MUTWE WA KULILONGESA 47
MWASO 38 Zambi Makutakamisa
‘ Yena Uli Mulemu Chinji’
‘ Yena uli mulemu chinji.’—DANIE. 9:23.
YIZE MUTULILONGESA
Mutwe uno, muukwasa waze akulimona ngwe keshi ni ulemu kunyingika ngwo, Yehova kakwalemesa chinji.
1-2. Yika muyitukwasa kupwa ni shindakenyo ngwetu tuli alemu chinji kumeso ja Yehova?
TUVUMBI twa Yehova eswe, kakwete ulemu kuli iye. Alioze, amwe keshi kutayiza ngwo Yehova kakwazanga. Muchihasa kupwa ngwe ayo kaamwesene lamba, mba mumu lia chino, yaputuka kulimona ngwe keshi ni ulemu. Shina ni yena che wakulivwa? Yika muyihasa kukukwasa kupwa ni shindakenyo ngwe, ukwete lume ulemu kumeso ja Yehova?
2 Chuma chize muchihasa kukukwasa, chili kupukuna ha sango ja mu Mbimbiliya jize jakusolola chize Yehova anazange hanga atu atwame ni akwo. Mwanenyi Yesu, kapwile ni kulemesa atu ni kwasolwela vumbi. Ha kuchilinga, iye yakwasa atu waze te akulimona ngwo keshi ni ulemu, anyingike ngwo kali alemu kuli Tato. (Yoa. 5:19; Hepre. 1:3) Ha mutwe uno, mutumonaho (1) chize Yesu akwashile atu kunyingika ngwo ayo kakwete ulemu unji kuli Yehova ni (2) chize mutuhasa kupwa ni shindakenyo ngwetu, tuli alemu kumeso ja Yehova.—Haga. 2:7.
KUCHI YESU AKWASHILE ATU KUNYINGIKA NGWO KALI ALEMU?
3. Kuchi Yesu apwile ni kumona atu a mu Ngalileya waze apwile ni kuya kuli iye hanga amwite ukwaso?
3 Muze Yesu apwile ni kwambujola mu Ngalileya, atu anji kapwile ni kwiza kuli iye, mba iye maapanjika ni kwauka. Chocho iye yamona ngwenyi, ayo “kapwile ni kwamwesa lamba ni kwalengulula ngwe mapanga waze keshi kafunga.” (Mateu 9:36) Mangana-a-mayingeleja kapwile ni kumona atu ngwe keshi ni ulemu, kashika te keshi kulihulumba hali ayo. Ayo kapwile nawa ni kuvuluka atu waze te akwamwesa lamba ngwo, “atu akushingiwa.” (Yoa. 7:47-49 tala nawa nota ha Mbimbiliya ya estudo.) Alioze Yesu te kakwasolwela umbovu ni keke ni kusa mashimbu hanga aalongese ni kwauka. (Mateu 9:35) Chikwo nawa, mba akwase atu anji, Yesu yafumba tumbaji twenyi ni kwaha chiyulo cha kuuka mieji.—Mateu 10:5-8.
4. Yika twalilongesa ha chize Yesu apwile ni kutwama ni atu waze te keshi kwalemesa kuli akwo?
4 Yesu kasolwele kuli waze keshi kwalemesa kuli akwo ngwo, kali ni ulemu kuli iye ni kuli Tato, ha kwalemesa ni kwavumbika. Nyi wakuwayila Yehova alioze wakukakajana nyi ukwete ulemu kuli iye, nyonga ha chize Yesu apwile ni kutwama ni atu waze azangile kulilongesa nenyi. Kulinga chino, muchikukwasa kumona ulemu uze ukwete kumeso ja Yehova.
