Luyinda Yoze Walingiwa ha 2022—Mandumbu Kasolola Zango mu Yitanga

Mbimbiliya hiyinambe ngwo, ha matangwa jetu te mukusoloka jita, minyiko misongo ni yuma yikwo “yakwivwisa woma.” (Luka 21:10, 11) Maliji wano a uprofeto kananungu ni kumanunuka ha mwaka wa mulimo wa 2022.a Chakutalilaho, jita yinanungu mu Ucrânia, yaneha lamba hali atu anji. Hashi heswe atu kanapinji ni musongo wa COVID-19. Chikwo nawa, atu anji kapalika mu luyinda wa chisemewa, ngwe minyiko ku chifuchi cha Haiti ni kakundukundu yoze wapihisa yuma yinji ku América Central, Filipinas ni ku Sudeste ya África. Kuchi Yela ja Yehova akwashile atu waze apalikile mu kapinda wacho?

Ha mwaka wa mulimo wa 2022, ululikiso wetu wakwasa atu waze apalikile mu luyinda wa chisemewa kuheta ku 200! Mba tukwase ha mulimo wacho, twazachisa mbongo kuheta ku 12 milhões ya ndolare.b Tala chize twazachishile milambu hanga tukwase ku yihela yaali kuze kwalingiwile luyinda.

Minyiko Yize Yalingiwile ku Haiti

Ha 14 ya Agosto, 2021, ku Sule ya Haiti kwalingiwile munyiko unene uze wapwile ni tachi kuheta ha 7.2. Chaluyinda, Yela ja Yehova atatu yafwa. Hali mandumbu jacho, hapwile mapangi aali ni ndumbu umuwika. Waze asalile ni mwono, kapinjile chinji ku musunya ni ku manyonga mumu lia munyiko wacho. Ndumbu Stephane, yamba ngwenyi: “Mu mbonge mwafwile atu anji, hachino ha tukweji aali, hita poso te afu anji te akuya ni kufunda.” Ndumbu mukwo avuluka ngwo Éliézer, yamba ngwenyi: “Yela ja Yehova anji mazuwo jo kauzukile, chocho yatokesa mazalo, sapato ni yuma yikwo nawa. Ha amwe tukweji, atu anji kapwile ni kwivwa woma mumu lia kunyika cha mavu chize chapwile ni kulingiwa.”

Ululikiso wetu yiuhana ukwaso ni kwashi-washi. Mbetele ya ku Haiti yiyihana matonelada a kulia kuhiana 53, kuchingako matenda, lona, mihela ni karegador jize jakukalakala ni mwalwa hanga ase najo kahia ku matelefone. Chikwo nawa, ha 2022, kwafupiwa kutunga ni kutungulula mazuwo kuhiana 100. Twazachisa mbongo kuhiana 1 milhão ya ndolare hanga tukwase atu waze apalika mu luyinda.

Mandumbu jetu kanasakwilila chinji. Lorette yamba ngwenyi: “Minyiko ya puzula zuwo lietu ni kupihisa mingoso yetu. Kutwakapwile ni chuma nichimwe chize te mutulia. Alioze, ululikiso wa Yehova wapwile sali lietu ni kutwaha yize yeswe te tunafupiwa.” Micheline yamba ngwenyi: “Minyiko yapihisa yuma yinji mu chisambwe chize te natwama ni ana jami. Kuchakamwene yize mungulinga, chuma wika nahashile kulinga chapwile kulemba kuli Yehova, mba iye yatukwasa kupalikila mu ululikiso wenyi. Haliapwila, yitwapwa ni zuwo lia kutwama. Ngunazange kulinga yeswe yize munguhasa hanga ngusolole usakwililo wami kuli Yehova.”

Ukwaso uze twahanyine chipwe manguvulu kaumwene. Tuminyi wa mu chihunda cha L’Asile, yamba ngwenyi: “Ngunasakwilila ha ukwaso uze nwahasa ni kawashi-washi. Nunatela uchichimieko uze nwakutambula kuli nguvulu. Nawahilila ha kumona ngwami kunushi kulihulumba ni mbongo, alioze nwakulihulumba ni atu. Chikwo nawa, yuma yeswe yize nwakulinga nwakuyilinga ni zango.”

Kakundukundu avuluka ngwo Ana Kapihisa Yuma ku Malauí ni ku Moçambique

Ha 24, Janeiro 2022, Kakundukundu avuluka ngwo Ana yapihisa yuma ku Moçambique yatalikisa ku chitokelo cha tangwa ni kuheta ndo ku Malauí. Chinjimbi chinakeza ni vula munji ni fuji ya tachi yize yahetele ha kilometro kuhiana 100 ha ola. Kakundukundu wacho nawa kanakauzula yau, manguji a kahia ka zembwe ni kukoka mihwiji meya.

