Shimbu Lika Jita Muyikahwa?—Yika Mbimbiliya Yakulongesa?

Hakutwala ku mbwanja yize Akwa-Irã alinganga kuli Akwa-Israel ha Sambata 13 ya Abril, António Guterres, Secretário-geral das Nações Unidas, yamba ngwenyi: “Wano kali mashimbu akusa tachi hanga tulivwashane ni kutepulula mbwanja ngwe yino. Kali nawa mashimbu waze twatamba kusa tachi hanga tusolole kulihumikiza.”

Jita yize yili ku yifuchi ya ku chivumbuko, yili yimwe ya ku jita jize jinalingiwa hashi heswe.

“Kukatuka ha jita yamuchiali ya hashi heswe, musono hano hashi hali mbwanja jinji kuhiana. Atu tununu 2 a tununu hanji ngwetu, atu anji katwama ku yihela kuze kunalingiwa jita.”— Conselho de Segurança da ONU, 26 Janeiro, 2023.

Yino yili yimwe ya ku yifuchi yize yili ni jita: Israel, Gaza, Síria, Azerbaijão, Ucrânia, Sudão, Etiópia, Níger, Mianmar ni Haiti.a

Mba shimbu lika mbwanja jacho mujikahwa? Shina manguvulu a hano hashi mahasa lume kuneha ukulungunga? Yika Mbimbiliya yakuhanjika ha chikuma chino?

Jita jize jili hano hashi

Jita jize jinalingiwa chinji hano hashi, jinasolola ngwo, kwasala hakehe kujichi kupwako nawa. Jita jino jinamanunuka uprofeto wa mu Mbimbiliya hakutwala ku mashimbu waze tuli. Mbimbiliya yakuvuluka mashimbu jacho ngwo, “kumanunuka cha miaka.”—Mateu 24:3.

• “Munukevwa zungo lia jita ni sango ja jita . . . Vungu limwe mulikasa jita ni vungu likwo, wanangana umwe muukalimika ni wanangana ukwo.”—Mateu 24:6, 7.

Tanga chikuma, “O que é o sinal dos ‘últimos dias’ ou ‘fim dos tempos’?” hanga umone chize jita jize jinalingiwa musono jinamanununa uprofeto wa mu Mbimbiliya.

Jita yize muyikahwisa jita jeswe

Mbimbiliya yinalakenyo ngwo, jita jeswe hano hashi mujikahwa. Mba kuchi chino muchikalingiwa? Atu kechi kuhasa kuchilinga. Kwamba pundu, Armagedone “jita ya tangwa linene lia Zambi Mukwa-Ndundo-Jeswe” ye muyikahwisa jita hano hashi. (Usolwelo 16:14, 16) Hanyima lia jita yacho, Zambi makamanununa chilakenyo chenyi cha kunehena atu eswe ukulungunga uze muukanunga ku miaka yeswe.—Samu 37:10, 11, 29.

Mba unyingike sango jikwo hakutwala ku jita yize muyikahwisa jita jeswe, tanga chikuma “Jita ya Armagedone Yika?”