MUTWE WA KULILONGESA 14
MWASO 8 Yehova Iye Uchinyino Wetu
“Sakulenu . . . Yoze Munuwayila”
“Yami ni akwa-zuwo liami mutuwayila Yehova.”—YOSHU. 24:15.
YIZE MUTULILONGESA
Mutumona yuma yize yatutwalile kusakula kuwayila Yehova.
1. Yika twatamba kulinga mba tupwe ni uwahililo wamwenemwene, mumu liaka? (Izaia 48:17, 18)
TATA yetu wa mu malilu Yehova, kakutuzanga chinji, nawa kanazange hanga tupwe ni mwono upema haliapwila ni kulutwe lia matangwa. (Chilu. 3:12, 13) Yehova katuhele umwe utotombo, alioze kakatuhele uhashi wa kuliyula yetu ene hanji wa kutesa chipi ni chipema. (Chilu. 8:9; Jere. 10:23) Iye kananyingika ngwenyi, mba tupwe ni uwahililo wamwenemwene, twatamba kumuwayila ni kumwononokena.—Tanga Izaia 48:17, 18.
2. Yika Satana anazange hanga tutayize, mba yika Yehova analingi ha chikuma chino?
2 Satana kanazange hanga tutayize ngwetu, mutuhasa kuwahilila chipwe ngwe kutushi ni ukwaso wa Yehova; nawa ngwo atu mahasa kutwama kanawa nyi maliyula ene. (Uputu. 3:4, 5) Mba asolole ngwo Satana kali mukwa-mahuza, Yehova yecha hanga atu aliyule ene ha amwe mashimbu. Muze twakumona chize yuma yinapihia hano hashi, chakusoloka zwalala ngwo atu keshi kuhasa kuliyula ene. Chipwe chocho, Mbimbiliya yakuhanjika hali malunga ni mapwo waze apwile ni uwahililo mumu lia kusakula kulingila Yehova. Hakachi ko, Yesu mwe wawahililile chinji. Ha mutwe uno, mutumonaho mumu liaka Yesu asakwile kuwayila Yehova; mutumona nawa mumu liaka Yehova anatela uwayilo wetu. Kusulaho, mutuliulula yuma yimwe yize yatutwalile kusakula kuwayila Yehova.
MUMU LIAKA YESU ASAKWILE KUWAYILA YEHOVA?
3. Yika Satana azangile kuhana kuli Yesu, mba yika Yesu asakwile kulinga?
3 Muze Yesu apwile hano hashi, iye katambile kusakula yoze mawayila. Muze te hamupapachisa, ha kupalika cha mashimbu akehe, Satana yamusolwela mawanangana eswe a hashi ni kumulweza ngwenyi, mungukwaha yuma yeswayi nyi munguwayila. Yesu yakumbulula ngwenyi: “Katuka, Satana! Mumu chinasonewa ngwo: ‘Wayila Yehova Zambi ye, iye wika watamba kulingila.” (Mateu 4:8-10) Mumu liaka Yesu akwachile chiyulo chino? Tutalenu yize yamutwalile kuchilinga.
4-5. Yuma yika yatwalile Yesu kusakula kuwayila Yehova?
4 Chuma chilemu chize chatwalile Yesu kusakula kuwayila Yehova, chili zango—zango linji lize apwile nalio hali Tato. (Yoa. 14:31) Chikwo nawa, Yesu kakuwayila Yehova mumu che chuma chalita kulinga. (Yoa. 8:28, 29; Uso. 4:11) Iye kanyingikine ngwenyi, Yehova kali Chishina cha mwono, kali chihanyi nawa mahasa kumujikijila. (Samu 33:4; 36:9; Tia. 1:17) Yehova kapwile ni kuhanjika umwenemwene kuli Yesu mashimbu eswe, ni kumwaha yuma yeswe yize apwile nayo. (Yoa. 1:14) Alioze Satana kalisa ni Yehova. Iye mwe watunehenene shili ni kufwa. Kali mukwa-mahuza; chikwo nawa, yuma yeswe yize akulinga yakukatuka ha chipululu ni kuzo. (Yoa. 8:44) Yesu te kanyingika kanawa Yehova ni Satana, kashika kakazangile kupwa ngwe Satana hanga ehuke Yehova.—Fwili. 2:5-8.
5 Chuma chikwo chize chatwalile Yesu kusakula kulingila Yehova, chapwile kunyingika ngwenyi ushishiko wenyi te muuneha yuma yinji yipema. (Hepre. 12:2) Iye kanyingikine ngwenyi, nyi te manunga ni kushishika, mapemesa lufuma wa jina lia Tato ni kukwasa kuhwisa lamba lize liakwiza ku yitanga ya Ndiapu.
MUMU LIAKA YEHOVA ATELA UWAYILO WETU?
