Yehova ‘Kakuuka Waze Amakuka Mbunge’

1. Kuchi Yehova akulivwa hakutwala kuli tuvumbi twenyi?

KUNYONGA lie, yika Yehova akumona muze akutala hali tuvumbi twenyi hano hashi? Yehova kakumona muze twakuwahilila ni muze twakunenganyana. (Samu 37:18) Iye kakumona tachi jize twakusa hanga tumuwayile chipwe ngwe tunahongo ku mbunge. Chino chakumuvwisa chinji kuwaha. Kanazange nawa kutukwasa ni kututakamisa.

2. Yika Yehova akulinga hali waze amakuka mbunge, nawa kuchi mutuhasa kuyuka ha ufunge wenyi?

² Samu 147:3 yinambe ngwo, Yehova kakuuka ‘yilonda ya waze amakuka mbunge.’ Ha Samu yino, Yehova kanamusolola ngwe yoze wakufunga kanawa mutu yoze unalemewa ku mbunge. Mba yika twatamba kulinga hanga tuyuke ha ufunge wa zango wa Yehova? Tuchinyongenu ha chilweza chino. Umwe ndotolo wajama mahasa kulinga yeswe yize mahasa hanga auke mutu yoze walemana. Mba chino chilingiwe, mutu yoze walemana katamba kukaula usongwelo weswe uze ndotolo mamwaha. Ha mutwe uno, kupalikila mu Mbimbiliya, mutumona yize Yehova analweze atu waze amakuka mbunge, ni chize mutuhasa kuwahilila ha kukaula yiyulo ya zango ya Yehova.

YEHOVA KANATULWEZE NGWENYI TULI ALEMU KULI IYE

3. Mumu liaka amwe akulivwa ngwe keshi ulemu?

³ Tuli mu chifuchi muze kumushi zango. Atu anji keshi kulisolwela zango umwe ni mukwo, nawa kakutwala akwo alivwe ngwe keshi ulemu. Ndumbu Helen,a yamba ngwenyi: “Nakolele mu usoko uze te kuushi kulisolwela zango. Tata te chitenu, mashimbu eswe kapwile ni kutulweza ngwenyi, kutushi ni ulemu.” Chizechene ngwe Helen, kota ni yena kakumwesene lamba ni kukwamba yuma yipi mba yiumona ngwe niumwe keshi kukuzanga. Nyi yino ye yalingiwile kuli yena, muchihasa kupwa chikalu kutayiza ngwe kuli umwe yoze wakukulemesa.

4. Kulita ni Samu 34:18, shindakenyo yika Yehova akutwaha?

⁴ Chipwe ngwe kakumwesene lamba kuli mutu mweswawo, pwako ni shindakenyo ngwe Yehova kakukuzanga chinji nawa kakukulemesa. Mbimbiliya yakwamba ngwo: “Yehova katwama hehi ni waze amakuka mbunge.” (Tanga Samu 34:18.) Nyi uli ni “spiritu ya kupihilila,” iwuluka ngwe Yehova kamwene yuma yipema ku mbunge ye, kashika akukokele hanga umuwayile. (Yoa. 6:44) Yehova kanazange chinji kukukwasa mumu kuli iye, uli ni ulemu unji.

5. Yika mutuhasa kulilongesa ha chize Yesu apwile ni kumona atu waze te akulelesa kuli akwo?

⁵ Kupalikila muli Yesu, mutuhasa kunyingika chize Yehova akwivwa. Muze apwile hano hashi, Yesu kapwile ni kulihulumba ni kusolwela zango atu waze te akulelesa kuli akwo. (Mateu 9:9-12) Ngwe chilweza, muze umwe pwo yoze te wakuyiza musongo upi akwachile ku mazalo ja Yesu ni kushimbwila ngwenyi mamuuka, iye yamutakamisa ni kumuchichimieka ha ufulielo wenyi. (Marku 5:25-34) Chochene, Yesu kembulwile utu wa Tato ni ungunu weswe. (Yoa. 14:9) Kashika, muhasa kupwa ni shindakenyo ngwe, kuli Yehova, yena uli ni ulemu unji. Iye kakulemesa yitanga yize ukwete ngwe ufulielo ni zango.

