Left: Hurricane Ian, Florida, USA, September 2022 (Sean Rayford/Getty Images); center: Mother evacuating with her son, Donetsk, Ukraine, July 2022 (Alex Chan Tsz Yuk/SOPA Images/LightRocket via Getty Images); right: Mass COVID testing, Beijing, China, April 2022 (Kevin Frayer/Getty Images)
KANYAMENU!
Mwaka 2022: Wapwa Mwaka wa Kusakalala ni Vunda—Yika Mbimbiliya Yakulongesa?
Mu mwaka 2022, twevwa sango jinji hakutwala ku jita, kapinda wa mbongo, luyinda wa chisemewa ni yuma yikwo nawa. Mbimbiliya wika ye muyihasa kutwaha ulumbunwiso wa yize yinalingiwa hano hashi.
Ulumbunwiso wamwenemwene wa yize yalingiwa ha 2022
Yuma yize yalingiwa ha mwaka uno yasolola pundu ngwo, tuli ha matangwa waze Mbimbiliya yakuvuluka ngwo, “matangwa a kusula.” (2 Timoteu 3:1) Matangwa jacho kaputukile ha 1914. Talenu chize yuma yize yalingiwa ha mwaka uno yinalite ni yize Mbimbiliya yambile ngwo muyilingiwa ha mashimbu jetu:
“Jita.”—Mateu 24:6.
“2022 Wapwa mwaka uze mu Europa mwapwa nawa jita yize yapihisa yuma yinji.”a
Tala chikuma, “Maswalale a mu Rússia Kalukukila Chifuchi cha Ucrânia.”
“Zala.”—Mateu 24:7.
“2022: Wapwa mwaka wa zala yinji.”b
Tala chikuma, “Jita mu Ucrânia Yinatepulula Kulia Hashi Heswe.”
“Yikola.”—Luka 21:11.
“Musongo wa kalepa, musongo wa yimbulu yaneha lamba linji. Ni musongo wa COVID-19 newo muuchinunga ni kuneha lamba linji. Yuma yino yinasolola pundu chize misongo yize yakusambuluka yinapinjisa mwono wa atu.”c
Tala chikuma, “COVID Yashiha Atu Tununu 6 a Tununu.”
“Yuma yakwivwisa woma.”—Luka 21:11.
“Kusasaminya, changa, kuwema cha misenge ni masanga a meya. Atu manunga ni kwiwuluka mwaka 2022, mumu kwalingiwa yuma yinji yize yaneha lamba hano hashi, yonwona mwono wa tununu a tununu twa atu ni kutwala atu anji kutokesa mazuwo jo.”d
Tala chikuma, “Hashi Heswe Hanapinji ni Kusasaminya.”
“Sango ja jita.”—Luka 21:9.
“Amu atu apwile ni kwivwa uli mumu lia kuhona mbongo, chipi-chipi ha kwoka cha ndando ya yuma, chocho yalimika chinji ni manguvulu ha mwaka 2022.”e
Tala chikuma, “Kwoka cha Ndando ya Yuma Hashi Heswe.”
Yika mutumona ha mwaka muwizaho?
Kukushi niumwe yoze unanyingika pundu yize mulikalingiwa ha mwaka 2023. Yuma tunanyingika wika yili ngwo kwala hakehe, Wanangana wa Zambi hanji ngwetu unguvulu wa mu malilu, muwiza hanga ululieke yuma hano hashi. (Daniele 2:44) Unguvulu uno, muukachiza yuma yize yakunehena atu lamba ni kusa shindakenyo hanga upale wa Zambi ulingiwe hano hashi.—Mateu 6:9, 10.
Tunakwichi hanga ukaule chiyulo cha Yesu cha ‘kununga ni kulawola’ ha yuma yinalingiwa hano hashi yize yinamanununa uprofeto wa mu Mbimbiliya. (Marku 13:37) Eta umwe eze ni kukumeneka hanga akukwase kunyingika chize Mbimbiliya muyihasa kukukwasa haliapwila hamwe ni asoko je hanga nupwe ni kutalatala chipema cha kulutwe lia matangwa.
a Chishina: AP News, “2022 Was Year the Horror of War Returned to Europe,” by Jill Lawless, December 8, 2022.
b Chishina: World Food Programme, “A Global Food Crises.”
c Chishina: JAMA Health Forum, “Living in an Age of Pandemics—From COVID-19 to Monkeypox, Polio, and Disease X,” by Lawrence O. Gostin, JD, September 22, 2022.
d Chishina: Earth.Org, “What’s Behind the Record-Breaking Extreme Weather Events of Summer 2022?” by Martina Igini, October 24, 2022.
e Chishina: Carnegie Endowment for International Peace, “Economic Anger Dominated Global Protests in 2022,” by Thomas Carothers and Benjamin Feldman, December 8, 2022.