MUTWE WA KULILONGESA 17
MWASO 99 Tununu Anji a Mandumbu
Kutushi Ukawetu
“Kumungukukwasa.”—IZA. 41:10.
YIZE MUTULILONGESA
Mutumona chize Yehova akutukwasa kupalikila mu majila awana.
1-2. (a) Mumu liaka mutuhasa kwamba ngwetu kutuchi keza kapwa ukawetu muze mutupalika mu yipikalo? (b) Yika mutumona ha mutwe uno?
MUZE tunapalika mu yipikalo yinji, mutuhasa kulivwa ukawetu ngwe mutu yoze watoka mu mushitu unene. Alioze umwenemwene uli ngwo, kutushi ukawetu. Tata yetu wa zango Yehova, kakumona yipikalo yize tunapalika. Chikwo nawa, kakutukwasa hanga tuyikumbe. Kashika analakenya ngwenyi: “Kumungukutakamisa.”—Iza. 41:10.
2 Ha mutwe uno, mutumonaho chize Yehova akutukwasa kupalikila mu majila awana. (1) Iye kakutusongwela, (2) kakutwaha yize tunafupu, (3) kakutufunga, ni (4) kakututakamisa. Yehova kanalakenya ngwenyi, chipwe ngwe mutupalika mu lamba lieswalio, nihindu kechi keza katuvulama nilimwe tangwa. Chikwo nawa, kechi keza katuhichika ukawetu. Maliji wano kanatukwasa kunyingika ngwo, kutushi ukawetu, Yehova kali hamwe ni yetu.
YEHOVA KAKUTUSONGWELA
3-4. Kuchi Yehova akutusongwela? (Samu 48:14)
3 Tanga Samu 48:14. Yehova kakutusongwela mumu kananyingika ngwenyi, kutuchi kuhasa kulisongwela ukawetu. Kuchi akuchilinga? Jila yimwe yili ha kutwaha Mbimbiliya. (Samu 119:105) Kupalikila mu Liji lienyi, iye kakutulongesa chize mutukwata yiyulo yipema, chize mutupwa ni yitanga yize muyitukwasa kuwahilila musono, ni chize mutukazuka mwono wa mutolo kulutwe lia matangwa.a Ngwe chilweza, iye kakutulongesa hanga tuhone kufungila akwetu toto, kuhanjika umwenemwene mu yuma yeswe ni kuzanga akwetu ni mbunge yeswe. (Samu 37:8; Hepre. 13:18; 1 Petu. 1:22) Muze twakuchilinga, twakupwa yisemi, malunga ni mapwo apema, ni kupwa nawa masepa apema.
4 Chikwo nawa, Yehova kasele mu Mbimbiliya yuma yize amwe tuvumbi twenyi apalikile kunyima, yinalifu ni yize yetu tunapalika musono. (1 Kori. 10:13; Tia. 5:17) Nyi twatanga sango jacho ni kukaula malongeso waze twawanaho, mutuyuka mu majila aali. Yitangu, mutunyingika ngwetu hi yetu wika ko tunapalika mu kapinda, kuli akwetu akwo waze apalikile mu kapinda wacho, mba Yehova yaakwasa kunyongonona. (1 Petu. 5:9) Yamuchiali, mutunyingika chize mutuhasa kukumba yipikalo yize tunapalika musono.—Roma 15:4.
5. Yehova kakutusongwela nawa kupalikila muli aya?
5 Yehova kakutusongwela nawa kupalikila muli mandumbu jetu a malunga ni a mapwo.b Ngwe chilweza, tulayi a mbonge kakumeneka yikungulwila mashimbu eswe hanga atutakamise. Pande jize akuhanjika, jakukolesa ufulielo wetu ni kutukwasa hanga tufunge kulinunga chetu. (Yili. 15:40–16:5) Makulwana a mu chikungulwila no, kakusa tachi jinji hanga akwase akwa-kwambujola eswe anunge ni kukolesa ufulielo wo. (1 Petu. 5:2, 3) Yisemi, kakulongesa ana jo hanga azange Yehova, akwate yiyulo ya mana ni kupwa ni yitanga yipema. (Yishi. 22:6) Mandumbu a mapwo waze ajama ku ufulielo, kakukwasa mandumbu a mapwo akweze kupalikila mu yilweza yo, kwaha yiyulo yipema ni kwatakamisa.—Titu 2:3-5.
