MUTWE WA KULILONGESA 28
MWASO 88 Ngulweze Kama Majila Je
Mumu Liaka Twatamba Kwita Yiyulo Kuli Akwetu?
‘Mana kali kuli waze akufupa yiyulo.’—YISHI. 13:10.
YIZE MUTULILONGESA
Mutumona yize twatamba kulinga hanga tuyuke ha yiyulo yize mututambula.
1. Kulita ni Yishima 13:10; 15:22, kuchi mutuhasa kukwata yiyulo ya mana ni kuyuka ha yiyulo yacho?
YETU eswe tunazange kukwata yiyulo ya mana. Tunazange nawa hanga yiyulo yacho yende kanawa. Mbimbiliya yakusolola chize mutuhasa kumanununa yuma yino yaali.—Tanga Yishima 13:10; 15:22.
2. Yika Yehova anatulakenya?
2 Pundu lume, Tata yetu Yehova, mwe mahasa kutwaha yiyulo yipema. Kashika, mutuhasa kulemba kuli iye ni kumwita mana. Yehova kanatulakenya ngwenyi: “Mungukwaha mana ni kukutala ni liso liami.” (Samu 32:8) Maliji wano kanasolola ngwo, Yehova keshi kutwaha yiyulo yeswayo, alioze kakutwaha yiyulo yize tunafupu, ni kutukwasa hanga tukaule yiyulo yacho.
3. Yihula yika mutukumbulula ha mutwe uno?
3 Ha mutwe uno, mutumonaho chize Mbimbiliya muyitukwasa kukumbulula yihula yino yiwana: (1) Yitanga yika natamba kupwa nayo mba nguyuke ha yiyulo yize mangwaha? (2) Iya mahasa kungwaha yiyulo yipema? (3) Kuchi munguhasa kusolola ngwami, ngunazange kutayiza yiyulo yize mangwaha? (4) Mumu liaka kuchatambile kwita kuli akwetu hanga angukwachile yiyulo?
YITANGA YIKA NATAMBA KUPWA NAYO?
4. Chitanga chika twatamba kupwa nacho mba tutayize yiyulo yipema yize matwaha?
4 Mba tutayize yiyulo yipema yize matwaha, twatamba kupwa akwa-kulikehesa. Twatamba kutayiza ngwetu, kutwanyingikine yuma yeswe, nawa ngwo muze mutupalika mu yuma yize te kanda tuchipalika, mutufupa ukwaso wa akwetu mba tukwate yiyulo ya mana. Nyi kutwapwile akwa-kulikehesa, Yehova kechi kuhasa kutukwasa. Hachino, muze mututanga Mbimbiliya, kutuchi kumona ulemu wa kukaula yiyulo yize mutuwanamo. (Mika 6:8; 1 Petu. 5:5) Alioze nyi twapwa akwa-kulikehesa, mutulihulikila ha yiyulo yize mutuwana mu Mbimbiliya ni kuyikaula ku mwono wetu.
5. Yuma yika kachi yatwalile Mwanangana Ndawichi kulinangamisa?
5 Tutalenu yize mutuhasa kulilongesa ha chilweza cha Mwanangana Ndawichi. Iye kalingile yuma yinji yakukomwesa, alioze kakapwile ni kulinangamisa. Ngwe chilweza, muze te kanda achipwa mwanangana, iye kapwile ni lufuma munji mumu lia kwimba. Kashika amusanyikine hanga embile mwanangana Saulu. (1 Samue. 16:18, 19) Hanyima lia kumuwayisa ngwe Mwanangana, spiritu ya Yehova yiyimwaha ndundo. (1 Samue. 16:11-13) Iye kamunyingikine chinji kuli A-Izalele mumu lia kushiha akwa-kole jo, kuchingako Ngoliate chitakame wa A-Filistea. (1 Samue. 17:37, 50; 18:7) Nyi Ndawichi te kakulinangamisa, kachi kanyongene ngwenyi, mumu lia kulinga yuma yeswayi, kuchishi ni ulemu kupanjika yiyulo ya akwo. Alioze Ndawichi te kakulikehesa.
6. Kuchi tunanyingika ngwetu, Ndawichi te kakupanjika yiyulo? (Tala nawa chizulie ha chifukilo.)
6 Muze apwile mwanangana, Ndawichi yasakula masepa waze te mahasa kumwaha yiyulo. (1 Sango 27:32-34) Chino kuchishi kutukomwesa, mumu chipwe muze te kanda achipwa mwanangana, Ndawichi kapwile ni chako cha kupanjika yiyulo. Iye kakatayijile wika yiyulo ya malunga, alioze katayijile nawa chiyulo cha Abigale, pwo lia Nabale. Mukwo-lunga kapwile mukwa-kulizata, mukwa-kaleleso, nawa te keshi kuvumbika akwo. Kulisa ni Nabale, Ndawichi kapwile mukwa-kulikehesa, kashika atayijile chiyulo chize amuhele kuli Abigale ni kwehuka kulinga yuma yipi.—1 Samue. 25:2, 3, 21-25, 32-34.
