Kwata Yiyulo Kulita ni Yize Wafuliela

1. Mumu liaka Paulu anakawahilila ha kunyonga ha chize ambachile mwono wenyi?

POSTOLO Paulu kanyingikine ngwenyi, te kwasala hakehe mamushiha. Alioze, muze anyongene ha chize ambachile mwono wenyi, iye yawahilila chinji. Yamba ngwenyi: “Hinazomboka ndo ku songo, hinatwama kulita ni ufulielo.” (2 Timo. 4:6-8) Muze apwile Mukwa-Kristu, Paulu kakwachile yiyulo yipema; nawa kanyingikine ngwenyi, kevwishile Yehova kuwaha. Ni yetu nawa, tunazange kukwata yiyulo ya mana ni kupwa ni utayizo wa Yehova. Kuchi mutuhasa kuchilinga?

2. Yika Paulu azangile kwamba ha 2 A-Korindu. 5:7?

² Paulu kahanjikile hali iye mwene ni hali Akwa-Kristu akwo ashishika, ngwenyi: “Twakutwama kulita ni ufulielo hi kulita ni yize twakumona ko.” (2 Kori. 5:7) Yika azangile kwamba? Mu Mbimbiliya liji ‘kutwama,’ kanji-kanji liakutala ha yize mutu akusakula kulinga ku mwono wenyi. Atu waze keshi kufuliela muli Yehova, kakukwata yiyulo kulita ni yize akumona, yize akwivwa ni yize akunyonga. Alioze, mutu yoze wakufuliela muli Yehova, kakukwata yiyulo kulita ni yize iye akuzanga. Yitanga yenyi yakusolola ngwo, iye kali ni shindakenyo ngwenyi, Yehova mamukwasa kupwa ni mwono upema musono ni kumuwahisa kulutwe lia matangwa.—Samu 119:66; Hepre. 11:6.

3. Yiwape yika twakuzuka muze twakutwama kulita ni ufulielo? (2 A-Korindu 4:18)

³ Ha mashimbu amwe, muze yetu eswe tunambe kukwata yiyulo, twakujikijila ha yize tunamono, yize tunevu ni yize tunanyongo. Alioze nyi mutulihulikila wika ha yuma yino muze tunambe kukwata yiyulo yilemu, mutuhasa kupwa ni kapinda. Mumu liaka? Mumu kutwatambile mashimbu eswe kujikijila ha yize tunamono, yize tunevu ni yize tunanyongo. Nyi twalinga wika yuma kulita ni yize twakumona, ha shimbu lieswalio mutuhasa kukwata chiyulo chize Yehova keshi kuzanga. (Chilu. 11:9; Mateu 24:37-39) Alioze, nyi mututwama kulita ni ufulielo, mutukwata yiyulo yize muyivwisa Yehova kuwaha. (Efwe. 5:10) Chikwo nawa, kukaula yiyulo ya Zambi muchitukwasa kupwa ni sambukila ya ku mbunge ni uwahililo wamwenemwene. (Samu 16:8, 9; Iza. 48:17, 18) Nyi twanunga ni kutwama kulita ni ufulielo, mutukazuka mwono wa mutolo.—Tanga 2 A-Korindu 4:18.

4. Kuchi mutuhasa kunyingika nyi tunatwame kulita ni ufulielo hi kulita ko ni yize twakumona?

⁴ Kuchi mutuhasa kunyingika nyi tunatwame kulita ni ufulielo hi kulita ko ni yize twakumona? Twatamba kulihula ngwetu: ‘Ha yika nakulihulikila muze ngunambe kukwata chimwe chiyulo? Shina nakunyonga wika ha yuma yize nakumona? Nyi hanji nakukwata yiyulo kulita ni shimbi ja Yehova?’ Ha mutwe uno, mutumonaho chize mutuhasa kutwama kulita ni ufulielo ha yikuma yitatu yilemu: Muze mutufupa mulimo, muze tunambe kumbata ni muze mututambula usongwelo mu ululikiso wa Yehova. Ha hita chikuma, mutumona yize twatamba kulinga mba tukwate chiyulo chipema.

