Kukunguluka cha Mambonge Chize “Twakupanjika ni Kutala”

Ha miaka kuhiana 130, Yela ja Yehova kakulinga kukunguluka cha mambonge miaka yeswe. Musono tutalilo wano kakupwa ni pande 40, kuchingako miaso, yihujola ni yinema. Mba katalilo ayukise atu waze aliho, katamba “kwivwa ni kutala” kanawa. (Luka 2:20) Kuchi milambu yize wakuhana yakukwasa hanga kukunguluka chino, chiyukise atu eswe, chipwe ngwe katwama kweswako?

Yikwata ya Miaso ni Yinema Yize Yalita ni Kuze Kukunguluka Muchilingiwila

Musono, mu yifuchi ya ku ocidente, yihela yinji ya kwashila konda yikwete yikwata ya miaso ni yinema. Mba mumu liaka kanji-kanji muze twakufwetela chimwe chihela hanga tulingilemo kukunguluka cha mambonge, yetu twakusa yikwata yetu ya miaso ni yinema? David, yoze wakukalakala ku Chipatulo cha Broadcasting, ku Chishina Chinene, yalumbununa ngwenyi: “Yihela yimwe yize twakufwetela hanga tulingilemo kukunguluka, kayitungile hanga yikwase atu kupanjika umwe katalilo yoze atu mahanjika wika kuhiana ha maola asambano. Ngwe chilweza, yihela ya kwashila konda kaselemo yikwata ya miaso yize kanji-kanji akutwila mitambi ni kwimbisa miaso yihi. Chikwo nawa, ha matela jo kakusolaho wika chize konda yinende, mitambi ni kufunyina tuyihanda tumwe twa yinema ya konda. Kulisa ni ayo, yetu twakuzanga hanga atu waze ali ha mbunga atale yinema ha mashimbu anji, evwe ni kupanjika kanawa yeswe yize mahanjikaho.”

Chihela chimwe cha kukunguluka cha mambonge chalisa ni chikwo, kashika yikwata ya miaso ni yinema, yatamba kulita ni chiheta. Muze akusakula yihela ya kukungulukila, Chipatulo cha Broadcasting ku Mbetele yetu, chakusakula kuze mbunga muyikatwamina kulita ni utohwe wa chihela ni unji wa atu waze maakapwaho. Chocho, mandumbu kakutesa kuze yisaji ni matela a yinema muyipwila, chize mapalikisa ngoji, mba hanyima, masoneka unji wa yikwata yize mafupa hanga eswe akahase kutala ni kwivwa katalilo.

Yikwata ya miaso ni yinema yakupwa yikalu chinji kukalakalisa, chipi-chipi ha kukunguluka chamambonge chize chakulingiwa mu malimi anji ha chisuho chimuwika. Muze kukunguluka akuchilumbununa mu malimi akwo, akwa kulumbununa kakutambula kalilo wa miaso ni yinema hanga ayipalikise ku chisaji cha fuji hanga atu waze akuhanjika limi liacho achivwe. Maprograma waze akukalakala no, kakukwasa kusolola chinema chimuwika mu malimi nake ha shimbu limuwika. David yanunga ni kwamba ngwenyi: “Yisaji yino yapwa yikalu kukalakala nayo, kashika mandumbu waze akukalakala nayo katamba kwafumba kanawa”

Ku Mambetele eswe, kuli yihela yize akutulikila yikwata yaha ya miaso ni yinema, yize akukalakalisa mwaka ha mwaka. Ku yihela yacho, mandumbu kakululieka yikwata yacho hanga ayitume ku yihela kuze mukulingiwa kukunguluka chikwo. Mbetele ya Estados Unidos wika, yakutuhwisa 200.000a twa ndolare, chino chakukwasa hanga ahone kulanda yikwata yikwo. Steven, yoze unakasongwela chizavu cha mandumbu atala ha miaso ni yinema ha chimwe kukunguluka cha mambonge ku Canada, yamba ngwenyi: “Chizavu chetu cha miaso ni yinema chasele tachi hanga tufunge kanawa ngoji ni parafuso, hanga nichimwe chikwata chihone kutoka. Twayifungile kanawa ni kuyilulieka hanga tuyitume ku chihela kuze malingila kukunguluka chize te muchihataho.”