5. Lumbununa yize te yinalingiwa kuli pwo yoze Yesu anyingikine mu Ngalileya.
5 Yesu te keshi kulongesa wika yizavu ya atu, alioze te kakulihulikila nawa hali mutu ni mutu. Ngwe chilweza, mu mulimo wenyi wa kwambujola mu Ngalileya, Yesu yanyingika umwe pwo yoze te wayiza musongo wa kuhita manyinga ha miaka 12. (Marku 5:25) Kulita ni shimbi, musongo uno te wakupwisa pwo wacho mukwa-luchisa, nawa mutu mweswawo te mamukwata neye mapwa mukwa-luchisa. Mumu lia chino, iye te keshi kupwa hamwe ni akwo. Chinasoloka ngwe, iye kapwile ni kupalikisa mashimbu anji ukawenyi. Chikwo nawa, te keshi kuwayila Zambi hamwe ni akwo mu sunangonga chipwe kupwa ha yiwanyino. (Levi 15:19, 25) Pundu lume, pwo wacho te kakumona lamba linji ku musunya ni ku manyonga.—Marku 5:26.
6. Yika pwo alingile mba amuuke?
6 Pwo yono wapwile ni kumona lamba, kazangile hanga Yesu amuuke. Alioze, iye kakechile hanga Yesu achilinge. Mumu liaka? Chitangu, iye kota kevwile sonyi mumu lia musongo uze apwile nawo. Chamuchiali, kota kevwile woma ngwo, Yesu mamuhuma mumu kapwile mukwa-luchisa nawa te katambile kupwa mukachi ka mbunga. Kashika iye yakwata ku mazalo a Yesu, ni shindakenyo ngwenyi mamuuka. (Marku 5:27, 28) Yino ye yalingiwileko lume. Pwo yono kapwile ni ufulielo ukolo chinji, chocho musongo wenyi yauuka. Hanyima, Yesu yahula yoze wamukwachile ku mazalo, pwo yalumbununa yize yalingiwileko. Mba yika Yesu alingile?
7. Kuchi Yesu akwashile pwo yoze wapwile ni kumona lamba linji? (Marku 5:34)
7 Muze amwene ngwenyi pwo wacho te kanachikima ni woma, Yesu yamusolwela umbovu ni vumbi. (Marku 5:33) Ha kunyingika chize pwo wacho te analivwu, Yesu yamusolwela zango ni kumutakamisa. Iye yamusanyika nawa ngwenyi, “mwanami.” Liji lino kulishi kusolola wika vumbi, alioze liakusolola nawa zango. (Tanga Marku 5:34.) Nota ya Mbimbiliya ya estudo yinalumbununa liji lino, yinasolola ngwo, chino chili chisuho chimuwika chize Yesu asanyikine umwe pwo ngwenyi, ‘mwanami.’ Iye kota kachilingile mumu kamwene ngwenyi, pwo te kanevwu sonyi ni woma unji. Kashika yize Yesu alingile, yakwashile pwo wacho kulivwa kanawa ni kuwahilila chinji. Alioze tuchinyongenu ngwetu, Yesu kauukile wika musongo wa pwo chakuhona kumusolwela keke. Nyi te kachilingile, kachi pwo kanungine ni kulema ku manyonga ni kulihisa. Yesu kazangile kulinga yuma yinji, hi wika ko kumuuka ku musunya. Iye kazangile nawa kukwasa pwo wacho alimone ngwenyi, kapwile mwana mulemu chinji kumeso ja Tata yetu wa mu malilu.
8. Kapinda muka Maria apwile ni kupalika?
8 Musono, tuvumbi twa Yehova amwe kakumona lamba mumu lia misongo yize yakwatwala kusakalala ni kulivwa ngwe keshi ni ulemu. Tutalenu chilweza cha Maria,a umwe pionelu wa shimbu lieswe ku Brazil. Iye kasemukine ni ulema, nawa kakapwile ni molu ni kwoko limuwika. Yamba ngwenyi: “Te kakungusosomba ni kungumwesa lamba ku shikola. Alongi-ni-akwetu te kakunguluka majina api chinji. Ha yisuho yimwe, chipwe lume asoko jami kapwile ni kungulelesa.”