MUZE TUNAFUPU MULIMO

5. Ha yika kanji-kanji twakulihulikila muze tunafupu mulimo?

⁵ Yetu eswe tunazange kufunga asoko jetu ni kwaha yize anafupu ku musunya. (Chilu. 7:12; 1 Timo. 5:8) Ku milimo yimwe, kakufwetako mbongo jinji. Kashika, muchihasa kupwa chashi kulanda yuma yize tunafupu tangwa ha tangwa ni kutulika jimwe mbongo jize mujitukwasa kulutwe. Alioze ku milimo yikwo, fweto yakukumbana wika ha kulanda yuma yikehe yize asoko anafupu. Kwamba pundu, muze mutufupa mulimo, mutuhasa kunyonga wika ha mbongo jize matufwetako. Alioze, nyi mutunyonga wika ha chino, mututwama kulita ni yize tunamono.

6. Kuchi mutuhasa kutwama kulita ni ufulielo muze tunafupu mulimo? (A-Hepreu 13:5)

⁶ Nyi twakutwama kulita ni ufulielo, mutunyonga nawa ha chize mulimo twasakula muukwata ha usepa wetu ni Yehova. Mutuhasa kulihula ngwetu: ‘Shina mulimo uno muungutwala kulinga yuma yize Yehova keshi kuzanga?’ (Yishi. 6:16-19) ‘Muungutwala nguhone kukunguluka, kupwa ni mashimbu akehe a kwambujola hanji kulilongesa Mbimbiliya?’ ‘Shina muunguhandununa ni usoko wami ha matangwa anji?’ (Fwili. 1:10) Nyi wakumbulula ngwo ewa, ha chimwe cha ku yihula yino, muchilita kulituna mulimo wacho chipwe ngwe chili chikalu kuwana mulimo ukwo. Yetu twakutwama kulita ni ufulielo, kashika twakukwata yiyulo yize yakusolola ngwo, twakujikijila ngwetu Yehova matwaha yeswe yize tunafupu.—Mateu 6:33; tanga A-Hepreu 13:5.

7-8. Kuchi ndumbu Javier atwamine kulita ni ufulielo? (Tala nawa chizulie.)

⁷ Javier,a umwe ndumbu wa ku América do Sul, kanyingikine ulemu wa kutwama kulita ni ufulielo. Yamba ngwenyi: “Nawanyine mulimo ukwo uze te muungukwasa kuzuka mbongo jinji ni kupwa ni uwahililo.” Alioze, Javier kazangile nawa kupwa pionelu wa shimbu lieswe. Yamba nawa ngwenyi: “Kangusanyikine ku mulimo wacho hanga angwihujole, alioze muze te kanda achingwihujola, yingulemba kuli Yehova ni kwita ukwaso mumu nanyingikine ngwami, iye kananyingika yize yinangupemena. Nazangile kupwa ni mulimo upema uze mangufweta kanawa, alioze chakazangile hanga mulimo wacho ungukwike kulihana chinji mu mulimo wa Yehova.”

⁸ Javier yawezela ngwenyi: “Muze te anangwihujola, mwata wa mulimo yangulweza ngwenyi, ha yisuho yinji te mungukalakala chipwe ha maola waze hi a mulimo ko. Ni vumbi lieswe yingumulweza ngwami, chichi kuhasa kuchilinga mumu lia uwayilo wami.” Javier yalituna mulimo wacho, mba ha kupalika cha poso jaali yapwa pionelu wa shimbu lieswe. Muze kwapalikile amwe tukweji, iye yawana mulimo wa mashimbu akehe. Yamba nawa ngwenyi: “Yehova kevwile kulemba chami, nawa kangukwashile kuwana mulimo uze te muungukwasa kupwa pionelu. Nakuwahilila chinji ni mulimo uno, mumu wakungwaha mashimbu a kulingila Yehova ni mandumbu jami.”