Mumu lia kulikehesa, Ndawichi yatayiza chiyulo cha Abigale ni kuchikaula (Tala paragrafu 6)
7. Yika mutuhasa kulilongesa hali Ndawichi? (Chilumbununyi 4:13) (Tala nawa yizulie.)
7 Mutuhasa kulilongesa yuma yinji hali Ndawichi. Ngwe chilweza, muchihasa kupwa ngwe twakulinga yuma yimwe kanawa hanji tukwete ndambu ya wata hali akwetu. Chipwe chocho, kutwatambile kunyonga ngwetu, tunanyingika yuma yeswe, nawa ngwo kutwafupile yiyulo ya akwetu. Chizechene ngwe Ndawichi, twatamba kupanjika yiyulo yipema chipwe ngwe matwahayo kuli mutu mweswawo. (Tanga Chilumbununyi 4:13.) Nyi twachilinga, mutwehuka yuma yize muyihasa kutunehena lamba hamwe ni akwetu.
Twatamba kusa tachi hanga tukaule chiyulo chipema chize matwaha chipwe ngwe chinakatuka kuli mutu mweswawo (Tala paragrafu 7)c
IYA MAHASA KUNGWAHA YIYULO YIPEMA?
8. Mumu liaka Jonata apwile mutu walita kuhana chiyulo kuli Ndawichi?
8 Mutuhasa kulilongesa nawa chuma chikwo hali Ndawichi. Iye te kakutayiza yiyulo ya atu waze apwile ni usepa upema ni Yehova, waze nawa te akunyingika yipikalo yize anapalika. Ngwe chilweza, muze azangile kunyingika yize mahasa kulinga hanga apwe ni sambukila ni Mwanangana Saulu, Ndawichi yapanjika chiyulo cha Jonata, mwana wa Saulu. Mumu liaka Jonata apwile mutu walita kuhana chiyulo chipema kuli Ndawichi? Mumu kuchizako kupwa ni usepa upema ni Yehova, Jonata te kanyingika kanawa tato Saulu. (1 Samue. 20:9-13) Yika lusango yono anatulongesa?
9. Kuli iya twatamba kwita yiyulo? Hana chilweza. (Yishima 13:20)
9 Muze tunafupu chimwe chiyulo, mutulinga kanawa nyi mutuya kuli mutu yoze ukwete usepa upema ni Yehova, nawa unanyingika kanawa yize tunapalika.a (Tanga Yishima 13:20.) Ngwe chilweza, tunyongenu ngwe, umwe mukweze kanafupu pwo wa yitanga yipema yoze malimbata nenyi. Iya mahasa kumwaha chiyulo chipema ha chikuma chino? Sepa lienyi yoze kanda achimbata mahasa kumwaha chiyulo chipema nyi makaula usongwelo wa mu Mbimbiliya. Alioze, mukweze wacho mahasa kuwana yiyulo yipema ha chikuma chacho, nyi meta ukwaso kuli mandumbu alimbata waze anamunyingika kanawa, nawa akulingila Yehova ni uwahililo ha mashimbu anji. Ayo mahasa kumulweza hi wika ko chize makaula shimbi ja mu Mbimbiliya, alioze ni yize o analilongesa mu ulo wo.
10. Yika mutulilongesa haliapwila?
10 Hitwahanjika ha chitanga chize twatamba kupwa nacho, ni hali atu waze mahasa kutwaha yiyulo yipema. Haliapwila, mutumona mumu liaka twatamba kupwa ni mbunge ya kutayiza yiyulo, ni kunyingika nyi twatamba kwita kuli akwetu hanga atukwachile yiyulo.
KUCHI MUNGUHASA KUPWA NI MBUNGE YA KUTAYIZA YIYULO?
11-12. (a) Yika kutwatambile kulinga? (b) Yika Rehoboame alingile muze afupile kukwata chiyulo chilemu?
11 Ha mashimbu amwe, chakusoloka ngwe umwe kanafupu chiyulo, alioze kwamba umwenemwene, kutenga hakwata kulu chiyulo mba kanafupu wika mutu yoze matayiza chiyulo chize akwata. Mutu wa mutapu au, keshi ni mbunge ya kutayiza yiyulo. Mutu wacho katamba kuwana longeso ha chilweza chipi cha Mwanangana Rehoboame.