Kakundukundu kanakakwata hali Yela ja Yehova kuhiana 30 mu Malauí ni mu Moçambique. Ndumbu Charles yoze unakapwa mu chizavu cha akwa-kukwasa, yamba ngwenyi: “Muze ngunakamona lamba lia mandumbu ni yize yeswe anakatokesa, yingwivwa chinyengo, chanyingikine yize te mungulinga.” Chaluyinda, mbuto mu minda ya mandumbu ni kulia chikehe chize apwile nacho yiyipihia. Anji yatokesa mazuwo jo. Chaluyinda, ndumbu umwe yafwisa mukwo-pwo ni anenyi aali; ayo kanakafwa mu meya muze wato uze apwile wachilumukine.

Kakundukundu kokele chinji. Ha ola yamuchitatu chimwene mu Malauí, asoko ya Sengeredo yevwa zungo lia lundunjila wa muhwiji ya meya. Ngiji jaali yijilaza! Ndumbu Sengeredo yakwata chiyulo cha kuhichika zuwo. Nyonga liacho liapwile lipema chinji mumu ha shimbu likehe wika zuwo yiliuzuka ku sanga lia meya! Yuma yeswe yize apwile nayo yiyipihia ni meya. Asoko yaya ku Zuwo lia Wanangana lize liapwile ha tando ya 30 minutu ya kwenda hashi kukatuka ku zuwo lio. Alioze ha chisuho chino, ayo kalinga maola aali mba ahete ku Zuwo lia Wanangana. Ayo kanakaheta hanapihia ni kuhonga, alioze o eswe yaheta kanawa.

Mbetele ya ku Malauí ni ya ku Moçambique, kawashi-washi yiyiputuka kulilulieka hanga akwase. Yeta hanga tulayi a mbonge ni makulwana, ahengwole yize mandumbu waze atokesa yuma anafupiwa ni kwakwasa nawa ku ufulielo ni ku manyonga. Kunakapwa kululieka yizavu yinji ya akwa-kukwasa hanga alinge mulimo wacho. Mumu lia ukwaso wa yizavu yacho, mandumbu yatambula kulia ha shimbu jacho ni yuma yikwo yize te anafupiwa. Kwapwa kuzachisa mbongo kuhiana tununu 33 a ndolare hanga ahane ukwaso. Mu ukwaso wacho kahana nawa mbongo kuhiana tununu 33 a ndolare apwa kuzachisa ha alulieke yuma ni kutungulula mazuwo.

Mitango yazachisa kanawa mbongo, chino chapema chinji mu lia kukaliwa cha yuma. Chakutalilaho, ha tukweji shimbiali atangu ya ukwaso, ndando ya kilu ya unga wa chivwale yiukala chinji—kulia chize te chapwa chashi mu Malauí—ndando yiyinyina ndo 70%. Ndando ya potololi neye yiyinyina. Mba afunge mbongo, mandumbu te kakulanda kulia chinji ni yikwata yinji ya kutunga nayo mazuwo. Ha kuchilinga, yatepululako ndando ni kwehuka kututa yuma mu majila waze mafweta ndando yinji.

Ukwaso wa hashi eswe uze ahana ku Moçambique, wakwata ku mbunge ja atu ja Yehova. Ndumbu Felisberto, yamba ngwenyi: “Kanda ngumona kama umwe ululikiso uze ukwete zango ngwe uno: wakutwaha kulia, yikwata ya kutunga nayo mazuwo, mbongo ja kufweta kuli waze matunga ni usongwelo wa zango. Ukwaso uno, uli chilweza cha zango lize Yesu atongwele ha Yoano 13:34, 35.” Ester umwe tuliwa mu Malauí yoze zuwo lienyi liapuzukile, yamba ngwenyi: “Yami te ngunalipikala chinji mumu te chishi nawa ni mbongo ja kutunga najo zuwo likwo. Kashika muze mandumbu ejile ni kungutungila zuwo, yingulivwa ngwe mu Paraisu nguli.”

Amu tunakundama ku chifuchi chaha, luyinda wa chisemewa manunga ni kwoka chinji. (Mateu 24:7, 8) Hachino, mumu lia milambu ya zango, tuli ni shindakenyo ngwetu atu ja Yehova matambula ukwaso uze mafupiwa. Kuli majila anji waze mutuhasa kuhanyinamo milambu, jila yimwe yili ha site donate.jw.org. Tunanusakwilila chinji ha zango lienu.