6-7. Mumu liaka atu anji musono keshi kuwayila Yehova, mba mumu liaka Yehova atela kumuwayila?
6 Atu anji musono, keshi kuwayila Yehova mumu kanda achinyingika yitanga yenyi ya kukomwesa ni yuma yeswe yipema yize akwalingila. Atu wano kanalifu ni waze Paulu ambulwilile sango jipema mu Atene, waze te kanda achinyingika Zambi.—Yili. 17:19, 20, 30, 34.
7 Paulu yalumbununa kuli Akwa-Atene ngwenyi: “Kakuhana kuli eswe mwono, ni mwiku, ni yuma yeswe.” Yamba nawa ngwenyi: “Mumu muli iye tuli ni mwono, muli iye twakwenda, muli iye tuli hano.” Zambi kali Sakatanga yoze “watangile mavungu eswe a hashi kupalikila muli mutu umuwika.” Kashika katela kumuwayila.—Yili. 17:25, 26, 28.
8. Yika Yehova keshi kulinga, nawa kuchi akusolola ngwo kakutuzanga?
8 Amu Yehova ali Sakatanga wa malilu ni hashi, iye kachi kakushinjila atu hanga amuwayile. Alioze, keshi kuchilinga. Shimbu achilinge, yitanga yenyi yakusolola ngwo, iye kwatwama nawa kakuzanga umwe ni umwe wa kuli yetu. Yehova kanazange hanga atu anji apwe masepa jenyi ku miaka yeswe. (1 Timo. 2:3, 4) Kashika akutufumba hanga tulongese akwetu upale wenyi ni yuma yipema yize makatulingila kulutwe lia matangwa. (Mateu 10:11-13; 28:19, 20) Iye hanalulieka yikungulwila ni kutwaha tulayi hanga atufunge.—Yili. 20:28.
9. Yika yakusolola ngwo Yehova kakutuzanga?
9 Yehova kakusolola zango lienyi ha kuhana yuma yipema chipwe kuli waze keshi kutayiza ngwo, iye kwatwama. Ngwe chilweza, ha miaka yinji, atu anji kakusakula kutwama kulita ni yize ene akumona ngwo, yili yipema hanji yipi, shimbu asakule kwononokena Yehova. Chipwe chocho, Yehova ni zango lieswe, kakwaha yuma yize akufupa hanga anunge ni mwono ni kuwahilila. (Mateu 5:44, 45; Yili. 14:16, 17) Iye nawa kaahele uhashi wa kupwa ni masepa, kufunga asoko jo ni kuwahilila ni yiwape ya kuhondangana cho. (Samu 127:3; Chilu. 2:24) Yuma yino yinasolola pundu ngwo, Yehova kakuzanga atu eswe. (Kutuhu. 34:6) Haliapwila, tutalenu yuma yize yatutwalile kusakula kuwayila Yehova ni chize iye akutuwahisa ha kuchilinga.
MUMU LIAKA TWAKUSAKULA KUWAYILA YEHOVA?
10. (a) Chuma chika chitangu chize chakututwala hanga tuwayile Yehova? (Mateu 22:37) (b) Kuchi wakwivwa ha kunyingika ngwo Yehova kakulihumikiza ni kutukonekena? (Samu 103:13, 14)
10 Chizechene ngwe Yesu, zango che chuma chitangu chize chakututwala kuwayila Yehova. (Tanga Mateu 22:37.) Kulilongesa chinji hakutwala ku yitanga ya Yehova, chakutukwasa hanga tuzange kupwa masepa jenyi. Ngwe chilweza, tuhengwolenu hakutwala ku uhumikizo wa Yehova. Muze A-Izalele ahonene kumwononokena, Yehova yaalweza ngwenyi: ‘Alumukenu mutu mweswe ku ndako jenyi jipi.’ (Jere. 18:11) Yino yinasolola ngwo, Yehova kananyingika ngwenyi tuli fufuta. (Tanga Samu 103:13, 14.) Muze twakupukuna ha uhumikizo, ukonekeno ni yitanga yipema ya Yehova, chino chakututwala hanga tuzange kumulingila ku miaka yeswe.
11. Yuma yikwo yika yize yakututwala kuwayila Yehova?
11 Twakuwayila nawa Yehova, mumu chili chuma chalita kulinga. (Mateu 4:10) Tunanyingika nawa ngwetu, kushishika kuli Yehova muchitukwasa kuzuka yuma yinji yipema. Muze twakuwayila Yehova ni ushishiko, twakupemesa lufuma wa jina lienyi, twakusolola ngwetu Satana kali mukwa-mahuza ni kuvwisa Tata yetu kuwaha. Chikwo nawa, nyi twasakula kuwayila Yehova musono, mutupwa ni kutalatala cha kumuwayila ku miaka yeswe!—Yoa. 17:3.