6. Yika muhasa kulinga nyi mulivwa ngwe kuushi ulemu?

⁶ Yika muhasa kulinga nyi muchikukaliwila kutayiza ngwe kuli Yehova, yena ukwete ulemu unji? Tanga yisoneko yize yakusolola ngwo Yehova kakukulemesa chinji, ni kupukuna ha yisoneko yacho.b (Samu 94:19) Nyi kuwahashile kumanununa yize watesele, nawa unanenganyana mumu kuushi kulinga yuma ngwe chize akwenu akulinga, kanda ulipikala. Yehova keshi kushimbwila hanga ulinge yuma yize kuuchi kuhasa. (Samu 103:13, 14) Nyi ngwe umwe kakulingile upi, kanda ulihisa ha yize akulingile. Kwamba pundu, te kuwatelele kupalika mu yuma yacho. Kuli Yehova, mulonga uli kuli mutu yoze wakulingile upi wacho hi kuli yena ko. (1 Petu. 3:12) Sandra, yoze apihishile ku wanuke yamba ngwenyi: “Mashimbu eswe nakulemba kuli Yehova hanga angukwase ngulimone ngwe chize iye akungumona.”

7. Kuchi yuma yize twapalikile ku mwono muyihasa kutukwasa kulingila kanawa Yehova?

⁷ Kanda uyambashana ngwo, Yehova mahasa kukwasa akwenu kupalikila muli yena. Iye kakuhele chiteli cha kukalakala hamwe nenyi mu mulimo wa kwambujola. (1 Kori. 3:9) Yuma yize wapalikile ku mwono, muyikukwasa kulisa mu chihela cha atu waze anamono lamba, ni kunyingika kanawa chize anevu. Hachino, muhasa kulinga yuma yinji hanga wakwase. Helen, yoze twatongola ku uputukilo, katambwile ukwaso mba haliapwila iye kanahase kukwasa akwo. Yamba ngwenyi: “Napwile ni kulivwa ngwe chishi ulemu. Alioze Yehova kangukwasa kumona ngwami nguli mulemu, nawa haliapwila nakuhasa kukwasa akwetu.” Musono, Helen kanawahilila ni kukalakala ngwe pionelu wa shimbu lieswe.

TAYIZA UKONEKENO WA YEHOVA

8. Shindakenyo yika tunawane ha Izaia 1:18?

⁸ Tuvumbi twa Yehova amwe machinunga ni kwivwa yikola ku mbunge, mumu lia shili yize alingile muze te kanda achaapapachisa ni hanyima lia kwapapachisa. Alioze chili chilemu kwiuluka ngwetu, Yehova katuhele chitapo cha ukuule mumu kakutuzanga. Iye kanazange hanga tutayize chawana chacho. Yehova kanatulweze ngwenyi, nyi ‘twalishimwinya nenyi’c hanji kulikonyeka, iye makonekena shili yetu yeswe. (Tanga Izaia 1:18.) Chakuwaha chinji kunyingika ngwetu, Yehova keshi kwiuluka nawa shili yize twalingile kunyima! Iye kanatulweze nawa ngwenyi, kechi keza kavulama yuma yipema yize twakulinga.—Samu 103:9, 12; Hepre. 6:10.

9. Mumu liaka kutwatambile kulihulikila ha shili yize twalingile kunyima?

⁹ Nyi wakunenganyana mumu lia yuma yize walingile kunyima, linga yize muhasa hanga ulihulikile ha yize unalingi haliapwila ni ha yize mukalinga kulutwe. Tutalenu chilweza cha postolo Paulu. Iye kevwile yikola ku mbunge mumu lia kuhungumiona chinji Akwa-Kristu, alioze kanyingikine ngwenyi Yehova te hanamukonekena. (1 Timo. 1:12-15) Shina iye kapwile ni kunyonga chinji ha shili yize alingile kunyima? Ka! Kakachilingile, ngwe chizechene nawa echele kunyonga ha yuma yize alingile mu uwayilo wa A-Yunda. (Fwili. 3:4-8, 13-15) Hachino, Paulu yalihulikila chinji mu mulimo wa kwambujola ni ha yuma ya kulutwe. Chizechene ngwe Paulu, ni yetu kutuchi kuhasa kwalumuna yuma yize yalingiwile kunyima. Alioze, mutuhasa kuhalisa Yehova ni yuma yize tunalingi haliapwila ni kulihulikila ha yuma ya kulutwe.

10. Yika mutuhasa kulinga nyi kunyima twalingile yuma yize yalemekene akwetu ku mbunge?

¹⁰ Hanji wakulivwa chipi mumu lia yuma yize walingile yize yalemekene akwenu ku mbunge. Nyi chenacho, yika muyihasa kukukwasa? Linga yize muhasa hanga ululieke yuma ni atu jacho. Muhasa kwalweza hanji kulinga yuma yize muyisolola ngwo, walikonyeka ha yize walingile. (2 Kori. 7:11) Chikwo nawa, eta kuli Yehova akwase atu waze walemekene ku mbunge. Pundu lume, Yehova mahasa kukukwasa ni kukwasa waze walemekene ku mbunge anunge ni kunyongonona ni kupwa ni sambukila.