Kulanda ni Kululieka Yikwata

Kulanda yikwata ya miaso ni yinema chakufika mbongo jinji, chikwo nawa, yikwata yacho kanji-kanji hi yipema ko. Mumu lia chino, twakuzanga kulanda yikwata yize tunafupu. Ha mashimbu wano, tuli ni Tela LED ya mbandu 5 ja utohwe ni 3 ja usuhwe, jize twakukalakalisa mu yihela yakutunga kanawa, yize yinafwika mbongo 24,000, ndolare, ni jimwe ngoji ja metro 15 ja microfone jize jakufwika 20 ndolare. Kashika, Chipautulo cha Broadcasting chakukalakala ni Chipatulo cha Akwa-Kulanda Yuma, hanga “alule ndando” shimbu kanda achilanda chuma nichimwe. (Luka 14:28) Ngwe chilweza, ayo kakumana anyonge ha yikuma ngwe yino: Yikwata yacho muyiyukisa atu angahi? Shina kulanda yikwata yaha yili jila yipema yakuhwishila kapinda yono? Tuli ni chihela cha kuyifungila? Tuli ni yikwata ha kululika nayo, ni akwa-kulihana waze twafumba hanga ayilulieke?

Mba tufunge yikwata ya miaso ni yinema ha mashimbu anji ni kuzachisa kanawa milambu yetu, twakululieka kanawa yikwata. Chikwo nawa, mba yihone kupiha twakuyimbachila mu makasha apema, waze twakululieka kanawa.

Uchela Upema ni Katalilo Mwashi Kukaula

Atu waze hi Yela ja Yehova ko, kakomokanga chinji ha kumona yikwata yipema ya miaso ni yinema ha kukunguluka chetu cha mambonge. Ngwe chilweza, ha chimwe kukunguluka, umwe mukweze yoze wakukalakala ku chisaji ni TV ya mu chifuchi, kanakatuchichimieka ha kupwa ni yikwata yipema. Jonathan, yoze unakakwasa ku mulimo wa kululieka miaso ni yinema yamba ngwenyi: “Iye kakomokene ha kunyingika ngwo eswe waze apwile ni kukalakala ni yikwata yacho kapwile akwa-kulihana, kakapwile ni yinyingi yinji. Ku mulimo wenyi te mahasa kulinga matangwa atano mba ahwise mulimo uze yetu twalinga ha tangwa limuwika ni chipinji.” Ha kukunguluka chikwo cha mambonge, mutu yoze wakufunga chihela chize tunakafwetela yamba ngwenyi: “Ku chihela chino, twakutambula atu anji waze akwete yinyingi yinji ya miaso ni yinema, alioze kanda nguchimona kama atu waze ali ni yinyingi yinji nawa ajama ngwe yenu!”

Kuchi yikwata ya miaso ni yinema yinakakuyukisa ha kukunguluka chenu cha mambonge? Kota unalivu ngwe David, yoze watwama ku Inglatera. Iye yamba ngwenyi: “Nguli ni miaka 88, nawa natala kukunguluka cha mambonge ku mwono wami weswe. Alioze chakupwa chikalu kulihukila ha malongeso. Haliapwila mumu lia kupwa ni yinema, kukunguluka cha mambonge chakuhwa kawashi, chikwo nawa malongeso kakupwa zwalala, ashi kukwata muze kukunguluka chinaligiwa.” Micheal, yoze watwama ku Nigeria, kanambe ngwenyi: “Amu twakupwa ni yinema, chakupwa chashi mandumbu kupanjika ndumbu yoze unalingi pande, kutala yinema ni kulihulikila ha malongeso.”

Muze mutala kukunguluka chamambonge hanji chalipwila cha mwaka uno chili ni mutwe wakwamba ngwo “Ambujolenu Sango Jipema”! Nyonga ha milimo yize yapwa kulinga hanga tupwe ni katalilo yono. Milambu yenu ni yikwo yize ahanyinanga kupalikila ha site donate.jw.org, ye yakwasa hanga chino chipwe chashi. Tunanusakwila chinji.