12-13. Yika twalilongesa ha chilweza cha Jane ni Pam?
12 Chipwe twanuke no mahasa kuzanga chinji Yehova. Chikwo nawa, zango liacho mulinunga ni kwoka ha kupalika cha mashimbu. Tutalenu yize yalingiwile kuli Jane ni Pam.a Ayo kaputukile kulilongesa umwenemwene, muze Jane te ali ni miaka 11, Pam ni miaka 10. Yisemi jo kakazangile kulilongesa Mbimbiliya, alioze yatayiza hanga Jane ni Pam alilongese. Chipwe chocho ku songo lia poso, ayo te katamba kuya ku yingeleja yo. Jane yamba ngwenyi: “Yize Yela ja Yehova angulongesele yangukwashile nguhone kulinga yuma yize alongi-ni-akwetu apwile ni kulinga ku shikola ngwe, kunwa makanya ni kulinga yuma ya upangala.”
13 Ha kupalika cha yimwe miaka, Jane ni Pam yapwa akwa-kwambujola, kulutwe yapwa mapionelu. Chipwe chocho, kakufunga yisemi jo waze hapwa tushinakaji. Muze akunyonga ha yize yeswe Yehova aalingilile, Jane yamba ngwenyi: “Nahasa kumona ni meso jami chize Yehova akufunga masepa jenyi. Chikwo nawa, ngwe chize mukanda 2 Timoteu 2:19 wakwamba, ‘Yehova kananyingika atu jenyi.’” Tuli ni shindakenyo ngwetu, mashimbu eswe Yehova manunga ni kufunga waze akusakula kumuzanga ni kumuwayila!
14. Kuchi maliji ni yitanga yetu muyihasa kupemesa lufuma wa jina lia Yehova? (Tala nawa yizulie.)
14 Tunazange kupemesa lufuma wa jina lia Yehova ku mahuza eswe waze akuhanjika hali Iye. Tuchinyongenu ngwe ukwete umwe sepa wa mbunge yipema, chihanyi nawa wa kukonekena akwo. Mba tangwa limwe, muwivwa ngwo kali mutu mupi nawa ngwo keshi kuhanjika umwenemwene. Yika mulinga? Mwosa tachi hanga umukalile. Chizechene nawa, Satana ni waze akumukwasa kakwamba yuma ya saki hanga apihise lufuma wa jina lia Yehova. Alioze, yetu twakulinga yeswe yize mutuhasa hanga tukalile lufuma wenyi ni kuhanjika umwenemwene hakutwala kuli Iye. (Samu 34:1; Iza. 43:10) Twakusolola ngwetu, tunazange kuwayila Yehova ni mbunge yetu yeswe ha yize twakuhanjika ni yize twakulinga.
Shina mununga ni kukalila jina lia Yehova? (Tala paragrafu 14)b
15. Yika postolo Paulu azukile ha kwalumuna mwono wenyi? (A-Fwilipu 3:7, 8)
15 Twakuwahilila chinji ha kwalumuna mwono wetu hanga tulingile Yehova ni kumuvwisa kuwaha. Ngwe chilweza, Paulu kapwile ni chiteli chinene mukachi ka A-Yunda, chipwe chocho yachihichika ni kupwa kambaji ka Yesu ni kuwayila Yehova. (Ngala. 1:14) Hakulinga chino, iye yazuka yuma yipema mu mulimo wa Yehova ni kutambula chiwape cha kuyula ni Yesu mu malilu. Paulu kakalisehele ha chiyulo chize akwachile cha kuwayila Yehova, ni yetu kutuchi kaliseha.—Tanga A-Fwilipu 3:7, 8.
16. Yika twalilongesa ha chilweza cha ndumbu Julia? (Tala nawa yizulie.)
16 Nyi twasa mulimo wa Yehova ha chihela chitangu ku mwono wetu, iye matuwahisa haliapwila ni kulutwe lia matangwa. Tutalenu chilweza cha ndumbu Julia. Muze apwile kanuke, iye te kakwimba mu chimwe chizavu mu yingeleja. Mumu lia kwimba kanawa, yaputuka kumufumba hanga apwe ngimba munene. Chipwe ngwe kapwile kanuke, atu anji yamunyingika mumu lia kwimba kanawa, chocho yaputuka kwimbila mu yihela ya lufuma. Muze te analilongesa ku shikola ya lufuma yize yakulongesa kwimba, umwe longi-ni-mukwo yaputuka kuhanjika nenyi hakutwala kuli Zambi ni kumulumbunwina ngwo, Zambi kakwete jina, Yehova. Ha kupalika cha amwe mashimbu, Julia yaputuka kulilongesa Mbimbiliya kaali ha poso. Chocho, yasakula kuwayila Yehova shimbu apwe mukwa-kwimba wa lufuma. Kukwata chiyulo chacho kuchakapwile chashi. Mwene yamba ngwenyi: “Atu anji kapwile ni kungulweza ngwo, napihisa utotombo wami wa kwimba, alioze yami nazangile kuhana mwono wami weswe kuli Yehova.” Chize haze Julia akwachile chiyulo chino, hikwapalika miaka 30. Mba kuchi akulivwa? Mwene yawezela ngwenyi: “Nakuwahilila chinji mumu lia kusakula kuwayila Yehova. Kashika nguli ni shindakenyo ngwami, kulutwe lia matangwa, Yehova makayukisa usona weswe wa ku mbunge yami.”—Samu 145:16.