6. Yika twatamba kulinga mba tuyuke ha usongwelo wa Yehova?
6 Yehova kakutwaha usongwelo weswawo mutufupa. Mba kuchi mutuhasa kusolola usakwililo wetu ha usongwelo weswe uze twakutambula? Yishima 3:5, 6, unambe ngwo: “Fuliela Yehova ni mbunge ye yeswe; kanda ukajikijila ha malinjekela ja yena mwene.” Nyi twachilinga, ‘iye malulamisa majila jetu,’ chekwamba, matukwasa kwehuka milonga yinji ni kupwa ni uwahililo. Twakusakwilila chinji ha chize Yehova ananyingika umwe ni umwe wa kuli yetu ni ha usongwelo wa zango uze akutwaha!—Samu 32:8.
YEHOVA KAKUTWAHA YIZE TUNAFUPU
7. Kuchi Yehova akutwaha yize tunafupu ku musunya? (A-Fwilipu 4:19)
7 Tanga A-Fwilipu 4:19. Kuchizako kutusongwela ku ufulielo, Yehova kakutwaha yize tunafupu ku musunya. Kuchi akuchilinga? Kakuchilinga ha kuwahisa tachi jize twakusa hanga tupwe ni yize mutulia, yize mutuzala ni chihela chize mututwama. (Mateu 6:33; 2 Tesa. 3:12) Kulihulumba hakutwala ku yuma yino, hi chipi ko. Alioze Yehova kanatulweze ngwenyi, kutwatambile kulipikala chinji ni yuma yacho. (Tala nota ya estudo ha Mateu 6:25.) Mumu liaka? Mumu Yehova kechi keza kehuka tuvumbi twenyi ashishika muze mafupa ukwaso wenyi. (Mateu 6:8; Hepre. 13:5) Kashika, mutuhasa kujikijila pundu ha maliji jenyi muze akwamba ngwenyi, matwaha yize mutufupa.
8. Yika Yehova alingilile Ndawichi?
8 Tutalenu chize Yehova akwashile Ndawichi. Iye kapwile ni kuchina Mwanangana Saulu ha miaka yinji. Ha mashimbu jacho akalu, Yehova yakwasa Ndawichi ni atu jenyi ha yize apwile ni kufupa hanga anunge ni mwono. Muze anyongene ha chize Yehova amukwashile ha miaka yino yeswe, Ndawichi yasoneka ngwenyi: ‘Napwile mukweze, haliapwila nguli mukulwana, nihindu chamwene mukwa-ululi kanamwehuka, hanji munyachi wenyi muufupafupa ya kulia.’ (Samu 37:25) Kota ni yena hiunamono zango lia Yehova muze akukwashile hanji muze akwashile mandumbu waze te anapalika mu yipikalo.
9. Kuchi Yehova akukwasa atu jenyi musono muze mapalika mu umwe luyinda wa chisemewa? (Tala nawa yizulie.)
9 Yehova kakutwaha nawa yize tunafupu, muze mukulingiwa luyinda wa chisemewa hanji kakundukundu. Ngwe chilweza, ku sekulu yitangu muze kwasolokele umwe kapunga wa zala mu Yerusaleme, Akwa-Kristu a ku yihela yeka ni yeka, yatumina mandumbu jo ukwaso. (Yili. 11:27-30; Roma 15:25, 26) Ni musono nawa, tuvumbi twa Yehova kakusolola chitanga chino, ha kukwasa akwo waze anafupu ukwaso. Muze kwakulingiwa luyinda wa chisemewa, kupalikila muli mandumbu jetu, Yehova kakuhana kulia, meya, mazalo ni yitumbo kuli waze apalika mu luyinda wacho. Yizavu ya mandumbu waze akutunga, kakuya ni kululieka mazuwo ja mandumbu ni Mazuwo a Wanangana waze apihia ku chihela chacho. Chikwo nawa, tuvumbi twa Yehova keshi kushimbula ha kukwasa ku manyonga ni ku spiritu, atu waze atokesa yikumba ni kufwisa asoko jo.c
Kuchi Yehova akutufunga muze tunapalika mu luyinda wa chisemewa? (Tala paragrafu 9)e
10-11. Yika walilongesa ha chilweza cha Borys?
