Hashi Heswe Hanapinji ni Kusasaminya—Yika Mbimbiliya Yakulongesa?

Ha kakweji wa Junho wa 2022, akwa-sango kambile ngwo, mu yifuchi yinji hano hashi munakasasaminya chinji:

• “Yilolo amu China kambile ngwo, mu mambonge 70 mu chifuchi chacho mumusasaminya chinji ha kakweji wacho.”— 25 Julho, 2022, CNN Wire Service.

• “Kusasaminya chinoke chinji hano hashi, kashika chinoche mishitu ni yambu yinji mu Europa.”— 17 Julho, 2022, The Guardian

• “Mu mambonge anji mu Estados Unidos munakasasaminya ha liayenga, muze kusasaminya cha verão chahetele ku Chivumbuko ni ku Sule ya chifuchi chacho.”— 24 Julho, 2022, The New York Times.

Yino yeswe yika yinalumbunuka? Shina kulutwe lia matangwa, mwono hano hashi muukuwa? Yika Mbimbiliya Yakulongesa?

Shina Mbimbiliya hiyinahanjika hakutwala ku kusasaminya chize chinalingiwa hano hashi?

Ewa. Mbimbiliya yinakaprofeteza ngwo yuma ngwe kusasaminya chize chinasoloka hano hashi te muyilingiwa ku matangwa a kusula. Chakutalilaho, Yesu kambile ngwenyi, te mutumona “yuma yakwivwisa woma” hanji ngwetu yakuchikimisa. (Luka 21:11) Mumu lia kusasaminya chize chinalingiwa hashi heswe, atu anji kanevu woma ngwo atu manongesa hashi.

Shina mwono hano hashi muukuwa?

Ka. Zambi katangile hashi hanga atu atwameho ku miaka yeswe. (Samu 115:16; Chilumbununyi 1:4) Iye kechi keza kecha hanga atu anongese hashi. Shimbu achilinge, kanalakenya ngwenyi, ‘makwonwona waze akwonwona hashi.’—Usolwelo 11:18.

Tala yuma yaali yize Zambi analakenya kulinga:

• “Puya ni chifuchi chumu muyikawaha; kango muyikawahilila ni kutemuna yitemo ngwe kawalangaza.” (Izaia 35:1) Zambi kechi katayiza hashi hapwe ngwe puya yize kuyishi yitangiwa ya mwono.

• “Wakunangisa hashi nikuhinjilaho meya; wakuwahisaho chikolo.” (Samu 65:9) Zambi makapwisa hashi heswe paraisu yipema.

Mba unyingike kanawa chize kwalumuka cha tungonde chinamanununa uprofeto wa mu Mbimbiliya, tanga chikuma, “Mudanças Climáticas e o Futuro da Humanidade—O que a Bíblia diz?”

Mba unyingike nawa sango jikwo hakutwala ku chilakenyo cha mu Mbimbiliya chinambe ngwo, hashi muhakapema, tanga chikuma “Quem Vai Salvar a Terra?”