12 Rehoboame, kapwile Mwanangana hanyima lia kufwa cha tato Solomone. Ha mashimbu jacho, mu Izalele mwapwile yuma yinji yipema. Alioze atu kapwile ni kunyonga ngwo, Solomone kapwile ni kwatuma hanga alinge milimo yikalu. Chocho atu yaya kuli Rehoboame hanga aatepulule yilemu yacho. Rehoboame yaeta hanga amwehe limwe shimbu, mba amone chize makwata chiyulo chacho. Iye kaputukile kanawa, mumu kayile ni kwita chiyulo kuli makulwana waze apwile ni kukwasa tato Solomone. (1 Mia. 12:2-7) Alioze, kakazangile kukaula chiyulo cha makulwana jacho. Mumu liaka? Shina Rehoboame te hakwata kulu chiyulo mba te kanafupu wika yoze matayiza chiyulo chacho? Nyi chenacho, iye kawanyine yize te anafupu ha chiyulo chize amuhele kuli masepa jenyi akweze. (1 Mia. 12:8-14) Rehoboame yalweza atu hanga alinge yize masepa jenyi amulwezele. Hachino, atu yalimika nenyi ni kusakula mwanangana mweka. Kukatuka haze, Rehoboame yaputuka kupalika mu kapinda munji.—1 Mia. 12:16-19.
13. Kuchi mutuhasa kunyingika nyi tukwete mbunge ya kutayiza yiyulo?
13 Mutuhasa kuwana longeso ha yize yalingiwile kuli Rehoboame. Muze mutwita chiyulo, twatamba kupwa ni mbunge ya kutayiza yize mutu wacho matulweza. Kashika lihule ngwe, ‘Shina nakulengulula chiyulo chize mangwaha nyi ngwe hi chize ko te ngunashimbwila?’ Tutalenu chimwe chilweza.
14. Yika twatamba kwiuluka muze anatwehe chimwe chiyulo? Hana chilweza. (Tala nawa chizulie.)
14 Tunyongenu ngwetu, umwe ndumbu mawana mulimo kuze mamufweta mbongo jinji. Shimbu kanda achiutayiza, iye mafupa chiyulo kuli umwe mukulwana wa mu chikungulwila. Ndumbu wacho mamba ngwenyi, mulimo wacho muumuhandununa ni asoko jenyi ha mashimbu anji. Hachino, mukulwana mamulweza ngwenyi kulita ni Mbimbiliya, chiteli chitangu cha mwata wa mu usoko chili kufunga mukwo-pwo ni ana jenyi ku ufulielo. (Efwe. 6:4; 1 Timo. 5:8) Haliapwila tunyongenu ngwetu, ndumbu wacho mahona kutayiza chiyulo cha mukulwana ni kununga ni kufupa chiyulo kuli atu akwo, ndo haze mawanyina mutu yoze mamulweza ngwenyi, katamba kutayiza mulimo wacho. Shina ndumbu yono kanafupu lume chiyulo chipema ha chikuma chacho? Nyi hanji hakwata kulu chiyulo, mba kanafupu wika mutu yoze mamutayiza ha chiyulo chacho? Twatamba kunyingika ngwetu mbunge yakwonga. (Jere. 17:9) Kanji-kanji, chiyulo chalita chize tunafupu che kutushi kutayiza.
Shina tunafupu lume chiyulo chipema nyi tunafupu mutu yoze matayiza chiyulo chize hitwakwata kulu? (Tala paragrafu 14)
NATAMBA KWITA KULI AKWETU HANGA ANGUKWACHILE YIYULO?
15. Ha yika twatamba kukeya, mumu liaka?
15 Mutu ni mutu kali ni chiteli cha kukwata yiyulo yenyi mwene. (Ngala. 6:4, 5) Ngwe chize twamona, mutu yoze ukwete mana shimbu kanda achikwata chiyulo nichimwe, kakufupa yiyulo mu Liji lia Zambi ni kuli mandumbu waze ajama ku ufulielo. Alioze, twatamba kukeya hanga tuhone kwita kuli akwetu atukwachile yiyulo. Amwe kakuchilinga ha kuhula kuli atu waze o akuvumbika ngwo: “Nyi ngwe yena mwe unambe kukwata chiyulo chino, yika te mulinga?” Akwo keshi kunyonga chinji, kakwimbulula wika yiyulo yize atu akwo hanakwate.