10 Yehova kapwa chinji chihanyi, kashika akukwasa chipwe atu waze keshi kumulingila. Ha kwimbulula chilweza chenyi, yetu twakufupa uhashi wa kusolola utu ha kukwasa atu waze hi mandumbu jetu ko. (Ngala. 6:10) Kanji-kanji, ukwaso uno wakuhana uchela upema. Tutalenu yize yalingiwile kuli Borys, kasongo wa yimwe shikola ku Ucrânia. Chipwe ngwe iye te hi Chela cha Yehova ko, nihindu kapwile ni kukwasa alongi Yela ja Yehova ni kuvumbika yize afuliela. Muze Borys akatukile ku chihela kuze kwapwile jita ni kuya kuze te kukushi jita, mandumbu jetu yamutambula kanawa ni kumukwasa. Ha kupalika cha amwe mashimbu, yaya ha Chiwanyino cha Kwiuluka Kufwa cha Yesu. Ha kunyonga ha yeswe yize mandumbu amulingilile, Borys yamba ngwenyi: “Yela ja Yehova kamwene yize te ngunapalika, chocho yangukwasa. Chuma mungulinga wika chili kwasakwilila.”
11 Ni yetu nawa, mutuhasa kwimbulula keke ya Yehova ha kusolola zango kuli atu waze anafupu ukwaso, apwe mandumbu jetu hanji ka. (Luka 6:31, 36) Tunazange hanga yitanga yetu ya zango, yikwase atu akundame kuli Zambi yetu. (1 Petu. 2:12) Alioze, chipwe ngwe o masakula kuwayila Yehova hanji ka, nihindu yetu mutuwahilila mumu Mbimbiliya yakwamba ngwo: “Kuhana chakuneha uwahililo unji.”—Yili. 20:35.
YEHOVA KAKUTUFUNGA
12. Ufunge uka Yehova analakenya kuli tuvumbi twenyi ngwe chizavu? (Samu 91:1, 2, 14)
12 Tanga Samu 91:1, 2, 14. Musono, Yehova kanalakenya kufunga atu jenyi ku ufulielo. Yehova kechi keza kecha Satana hanga apihise uwayilo wamwenemwene. (Yoa. 17:15) Kashika mutuhasa kupwa ni shindakenyo ngwetu, ha mashimbu a “luyinda munene,” Yehova makamanununa chilakenyo chenyi cha kufunga tuvumbi twenyi, hi wika ko ku ufulielo alioze ni ku musunya.—Uso. 7:9, 14.
13. Kuchi Yehova akufunga umwe ni umwe wa kuli tuvumbi twenyi?
13 Kuchi Yehova akufunga umwe ni umwe wa kuli tuvumbi twenyi? Kupalikila mu Mbimbiliya, Yehova kakutukwasa kunyingika kalisa watwama hakachi ka chipi ni chipema. (Hepre. 5:14) Kukaula yikota ya shimbi yize yinakatuka mu Mbimbiliya, chakutufunga ku spiritu ni ku musunya. (Samu 91:4) Yehova kakutufunga nawa kupalikila mu chikungulwila. (Iza. 32:1, 2) Mandumbu jetu kakuzanga Yehova ni kumwononokena. Kupwa no ha kukunguluka, mu mulimo wa kwambujola ni ha yiheho, chakututakamisa ni kutukwasa hanga twehuke yitanga yipi ya hano hashi.—Yishi. 13:20.
14. (a) Mumu liaka Yehova akwecha hanga tuvumbi twenyi amone lamba? (b) Shindakenyo yika tunawane ha Samu 9:10? (Tala nawa majili mushi lia lifwo.)
