Kuchi Mutuhasa Kwimbulula Yehova ha Kukonekena Akwetu?

1-2. (a) Mumu liaka ha mashimbu amwe chakupwa chikalu kukonekena umwe? (b) Yika Denise alingile?

SHINA chakukukalila kukonekena akwenu? Kuli anji a kuli yetu, hi chashi ko kukonekena umwe muze matulemeka ku mbunge. Twatamba kulinga chimwe hanga tuhone kufunga toto ni kukonekena akwetu. Tutalenu chilweza cha ndumbu Denise,a yoze wahashile kukonekena umwe mu jila ya kukomwesa. Ha mwaka 2017, iye ni usoko wenyi kayile ni kumeneka chishina chinene chize akunjikile kuli Yehova. Muze te anafuna ku zuwo, umwe mukwa-kwendesa mashinyi yapupa mashinyi muze apwile Denise ni asoko jenyi. Denise yalezumuka. Muze ahuzulukile, yanyingika ngwenyi, ana jenyi kalemana chinji, mukwo-lunga Brian kafwa. Ha kwiuluka yize yalingiwileko, Denise yamba ngwenyi: “Nevwile yikola yinji ku mbunge; chakanyingikine yize te mungulinga.” Muze anyingikine ngwenyi, mukwa-kwendesa wacho kakachilingile ku tachi, kapwile ni kwendesa kanawa, iye yalemba kuli Yehova hanga amwehe sambukila.

² Mukwa-kwendesa wacho, kamusele mu zuwo lia ususu mumu lia kushiha mutu ku mashinyi. Nyi kamuwanyine ni mulonga, kachi kanungine lume mu zuwo lia ususu. Alioze, chota cha usopeselo yichilweza Denise ngwo, lunga wacho te mamupatwila wika kulita ni yize iye mamba. Denise yamba ngwenyi: “Nevwile ngwe umwe kangwazulula ha mbandu ni kusaho mungwa, mumu neulukile yuma yeswe yize yalingiwile ha tangwa lipi chinji ku mwono wami.” Ha kupalika cha jimwe poso, Denise yaya ku chota cha usopeselo hanga ahanjike ni lunga yoze wanehene lamba linji mu usoko wenyi. Yika iye ambile? Denise yeta hanga ngaji akonekene lunga wacho.b Muze Denise ahwishile kuhanjika, ngaji yaputuka kulila ni kwamba ngwenyi: “Ha miaka 25 nakalakala ngwe ngaji, kanda nguchimona kama yuma ya mutapu au, kanda nguchivwa kama asoko ja mutu yoze alinga upi meta hanga atusule mutu yoze walinganga upi wacho. Kanda nguchivwa kama maliji a zango ni ukonekeno.”

3. Yika yakwashile Denise kukonekena mutu wacho?

³ Yika yakwashile Denise kukonekena mutu wacho? Iye kapukwine ha ukonekeno wa Yehova. (Mika 7:18) Muze twakusolola usakwililo ha chize Yehova akutukonekena, chino chakutukwasa kukonekena akwetu.

4. Yika Yehova anashimbwila hanga tulinge? (A-Efwesu 4:32)

⁴ Yehova kanazange hanga tukonekene akwetu ngwe chize iye akutukonekena. (Tanga A-Efwesu 4:32.) Iye kanashimbwila hanga tukonekene waze akutukekuna ni kutuvwisa yikola ku mbunge. (Samu 86:5; Luka 17:4) Ha mutwe uno, mutumonaho yikuma yitatu yize muyitukwasa hanga tupwe ni kukonekena akwetu.

KANDA ULENGULULA CHIZE UNALIVU KU MBUNGE

5. Kulita ni Yishima 12:18, kuchi mutuhasa kulivwa nyi umwe matulemeka ku mbunge?

⁵ Mutuhasa kwivwa yikola yinji ku mbunge mumu lia yuma yize umwe amba hanji alinga, chipi-chipi nyi mutu wacho kali sepa hanji usoko wetu. (Samu 55:12-14) Ha mashimbu amwe, yikola yize twakwivwa ku mbunge yakupwa ngwe kutuwa cha katana. (Tanga Yishima 12:18.) Mutuhasa kulengulula chize tunevu ni kusolola ngwe kwalingiwile chuma nichimwe. Alioze kulinga chino, chili ngwe kwecha katana wacho anunge ha chilonda. Chizechene nawa, kutwatambile kushimbwila ngwetu, yikola yize tunevu ku mbunge muyipalika ha kuyilengulula.