16. Yika yalingiwile mu Korindu hakutwala ku yifwo yize te akulambula ku mahamba, nawa iya wapwile ni chiteli cha kutesa nyi mandumbu malia yifwo yacho nyi ka? (1 A-Korindu 8:7; 10:25, 26)
16 Tunyongenu ha chikuma chimwe chize chalingiwile ku sekulu yitangu. Mu chikungulwila cha Korindu, mwasolokele chimwe chikuma hakutwala ku yifwo yize te akulambula ku mahamba. Paulu yasonekena Akwa-Kristu jacho ngwenyi: “Tunanyingika ngwetu hamba nichimweko hano hashi. Chikwo nawa, kukushi Zambi mukwo, shina umuwika.” (1 Kori. 8:4) Ha kwivwa maliji jacho, amwe mu chikungulwila yamona ngwo, mahasa kulia kwo yifwo ya tushitu waze te akulambula ku mahamba yize te akulanjisa ha yitanda. Amwe kakwachile chiyulo cha kwecha kulia yifwo yacho, hanga ahone kupihisa shimbi yo ya mbunge. (Tanga 1 A-Korindu 8:7; 10:25, 26.) Chino chapwile chiyulo chize mutu ni mutu te atamba kukwata. Paulu kakalwezele A-Korindu hanga akwachile akwo yiyulo hanji kukaula yiyulo yize akwo hanakwate. Mutu ni mutu te ‘malumbununa kuli Zambi hakutwala kuli iye mwene.’—Roma 14:10-12.
17. Yika muyihasa kulingiwa nyi twembulula wika yiyulo yize akwetu makwata? (Tala nawa yizulie.)
17 Kuchi chikuma cha mutapu au muchihasa kulingiwa musono? Tunyongenu ha tuma tukehe-tukehe tuze twatwama mu manyinga. Mukwa-Kristu mweswe katamba kukwata chiyulo nyi matayiza kutambula tuma twacho (frações de sangue)b nyi ka. Tunanyingika ngwetu muchihasa kupwa chikalu kunyingika kanawa chikuma chino. Alioze, kukwata chiyulo cha mutapu au, chinalingi chihanda ku chiteli chize Mukwa-Kristu mweswe ali nacho. (Roma 14:4) Nyi twembulula wika chiyulo chize akwetu makwata ha chikuma chino, mutuhasa kuzeyesa shimbi yetu ya mbunge. Alioze, mba tufumbe kanawa shimbi yetu ya mbunge, twatamba kuyikalakalisa. (Hepre. 5:14) Ha shimbu lika mutuhasa kwita chiyulo kuli Mukwa-Kristu yoze wajama ku ufulielo? Muze hitwahengwola kulu alioze mutumona ngwetu, tunafupu ukwaso hanga tunyingike jimwe shimbi ja mu Mbimbiliya ni kumona chize mujihasa kutukwasa ha chikuma chize tunapalika.
Twatamba kwita chiyulo muze yetu ene hitwahengwola kulu (Tala paragrafu 17)
NUNGA NI KWITA YIYULO YA MANA
18. Yika Yehova akutulingila?
18 Yehova kakusolola ngwenyi, kakutujikijila ha kutwecha hanga yetu ene tulikwachile yiyulo. Iye hanatwehe Liji lienyi ni masepa a mana, waze akutukwasa kunyingika chize mutuhasa kukaula shimbi ja mu Mbimbiliya. Kupalikila mu majila wano, Yehova kakutufunga ngwe umwe Tata wa zango. (Yishi. 3:21-23) Yika mutuhasa kulinga hanga tusolole ngwetu, twakumusakwilila?
19. Kuchi mutuhasa kununga ni kuvwisa Yehova kuwaha?
19 Yisemi kakuwahilila chinji ha kumona ana jo majama ku ufulielo, masolola mana ni kukwasa akwo. Chizechene nawa, Yehova kakuwahilila muze akutumona mutujama ku ufulielo, mutwita yiyulo ya mana kuli akwetu ni kukwata yiyulo yize yakumuhalisa.
MWASO 127 Mutapu wa Mutu Natamba Kupwa
a Ha mashimbu amwe, Mukwa-Kristu mahasa kwita chiyulo kuli mutu yoze keshi kulingila Yehova hakutwala ku chikuma cha mbongo, uwukiso ni yuma yikwo nawa.
b Mba uwane sango mu yimako-yimako ha chikuma chino, tala mukanda Wahilila ku Mwono ku Miaka Yeswe! longeso 39 chikuma 5 ni chikuma “Hengwola Nawa.”
c ULUMBUNWISO WA YIZULIE: Umwe mukulwana wa mu chikungulwila kanahane chiyulo kuli mukwo mumu lia chize ahanjikanga ha kukunguluka chize apwanga nacho.