9. Yika yakwashile Maria kulimona ngwenyi kali mulemu chinji kumeso ja Yehova?
9 Yika yakwashile Maria? Muze apwile Chela cha Yehova, mandumbu mu chikungulwila kamutakamishine ni kumukwasa alimone ngwe chize Yehova akumumona. Iye yamba nawa ngwenyi: “Kuchichi kuhasa kutongola mandumbu a malunga ni a mapwo eswe waze angukwashile. Nakusakwilila ni mbunge yeswe kuli Yehova ha kungwaha usoko upema chinji wa ku ufulielo.” Mandumbu kakwashile ndumbu Maria kulimona ngwenyi kali mulemu chinji kumeso ja Yehova Zambi.
10. Kapinda muka Maria Ka-Mandala apwile nenyi nawa kuchi apwile ni kulivwa? (Tala nawa yizulie.)
10 Tutalenu mutu mukwo yoze Yesu akwashile, Maria Ka-Mandala. Iye, kapwile ni mandemoniu shimbiali. (Luka 8:2) Iye kota kapwile ni kulinga yuma yipi mumu lia kupwa ni spiritu ya mandemoniu, nawa atu te kakumuchina. Iye te kakumona lamba linji, kota kapwile ni kunyonga ngwenyi niumwe keshi kumuzanga, hanji kumukwasa. Chakusoloka ngwe, Yesu katuhwishile mandemoniu waze apwile ni kumwesa lamba Maria, chocho iye yapwa kambaji kenyi washishika. Mu jila yikwo yika, Yesu akwashile Maria Ka-Mandala kunyingika ngwenyi kakwete ulemu kumeso ja Yehova?
Kuchi Yesu akwashile Maria Ka-Mandala kupwa ni shindakenyo ngwenyi, kapwile mulemu kuli Yehova? (Tala paragrafu 10-11)
11. Kuchi Yesu akwashile Maria Ka-Mandala kunyingika ngwenyi kali mulemu kuli Zambi? (Tala nawa yizulie.)
11 Yesu nawa kechile kuli Maria Ka-Mandala, hanga amukaule mu mulimo wenyi wa kwambujola.b Hachino, Maria yanunga ni kupwa ni uhashi wakwivwa Yesu muze te analongesa akwo. Yesu kasolokele nawa kuli Maria Ka-Mandala ha tangwa lizeliene amuhindwishile. Maria Ka-Mandala kapwile umwe wa kuli atu atangu waze Yesu ahanjikile no ha tangwa liacho. Chikwo nawa, iye yeta kuli Maria hanga alweze apostolo jenyi ngwenyi kamuhindwisa. Kupalikila mu yuma yino, Yesu yakwasa Maria Ka-Mandala kumona ngwenyi, chamwenemwene kapwile ni ulemu kuli Yehova.—Yoa. 20:11-18.
12. Yika yatwalile Lidia kunyonga ngwenyi katelele zango lia mutu niumwe?
12 Chizechene ngwe Maria Ka-Mandala, musono atu anji kakunyonga ngwo mutu niumwe keshi kwazanga. Tutalenu chilweza cha ndumbu Lidia, wa ku Espanha. Muze naye apwile ni ufumba wa Lidia, yazanga kuuchiza. Lidia kaneuluka ngwenyi chipwe muze te achili kanuke, naye kakapwile ni kumufunga kanawa, kapwile ni kumwamba yuma yipi. Mwene ngwenyi: “Chuma nazangile chinji ku mwono wami, chapwile kupwa ni utayizo wa akwetu ni kulivwa ngwami kakunguzanga. Yami te nakwivwa woma ngwami, niumwe mutu kechi keza kanguzanga. Mumu mama kangutwalile kunyonga ngwami, nguli mutu mupi.”
13. Yika yakwashile Lidia kulimona ngwenyi kakwete ulemu kuli Yehova?
13 Muze Lidia aputukile kulilongesa Mbimbiliya, yuma yiyalumuka ku mwono wenyi. Kulemba, kutanga Mbimbiliya, kwivwa maliji apema ni kumona yitanga yipema ya mandumbu a malunga ni a mapwo, yamukwashile kunyingika ngwenyi kali ni ulemu kumeso ja Yehova. Iye yamba ngwenyi: “Lunga liami kakungulweza matangwa eswe ngwenyi, kakunguzanga chinji. Ha shimbu ni shimbu, iye nawa kakungwiulula yitanga yipema yize ngukwete. Masepa jetu amwe, no che akulinga.” Shina wanyonga hali umwe yoze unafupu ukwaso hanga anyingike ngwenyi kali ni ulemu unji kumeso ja Yehova?