14 Ku shakulu, Yehova kafungile amwe tuvumbi twenyi ku musunya. Alioze ha yisuho yimwe kakachilingile. Mbimbiliya yakulongesa ngwo, yetu eswe mutuhasa kupalika mu lamba lize liakwiza susumuku. (Chilu. 9:11) Chikwo nawa, Yehova kechele amwe tuvumbi twenyi apalike mu yihungumiona ni kwashiha hanga yino yisolole ngwo, Satana kali mukwa-mahuza. (Yombi 2:4-6; Mateu 23:34) Yino ye yakulingiwa ni musono. Chipwe ngwe Yehova kechi kuchiza lamba lietu lieswe, nihindu Mbimbiliya yinatwehe shindakenyo ngwo, iye kechi kwehuka atu waze akumuzanga.d—Samu 9:10.
YEHOVA KAKUTUTAKAMISA
15. Kuchi Yehova akututakamisa kupalikila mu yilemba, Liji lienyi ni ha kukunguluka? (2 A-Korindu 1:3, 4)
15 Tanga 2 A-Korindu 1:3, 4. Ha mashimbu amwe, twakwivwa yikola ha kufwisa mutu yoze twazanga hanji kupalika mu yuma yize yakutusakalalisa. Ha mashimbu wano, hanji unapalika mu yuma yize yinakutwale ulivwe ukawe. Shina kuli umwe yoze unanyingika chize unalivu? Ewa, Yehova kananyingika. Iye keshi kumona wika yikola yize unevu, alioze kanazange nawa ‘kukutakamisa mu lamba lie lieswe.’ Kuchi akuchilinga? Muze twakulemba kuli Yehova ni kwita ukwaso wenyi, iye kakutwaha “sambukila ya Zambi yize yahiana kunyonga cheswe.” (Fwili. 4:6, 7) Chikwo nawa, twakuwana utakamiso muze twakutanga Liji lienyi. Mbimbiliya yakusolola zango ni mana a Yehova, ni kutwaha kutalatala chingunu cha kulutwe lia matangwa. Kupalikila ha kukunguluka, twakumona zango lia mandumbu jetu ni kuwana utakamiso ha yize twakulilongesa mu Mbimbiliya.
16. Yika twalilongesa ha chilweza cha Nathan ni Priscilla?
16 Tutalenu yize yalingiwile kuli Nathan ni Priscilla, a ku Estados Unidos. Chilweza cho chinasolola ngwo, Yehova kakututakamisa ni kutukolweza kupalikila mu Mbimbiliya. Ha yimwe miaka kunyima, ayo kakwachile chiyulo cha kuya kuze te kunafupiwa akwa-kwambujola. Nathan yamba ngwenyi: “Twapwile ni shindakenyo ngwetu, Yehova mawahisa tachi jetu.” Alioze muze ahetele ku chihela chacho, yaputuka kupalika mu kapinda wa misongo ni kuhona mbongo. Ha kupalika cha mashimbu, o yafuna ku mahio, chipwe chocho kapinda wa mbongo yanunga. Ha kwiuluka yize yalingiwileko, Nathan yamba ngwenyi: “Yehova kakatuwahishile mu mutapu uze te tunashimbwila, kashika napwile ni kulihula ngwami, ‘Mumu liaka yino yinalingiwa?’ ‘Shina nalingile chimwe chuma chipi?” Alioze kulutwe, Nathan ni Priscilla yanyingika ngwo, Yehova kakaehukile muze te anamufupu. Yamba nawa ngwenyi: “Ha mashimbu jacho akalu, Mbimbiliya yapwile ngwe sepa lietu yoze wapwile ni kutwaha yiyulo ya mana ni kututakamisa. Shimbu tulihulikile ha yipikalo yize twapwile ni kupalika, yituputuka kulihulikila ha chize Yehova te anatukwasa. Yino yiyitwaha shindakenyo ngwetu, Yehova manunga ni kutukwasa ha yipikalo yeswayo mutupalika kulutwe.”