9. Yika walilongesa ha chilweza cha Trésor?

⁹ Yika mutulinga nyi mutumona ngwetu, mulimo uze tuli nawo unatukwika kutwama kulita ni ufulielo? Tutalenu chilweza cha Trésor, umwe ndumbu yoze watwama mu República do Congo. Yamba ngwenyi: “Napwile ni mulimo uze atu eswe akuzanga kupwa nawo. Te kakungufweta mbongo jinji kuhiana ku mulimo wami utangu, nawa atu te kakunguvumbika.” Alioze ha mashimbu amwe, Trésor kakapwile ni kukunguluka mumu te kakukalakala chinji. Iye nawa kapwile ni kumushinjila hanga ahanjike mahuza ha kusweka yuma yipi yize atu apwile ni kulinga ku mulimo wacho. Trésor kazangile kukatuka ku mulimo, alioze kevwile woma ngwo, kechi kuhasa kuwana mulimo ukwo. Mba yika yamukwashile? Mwene ngwenyi: “Mukanda wa Habakuke 3:17-19, wangukwashile kunyingika ngwo, Yehova mangufunga chipwe ngwe mungwecha mulimo uno hanji munguzuka mbongo jikehe. Chocho, yingwita hanga ngukatuke ku mulimo wacho.” Trésor yalumbununa ngwenyi: “Miata anji a milimo kakunyonga ngwo, akwa-milimo jo mahasa kulinga yuma yeswayo hanga azuke mbongo jinji, kuchingako mashimbu waze akupalikisa ni asoko jo ni waze akusa hanga awayile Zambi. Nakuwahilila chinji mumu nahashile kufunga usepa wami ni Yehova. Ha kupalika cha mwaka umuwika, Yehova yangukwasa kupwa ni mulimo walita. Mbongo jize nakuzuka ku mulimo wacho, jakungukwasa kulisa asoko jami ni kupwa ni mashimbu akulingila Yehova.” Nyi twasa Yehova ha chihela chitangu ku mwono wetu, chipwe ngwe mutuhona mbongo, nihindu iye matufunga. Kashika nyi mutujikijila ha yiyulo ni yilakenyo ya Yehova, mutununga ni kutwama kulita ni ufulielo, chikwo nawa, iye matuwahisa.

MUZE TUNAFUPU YOZE MUTULIMBATA NENYI

10. Yika muyihasa kutwala umwe ndumbu kutwama kulita ni yize akumona muze mazanga kusakula yoze malimbata nenyi?

¹⁰ Ulo uli chawana cha kuli Yehova, kashika hi chipi ko kuzanga kumbata hanji kusomboka. Muze umwe ndumbu wa pwo anazange kusomboka, iye mahasa kulihulikila wika ha utu wa ndumbu, chifwa chenyi, lufuma, mbongo jize akwete, yiteli yize ali nayo mu usoko, nawa ni chize akumuvwisa kuwaha.b Yuma yino yeswe yili yilemu. Alioze nyi malihulikila wika ha yuma yacho, iye matwama kulita ni yize akumona.

11. Nyi tunazange kutwama kulita ni ufulielo, yika twatamba kulinga muze tunambe kusakula mutu yoze mutulimbata nenyi? (1 A-Korindu 7:39)

¹¹ Yehova kakuwahilila chinji muze akumona mandumbu a malunga ni a mapwo, makaula chiyulo chenyi muze anambe kusakula mutu yoze malimbata nenyi. Ngwe chilweza, ayo kakulemesa usongwelo wa kushimbwila ndo muze ‘hakola’ mba aputuke usendo. (1 Kori. 7:36) Ayo nawa kakusa shindakenyo ngwo, mutu yoze malimbata nenyi kali ni yitanga yize Yehova akwamba ngwenyi, muyimupwisa lunga hanji pwo mupema. (Yishi. 31:10-13, 26-28; Efwe. 5:33; 1 Timo. 5:8) Ayo keshi kulinga usendo ni mutu yoze hi Chela cha Yehova ko. Shimbu achilinge, kakukaula chiyulo cha kulimbata ‘wika muli Mwene’ chize chili ha 1 A-Korindu 7:39. (Tanga.) Ayo kakununga ni kutwama kulita ni ufulielo ni kujikijila muli Yehova ngwo, maaha ukwaso wa ku manyonga uze anafupu kuhiana mutu mweswawo.—Samu 55:22.