KUCHI MUTUHASA KULIMONA NGWE CHIZE YEHOVA AKUTUMONA?
14. Kuchi 1 Samuele 16:7 unatukwase kulimona ngwe chize Yehova akutumona? (Tala nawa mushete “Mumu Liaka Atu ja Yehova Apwa Alemu Kuli Iye?”)
14 Iwuluka ngwe, Yehova keshi kukumona ngwe chize atu akukumona. (Tanga 1 Samuele 16:7.) Kuli akwa-hashi, mutu kakupwa ni ulemu nyi masoloka kanawa ku meso, mapwa ni mbongo jinji ni kulilongesa chinji. Alioze Yehova keshi kulemesa atu mumu lia yuma yino. (Iza. 55:8, 9) Kashika, shimbu utese ulemu we kulita ni yize atu akwamba, utese kulita ni manyonga ja Yehova. Mbimbiliya yakuhanjika hali atu waze ha yisuho yimwe anyongene ngwo, keshi ni ulemu niumwe. Ngwe chilweza, Eliya, Noemi ni Hana. Muze mutanga hakutwala kuli ayo, lihulikile ha chize Yehova te akwazanga. Muhasa nawa kusoneka yuma yipema yize yinalingiwa ku mwono we, yinasolola ngwo Yehova kakukuzanga ni kukulemesa. Hengwola nawa chikuma, “Mumu liaka nakulipikala ha chifwa chami?” mu mikanda yetu.c
15. Mumu liaka Yehova apwile ni kumona Daniele ngwe ‘mutu mulemu chinji’? (Daniele 9:23)
15 Nyingika ngwe, ushishiko we wakukupwisa mulemu kuli Yehova. Ha shimbu limwe, profeta Daniele yahonga chinji ni kunenganyana. Iye kota te hapwa ni miaka 90. (Danie. 9:20, 21) Kuchi Yehova amutakamishine? Iye yatuma mungelo Gabriele hanga ewulule Daniele ngwenyi kapwile ‘mulemu chinji,’ nawa yilemba yenyi hanayivwu. (Tanga Daniele 9:23.) Yika yapwishile Daniele mutu mulemu kumeso ja Yehova? Iye kapwile ni yitanga yipema, ngwe ushishiko ni zango lia kulinga yuma yalita. (Eze. 14:14) Yehova katumine kusoneka lusango yono mu Mbimbiliya, hanga atutakamise. (Roma 15:4) Iye kakwivwa yilemba yetu, kakutulemesa mumu tukwete zango lia kulinga yuma yalita, nawa twakumuwayila ni ushishiko.—Mika 6:8; Hepre. 6:10.
16. Yika muyikukwasa kumona Yehova ngwe Tata wa Zango?
16 Mona Yehova ngwe umwe Tata yoze wakukuzanga. Iye kanazange kukukwasa, kazangile kuwana tupalia muli yena. (Samu 130:3; Mateu 7:11; Luka 12:6, 7) Kupukuna ha chikuma chino, chakukwasa atu anji waze akulimona ngwe keshi ni ulemu. Ngwe chilweza, tutalenu yize yalingiwile kuli Michelle, umwe ndumbu wa pwo ku Espanha. Iye te kakulivwa ngwe keshi kumulemesa, nawa ha miaka yinji te kakumumwesa lamba kuli mukwo-lunga. Iye yamba ngwenyi: “Muze te nakulivwa ngwe chishi ni ulemu, napwile ni kunyonga Yehova kanangumbate mu kondo, ni kungusolwela zango ni ufunge.” (Samu 28:9) Lauren, umwe ndumbu wa pwo mu África do Sul, kakwiuluka mashimbu eswe ngwenyi: “Nyi Yehova kangukokele ni zango lieswe kuli iye, nawa kakungufunga ha miaka yino yeswe ni kungukalakalisa hanga ngulongese akwetu, chino chinasolola ngwo iye chamwenemwene kakungulemesa chinji.”—Hoze. 11:4.
