Kushiha Atu Anji ku Shikola—Yika Mbimbiliya Yakwamba?

Ha 24 ya Maio ya 2022, kwalingiwile yimwe ponde yipi chinji mu mbonge yikepe ya Uvalde, mu Texas, Estados Unidos. Kulita ni mukanda wa sango wa The New York Times, “umwe chingalwe kashihile twanuke 19 ni alongeshi aali a mapwo . . . ku shikola primária ya Robb.”

Chaluyinda, yuma ya mutapu au yinalingiwa ku yihela yinji. Mukanda wa sango USA Today unambe ngwo, mu Estados Unidos wika, “ha mwaka wapalika kuloza atu ku mashikola chalingiwanga ha yisuho 249— yino yahiana yize yalingiwile ha miaka yikwo chize ha 1970.”

Mumu liaka yuma ya mutapu au yakulingiwa? Yika muyitukwasa mba tuhase kunyongonona mu upi wa mutapu au? Shina kuli chimwe kutalatala ngwo ungalwe tangwa limwe muukahwa? Mbimbiliya yinakumbulula yihula yino.

Mumu liaka hashi hanasoloka chinji ungalwe?

• Mbimbiliya yakuvuluka mashimbu wano tuli ngwo “matangwa a kusula,” ha mashimbu waze atu te mapwa “keshi zango lia atu” nawa “asasu”, hanji ngwetu, atu te mapwa chinji yingalwe hanji yilianyi. Mbimbiliya yinambe nawa ngwo atu waze ali ni yitanga yacho te manunga ni ‘kupiha chinji kuhiana.’ (2 Timoteu 3:1-5, 13) Mba unyingike sango jikwo, tanga chikuma, “Shina Mbimbiliya Hiyinambe Hakutwala ku Chize Manyonga ni Yitanga ya Atu te Muyipwa ha Matangwa wano?”

Atu anji kakulihula ngwo: ‘Mumu liaka Zambi keshi kukwika yuma ngwe kushiha cha atu ku mashikola?’ Mba uwane kumbulula lia Mbimbiliya, tanga chikuma “Mumu liaka Atu Apema Akumona Lamba?”

Yika muyitukwasa mba tuhase kupalika mu upi upwahaha?

• “Yuma yeswayo yasonewene kunyima, yasonewene mukutufumba yetu, hanga ku . . . kulembejeka cha Yisoneko Yisandu tukasele mbunge jetu ha chilakenyo cha Zambi.”—A-Roma 15:4.

Yiyulo ya mu Mbimbiliya muyihasa kukukwasa hanga utwame kanawa hano hashi haze hali ungalwe unji. Mba unyingike nawa sango yikwo, tala mukanda Laulenu!, uli ni mutwe ngwo “Ungalwe Muwiza Kahwa Limwe Tangwa?”

Mba uwane yikuma yize muyikwasa yisemi hanga akwase ana jo kukumba sango jino jipi, tanga chikuma “Tachi Jize Sango Jikwete Hali Ana.”

Shina ungalwe muwiza kahwa limwe tangwa?

• “Kumakakuula mwono wo ku yihungumiona ni uswi.”—Samu 72:14.

• “Kumakalumuna tutana two mu yikungo ya sharua, ni makunga jo makalumuna mu poko ja kululika najo mitongo. Vungu kulichi kakwata katana likalimike ni vungu likwo. Kechi kalilongesa jita nawa nilimwe tangwa.”—Mika 4:3.

Zambi makalinga yuma yize atu keshi kuhasa kulinga. Wanangana wenyi, uze uli unguvulu wa mu malilu, mukanongesa mata eswe ni kuhwisa ungalwe ku miaka yeswe. Mba unyingike yize Wanangana wa Zambi muukalinga, tanga chikuma “Wanangana wa Zambi Muukaneha ‘Sambukila Yinji.’”