12. Yika walilongesa ha chilweza cha Rosa?

¹² Tutalenu yize yalingiwile kuli Rosa, umwe pionelu mu Colômbia. Ha mukunda wa mulimo wenyi, iye yanyingika umwe lunga hi Chela cha Yehova ko yoze wapwile ni kumuzanga. Rosa neye yaputuka kumuzanga. Yamba ngwenyi: “Kapwile ni kusoloka ngwe lunga mupema. Iye te kakukwasa atu, keshi kunwa makanya chipwe kunwa walwa unji. Chikwo nawa, te kakunguzanga chinji. Iye kapwile ni yitanga yize te nakushimbwila kuli lunga yoze mungulimbata nenyi, alioze kakapwile Chela cha Yehova.” Rosa yamba nawa ngwenyi: “Chapwile chikalu kumulweza ngwami, chazangile. Ha mashimbu jacho, napwile ni kulivwa ukawami, kashika nazangile chinji kuya ulo, alioze chakawanyine ndumbu yoze mungulimbata nenyi.” Chipwe chocho, Rosa kakechele hanga manyonga jacho amusongwele, nawa kakatwamine kulita ni yize akumona. Iye yasa mashimbu hanga anyonge ha chize usepa wenyi ni Yehova te muupwa nyi malinga usendo ni lunga wacho. Chocho, yakwata chiyulo cha kwecha kulikata nenyi, ni kulihulikila chinji ha yuma ya ku ufulielo. Yamusanyika ku Shikola ya Akwa-Kwambujola Wanangana, musono kanakalakala ngwe pionelu walipwila. Rosa yamba ngwenyi: “Mbunge yami yinazale too ni chiseke ni yiwape yize Yehova angwaha.” Kwamba pundu, hi chashi ko mashimbu eswe kutwama kulita ni ufulielo ha yikuma yize yakukwata ha manyonga jetu. Alioze, muze twakwecha hanga Yehova atusongwele twakuzuka yuma yipema ku mwono wetu.

MUZE MUTUTAMBULA USONGWELO MU ULULIKISO WA YEHOVA

13. Yika muyihasa kututwala tutwame kulita ni yize twakumona muze mututambula umwe usongwelo?

¹³ Kanji-kanji, twakutambula usongwelo weka ni weka mu ululikiso wa Yehova uze wakutukwasa kumuwayila mu jila yalita. Usongwelo wacho muuhasa kwiza kuli makulwana a mu chikungulwila, kuli kalayi wa mbonge, ku Mbetele hanji ku Chizavu cha Tusongo. Mba yika mutulinga nyi usongwelo wacho kuwatulumbunukine kanawa? Hanji mutuhasa kulihulikila wika ha kapinda yoze usongwelo wacho muuhasa kutunehena. Chikwo nawa, hanji mutuhasa kuputuka kulihulikila ha uhenge wa mandumbu waze atwaha usongwelo wacho. Kulinga yuma mu jila yino, muchisolola ngwo tunatwame kulita ni yize tunamono.

14. Yika muyitukwasa kutwama kulita ni ufulielo muze mututambula usongwelo mu ululikiso wa Yehova? (A-Hepreu 13:17)

¹⁴ Muze twakutwama kulita ni ufulielo, twakufuliela ngwetu, Yehova kanasongwela ululikiso wenyi, nawa kananyingika kanawa yeswe yize twakupalika kuhiana yetu ene. Kashika twakwononoka kawashi-washi ni kuchilinga ni nyonga lialita. (Tanga A-Hepreu 13:17.) Tunanyingika ngwetu muze twakwononoka, twakukwasa hanga chikungulwila chetu chipwe chalinunga. (Efwe. 4:2, 3) Chipwe ngwe mandumbu waze akutusongwela kali yihenge, nihindu tuli ni shindakenyo ngwetu nyi twononoka, Yehova matuwahisa. (1 Samue. 15:22) Chikwo nawa, twakufuliela ngwetu nyi Yehova mafupa kwalumuna yimwe, iye machilinga ha shimbu lialita.—Mika 7:7.