11. Yika mutuhasa kulilongesa ha chilweza cha profeta Yona? (Tala nawa chizulie ha .)

¹¹ Lilongese ha tupalia waze walingile kunyima ni kutayiza kulingila Yehova mu jila yeswayo iye mazanga. Tutalenu chilweza cha profeta Yona. Yehova kamutumine ku Ninive, alioze iye yachina ni kuya ku chihela cheka. Yehova kafumbile Yona, chocho Yona yawana malongeso ha uhenge uze alingile. (Yona 1:1-4, 15-17; 2:7-10) Yehova kakechele kutuma Yona. Iye kamuhele uhashi ukwo wa kuya ku Ninive, ha chisuho chino, Yona yononoka kawashi-washi. Kwamba umwenemwene, kota Yona kanenganyanyine mumu lia kuhona kwononoka ha chisuho chitangu. Alioze chino kuchakamukwikile kutayiza chiteli chaha chize Yehova amuhele.—Yona 3:1-3.

YEHOVA KAKUTUTAKAMISA KUPALIKILA MU SPIRITU YISANDU

12. Kuchi Yehova akutwaha sambukila muze tunapalika mu yipikalo hanji twafwisa umwe? (A-Fwilipu 4:6, 7)

¹² Muze kwakulingiwa yimwe hanji muze twakufwisa umwe, Yehova kakututakamisa kupalikila mu spiritu yisandu. Tutalenu yize yalingiwile kuli Ron ni Carol. Chaluyinda, mwano kalishihile. Ayo yamba ngwo: “Yetu te hitunapalika mu yuma yipi, alioze yino yahianyine chinji. Ha yisuho yinji, te kutushi kuhasa kupomba; twapwile wika ni kulemba kuli Yehova, mba yitupwa ni sambukila yamwenemwene yize anatongola ha A-Fwilipu 4:6, 7.” (Tanga.) Nyi unapalika mu yuma yize yinakuhongesa chinji ku mbunge, lemba kuli Yehova ni kumulweza yeswe yize unapalika. Muhasa kuchilinga ha yisuho ni ha mashimbu eswawo muzanga. (Samu 86:3; 88:1) Eta spiritu yisandu ya Yehova mashimbu eswe. Nyi wachilinga, muhasa kupwa ni shindakenyo ngwe iye kechi kulengulula kwita che.—Luka 11:9-13.

13. Kuchi spiritu yisandu ya Yehova muyihasa kutukwasa kununga ni kumuwayila ni ushishiko? (A-Efwesu 3:16)

¹³ Shina wakulivwa ngwe kuushi ni tachi ja kulinga chuma nichimwe mumu lia yuma yikalu yize wapalikile ku mwono? Nyi chenacho, spiritu yisandu muyihasa kukukwasa kununga ni kuwayila Yehova ni ushishiko. (Tanga A-Efwesu 3:16.) Tutalenu yize yalingiwile kuli ndumbu Flora. Iye ni mukwo-lunga te kakukalakala ngwe mishionaliu, chocho mukwo-lunga yalinga utanji mba yalilakula. Iye yamba ngwenyi: “Nahongele chinji ku mbunge mumu lia yize iye alingile, te chishi kuhasa kunyonga ha chuma chikwo. Napwile ni kulemba kuli Yehova ni kwita spiritu yenyi yisandu hanga yingukwase. Yehova kanguhele ukwaso uze te ngunafupu hanga nguhase kukumba kapinda wacho yoze ku uputukilo wapwile mukalu chinji. Flora kakulivwa ngwo, Yehova kamukwashile kujikijila chinji muli iye ni kupwa ni shindakenyo ngwenyi, Yehova manunga ni kumukwasa mu yuma yeswayo mapalika.” Iye yamba nawa ngwenyi: “Maliji ali ha Samu 119:32 kanalumbununa kanawa chize Yehova angukwashile: ‘Munguzombokela mu jila ya shimbi je muze yena mutohwesa mbunge yami.’”

14. Kuchi mutuhasa kwecha spiritu ya Zambi yitusongwele?

¹⁴ Hanyima lia kulemba kuli Yehova ni kwita spiritu yenyi yisandu, kuchi muhasa kutwama kulita ni yize weta? Eseka kulinga yuma yize muyikukwasa kupwa ni ukwaso wa spiritu yisandu, ngwe kupwa ha kukunguluka ni kwambujola sango jipema. Zalisa mbunge ye ni yinyingi ya Yehova ha kutanga Liji lienyi tangwa ha tangwa. (Fwili. 4:8, 9) Muze mutanga Mbimbiliya, lihulikile hali atu waze apalikile mu yipikalo ni kumona chize Yehova aakwashile kunyongonona. Sandra twatongola ku uputukilo, yoze wamwene lamba linji mumu lia yize apalikile ku mwono, yamba ngwenyi: “Lusango wa Yosefwe kakungukwata chinji ku mbunge. Iye kamulingile yuma yinji yipi, nihindu kakechele hanga yuma yacho yipihise usepa wenyi ni Yehova.”—Uputu. 39:21-23.