Twakuwahilila chinji muze twakusa uwayilo wetu kuli Yehova ha chihela chitangu (Tala paragrafu 16)c
NUNGA NI KUWAYILA YEHOVA
17. (a) Yika waze keshi kuwayila Yehova atamba kulinga, mumu liaka? (b) Shindakenyo yika ali nayo waze asakwile kuwayila Yehova?
17 Tuli ku songo lia chifuchi chino chipi. Postolo Paulu kasonekene ngwenyi: “Shimbu likehe liasalako, yoze uneza kumaheta, kechi kalaluka.” (Hepre. 10:37) Yika maliji wano analumbunuka? Kanalumbunuka ngwo, kwasala mashimbu akehe waze atu atamba kusakula nyi mawayila Yehova nyi ka. (1 Kori. 7:29) Alioze, yetu waze hitunasakula kuwayila Yehova, tunanyingika ngwetu mutuhasa kupalika mu yipikalo, chipwe chocho, muyipwa wika ya ‘mashimbu akehe.’
18. Yika Yesu ni Yehova anatukolweza kulinga?
18 Yesu kakolwezele atu hanga apwe tumbaji twenyi ni kununga ni kumukaula. (Mateu 16:24) Nyi wakuyila Yehova ha miaka yinji, kanda ulitwamina; nunga ni kuchilinga. Yetu eswe twatamba kusa tachi hanga tununge ni kuwayila Yehova. Hanji kuchichi kupwa chashi kuchilinga, alioze nyi twachilinga, muchitunehena yiwape yinji kukatuka haliapwila.—Samu 35:27.
19. Yika twalilongesa ha chilweza cha Gene?
19 Atu anji kakunyonga ngwo, nyi mawayila Yehova kechi kulivwisa kuwaha ku mwono. Nyi uli mukweze, shina wakunyonga ngwo, kuwayila Yehova chakukalisa mwono we? Umwe mukweze avuluka ngwo Gene, yamba ngwenyi: “Yami napwile ni kunyonga ngwami, kupwa Chela cha Yehova chinangukwika kulinga yuma yinji ku mwono wami. Chapwile ni kusoloka ngwe alongi-ni-akwetu, kanalivwisa chinji kuwaha ku mwono ha kuya ha yiwanyino, kupwa ni tusendo ni kuheha yiheho yize yapwile ni kusolola yuma ya upupilo. Yami te nakuya wika ku kukunguluka ni mu munda.” Kuchi manyonga wano akwachile ku mwono wa Gene? Yamba ngwenyi: “Yinguputuka kulinga yuma yipi ku usweke ni kumona ngwami yili yipema. Alioze chakayilingile ha mashimbu anji, mumu te chishi kupwa ni uwahililo wamwenemwene. Yinguputuka kunyonga ha shimbi ja mu Mbimbiliya jize nehukile, chocho yingukwata chiyulo cha kufuna ni kuwayila Yehova ni mbunge yami yeswe. Kukatuka ha shimbu liacho, yinguputuka kumona chize Yehova akukumbulula yilemba yami.”
20. Nyonga lika twatamba kupwa nalio?
20 Umwe mukwa-kwimba masamu yamba ngwenyi: “Kawaha yoze hiwamutongola yena ni kumukundamisa kuli yena, akatwame mu yiize ye.” (Samu 65:4) Tunazange kununga ni kupwa ni nyonga ngwe lia Yoshua, yoze wambile ngwenyi: “Yami ni akwa-zuwo liami mutuwayila Yehova.”—Yoshu. 24:15.
MWASO 28 Kupwa Sepa lia Yehova
a Majina amwe kapwa kwalumuna.
b ULUMBUNWISO WA YIZULIE: Hanyima lia kupalika chizavu cha atu waze akulimika ni yetu hakamwihi ni chihela chakulingila kukunguluka cha mambonge, umwe pwo yakundama ku temba lia mikanda hanga apanjike umwenemwene.
c ULUMBUNWISO WA CHIZULIE: Chizulie chino chinasolola yize Julia alingile hanga alihane chinji mu mulimo wa Yehova.