15-16. Yika yakwashile mandumbu kutwama kulita ni ufulielo chipwe ngwe kapwile ni kuyambashana ha usongwelo uze atambwile? (Tala nawa chizulie.)

¹⁵ Tutalenu chilweza chinasolola chize kutwama kulita ni ufulielo, ni kwononokena usongwelo wa mu ululikiso chakutuyukisa. Ku Peru, chipwe ngwe kakuhanjikako chinji Espanhol, nihindu atu anji kakuhanjika malimi akwo a mu chifuchi chacho. Limwe lia ku malimi jacho, lili Quéchua. Ha miaka yinji, mandumbu te kakufupa atu waze akuhanjika limi lia Quéchua mu njiza yo. Alioze mba akaule jimwe shimbi ja nguvulu, ululikiso yiwalumuna mutapu wa kufupilamo atu jacho. (Roma 13:1) Hachino, mandumbu amwe yaputuka kunyonga ngwo, kwalumuka chacho te muchipihisa mulimo wa kwambujola mu limi lia Quéchua. Alioze muze ayo ononokene usongwelo wacho, Yehova yawahisa mulimo wo wa kuwana atu waze akuhanjika limi lia Quéchua.

¹⁶ Kevin, umwe mukulwana wa mu chikungulwila cha limi lia Quéchua, kali umwe wa kuli waze apwile ni kulipikala. Yamba ngwenyi: “Napwile ni kulihula ngwami, ‘Haliapwila yika mutulinga mba tuwane atu waze akuhanjika Quéchua’?” Mba yika Kevin alingile? Iye yamba ngwenyi: “Napukwine ha Yishima 3:5 ni ha chilweza cha Mose. Yehova kahanyine usongwelo kuli Mose uze wasolokele ngwe kuwalitele. Muze A-Izalele te anatuhuka mu Engitu, Yehova yalweza Mose hanga aye no mu jila yize te muyaatwala ku Kalunga-lwiji Muchila. Chapwile ngwe kechi kuya nyikumwe, nawa te muchipwa chashi kwakwata kuli A-Engitu. Chipwe chocho, Mose yononoka mba Yehova yawahisa A-Izalele ha kwalamwina kupalikila mu chikomokeso.” (Kutuhu. 14:1, 2, 9-11, 21, 22) Chipwe ngwe kapwile ni kulipikala, nihindu Kevin yononokena usongwelo wacho. Mba yika yalingiwileko? Kevin yamba nawa ngwenyi: “Chapwile chipema kumona chize Yehova atuwahishile. Kunyima, te twakwenda mu njiza yeswe mba tuwane mutu umuwika hanji aali, alioze haliapwila twakuya wika ku yihela yize tunanyingika ngwetu, kuli atu waze akuhanjika limi lia Quéchua. Hachino, twakuhasa kuhanjika ni atu anji, kufuna ni kwameneka ni kusongwela malongeso a Mbimbiliya. Chikwo nawa, atu waze akwiza ku kukunguluka koka chinji.” Pundu lume, muze twakutwama kulita ni ufulielo, Yehova kakutuwahisa.

17. Yika twalilongesa ha mutwe uno?

¹⁷ Twamona chize mutuhasa kununga ni kutwama kulita ni ufulielo, ha kukwata yiyulo ha yikuma yitatu yilemu. Alioze twatamba kununga ni kutwama kulita ni ufulielo mu yuma yeswe ya ku mwono wetu, ngwe muze mutusakula yinema yize mututala, chize mutukalakalisa mashimbu jetu, chize mutulela ana jetu ni kumona nyi mutuya ku shikola yinene nyi ka. Chiyulo cheswacho mutukwata ku mwono wetu, kutwatambile wika kulikwachilila ha yize twakumona, alioze twatamba nawa kunyonga ha usepa wetu ni Yehova, ha shimbi jenyi ni ha chilakenyo chenyi cha kutufunga. Nyi twachilinga, “mutwenda mu jina lia Yehova Zambi yetu ku miaka yeswe ya mutolo.”—Mika 4:5.