6. Yika muyihasa kulingiwa nyi umwe matulemeka ku mbunge?

⁶ Nyi umwe matulemeka ku mbunge, kanji-kanji twakuvwila mutu wacho uli. Mbimbiliya yakusolola ngwo, hi chipi ko kwivwa uli ha mashimbu amwe. Alioze, yakututoweza nawa ngwo, manyonga wano api katambile kutusongwela. (Samu 4:4; Efwe. 4:26) Mumu liaka? Mumu manyonga jetu mahasa kututwala hanga tulinge yimwe. Chikwo nawa, uli kuushi kututwala kulinga yuma yipema. (Tia. 1:20) Mutu mahasa kwivwa uli, alioze kununga ni uli chili chuma chize mwene masakula.

7. Manyonga akwo aka api mutuhasa kupwa no nyi umwe matulemeka ku mbunge?

⁷ Muze umwe matulemeka ku mbunge, chino chakuneha manyonga akwo api. Ngwe chilweza, umwe ndumbu avuluka ngwo Ann, yamba ngwenyi: “Muze napwile kanuke, tata yalakula mama, yalimbata ni pwo yoze wapwile ndeji yami. Nalivwile ukawami. Kulutwe, o yapwa ni ana; nalivwile ngwe kangusapula. Nakolele ni kulivwa ngwami, keshi kungulemesa.” Ndumbu Georgette, kanalumbununa chize alivwile muze mukwolunga ahonene kushishika kuli iye. Yamba ngwenyi: “Yetu twapwile masepa chize ku wanuke wetu, twakalakalile hamuwika ngwe mapionelu, kashika nevwile yikola yinji ku mbunge.” Ndumbu Naomi, yamba ngwenyi: “Te kanda nguchinyonga kama ngwami, mukwetu-lunga manguvwisa yikola ku mbunge. Muze angulwezele ngwenyi te kakutala yinema ya sonyi, nevwile yikola yinji ku mbunge ni kumona ngwami keshi kungulemesa.”

8. (a) Yika yatamba kututwala mba tukonekene akwetu? (b) Yika twakuyuka muze twakukonekena akwetu? (Tala mushete, “Yika Mulinga Nyi Wakuvwila Umwe Mutu Woma?”)

⁸ Yetu kutuchi kuhasa kukinda akwetu ha yize matulinga hanji matwamba. Alioze, mutuhasa kulihumikiza ha yuma yacho. Kanji-kanji, chuma chipema kulinga chili kukonekena akwetu. Mumu liaka? Mumu twakuzanga Yehova, nawa iye kanashimbwila hanga tupwe ni kukonekena akwetu. Nyi twanunga ni kulivutula chakuhona kukonekena akwetu, muchipwa chashi kukwata yiyulo yipi ni kulikokela misongo yinji ku mwono. (Yishi. 14:17, 29, 30) Tutalenu chilweza cha ndumbu Christine. Iye yamba ngwenyi: “Muze nakwivwa yikola ku mbunge, chakupwa chikalu kuseha, kulia, chipwe tulo chishi kwamona. Kashika, chakupwa chikalu kulihumikiza, nawa yino yakukwata ha chize nakuhanjika ni mukwetu-lunga ni ha usepa wami ni akwetu.”

9. Mumu liaka kutwatambile kufungila akwetu toto?

⁹ Chipwe ngwe mutu yoze watulemeka ku mbunge katwichile ukonekeno, nihindu mutuhasa kulinga yimwe hanga tutepulule yikola yize tunevu. Kuchi mutuhasa kuchilinga? Georgette, yoze twatongola helu, yamba ngwenyi: “Kuchakapwile chashi kuvulama yuma yize angulingile kuli lunga yoze nalimbachile nenyi, chipwe chocho, ha kupalika cha mashimbu yingwecha kumuvwila toto. Kulinga chino, changukwashile kupwa ni sambukila ya ku mbunge.” Kwehuka kufunga toto, chakutukwasa tuhone kunenganyana chinji ni kutwama kanawa ni akwetu. Chikwo nawa, chakupwa ngwe tunaliehe chawana, chekwamba, kwecha kulihulikila ha yize atulingile ni kuwahilila cheka ku mwono. (Yishi. 11:17) Mba yika mulinga nyi ngwe kanda uchilivwa kanawa hanga ukonekene mutu yoze wakulemeka ku mbunge?