YEHOVA KAKUTUTAKAMISA KUPALIKILA MULI MANDUMBU JETU

15. Aya mahasa kututakamisa, nawa kuchi ayo mahasa kutukwasa? (Tala nawa chizulie.)

¹⁵ Muze tunapalika mu umwe kapinda, mandumbu jetu mahasa kupwa ‘chishina cha utakamiso.’ (Kolo. 4:11) Yehova kakutusolwela zango lienyi kupalikila muli mandumbu jetu a malunga ni a mapwo. Ayo kakututakamisa ha kutupanjika ni kufupa kunyingika chize tunalivu. Ha yisuho yimwe, o kakuchilinga ha kupwa hamwe ni yetu. Ayo nawa mahasa kulianyina ni yetu chimwe chisoneko cha mu Mbimbiliya ni kulemba hamwe ni yetu.d (Roma 15:4) Ha mashimbu amwe, mandumbu jetu mahasa kutukwasa kunyingika chize Yehova akunyonga hakutwala ku chimwe chikuma. Hachino, mutuhasa kuhwima mbunge ni kunyongonona. Ha mashimbu akwo, ayo mahasa kutukwasa mu majila alisa, ngwe kutunehena kulia ni kutukwasa kulivwa kanawa.

16. Yika mutuhasa kulinga mba akwetu atukwase?

¹⁶ Mba akwetu atukwase, o katamba kunyingika yize tunafupu. Mandumbu jetu kakutuzanga chinji nawa kanazange kutukwasa. (Yishi. 17:17) Alioze, ayo hanji kanyingikine chize tunalivu ni yize tunafupu. (Yishi. 14:10) Nyi unahongo chinji ku manyonga, eseka kuhanjika ni umwe sepa wajama. Mulweze yize mahasa kulinga hanga akukwase. Muhasa nawa kuhanjika ni mukulwana wa mu chikungulwila umuwika hanji aali waze wakulivwa kanawa kuhanjika no. Kuli mandumbu a mapwo, o mahasa kulivwa kanawa ha kuhanjika ni umwe ndumbu wa pwo yoze wajama.

17. Yika muyihasa kututwala hanga tuhone kutambula utakamiso wa akwetu, mba yika mutuhasa kulinga?

¹⁷ Ehuka kupalikisa mashimbu anji ukawe. Mumu lia yikola yize unevu ku mbunge, muchihasa kupwa chikalu kuhanjika ni akwenu. Ha mashimbu amwe, mandumbu je kechi kuhasa kunyingika chize unalivu hanji mahasa kwamba yuma yize kuyalitele. (Tia. 3:2) Chipwe chocho, kanda ulihandununa no, mumu Yehova mahasa kukutakamisa kupalikila muli ayo. Gavin, umwe mukulwana wa mu chikungulwila, yoze wayijile musongo wa kulema ku mbunge, yamba ngwenyi: “Ha mashimbu amwe, chishi kuzanga kuhanjika hanji kupalikisa mashimbu ni masepa jami. Alioze, Gavin kakulikolweza hanga apwe hamuwika ni mandumbu jenyi. Kanji-kanji, iye kakulivwa kanawa muze akuchilinga.” Amy, umwe ndumbu wa pwo, yamba ngwenyi: “Mumu lia yuma yize napalikile kunyima, te chakupwa chikalu kujikijila muli atu. Alioze, nalilongesele kuzanga ni kujikijila muli mandumbu jami ngwe chize Yehova akulinga. Ngunanyingika ngwami, kulinga chino chakuvwisa Yehova kuwaha ni yami mwene ngunawahilila.”

YILAKENYO YA YEHOVA YAKUTUTAKAMISA

18. Yika mutuhasa kushimbwila kulutwe lia matangwa, mba yika mutuhasa kulinga haliapwila?

¹⁸ Mutuhasa kujikijila ku yuma ya kulutwe ni kupwa ni shindakenyo ngwetu, kwasala hakehe Yehova mahwisa lamba ni yuma yeswe yize yakutunehena yinyengo. (Uso. 21:3, 4) Ha shimbu liacho, yuma yize yakutumwesa lamba ‘kutuchi kayiwuluka nawa.’ (Iza. 65:17) Alioze chipwe haliapwila, Yehova kakutufunga muze twakupalika mu lamba. Kakutwaha yuma yinji hanga atukwase ni kututakamisa. Kashika tayiza ukwaso wenyi, kanda uyambashana ngwe ‘iye kakukufunga.’—1 Petu. 5:7.