Kulukukila Atu ni Mata Chize Chinalingiwa Hashi Heswe—Yika Mbimbiliya Yakulongesa?

Ha Julho ya 2022, kwalingiwile yuma yinji yipi; yingalwe waze apwile ni mata kashihile atu anji hano hashi:

• “Kushiha mukwa-mafwefwe yoze te anyingika chinji mu Japão [Shinzo Abe yoze wapwile Primeiro-Ministro] chinakevwisa atu yikola yinji ku mbunge mu chifuchi chacho ni hashi heswe, mumu kanji-kanji mu Japão kumwatwamine ungalwe unji nawa shimbi yize yakukanjisa mata kakukalakala kanawa.”—10 Julho, 2022, The Japan Times.

• “Mu Dinamarca atu kevwile yikola ku mbunge muze chingalwe umwe ashihile atu atatu mu loja mu Copenhague.”—4 Julho, 2022, Reuters.

• “Mu África do Sul: malunga waze apwile ni mata yanjila mu yimwe bar mu Soweto yashiha atu 15.”—10 Julho, 2022, The Guardian.

• “Mu Estados Unidos atu kuhiana 220 kaashihile ni mata ha ya poso ya kunanga ya tangwa 4 ya Julho.”—5 Julho, 2022, CBS News.

Shina tangwa limwe ungalwe wacho muwiza kahwa? Yika Mbimbiliya Yakulongesa?

Kuhwa cha Ungalwe Weswe Hano Hashi

Mbimbiliya yakwamba ngwo tuli “ha matangwa a kusula,” nawa ngwo, ha matangwa jacho atu te mapwa yingalwe, asasu nawa keshi kuzanga yipema. (2 Timoteu 3:1, 3) Mumu lia ungalwe uno weswe, atu kakutwama ni woma. (Luka 21:11) Alioze, Mbimbiliya yakulakenya ngwo, ungalwe muukahwa nawa ngwo, atu makatwama “muma mwa sambukila, mu mazuwo keshi woma, mu yihela ya kuhwima ni kuhola.” (Izaia 32:18) Kuchi yino muyikalingiwa?

Zambi makashiha atu api ni kwonwona mata eswe hano hashi.

• “Yingulungulu kumakaateta mu chifuchi.”—Yishima 2:22.

• “[Zambi] hamanununa jita ndo ku songo lia hashi; kakumakuna uta; kakupatula kunga hakachi; kakwocha ni kahia matemba a jita.”—Samu 46:9.

Zambi makahwisa yuma yize yakuneha ungalwe ha kulongesa atu apwe akwa-sambukila.

• “Niumwe mavwisa yikola hanji kwonwona heswe ha mulundu wami usandu; mumu hashi muhakazala ni chinyingi cha Yehova ngwe meya akufuka kalunga-lwiji.”—Izaia 11:9.

• Kukatuka ha mashimbu wano, Zambi kanalongesa atu hashi heswe hanga alumune ‘tutana two apwe yikungo ya sharua, ni makunga jo apwe poko ja kululieka najo mitondo.’—Mika 4:3.

Mba unyingika sango jikwo ha yilakenyo ya mu Mbimbiliya ya kutwama mu chifuchi chize atu kechi kevwa woma, tanga chikuma “É Possível Ficar Livre do Medo?”

Mba unyingike chize Zambi makahwisa ungalwe weswe, tanga chikuma “Paz na Terra Enfim!”