KUMBA MANYONGA API

10. Mumu liaka tunafupiwa mashimbu mba twehuke ufwatulo? (Tala nawa yizulie.)

¹⁰ Yika muhasa kulinga mba wehuke ufwatulo? Jila yimwe, yili kwecha amwe mashimbu apalike. Ngwe chilweza, muze mutu akulemana, kwakufupiwa mashimbu mba chilonda chume. Chizechene nawa, ni yetu tunafupiwa mashimbu mba tukwate chiyulo cha kukonekena mutu yoze watulemeka ku mbunge.​—Chilu. 3:3; 1 Petu. 1:22.

11. Yika chilweza cha Ann chinakulongesa hakutwala ku kulemba?

¹¹ Lemba kuli Yehova hanga akukwase kupwa mukwa-kukonekena.c Ann, yoze hitwatongola, kanalumbununa chize kulemba chamukwashile. Yamba ngwenyi: “Nalembele kuli Yehova hanga akonekene hita umwe mu usoko wetu hakutwala ku yuma yipi yize twambile ni yize twalingile. Chocho yingusonekena tata ni mukwo-pwo mukanda ni kwalweza ngwami, te hingunaakonekena ha yize angulingile.” Ann yatayiza ngwenyi, kulinga chino, kuchakapwile chashi. Alioze yamba nawa ngwenyi: “Ngunashimbwila ngwami, kwimbulula ukonekeno wa Yehova, muchikwasa tata ni mukwo-pwo azange kulilongesa hakutwala kuli Yehova.”

12. Mumu liaka chili chilemu kujikijila muli Yehova, shimbu tujikijile ha manyonga jetu? (Yishima 3:5, 6)

¹² Jikijila muli Yehova, kanda ujikijila ha manyonga je. (Tanga Yishima 3:5, 6.) Yehova kananyingika mashimbu eswe yize yinatupemena. (Iza. 55:8, 9) Iye kechi keza katwita nilimwe tangwa hanga tulinge yuma yize muyitunehena lamba. Kashika, muze akutwita hanga tukonekene akwetu, mutuhasa kupwa ni shindakenyo ngwetu, kanachilingi mumu lia upeme wetu. (Samu 40:4; Iza. 48:17, 18) Alioze, nyi twajikijila wika ha manyonga jetu, kutuchi kuhasa kukonekena akwetu. (Yishi. 14:12; Jere. 17:9) Naomi, yoze hitwatongola, yamba ngwenyi: “Ku uputukilo, napwile ni kunyonga ngwami, nguli ni ulite wa kuhona kukonekena mukwetulunga mumu lia kutala yinema ya sonyi. Napwile ni kwivwa woma ngwami, manguvwisa cheka yikola ku mbunge hanji kuvulama lamba lize angunehenene. Chikwo nawa, napwile ni kuliamba ngwami, Yehova kananyingika kanawa chize ngunevu. Alioze, yingunyingika ngwami, chipwe ngwe Yehova kananyingika yize ngunapalika, chino kuchalumbunukine ngwo kanatayiza yize ngunalingi. Iye kananyingika chize ngunalivu; kananyingika ngwo, mukupalika mashimbu mba ngulivwe kanawa, alioze kanazange nawa hanga ngupwe mukwa-kukonekena.”d

PWAKO NI MANYONGA ALITA

13. Kulita ni A-Roma 12:18-21, yika twatamba kulinga?

¹³ Muze mutukonekena umwe yoze watulemeka ku mbunge, twakuzanga kulinga yuma yinji hi wika ko kwecha kuhanjika ha yize atulinga. Nyi yoze watulemeka ku mbunge kali ndumbwetu ku ufulielo, chuma chilemu twatamba kulinga chili kufunga sambukila. (Mateu 5:23, 24) Yetu tunazange kusalakanyisa ufwatulo ni keke, kutulika toto ni ukonekeno. (Tanga A-Roma 12:18-21; 1 Petu. 3:9) Yika muyitukwasa kuchilinga?

