Jita Yize Analingi ku Israel ni Yifuchi Yikwo Yalisulangana—Yika Mbimbiliya Yakulongesa?

Atu anji kanalipikala chinji ni jita yize analingi ku Israel, Estados Unidos, ni Irã. Shina jita yino muyilitanda nawa ku yifuchi yikwo? Shina manguvulu mahasa kuhwisa jita yacho ni kuneha sambukila hano hashi?

Atu waze akutanga Mbimbiliya, kananyingika uprofeto hakutwala ku jita ya Armagedone uze uli mu mukanda wa Usolwelo. Kashika, kota kananyongo ngwo, jita yacho yili uputukilo wa Armagedone.

Yika Mbimbiliya Yakulongesa?

Shina manguvulu makahwisa jita yize yinalingiwa ku Israel ni yifuchi yikwo yalisulangana?

Mbimbiliya yakwamba ngwo: “Kanda nufuliela yilolo, hanji umwe mwana mutu yoze keshi kuhasa kukwasa.”—Samu 146:3.

Kutwanyingikine nyi manguvulu maneha sambukila ku chihela chacho. Alioze, Mbimbiliya yakusolola zwalala ngwo, kukushi nguvulu niumwe hanji chizavu cha atu chize muchihasa kuhwisa jita ni kuneha sambukila hano hashi ku miaka ya mutolo. Zambi mwe wika mahasa ‘kuhwisa jita hashi heswe.’—Samu 46:9.

• Nyi muzanga kunyingika sango jikwo, tanga Kaposhi Wakutalila uli ni mutwe unambe ngwo “Shina Jita ni Mbwanja—Muyiza Kahwa?”

Shina Jita Yino Yinamanununa Uprofeto?

Mbimbiliya yakwamba ngwo: “Munukevwa zungo lia jita ni sango ja jita ... Vungu limwe mulikasa jita ni vungu likwo, wanangana umwe muukalimika ni wanangana ukwo.”—Mateu 24:6, 7.

Jita yize yili ku Israel ni yifuchi yikwo yalisulangana, yili chilayi chize chinasolola ngwo tuli “ha matangwa akusula.” (Mateu 24:3; 2 Timoteu 3:1) Chekwamba, jita yize twakumona musono, yakusolola ngwo, kwasala hakehe hanga Zambi ahwise jita yeswe hamwe ni yipikalo yize twakupalika hano hashi.

• Nyi muzanga kunyingika sango jikwo, tanga chikuma “O que é o sinal dos “últimos dias” ou “fim dos tempos?”

Shina Armagedone Muyikaputukila mu Israel ni mu Yifuchi Yikwo Yalisulangana?

Mbimbiliya yakwamba ngwo: “Ayo akungulwile mianangana hamuwika mu chihela chize avuluka mu Hepreu ngwo, Armagedone.”—Usolwelo 16:16.

Jita ya Armagedone, hi wika ko jita ya manguvulu a ku Israel ni yifuchi yikwo yalisulangana. Alioze, yili jita ya Zambi ni manguvulu eswe a hano hashi.

• Nyi muzanga kunyingika sango jikwo, tanga chikuma “Jita ya Armagedone Yika?”

Yika muyitukwasa kupwa ni sambukila chipwe muze yuma yipi yinalingiwa?

Mbimbiliya yakwamba ngwo: “Kanda nulipikala ha chuma nichimwe, alioze ha yuma yeswe yize munuhona, nyingikisenu kwita chenu kuli Zambi kupalikila mu kulemba ni kuliumba hamwe ni kusakwilila.”—A-Fwilipu 4:6.

Yehovaa kanazange hanga tulembe kuli iye. Mumu iye kakutufunga, kakwivwa yilemba yetu, nawa kakutukwasa kunyongonona. (1 Petulu 5:7) Jila yimwe yize akutukwashilamo, yili muze twakunyingika mumu liaka jita yinanungu, chize muyikahwa, ni yize makalinga hanga akahwise lamba lieswe.—Usolwelo 21:3, 4.

• Nyi muzanga kunyingika sango jikwo hakutwala ku chize Zambi akutukwasa, tanga chikuma “Posso encontrar palavras de consolo na Bíblia?.”