17. Yika muyihasa kukukwasa kupwa ni shindakenyo ngwo uli ni utayizo wa Yehova? (Samu 5:12) (Tala nawa chizulie.)
17 Pwako ni shindakenyo ngwe uli ni utayizo wa Yehova. (Tanga Samu 5:12.) Ndawichi katesele utayizo wa Yehova ni umwe “lukepwe” yoze wakufunga akwa-ululi. Kunyingika ngwo uli ni utayizo ni ukwaso wa Yehova, muchihasa kukufunga ngwe lukepwe muze muputuka kunyonga ha yuma yipi. Alioze kuchi muhasa kunyingika ngwe, uli ni utayizo wa Yehova? Ngwe chize hitwamona kulu, mutuhasa kupwa ni shindakenyo yino, ha kutanga Mbimbiliya hanga tumone yize Yehova akutulweza ni yize akunyonga hali yetu. Chikwo nawa, kupalikila muli makulwana a mu chikungulwila, masepa ni atu akwo, Yehova kakutwiulula ngwenyi tuli alemu chinji kuli iye. Alioze, yika watamba kulinga muze mutu umwe makulweza yuma yipema?
Kunyingika ngwetu tuli ni utayizo wa Yehova, muchihasa kutukwasa tulivwe ngwetu tuli alemu (Tala paragrafu 17)
18. Mumu liaka watamba kutayiza uchichimieko wa akwenu?
18 Tayiza kuchichimieka cha zango chize chakwiza kuli waze akukuzanga, nawa anakunyingika kanawa. Iwuluka ngwe, Yehova mahasa kukukwasa kupalikila muli atu wano kunyingika ngwo uli ni utayizo wenyi. Michelle yoze hitwatongola kulu yamba nawa ngwenyi: “Hakehe-hakehe, ngunalilongesa kutayiza ni mbunge yeswe muze akwetu manguchichimieka. Kulinga chino hi chashi ko kuli yami, alioze ngunanyingika ngwami, che Yehova anazange hanga ngulinge.” Makulwana a mu chikungulwila ni umbovu weswe, kakukwasa Michelle kumona ngwo, kali ni utayizo wa Yehova. Haliapwila iye kali pionelu, nawa kakulihana hanga akwase milimo ya ku Mbetele kupalikila ku zuwo lienyi.
19. Mumu liaka mutuhasa kupwa ni shindakenyo ngwetu tuli alemu kuli Yehova?
19 Yesu ni zango lieswe kanatwiulula ngwenyi, tuli alemu chinji kuli Tata yetu wa mu malilu. (Luka 12:24) Kashika mutuhasa kupwa ni shindakenyo ngwetu, Yehova kakutumona ngwenyi tuli alemu. Kanda tuvulama chikuma chino. Chikwo nawa, tunazange kulinga yeswe yize mutuhasa hanga tukwase akwetu no anyingike ngwo, kali alemu chinji kumeso ja Zambi.
MWASO 139 Nyonga Uli Mu Chifuchi Chaha
a Majina amwe kapwa kwalumuna.
b Sango jakusolola ngwo, Maria Ka-Mandala kapwile hakachi ka mapwo waze te akuya wenyi ni Yesu mu mulimo wa kwambujola. Mapwo wano, kapwile ni kulanda yuma ni mbongo jo hanga akwase Yesu ni apostolo jenyi.—Mateu 27:55, 56; Luka 8:1-3.
c Ngwe chilweza, muhasa kutanga kapitulu 24 wa mukanda Achegue-se a Jeová ni kutanga yisoneko ni sango ja mu Mbimbiliya jize jili ha chikuma “Kuyambashana” mu mukanda, Yisoneko Yize Yakusongwela Mwono Wa Akwa-Kristu.