14. Kuchi twatamba kumona mutu yoze watulemeka ku mbunge, nawa mumu liaka?

¹⁴ Twatamba kusa tachi hanga tumone mutu yoze watulemeka ku mbunge ngwe chize Yehova akumumona. Yehova kakusakula kumona yuma yipema hali atu. (2 Sango 16:9; Samu 130:3) Maliji amwe kakwamba ngwo, kanji-kanji twakuwana yize twakufupa muli atu—yuma yacho muyihasa kupwa yipema hanji yipi. Muze twakufupa kuwana yitanga yipema hali akwetu, chakupwa chashi kwakonekena. Ngwe chilweza, ndumbu Jarrod, yamba ngwenyi: “Kuli yami, chakupwa chashi kukonekena umwe ndumbu, muze nakutesa yuma yipi yize angulinga ni yitanga yipema yize akwete.”

15. Mumu liaka chili chilemu kulweza mutu yoze watulemeka ku mbunge ngwetu, twakukonekena?

¹⁵ Chuma chikwo chilemu chize twatamba kulinga, chili kulweza mutu yoze watulemeka ku mbunge ngwetu, twamukonekena. Mumu liaka? Naomi, yoze hitwatongola kulu, kambile ngwenyi: “Muze mukwetu-lunga anguhulile ngwenyi: ‘Shina wangukonekena?’ Muze te ngunambe kumukumbulula ngwami: ‘Ewa, nakukonekena,’ yinguliswenya, kuchakahashile kumukumbulula. Nanyingikine ngwami, chakakonekenene lunga liami ni mbunge yeswe. Alioze ha kupalika cha mashimbu, yinguhasa kumulweza maliji wano apema ngwami: ‘Nakukonekena.’ Muze nakonekenene mukwetu-lunga, iye yalila. Nakomokene ha kumona chize alivwile ni chize ukonekeno wami wamunehenene sambukila ya ku mbunge. Kulutwe, yinguputuka kumujikijila cheka. Haliapwila tuli masepa apema.”

16. Yika walilongesa hakutwala ku ukonekeno?

¹⁶ Yehova kanazange hanga tupwe akwa-kukonekena. (Kolo. 3:13) Chipwe chocho, muchihasa kupwa chikalu kukonekena akwetu. Alioze nyi kutwalengulwile chize tunalivu, mutuhasa kukonekena akwetu ni kusa tachi hanga tuhone kwatulikila kakucha. Nyi twachilinga, mutuhasa kupwa ni manyonga apema.​—Tala mushete, “Yikuma Yitatu Yize Muyikukwasa Kukonekena Akwenu.”

NYONGA HA YIWAPE YIZE YAKWIZA HA KUKONEKENA

17. Yuma yika yakututwala mba tukonekene akwetu?

¹⁷ Tuli ni yuma yinji yize yakututwala mba tukonekene akwetu. Chitangu, muze twakukonekena akwetu, twakwimbulula Tata yetu Yehova ni kumuvwisa kuwaha. (Luka 6:36) Chamuchiali, twakusolola usakwililo wetu ha chize Yehova akutukonekena. (Mateu 6:12) Chamuchitatu, twakupwa kanawa ku mujimba, ku manyonga ni kupwa ni usepa upema ni akwetu.

18-19. Yika muyihasa kulingiwa nyi twakonekena akwetu?

¹⁸ Nyi twakonekena akwetu, mukuhasa kulingiwa yuma yipema yize te kutushi ni kushimbwila. Ngwe chilweza, tutalenu yize yalingiwile kuli Denise yoze twatongola ku uputukilo. Ha mashimbu a usopeso, iye kakanyingikine ngwenyi, lunga yoze washihile mukwo-lunga, katesele kulisukika hanyima lia usopeso. Alioze, lunga wacho kawahililile chinji ha kunyingika ngwenyi, Denise kamukonekenene, chocho yaputuka kulilongesa Mbimbiliya ni Yela ja Yehova.

¹⁹ Mutuhasa kumona ngwetu, chili chikalu kukonekena umwe yoze watulinga upi, alioze muchihasa nawa kupwa chiyulo chipema chize mutukwata. (Mateu 5:7) Hachino, twatamba kusa tachi tulinge yize mutuhasa hanga twimbulule Yehova ha kukonekena akwetu.