17. Kuchi Yehova atakamishine ndumbu Helga? (Tala nawa chizulie.)
17 Mandumbu jetu a malunga ni a mapwo no kali chishina cha utakamiso. Tutalenu chilweza cha ndumbu Helga yoze watwama mu Hungria. Ha miaka yinji, kapalikile mu yipikalo yize yamutwalile ahone kutalatala ni kunyonga ngwe keshi ulemu. Alioze muze akutala kunyima, kakuhasa kumona chize Yehova amukwashile kupalikila muli mandumbu. Yamba ngwenyi: “Yehova mashimbu eswe kapwile ni kungukwasa muze te akumona ngwenyi, ngunahono tachi mumu lia mulimo, kufunga mwanami yoze te wayiza ni kukumba yipikalo yikwo nawa. Ha miaka 30 yapalika, kukwakapwile nilimwe tangwa lize Yehova ahonene kumanununa chilakenyo chenyi cha kungutakamisa. Kanji-kanji, iye kakuchilinga kupalikila mu maliji a utakamiso a mandumbu jami. Ayo kakungutumina mesage, kungusonekena mikanda ni kunguchichimieka.”
Kuchi Yehova mahasa kutakamisa atu akwo kupalikila muli yena? (Tala paragrafu 17)
18. Kuchi mutuhasa kutakamisa akwetu?
18 Yetu tukwete chiwape cha kwimbulula Zambi yetu ha kutakamisa akwetu. Mba kuchi twakuchilinga? Twakuchilinga ha kupanjika akwetu ni uhumikizo, kuhanjika maliji a utakamiso ni kwakwasa muze anafupu ukwaso. (Yishi. 3:27) Twakusa tachi hanga tutakamise atu eswe waze anapalika mu yipikalo, chipwe waze keshi kulingila Yehova. Muze enyembo jetu akufwisa, akuyiza hanji kusakalala, yetu twakuya ni kwameneka, kwapanjika kanawa ni kulianyina no yisoneko ya mu Mbimbiliya yize yakwatakamisa. Muze twakwimbulula Yehova, “Zambi ya utakamiso,” kutushi kukwasa wika mandumbu jetu hanga anyongonone, alioze twakukwasa nawa atu waze keshi kulingila Zambi hanga azange umwenemwene.—Mateu 5:16.
YEHOVA KALI HAMWE NI YETU MASHIMBU ESWE
19. Yika Yehova akulinga hali yetu, mba kuchi mutuhasa kumwimbulula?
19 Kwamba umwenemwene, Yehova kakulihulumba hali atu eswe waze akumuzanga. Keshi kutuhichika ukawetu muze tunapalika mu yipikalo. Yehova kakutufunga ngwe chizechene umwe chisemi akufunga mwanenyi ni zango. Iye kakutusongwela, kakutwaha yize tunafupu, kakutufunga ni kututakamisa. Mutuhasa kwimbulula Tata yetu wa zango, ha kukwasa ni kutakamisa eswe waze anapalika mu yipikalo. Ewa, chipwe ngwe lamba ni yuma yikwo yipi yinalingi chihanda ku mwono wetu, nihindu mutuhasa kufuliela ngwetu, Yehova kali hamwe ni yetu. Mumu liaka tunambe chocho? Mumu iye kanalakenya ngwenyi: “Kanda wivwa woma, nguli hamwe ni yena.” (Iza. 41:10) Maliji wano kanatwehe shindakenyo ngwo, kutushi ukawetu.
MWASO 100 Atambulenu ni Kwazumbula
a Tala chikuma, “Kwata Yiyulo Yize Muyihalisa Yehova” mu Kaposhi wa Kutalila 15 Abril, 2011.
b Tala paragrafu 11-14 ha mutwe, “Fuliela ha Chize Yehova Akusongwela Atu Jenyi” mu Kaposhi wa Kutalila Fevereiro 2024.
c Muhasa kuwana yilweza ya ha mashimbu jetu, ha kusoneka chikuma “Kukwasa Waze Anapalika mu Luyinda wa Chisemewa” mu chihela hengwola ha site jw.org.
d Tala “Yihula ya Waze Akutanga Mikanda Yetu” mu Kaposhi wa Kutalila Fevereiro 2017.
e ULUMBUNWISO WA CHIZULIE: Mandumbu mu Maláui, kanatambula ukwaso wa ku ufulielo, yuma ya kulia ni yikwata yikwo nawa hanyima lia luyinda wa chisemewa.