Tutalenu chilweza chamuchiali haze Yesu avulukile Yehova ngwenyi “Tata.” (Tanga Yoano 6:44.) Yehova mwene, mwe wakukwashile kumunyingika ni kumuzanga. Mumu liaka achilingile? Mumu kamwene yitanga yipema mu mbunge ye. (Yili. 13:48) Muze Yesu atongwele maliji ali ha Yoano 6:44, iye kota katongwele maliji a Yehova waze ali ha Jeremia 31:3 haze Yehova alwezele atu jenyi ngwenyi: “Hinanukoka ni utu wa zango.” (Tesa nawa ni Hozeia 11:4.) Achinyonga ha ulumbunwiso wa maliji wano. Tata yetu wa mu malilu kananungu ni kumona yitanga yipema muli yena, chipwe ngwe yena mwene kuushi kuhasa kuyimona.

16. (a) Yika Yesu anatulongesa hakutwala kuli Yehova, nawa mumu liaka twatamba kumujikijila? (b) Yika muyikukwasa kupwa ni shindakenyo ngwe Yehova kali Tatenu mupema? (Tala mushete “Tata Yoze Yetu Eswe Tunafupu.”)

¹⁶ Ha kusolola Yehova ngwe Tata yetu, chili ngwe Yesu kanambe ngwenyi: “Yehova hi Tata wa yami wika ko, kali nawa tatenu. Ngunakulweze ni shindakenyo yeswe ngwami, iye kakukuzanga nawa kakulihulumba chinji hali yena.” Kashika, nyi ha mashimbu amwe mukakajana hakutwala ku zango lia Yehova hali yena, muchilita kwiuluka yize Yesu ambile ni kumujikijila. Mumu iye mashimbu eswe kakuhanjika umwenemwene nawa kananyingika kanawa Tata yetu kuhiana mutu mweswawo.’—1 Petu. 2:22.

NUNGA NI KUPWA NI SHINDAKENYO NGWE YEHOVA KAKUKUZANGA

17. Mumu liaka twatamba kulinga yeswe yize mutuhasa hanga tupwe ni shindakenyo ngwetu Yehova kakutuzanga?

¹⁷ Twatamba kulinga yeswe yize mutuhasa hanga tupwe ni shindakenyo ngwetu, Yehova kakutuzanga. Ngwe chize twamona ha mutwe uno, Satana kali mukwa-kole mupi yoze wakuzanga kuzeyesa ufulielo wetu hanga tulitwamine kuwayila Yehova. Iye keshi kuhonga, kananungu ni kutweseka hanga tunyonge ngwetu Yehova keshi kutuzanga. Alioze kanda tufwa mu muheto uno.—Yombi 27:5.

18. Yika muhasa kulinga hanga ununge kupwa ni shindakenyo ngwe Yehova kakukuzanga?

¹⁸ Ha mutwe uno, twalilongesaho yize mutuhasa kulinga hanga tupwe ni shindakenyo ngwetu, Yehova kakutuzanga. Mutuhasa kulemba kuli iye hanga atukwase kumona yitanga yipema yize iye akumona muli yetu. Pukuna ha yisoneko ya mu Mbimbiliya yize yakusolola zango linene lia Yehova ni chize akulihulumba hali atu waze akumuzanga. Iwuluka ngwe, muze umwe mutu akuzanga Yehova, chakupwa chikalu Yehova kuhona kumuzanga. Chikwo nawa, kanda wiza kavulama ngwe, ukuule uli chawana cha Yehova hali yena. Kashika pwako ni shindakenyo ngwe, Yehova kali Tatenu chizechene ngwe Yesu ambile. Hachino, nyi umwe makuhula ngwe: “Shina uli ni shindakenyo ngwe Yehova kakukuzanga?” Mukumbulule ni shindakenyo yeswe ngwe, “Ewa, kakunguzanga. Ni yami nakulinga yeswe yize munguhasa tangwa ha tangwa, hanga ngusolole zango liami hali iye.”