Yizulie ya Rui Almeida Fotografia/Moment via Getty
KANYAMENU!
Mbwanja mu Yuma ya Mafwefwe—Yika Mbimbiliya Yakulongesa?
Kulimika ni manguvulu chinalingiwa chinji musono.
Mumu liaka kuli mbwanja yinji mu yuma ya mafwefwe? Shina muyiza kahwa limwe tangwa? Yika Mbimbiliya yakulongesa?
Mbimbiliya yaprofetezele kulihandununa cha mafwefwe
Mbimbiliya yaprofetezele ngwo, ha mashimbu tuli, waze avuluka ngwo, “matangwa a kusula,” atu anji te maneha mbwanja ni upupilo.
‘Ha matangwa akusula, mukukapwa mashimbu akalu chinji. Mumu atu makapwa keshi kusakwilila, keshi kushishika, kechi katayiza kulivwashana ni akwo, asasu, akwa-kukunjika akwo, akwa-pami, akwa-kulizata.’—2 Timoteu 3:1-4.
Mbimbiliya yaprofetezele nawa ngwo, chizungo-zungo ni vunda ya mafwefwe, te muyilingiwa ha matangwa wano tuli. (Luka 21:9) Alioze yuma yacho kuyichi kununga ku miaka yeswe.
Kuhwa cha mbwanja ya mafwefwe
Mbimbiliya yasolola ngwo, Zambi makasalakanyisa manguvulu ja atu ni unguvulu wenyi, uze uli mu malilu.
‘Zambi ya mwilu makakolesa umwe wanangana uze muukafwenya mawanangana wano akwo ni kwasulisa, alioze wene muukakola wa mutolo.’—Daniele 2:44.
Wanangana wa Zambi muukanunga atu ni kuneha sambukila hashi eswe.
Yesu Kristu, Mwanangana wa mu wanangana wacho, kakumuvuluka ngwo, “Mwanangana wa Sambukila,” iye nawa makasa tachi hanga ‘sambukila yacho yichine kahwa.’—Izaia 9:6, 7.
Chipwe haliapwila, tumbaji twenyi kanalilongesa kutwama ni sambukila. Hakutwala ku chikuma chino, Mbimbiliya yakwamba ngwo: ‘O makalumuna tutana two akapwe yikungo ya kulima nayo, makalumuna makunga jo akapwe poko ja kululieka najo mitondo ya mihuko. Akwa-vungu limwe kechi kasa jita ni akwa-vungu likwo; kechi kalilongesa nawa kwasa jita.’—Izaia 2:3, 4.
Nyi muzanga kunyingika sango jikwo, tanga chikuma “Yika Wanangana wa Zambi Muukalinga?” tala nawa chinema Wanangana wa Zambi Yika?